Ti piwkeyewün kelluaeiñmu taiñ newenküleal üdengen mu rume

1. Ñi feypin Matew 24:⁠9, ¿chumngelu afmatulkelaeiñmu taiñ üdengen mu?

CHAW JEWBA dewmaeiñmu taiñ piwkeyecheal ka taiñ piwkeyengeal iñchiñ. Feymu üdengeliyiñ, weda duamküleafuiñ ka llükayafuiñ chi. Kiñe lamngen, Georgina⁠b pingelu, feypi: “14 tripantu nielu iñche, tañi ñuke üdeenew tañi serfifiel mu ta Jewba. Müna weda duamün, kidulelu trokiwün fey rakiduamün ‘¿weda chengepen may?’” pi taiñ lamngen. Kiñe peñi, Danilo pingelu, feypi: “Tañi testigongen mu, pu soltau wülelkaenew, lukatuenew ka aneltuenew. Feymu llükalefun ka yewelkangefun” pi taiñ peñi. Weda duamkeiñ taiñ üdengen mu, welu afmatulkelaeiñmu. ¿Chumngelu? Jesus feypikünuy taiñ üdengeal (papeltunge Matew 24:⁠9).

2, 3. ¿Chumngelu üdengekeiñ?

² Jesus reke, iñchiñ koneltukelaiñ tüfachi Mapu tuwün pu che mew, feymu üdengekeiñ (Juan 15:⁠17-19). Yamniefiyiñ rume pu gobierno, welu koneltukelaiñ politico dungu mu, poyelafiyiñ ti bandera ka ülkantukelaiñ tati himno nacional. Iñchiñ serfiniefiyiñ Chaw Jewba müten. Kimnieiñ Jewba müten ngünenieafilu ta kom pu che feymu kelluntukukeiñ, welu Weküfü ka tañi pu inaniekeetew ayükeyngün ñi katrütuafiel ta Chaw Jewba (Gén. 3:⁠1-5, 15). Enseñachekeiñ Jewba ñi Gobierno müten küme elkünutuafi ti Mapu ka apümkayafi tañi pu kayñetukeetew (Dan. 2:⁠44; Apok. 19:⁠19-21). Tüfa ta kümeke noticia tati ñom chengelu, welu wedake noticia tati norngenolu (Sal. 37:⁠10, 11).

³ Ka üdengekeiñ taiñ inaniefiel mu Jewba tañi ngülam. Chaw Jewba feypi chem ñi kümen ka chem ñi kümenon. Welu pu che ñi rakiduam rume kaley. Famülke mu, fentren che kümelu trokikefi fillke pekan kudumuwün dungu. Welu Chaw Jewba apümkafi tati pu che femkelu feychi podngechi dungu Sodoma ka Gomora waria mu (2 Ped. 2:⁠6; Juda 7). Taiñ inaniefiel mu Jewba tañi ngülam, famentukefiyiñ feychi podngechi wimtun, feymu ayentungekeiñ ka feypingekeiñ taiñ küme rakiduam nienon (1 Ped. 4:⁠3, 4).

4. Üdeeliyiñmu pu che, ¿chem kelluaeiñmu taiñ newenküleal?

⁴ ¿Chem kelluaeiñmu taiñ newenküleal üdengeliyiñ kam lukatungeliyiñ rume? Kom piwke mew maneluwküleaiñ Jewba taiñ kelluaetew. Taiñ maneluwün kiñe escudo reke feley, feymu ‘chongümafiyiñ tati üykülechi flecha küpalu Weküfü mew’ (Efes. 6:⁠16, TNM). Duamnieiñ taiñ piwkeyechefengeal. ¿Chumngelu? Tati piwkeyechekelu “lladküfemkelay”. Kafey “yafüluwkey chem dungu rupale rume”, “ka chem no rume afelkelaeyew” (1 Kor. 13:⁠4-7, 13, TNM). Fewla peaiñ chumngelu fente falin-ngey piwkeyeafiel ta Jewba, taiñ pu peñi, pu lamngen ka taiñ pu kayñe kütu, femngechi taiñ newenküleal üdengeliyiñ rume.

PIWKEYEAFIYIÑ TA CHAW JEWBA

5. ¿Chem chumi Jesus fente tañi piwkeyefiel mu tañi Chaw?

⁵ Feychi pun petu ñi langümngenon ta Jesus, feypifi tañi pu inanieetew: ‘Iñche piwkeyefiñ ta Chaw, ka iñche femken tañi Chaw ñi werküetewchi dungu’ (Juan 14:⁠31). Jesus fente tañi piwkeyefiel mu ta Jewba, küme chaftukefi kom tañi weda rupan. Taiñ piwkeyefiel mu ta Jewba ka femngechi kelluafeiñmu.

6. Üdengen mu iñchiñ, ¿chum duamkülekeiñ?

⁶ Jewba tañi pu che rumel newenküley, inakangelu rume. ¿Chumngelu? Fente tañi piwkeyefiel mu ta Jewba. Wünen siglo mew, ti tribunal supremo feypifi pu apostol ñi amuldunguchewenoal. Fey, ¿chumingün pu apostol? Fente tañi piwkeyefiel mu ta Jewba feypingün: ‘Iñchiñ feley taiñ doy allkütuafiel ta Ngünechen ta che mew’ (Hecho 5:⁠29; 1 Juan 5:⁠3). Ka femngechi famülke mu, fentren taiñ pu peñi, pu lamngen kayñetueyew ka inakaeyew pu gobierno. Welu fey engün newenküleyngün fente tañi piwkeyefiel mu ta Chaw Jewba. Fey llemay, üdengen mu iñchiñ weda duamkülelaiñ, doy may ayüwküleiñ (Hecho 5:⁠41; Rom. 5:⁠3-5).

7. Kayñetueliyiñmu taiñ pu familia, ¿chumaiñ?

⁷ Kidu taiñ pu familia kayñetueliyiñmu, rume küdawtuafuiñ taiñ newenküleal. We eluwlu taiñ kimafiel ta Jewba, taiñ pu che feypiafeiñmu taiñ ngünenkamekengen ka “locoleymi” piafeiñmu (ka ngüneduamafuymi Marku 3:⁠21). Kiñeke engün lukatuafeiñmu ka wülelkayafeiñmu kütu. Welu kom tüfachi dungu afmatulkelaeiñmu. ¿Chumngelu? Jesus feypikünuy taiñ kayñetuaetew taiñ pu che (Mat. 10:⁠36). Chumngechi femeliyiñmu rume taiñ pu che, iñchiñ kayñetulayafiyiñ engün. Doy piwkeyefiliyiñ ta Jewba, doy piwkeyeafiyiñ ta kakelu che (Mat. 22:⁠37-39). Welu turpu famentulayafiyiñ Jewba tañi ngülam, re taiñ ayüwülafiel ta kakelu che.

8, 9. Weda kayñetungelu kiñe lamngen, ¿chem kellueyew ñi newenküleal?

⁸ Taiñ lamngen Georgina taiñ ngüneduampeel, feypi chem wedake dungu rupay: “Tañi ñuke iñchiw, eluwiyu tayu estudiayal pu testigo engün. Kayu küyen rupalu, iñche ayün ñi amual trawün mew, welu ñi ñuke katrütuenew. Kimtukun tañi ñuke ñi papeltuken chem ñi feypin pu apostata, feymu feypienew chem ñi kimeltuel engün. Kafey lukatuenew, longkotukakefenew, ngütrükakefenew ka ütrüfentuñmaenew iñche tañi publicaciones. Fautizawün 15 tripantu nielu iñche. Tañi ñuke küpa katrütukefenew ñi serfiafiel ta Jewba, feymu werküenew ñi amual kiñe internado mu chew ñi mülen kakelu üllchake domo weda portalu. Kiñeke engün drogatukefuyngün ka wedake dungu femkefuyngün. Taiñ pu che müley taiñ piwkeyenieetew ka cuidanieetew, feymu kayñetueliyiñmu, müna küdawngeafuy taiñ newenküleal” pi taiñ lamngen. Weda kayñetueyew rume tañi ñuke, taiñ lamngen Georgina fentekünulay tañi poyefiel ta Jewba.

⁹ ¿Chem kellueyew taiñ lamngen ñi newenküleal? Fey feypi: “Feychi mu tañi ñuke ñi kayñetuetew, iñche dew papeltufiñ kom tati Biblia. Kimtukun tañi kimfiel ti rüf dungu ka doy fülkonkülefun Jewba mu. Afkentu llellipukefiñ Jewba, fey allkütukeenew. Internado mu mülelu iñche, kiñe lamngen mangelenew tañi ruka mu, fey kiñentrür estudiayu ta Biblia. Kom feychi mu, pu lamngen rume yafültukuenew, familiayeenew reke. Fey kimtukun iney ngeafuy rume taiñ pu kayñe, Jewba doy newen-ngey” pi taiñ lamngen.

10. Kutrankawliyiñ rume, ¿chem küme kimnieiñ?

¹⁰ Apostol Pablo feypi: “Ngelay chem rume taiñ püntünentuaetew Ngünechen tañi piwkeyechen mew, tati pengelel ta Cristo Jesus mew” (Rom. 8:⁠38, 39). Kiñeke mu kutrankawafuiñ, welu Jewba turpu kidukünulayaeiñmu. Eluwküley taiñ kelluaetew ka yafültukuaetew. Kafey, Jewba adkünukefi taiñ pu peñi, pu lamngen taiñ kelluaetew, chumngechi pengeli taiñ lamngen Georgina ñi rupan.

PIWKEYEAFIYIÑ TAIÑ PU PEÑI KA PU LAMNGEN

11. Jesus ñi feypin Juan 15:⁠12, 13 mu, ¿chumngechi kelluafuy tañi pu inanieetew? Feypinge ñi rupan kiñeke cristiano.

¹¹ Feychi pun, petu ñi langümngenon ta Jesus, feypifi tañi pu inanieetew ñi welukonke piwkeyewal engün (papeltunge Juan 15:⁠12, 13). Jesus kimniefuy femngechi piwkeyewle engün, kiñewküleafuyngün ka newenküleafuyngün üdengen mu rume. Rakiduamaiñ ñi femün pu cristiano Tesalonika mew mülelu. We eluwlu ñi trawüluwal engün, inakangeyngün. Welu pu peñi ka pu lamngen rume piwkeyewingün ka yafüluwingün (1 Tes. 1:⁠3, 6, 7). Pablo ka ngülamtueyew ñi doy piwkeyewal (1 Tes. 4:⁠9, 10). Welukonke piwkeyewle engün, eluwayngün ñi yafültukuafiel pu weñangkülelu ka kelluafiel pu duamnielu ta kellu (1 Tes. 5:⁠14). Pu cristiano mülelu Tesalonika mew, inafingün Pablo ñi ngülam. Feymu rupalu kiñe tripantu peno, Pablo ka wirintukueyew ka sakieyew fente tañi piwkeyewün engün (2 Tes. 1:⁠3-5). Tañi piwkeyewün engün kellueyew ñi küme chaftuafiel tañi weda rupan ka tañi inakangen engün.

12. Mülen mu ta guerra, ¿chumngechi pu peñi ka pu lamngen welukonke piwkeyewingün?

¹² Ngüneduamaiñ ñi rupan taiñ peñi Danilo tañi domo engu. Tañi mapu mu mülerkey ta guerra. Femngechi rupan mu rume, Danilo tañi domo engu trawüluwkefuyngu ñi poyeafiel ta Jewba, amuldungukefuyngu ka wüdamkakefuyngu tañi iyael ñi eluafiel tañi pu peñi ka pu lamngen. Kiñe antü akurumey pu soltau armawkülelu Danilo ñi ruka mu. Danilo feypi: “Feypingen tañi testigongewenoal. ‘Femlayan’, pifiñ pu soltau, feymu wülelkaenew ka tralkantukantuenew wente longko mew tañi llükalkayaetew müten. Fey petu ñi amutunon engün, feypienew ñi wiñotual fey ñi nüntukayafiel tañi domo. Taiñ pu peñi pürüm adkünuy tayu amutual tren mu, fey müleputuyu ka waria mu. Piwkentukuken fente tayu piwkeyeetew pu peñi ka pu lamngen. Puwlu iñchiw tati we waria mu, pu peñi ka pu lamngen elueyumu iyael ka kelluenew peal küdaw ka kiñe ruka. Fey rupalu ta antü, iñchiw ka kellufiyu pu peñi ka pu lamngen lefmawlu tañi mapu mu” pi taiñ peñi. ¿Chem kimeltueiñmu taiñ peñi Danilo ñi rupan? Welukonke piwkeyewliyiñ, newenküleaiñ üdengen mu rume.

PIWKEYEAFIYIÑ TAIÑ PU KAYÑE

13. ¿Chumngechi kellukeeiñmu Jewba tañi newen üdengen mu iñchiñ?

¹³ Jesus feypieiñmu taiñ piwkeyeafiel taiñ pu kayñe (Mat. 5:⁠44, 45). Kidu taiñ newen mu, rume küdawngeafuy. Welu Jewba tañi newen mu femafuiñ tüfa. Llowliyiñ Jewba tañi newen, piwkeyechefengeaiñ, nieaiñ ta paciencia, fürenecheaiñ, ñom duamngeaiñ ka kim ngüneniewaiñ (Gal. 5:⁠22, 23, TNM). Femngechi chengeliyiñ, newenküleaiñ üdengen mu rume. Fentren pu che ngüneduamingün ñi küme chengen tañi afkadi, tañi pu yall, tañi püñeñ ka tañi karukatu che, feymu fentekünuyngün taiñ kayñetuetew. Fentren fey engün fewla taiñ peñi ka lamngen ngetuyngün. Feymu küdawtuliyiñ taiñ piwkeyeafiel taiñ pu kayñe, llellipuafiyiñ Jewba taiñ eluaetew ñi newen (Luka 11:⁠13). Longkontukuaiñ: siempre doy kümey inayal Chaw Jewba tañi ngülam (Prov. 3:⁠5-7).

14, 15. Taiñ lamngen Yasmín, ¿chumngechi kellueyew inayal ñi feypin Romanu 12:⁠17-21?

¹⁴ Ngüneduamaiñ ñi rupan taiñ lamngen Yasmín. We testigo ngerpulu, “ngünenkangepelay” pieyew tañi füta, fey eluwi ñi kayñetuaetew. Fey ti wentru lukatufi taiñ lamngen ka feypifi tañi pu che, tañi longkolechi religioso ka kiñe kalku wentru ñi aneltuafiel. Ka feypifi engün ñi koyla dallukayafiel taiñ lamngen ñi wüdamkameken tañi familia. Kiñe rupa, tati wentru wirartu lukatufi tati pu peñi, pu lamngen trawüluwlu. Taiñ lamngen Yasmín fentren rupa ngümakefuy fente tañi wedalkangen mu.

¹⁵ Trawün mu pu peñi, pu lamngen yafültukufingün ka newentukufingün ta Yasmín. Ka tati pu longkolelu ngülamtufingün ñi inanieal ñi feypin Romanu capitulo 12, versiculo 17 puwlu 21 (papeltunge). Yasmín feypi: “Küdawtun llemay ñi inayal Biblia ñi ngülam, welu eluwün tañi femal. Fey llellipufiñ Jewba tañi kelluaetew. Tañi füta podümuñmaenew tañi cocina, welu iñche liftukatufiñ müten. Kafey weda pienew rume tañi füta, welu iñche tüngduamkülekefun. Kutrankülen mu tañi füta, iñche dapikefiñ” pi taiñ lamngen.

16, 17. ¿Chem kimeltueymu eymi Yasmín ñi rupan?

¹⁶ Müna küme tripay ñi femün ta Yasmín. Fey feypi: “Tañi füta kimniey tañi koylatukenon, feymu doy maneluwkey iñche mu. Yamünkechi allkütukeenew religion dungu mu nütramkawlu iñchiw. Eluwküley ka tayu tüngküleal ruka mu ka feypienew ñi amual trawün mu. Doy küme yewküleyu ka küme feleyu. Maneluwkülen ñi füta ñi llowal ti rüf dungu, femngechi tayu kiñentrür serfiafiel ta Chaw Jewba” pi taiñ lamngen.

¹⁷ Yasmín tañi rupan küme kimfalkünuy tati piwkeyechekelu “yafüluwkey chem dungu rupale rume”, “rumel maneluwkey, ka chem no rume afelkelaeyew” (1 Kor. 13:⁠4, 7, TNM). Piwkeyewün doy newen-ngey ta üdewün mu. Piwkeyefiliyiñ taiñ pu kayñe, kayñetuwelayafeiñmu chi. Kafey ayüwülafiyiñ ta Jewba. Welu amulele taiñ üdeetew taiñ pu kayñe, iñchiñ ayüwküleaiñ. ¿Chumngelu? Peafiyiñ.

AYÜWKÜLEIÑ ÜDENGEN MU RUME

18. ¿Chumngelu ayüwküleiñ üdengen mu rume?

¹⁸ Jesus feypi: ‘Ayüwün nieaymün üdeelmünmew ta kom pu che’ (Luka 6:⁠22). Iñchiñ ayükelaiñ taiñ üdengeal ka inakangeal. Feymu, ¿chumngelu ayüwküleafuiñ fente ñi üdengen mu rume? Ngüneduamaiñ küla dungu. Kiñe, newenküleliyiñ, ayüwülafiyiñ ta Jewba (1 Ped. 4:⁠13, 14, TNM). Epu, doy maneluwküleiñ Chaw Jewba mu (1 Ped. 1:⁠7). Ka küla, Jewba eluaeiñmu taiñ rumel mongeleal (Rom. 2:⁠6, 7).

19. Wimakangelu engün rume, ¿chumngelu ayüwkülefuyngün pu apostol?

¹⁹ Pichi rupalu müten Jesus tañi wiñomongetun mu, pu apostol wimakangey ka feypingey ñi amuldunguwenoal. Femngelu rume, ayüwkülefuyngün. ¿Chumngelu? Pu apostol kimnieyngün ñi femngechi kutrankawün Jesus ñi duam mew (Hecho 5:⁠40-42). Rume piwkeyefingün ta Jesus, feymu llükalkalaeyew tañi pu kayñe. Doy may fentekünulayngün ñi amuldungucheken. Famülke mu, fentren taiñ pu peñi, pu lamngen serfiniefingün ta Jewba weda rupan mu rume. Kimnieyngün Jewba tañi falintunieetew kom tañi femken engün ka tañi piwkeyefiel (Eb. 6:⁠10).

20. ¿Chem ngüneduamaiñ küpalechi trokiñ mu?

²⁰ Petu ngüneniele Weküfü, pu che amuleay taiñ üdeaetew (Juan 15:⁠19). Welu ngelay taiñ llükaleal, ¿chumngelu? Küpalechi trokiñ mu, ngüneduamaiñ Jewba newentukuafi ka kuñiwtukuafi tañi nor piwkeyeetew (2 Tes. 3:⁠3). Feymu amulepe taiñ piwkeyefiel ta Jewba, taiñ pu peñi, pu lamngen ka taiñ pu kayñe. Femngechi femliyiñ, kiñewküleaiñ ka doy maneluwaiñ Jewba mu, püramyeafiyiñ taiñ Wenu Chaw Jewba ka kimfalkünungeay ñi doy newen-ngen tati piwkeyewün ta üdewün mew.