Tami allcütuaeteu Chau Dios, ¿chumngechi llellipuafuimi?
Jehová fei tati “Allcütuquelu tati llellipun” (Salmo 65:2). Feimu chumül rume ca cheu rume llellipuafuiñ ta Ngünechen. Fei nehuentu dungun meu ca ñücüfcülen mu llellipuafuiñ. Jehová ayüquei taiñ chau piafiel. Jehová fei tati doi cüme Chau taiñ nieafel (Mateo 6:9). Quisu piuqueyeiñmu, feimu quimeltuqueiñmu chumngechi taiñ ngillatuafiel.
JESUS ÑI ÜI MEU LLELLIPUAIMI
“Chem rume llellipufilmün tañi Chau iñche tañi üi meu, elungeaimün” (Juan 16:23).
Tüfa Jesús ñi feipin tati. Fei quimeltueiñmu quiñe falin dungu. ¿Chem dungu am? Jehová ayüquei taiñ ngillatuafiel ta quisu, Jesús tañi üi meu müten. Jehová ayüquelai taiñ ngillatuafiel quiñe rehue meu, quiñe santo cam adentun meu no rume. Ca femngechi quiñe la cam quiñe püllü ñi üi meu no rume. Llellipufiel mu ta Chau Dios Jesús ñi üi meu, pengelqueiñ taiñ falintuquefiel quisu tañi femün iñchiñ meu. Feimu Jesús feipi: “Iñche meu müten pu che puhuafui tati Fütra Chau mu” (Juan 14:6).
COM PIUQUE MEU LLELLIPUNGE
“Chau Dios ñi adquiñ meu nülanentumün reque tamün piuque” (Salmo 62:8).
Chumngechi quiñe pichiche nütramcaquefi tañi chau, ca femngechi iñchiñ nütramcayafiyiñ ta Jehová. Feimu papeltulayaiñ chem taiñ ngillatual ca huiño feipimequelayaiñ taiñ ngillatuel. Doi mai piuque meu tripape taiñ ngillatun.
LLELLIPUFINGE TA CHAU DIOS CHUMNGECHI ÑI AYÜQUEEL
“Chem rume nüucülelu Chau Dios tañi ayünieel mu llellipuafuiñ, fei allcütuqueiñmeu” (1 Juan 5:14).
Biblia meu, Chau Jehová feipieiñmu chem mülei taiñ femal iñchiñ femngechi taiñ ayühulafiel. Feimu taiñ allcütungeal, mülei taiñ llellipuafiel ta Chau Dios chumngechi ñi ayüqueel quisu. ¿Chumngechi quimafuiñ? Mülei taiñ chillcatual ta Biblia. Femliyiñ com tüfa, taiñ llellipun meu ayühulafiyiñ ta Chau Dios.
CHEM PIAFUIÑ NGILLATUN MEU
Ngillatuafiyiñ chem no rume taiñ faltalenoal. Llellipuafuiñ ta Chau Dios taiñ eluaeteu iyael, tacun cam cheu mongeleam. Cafei llellipuafuiñ taiñ eluaeteu quimün, femngechi taiñ cüme dullial chem chumal. Cafei taiñ eluaeteu nehuen, femngechi taiñ chaftuafiel fillque huesaque dungu mu taiñ rupamequen. ¿Ca chem dungu mu llellipuafuiñ? Taiñ doi feyentual, taiñ perdonayaeteu ca taiñ quelluaeteu (Lucas 11:3, 4, 13; Santiago 1:5, 17).
Ngillatuñmanieafiyiñ caquelu che. Biblia feipi: ‘hueluconque ngillatuñmahuaimün’ (Santiago 5:16). Pu chau rume ayüquei ñi piuqueyeuquen tañi pu pichiqueche. Iñchiñ, Chau Jehová tañi yall, fei hueluconque piuqueyenieuliyiñ ca duamtunieuliyiñ, Chau Jehová rume ayühuai. Eimi llellipuafuimi ta Chau Dios ñi quelluafiel tami füta, tami domo, tami familia, tami pu yall cam tami pu hueni.
Cracia mai piafiyiñ. Chau Jehová eli com tati mülelu. Ngüneduamnge ñi feipin Biblia quisu meu: ‘Cümeque dungu femi. Elufi mahun, cümeque cosecha, alün iyael, fei ñi rume ayühual tañi piuque’ (Hechos 14:17). Raquiduamliyiñ com ti cümeque dungu taiñ elueteu Jehová, doi eluucüleaiñ taiñ mañumafiel ngillatun meu. ¿Ca chem chumafuiñ taiñ mañumafiel ta Chau Dios? Inanieafiyiñ quisu tañi huercün dungu (Colosenses 3:15).
FENTECÜNUQUILNGE TAMI LLELLIPUAL
Quiñeque mu huesa duamnagafuiñ taiñ pürüm huiñoldungunoeteu Jehová. Fei raquiduamafuiñ: “Chau Dios duamtuquelaeneu”. Huelu ¿rüfngepei mai tüfa? Femlai tati. Quiñeque che ñi rupan pengeli chumngelu fente falin-ngei fentecünunoal taiñ ngillatuquen. Inaduamaiñ quiñeque.
Ti hunen troquiñ tüfachi revista mu, inaduamiyiñ Esteban tañi rupan, ¿acordaimi cai? Quisu feipi: “Af duamcülefun, huelu fente tañi ngillatun meu ayüucületun” pi. ¿Chem quellueyu? Eluhui tañi papeltuafiel Biblia, fei quimürpui fente falin-ngei llellipual ca fentecünulai ñi femal. Esteban feipi: “Iñche tañi pu hueni müna piuqueyeneu ca dapiqueneu, feimu mañumtuquefiñ ta Chau Dios. Fente tañi tremün, turpu pequelafun femngechi ayühun”.
¿Acordaimi ñi rupan Jenny? Quisu huesaque dungu femquefui cuifi. Fei raquiduami turpu allcütunoaeteu ta Chau Dios. Fente tañi huesa duamcülen meu, chengehuelafui. Quimlafui chumngelu ñi fente huesa duamcülequefel, feimu ngillatufi ta Chau Ngünechen. Fei ¿chumngechi quellueyu Chau Dios? Jenny feipi: “Ngillatufiñ ta Chau Dios, fei doi culpantucuhuelan. Fei tunte culpantucuufuli iñche, Chau Jehová femngechi raquiduamquelai. Fei tüfa cüme duamelqueneu ca quelluqueneu ñi ayüucüleal tañi mongen mu”. ¿Ca chumngechi quellueyu llellipual? Quisu feipi: “Feula quiñe cüme chau reque niefiñ ta Jehová, ca fente cüme hueniyefiñ. Quimnien Jehová fente piuqueyequeneu. Feimu adniequeneu ca quelluqueneu femal tañi pin”.
Isabel pefiel ñi ayüucülen tañi püñeñ, quisu feipi: “Jehová allcütueneu ca cümelcaeneu iñche tañi püñeñ mu”.
Ngüneduamnge ñi rupan quiñe domo, Isabel pingelu. Niepüñeñcülelu Isabel, ti doctor feipieyu ñi püñeñ ñi lañmaleal ñi cuerpo. Fei af duamcülehuei. Ngülamtungei ñi ancanentupüñeñal cütu. Quisu feipi: “Latripayalu reque fente tañi cutrancahun” pi. ¿Chumi quisu? Feipi: “Fentecünulan ñi ngillatuafiel ta Chau Dios” pi. Rupalu chi antü choyüi tañi püñeñ, Gerard pintuculeleyu. Fei lañmalefui ñi cuerpo. Isabel, ¿raquiduampei mai Chau Dios ñi huiñoldungunoeteu? Femlai. Doi mai quisu feipi: “Lañmalelu rume ñi cuerpo, tañi püñeñ ayüucülequei. Jehová allcütueneu ca cümelcaeneu iñche tañi püñeñ mu”.
Taiñ inaduampeel raquiduameleiñmu chem pin tati Biblia. Fei feipi: “Ahuem Jehová, eimi allcütuñmayafimi pu ñomngelu ñi ngillatun. Yafülpiuqueyeafimi ca ngüneitunieafimi engün” (Salmo 10:17). ¿Cümenoafulu ngillatuafiel ta Chau Ngünechen?
Biblia meu huirintucungei fillque llellipun ñi feipiel Jesús. Quiñe tüfa fei tati padrenuestro pingechi llellipun. ¿Chem quimürpuafuiñ tüfachi llellipun mu?