Llellipulmi, ¿chumngechi quelluafeimu?

Quiñe domo Pamela pingelu, cancer cutran contueyu, fei doctor mu amui. ¿Ca chem chumi tüfachi domo? Ngillatufi ta Chau Dios tañi quelluaeteu. ¿Quellueyu tüfa?

Pamela feipi: “Petu lahuentumequelu iñche, müna llicalequefun. Huelu ngillatufiñ ta Chau Jehová, fei doi cüme duamcületun. Müna huesalcaeneu tüfachi cutran. Huelu ngillatufiel mu ta Chau Dios quellueneu tañi doi yafüluucüleal. Tati pu che ramtuqueneu: ‘¿Chumleimi?’. Fei iñche feipiquefiñ: ‘Cutrancülen, huelu ayüucülen’”.

Rupanoliyiñ rume quiñe fütra huesa dungu, llellipuafiyiñ ta Chau Dios. ¿Chumngelu? Com iñchiñ rupaqueiñ fütraque cam pichique cüdaungechi dungu meu, feimu duamnieiñ taiñ quellungeal. Fei ti llellipun mai, ¿rüf quellupeafeiñmu?

Ngüneduamnge chem pin Biblia: “Tami fanetunieteuchi dungu elcünunge Jehová mu, fei quisu am yafülduamnieaimu. Turpu eluñmalayai ñi tranürpual tati nor chengelu” (Salmo 55:22). Müna yafüluhun-ngei ñi feipin Biblia. Feimu cüme ngillatufilmi ta Chau Dios, quisu quelluaimu chaftuafiel fillque huesaque dungu (pefinge ti troquiñ “Llellipulmi, ¿chem cümeque dungu llohuaimi?”).

Llellipulmi, ¿chem cümeque dungu llohuaimi?

Tüngcüleaimi

Biblia feipi: ‘Ngillatuqueafimün ta Chau Ngünechen. Fei hulai tañi cüme tüngün. Femngechi cuñiutucuaimünmeu tamün piuque ca tamün raquiduam, tamün inaniefiel ta Cristo Jesús. Pu che pepi adümquelafi tüfachi tüngün’ (Filipenses 4:6, 7). Rupaliyiñ huesaque dungu mu, Chau Dios quelluafeiñmu. Nütramcalelfiliyiñ taiñ chum duamcülen, tüngduamelafeiñmu ca quelluafeiñmu taiñ cüme dullial.

Nieaimi Chau Dios ñi quimün

Biblia feipi: “Müte nienolmün quimün, llellipuqueafimün ta Chau Ngünechen, fei llohuaimün quimün. Chau Dios com piuque mu hulquei alün dungu, fei lladcütuquelafi tuchi tañi llellipueteu” (Santiago 1:5). Rupaliyiñ huesaque dungu meu, quimlayafuiñ chem chumal. Huelu llellipufiliyiñ ta Chau Dios, quisu quelluaiñmu taiñ cüme dullial, fei quelluafeiñmu taiñ acordayal fillque ngülam mülelu Biblia mu.

Yafüluucüleaimi

Biblia feipi: “Itrofill dungu mu yafüluucülequen Chau Ngünechen ñi duam mu, fei eluqueneu nehuen” (Filipenses 4:13). Chau Jehová com nehuen-ngei, feimu nehuentucuafeiñmu taiñ chaftuafiel fillque huesaque dungu (Isaías 40:29). Feimu Biblia ca feipi: “Chau Ngünechen itrofill dungu mu yafültucuchequei. Chau Ngünechen yafültucuqueiñmeu chem huesa dungu mu rume rupaliyiñ” (2 Corintios 1:3, 4).