Jesús, ¿chumngechi huli ñi mongen “ñi lifrenentuafiel ta com che”?
Biblia ñi quimeltuqueel
Jesús tañi lan mu, Jehová montulfi itrocom che ti culpan ca lan mu. Biblia feipi ta Jesús tañi lan mu culli reque taiñ montulaeteu (Efesios 1:7; 1 Pedro 1:18, 19). Feimu Jesús feipi ñi cüpan “ñi hultucuael tañi mongen femngechi ñi lifrenentuafiel ta com che” (Mateo 20:28).
¿Chumngelu duamniengefui “ñi lifrenentuafiel ta com che”?
Ti hunen huentru Adán, hue deumangelu culpaquelafui. Doi mai Adán rumel mongen nieafui, huelu allcütunofilu am ta Ngünechen ñi feipin, fei ñamümi tüfa (Génesis 3:17-19). Fei rulpalelfi ñi culpan tañi pu yall (Romanos 5:12). Feimu lle tati Biblia feipi Adán fendehui ca iñchiñ fendecünueiñmu, feimu “püresucona reque” feletuiñ tati culpan ca lan meu (Romanos 7:14). Culpanchengelu am iñchiñ, huiño nietulayafuiñ Adán tañi ñamümel (Salmo 49:7, 8).
Adán ñi pu cüpanche nielafuingün maneluhun, feimu Chau Dios cutrantupiuqueyeyu engün (Juan 3:16). Huelu Ngünechen norngei, feimu pecan ngoimafemtulai pu che ñi culpan (Salmo 89:14; Romanos 3:23-26). Quisu piuqueyefilu am com pu che, adcünui chem ñi duamnieel tañi huiñoduamtuafiel ca apümcayafiel ti culpan dungu (Romanos 5:6-8). Feimu llemai, Chau Ngünechen adcünui tati montulchen.
¿Chem am tati montulchen?
Biblia mu ti dungun “montulchen” pengelquei cüla dungu:
Cullingequei ñi falin (Números 3:46, 47).
Quelluquei ñi neicümafiel cam montulafiel (Éxodo 21:30).
Ñi falin trürngei tunte cullingequei.a
Ngüneduamaiñ chumngechi nüucülei feichi cüla dungu ca Jesús tañi lan mu.
Cullingequei ñi falin. Biblia feipi pu cristiano ‘ngillangeingün’ reque (1 Corintios 6:20; 7:23). Jesús tañi lan mu culli, fei ngillafi reque “itrocom caquerume troquiñche, dungun, huaria ca troquiñche mülelu ta mapu meu” (Apocalipsis 5:8, 9).
Ñi montulafiel. Jesús lai ‘taiñ montulngeael ta culpan meu’ (1 Corintios 1:30; Colosenses 1:14; Hebreos 9:15).
Ñi falin trürngei. Jesús culpalai Adán reque ellaca mu, feimu feichi mongen ñi hultucuel trüri tati mongen ñi ñamümel ta Adán (1 Corintios 15:21, 22, 45, 46). Biblia feipi: ‘Quiñe huentru Adán tañi feyentunon meu, fentren che culpafengetui, huelu ca femngechi, quiñe huentru Jesucristo tañi feyentun meu, fentren che ta lifrengetui ta culpan meu’ (Romanos 5:19). Tüfa cüme quimfalcünui chumngechi quiñe huentru ñi lan müten montulquefi ta fentren che culpafengelu. Feimu Jesús tañi lan mu ‘montulquefi ta itrocom che’ nehuentuquelu ñi füreneaeteu (1 Timoteo 2:5, 6).
a Cuifique quehun Biblia mu rulpadungungelu, ti dungun “montulchen” cüpa feipi quiñe cullitun cam tunte ñi falin quiñe dungu hulngelu ta cangelu meu. Quiñe pengelün dungu, ti griego dungun cafár feipi “cüme elcünutual”. Feichi dungun feipingequei ñi cüme elcünutual taiñ culpan (Salmo 65:3). Ti feipin kófer pengeli chem cullingequei ñi montulafiel quiñe dungu (Éxodo 21:30). Ca femngechi ti griego dungun lýtron rulpadungungelu “montulchen” ca rulpadungungeafui “cullitun ñi montulngeal” (Mateo 20:28). Pu huirintuculu griego feipiquefuingün feichi dungun ñi pengelal quiñe püresulelu cam quiñe cona ñi montulngeal.