Chau Dios, ¿chemu allcütulayafui ñi llellipuel quiñe che?

Rüf piuque meu llellipufiliyiñ taiñ Huenu Chau, quisu allcütuaiñmu. Huelu Chau Dios com che huiñoldunguquelafi tañi llellipuqueel. ¿Chumngelu am? Ngüneduamaiñ quiñeque ngülam mülelu Biblia mu.

Quiñe troquiñche iglesia meu papeltumequei ñi ngillatumequeel engün.

“Llellipulmün, huiño feipifeipihuelayaimün fentren rupa tamün deu feipielchi dungun” (Mateo 6:7).

Cuñiutucuunoliyiñ, fill antü femngechi dungu müten ngillatuafuiñ ta Chau Dios, cam re papeltuafuiñ müten taiñ ngillatuquefiel. Chau Dios ayüquelai taiñ femngechi femal, doi mai ayüquei taiñ com piuque mu nütramcalelafiel. Raquiduamnge tüfa: quiñe tami hueni fill antü femngechi dungu müten nütramcaelmu, ¿ayüafuimi tañi femngechi femün tami hueni? ¡Femlayafuimi! Pu cümeque hueni femngechi femquelaingün. ¿Chem quimeltueiñmu tüfa? Hueniyefiliyiñ ta Jehová piliyiñ, com piuque mu ngillatuafiyiñ.

Quiñe huentru huitrapürami ta Chau Dios petu ñi cafüdcünungefiel quiñe boleto de loteria.

‘Eimün huesa piuque mu eluen piqueimün, feimu elungequelaimün’ (Santiago 4:3).

Ngillatufiliyiñ ta Chau Dios taiñ quelluaeteu femal quisu ñi ayüquenoel, ¿allcütupeafeiñmu? ¡Femlayafui! Raquiduamnge tüfa: quiñe che femngechi ngillatufile ta Chau Dios: “¡Quelluen! ¡Eluen suerte tañi huehual fentren plata!”, ¿allcütupeafui mai Chau Dios? Femlayafui. Chau Dios ayüquelai taiñ diñmatual ta plata cam feyentual tati suerte cam caquelu femngechi dungu meu (Isaías 65:11; Lucas 12:15). Feimu llemai, chem taiñ ngillatuqueel nüucülepe Jehová tañi ayüqueel meu. ¿Chumngechi quimafuiñ ñi ayüqueel ta Chau Dios? Biblia meu quimürpuafuiñ.

Quiñe religioso ngillatumequei pu soltau ñi cüme tripayal hueichan mu.

“Quimnieiñ ta Chau Dios ñi allcütuquenofiel tati pu culpafe” (Juan 9:31).

Biblia feipi, cuifi meu feiti pu che inaquenolu Chau Jehová tañi feipin, quisu allcütuquelaeyu (Isaías 1:15, 16). Fantepu meu, Chau Jehová caletuquelai tañi raquiduam (Malaquías 3:6). Felei llemai, inaliyiñ Chau Jehová tañi feipin, quisu allcütuaiñmu taiñ llellipun. Huelu iñchiñ feipiafuiñ: “Fentren huesaque dungu femquefun cuifi, fei Ngünechen turpu allcütulayaeneu”. ¿Rüfngepei mai tüfa? Femlai tati. Rüf repentiutuliyiñ ca eluucüleliyiñ taiñ ayühulafiel Chau Dios, fei perdonayaiñmu ca allcütuaiñmu (Hechos 3:19).