¿Chuchi am tati doy küme yewün?

“Kom tati kümelu ka norngechi dungu küpakey ta Ngünechen mew, fey kisu dewmafi tati pu wangülen kallfü wenu mew” (Santiaw 1:17). Tüfa pengeli Chaw Jewba ñi eluwkülen tañi wülal. Kidu elufi ta che fentren yewün, welu kiñe doy fali. ¿Chuchi am? Juan 3:16 mu müley Jesus tañi feypiel: “Ngünechen am rume piwkeyefilu ta kom mapu mew mülechi pu che, feymew wüli ñi kiñen Fotüm femngechi kom tati feyentulu kisu mew chumkawnorume ñi lanoael, welu may ñi nieael ta rumel mongen”.

Chaw Ngünechen wüli tañi kiñen Fotüm, fey tüfa ti doy küme yewün ñi elungeafel pu che. Jesus ñi lan mu montuafuiñ ti kulpan, füchan ka lan dungu mu, kidutu taiñ duam mu turpu diturpulayafuiñ tüfa (Salmo 51:5; Juan 8:34). Welu Chaw Dios müna piwkeyenieeiñmu, feymu adkünuy kom ñi duamniengeel taiñ montulaetew. Fey wülkünuy tañi kiñen Fotüm Jesukristo tañi montulcheal, femngechi Jewba elufi pu feyentulechi che tañi nieal afnoachi mongen. Welu Jesus ñi wülkünuel tañi mongen, ¿chumngechi kulli taiñ montulaetew ti kulpan ka lan dungu mu? ¿Chumngelu am (chemu) duamfalngey? Ka ¿chumngechi kümelkayafeiñmu?

Jesus ñi wülkünuel tañi mongen trürngey ta tunte ñi kullingeken ñi nietuafiel kiñe chemkün kam ñi neykümafiel kiñe püresu. Biblia feypi Chaw Ngünechen dewmafi Adan ka Eva ñi kulpanchengenoal, femngechi tañi rumel mongeleal kom tañi pu yall engün kiñe küme mülewe Mapu mu (Génesis 1:26-28). Welu doyümingu ñi allkütunoafiel ta Chaw Dios, femngechi kulpanchengetuyngu, ¡müna weda! ¿Chum tripay tüfa? Biblia feypi: ‘Femngechi llemay, kiñe wentru mew müten müley ta kulpan mapu mew ka femngechi müley ta lan dungu. Fey tati lan dungu müley itrokom che mew, itrokom che kulpafengelu am’ (Romanu 5:12). Feymu Adan elulafi tañi pu yall ñi rumel mongeleal, welu may elufi ti kulpan ka lan dungu.

Tunte ñi kullingeel taiñ montulaetew ti kulpan ka lan dungu mu trürngeafuy tunte ñi ñamümngeel. Adan kidu tañi duam mu allkütulafi ta Chaw Ngünechen, femngechi kulpay ka ñamümi ñi kulpan-ngenochi mongen. Biblia ñi feypin mu, Adan kondenafi reke tañi pu yall ñi kulpayal ka layal. Taiñ montulngeal, duamfalngefuy ñi wülkünungeal kangelu che ñi kulpan-ngenochi mongen: Jesus ürke (Romanu 5:19; Efesio 1:7). Taiñ Fütra Chaw piwkeyen mu wülkünuy ta Jesus, welu femnofule, turpu nielayafuiñ afnoachi mongen kiñe küme mülewe mu, fey tüfa ñi ñamümel Adan engu Eva (Apokalipsi 21:3-5).

Feymu llemay Chaw Dios ñi wülkünuel taiñ montulaetew, fey tati “doy küme yewün”, nierpualu iñchiñ afnoachi mongen. Taiñ kimal chumngelu doy fali kakelu yewün mu, ngüneduamaiñ chumngechi inaniey ti ngülam ñi wülal kümeke yewün taiñ inaduampeel rupachi trokiñ mu.

Wülkey taiñ ayünieel. Iñchiñ pu chengen ayükeiñ taiñ rumel mongeleal (Eclesiastés 3:11). Kidutu taiñ duam mu turpu diturpulayafuiñ tüfa, welu Jesus tañi lan mu nierpuafuiñ llemay. Biblia ta feypiley: ‘Tati kulpan ñi wülkeel re lan dungu müten, welu Ngünechen wülkey tati rumel mongen, Cristo Jesus mew, iñchiñ taiñ Ñidol’ (Romanu 6:23).

Wülkey taiñ duamnieel. Iney no rume pepi wülkelay ñi mongen tañi montulcheal. Biblia kimfalkünuy taiñ pepi kullikenon taiñ montulngeal, rume falilu kay tüfa (Salmo 49:8). Müna duamniefuiñ Chaw Dios ñi kellu taiñ montulaetew ti kulpan ka lan dungu mu. Feymu Chaw Ngünechen wüli chem ñi duamniengeel, fey ‘adkünuy iñchiñ taiñ niewetunoael ta kulpan reke Jesucristo ñi kutrankawün mew’ (Romanu 3:23, 24).

Puwchi antü mu. Biblia feypi: ‘Petu kulpafengelu ta iñchiñ, Cristo lay iñchiñ taiñ duam’ (Romanu 5:8). Feymu Chaw Ngünechen wülkünuy ta Jesus ‘petu kulpafengelu ta iñchiñ’, tüfa pengeli fente taiñ piwkeyenieetew kulpanchengeliyiñ rume. Ka femngechi tüfa elukeeiñmu maneluwün küpalechi antü mu, kutrankawliyiñ rume ti kulpan mu.

Femi küme duam mu. Chaw Dios, ¿chem duam mu wüli tañi Fotüm taiñ montulaetew? Biblia feypi: ‘Ngünechen pengeleleiñmew taiñ piwkeyeetew feychi werkülu tañi kiñen Fotüm ta tüfachi mapu mew femngechi taiñ nieael rumel mongen ta kisu ñi Fotüm mew. Fey tüfa famngechi pengeleleiñmew taiñ piwkeyenieetew: Ngünechen werküy tañi Fotüm iñchiñ taiñ piwkeyefiel mew no, welu may kisu taiñ piwkeyeetew mew ta iñchiñ, femngechi ta chalintukuwi tañi langümngeael, taiñ wiñoduamangetuael kisuke iñchiñ taiñ kulpan mew’ (1 Juan 4:9, 10).  

Tami pengelal tami falintufiel tüfachi doy küme yewün, ¿chumafuymi? Rakiduamtukunge Jesus ñi feypin Juan 3:16 mu, “kom tati feyentulu kisu mew” ñi montulngeal. Biblia ka feypi pu feyentulelu rüf dungu mew maneluwkey “ñi llowael tüfey tañi üngümnieel” (Ebrew 11:1). Taiñ ka femngechi maneluwal, duamfali taiñ rüf kimürpual Chaw Dios ñi dungu. Feymu llemay, elantükünunge tami kimafiel taiñ Fütra Chaw, kidu Wülkelu kay ti “doy küme yewün”, ka kimürpual chem tami femafel ñi nieal afnoachi mongen Jesus tañi lan mu.

Ngüneduamülmi Biblia ñi dungu mülelu www.jw.org mu, nierpuafuymi feychi kimün. Pu Dungukelu Iney Ngen Jewba ayüwünkechi kelluafeymu. Doy kimürpufilmi tüfachi doy küme yewün ka chumngechi tami kümelkakeetew, kom piwke mu feypiaymi llemay: “Ngünechen müten, fey kisu ta mañumtukefiñ, tañi montulaetew ta Ñidol Jesucristo mew” (Romanu 7:25).