1 Chumngechi famentual wedake dungu

RUME PUTUAL

Delia nütramkangelu nga, ngünew-welay ñi putual tañi fill rakiduamkülen mu. Biblia feypikelay taiñ putunoal, welu may feypi: “Reyükonkilnge tati pu rume putukelu pulku” (Proverbios 23:20). Pu che rume putukelu kontukeeyew wedake kutran, kümelkawkülekelay tañi pu che engün, ka fentren che füchanolu rume lakey fill tripantu. Pu che inaniefule Biblia ñi küme ngülam famentuafuy kom feychi wedake dungu.

Delia femngechi femi. Kidu feypi: “Kimtukun tañi küme duamelkenoetew tañi putual. Fey inaniefiñ Filipense 4:6, 7 feypilu: ‘Chem mew no rume ta welulekilpe tamün rakiduam itrofill mew kom eymün tamün nieelchi dungu, nütramelkeafimün ta Ngünechen’. Fill pun weda duamkülelu ka fill rakiduamkülelu iñche, ngillatukefiñ ta Jewba.a Nütramkalelkefiñ tañi chum duamkülen, tañi illkun, weñangkün ka ti weda duamün, ka feypikefiñ ñi kelluaetew ñi doy küme rakiduam nietual. Puliwen mu yafüluwken ñi niewetunoal wedake rakiduam. Tüfa kellukeenew ñi longkontukual tañi nieelchi dungu müten. Feymu eluwün tañi putuwenoal. Rume falintukefilu am tañi küme duamkületun, ayülen tañi rumel femngechi feleal”.

PEKAN KUDUMUWÜN DUNGU

Tüfa rume wedalkakefi ka weñangkülkefi ta che. Welu Biblia ngülamtukeeiñmu ñi famentual chem taiñ yeafetew ñi konal pekan kudumuwün mu, kiñeke tüfa: ti dakelkantuluwün ka pengelkeelchi kudumuwün dungu. Kiñe weche wentru Samuel pingelu feypi: “Küdawtukelafun ñi dakelkantual. Kiñeke mu ngüneduamlu tañi ayüetew kiñe domo, dakelkantufiñ ayünofilu rume, tüfa küme duamelkefenew”. Samuel weda dunguyengey, fey kimtukuy ñi re dakelkantuyawülken küpa femnofulu rume, fey fentekünulay. Welu afeluwtripay, kidu feypi: “Kuñiwün-ngey tüfa, fey kidutu duamuwürpun”.

Samuel papeltuy kiñe kimeltun pu wechekeche ngealu mülelu jw.org mu. Fey rakiduamtukuy Proverbios 20:11 feypilelu: “Tati weche kimngerpukey kidu ñi femkeelchi dungu mew, lifkülele kam norngele tañi chumngen”. ¿Chumngechi kellueyew tüfa? Samuel kimtukuy ñi lifngenon ka norngenon dakelkantual. Kidu feypi: “Kiñe weche dakelkantuyawle, kiñe weda füta ngeay. Ka rakiduamün kurengeli chum duamküleafuy ñi domo ngüneduamle ñi dakelkantumekefiel kangelu domo. Ka kimtukun ñi wedalkacheken, chem dungu no trokingeafuy chi, welu kümelay”. Samuel küme elkünutuy ñi femün fey dakelkantuwelay, tüfa kellueyew ñi kon-noal pekan kudumuwün mu.

Antonio epe konkülekefuy pekan kudumuwün mu: kidu pekefuy pengelkeelchi kudumuwün dungu. Kidu kurengey ka müna piwkeyeniey tañi domo, welu fentekünukelafuy tüfachi wimtun. Rüf kellueyew 1 Pedro 5:8 feypilelu: “Küme upewtulemün ka trepeluwkülemün, tamün kayñe weküfü am tati ñawawkiyawchi trapial reke femyawlu, kintuyawülfi iney tañi lümüafiel reke”. Antonio feypi: “Wall püle müley tüfachi adentun pengelkelu kudumuwün dungu, fey entungelayafuy longko mu. Tüfachi versikulo rüf kelluenew ñi rakiduamal chew ñi küpan feychi wedake dungu. Duamniefun pürüm müten longkontukual Weküfü mu ñi küpan feychi podngechi adentun. Fewla ta kimtukun Jewba müten kelluafenew ñi ‘küme upewtuleal ka trepeluwküleal’, femngechi famentuafun feychi weda dungu tañi longko mu, tañi piwke ka tañi kurewen mu”. Antonio müna küme kellungey, fey elkünuy tañi weda wimtun. Ka femngechi tüfa kellueyew ñi kon-noal doy wedake dungu mew.

Rüfkünu llemay, Biblia küme ngülamtukeeiñmu taiñ famentual fütrake weda dungu. Welu dew konliyiñ kay wedake dungu mu, ¿chumafuiñ? Ngüneduamaiñ chumngechi kelluafeiñmu Biblia ñi küme elkünutual tüfa.