2 | Chau Ngünechen ñi dungu yafültucuafeimu

BIBLIA FEIPI: “Com tati cuifique dungu huirintucungei taiñ quimeltungeal. Chau Ngünechen ñi huirintucuel yafültucuqueiñmeu ca quelluqueiñmeu taiñ nehuentuleal. Feimu nieiñ ta maneluhun” (ROMANOS 15:4).

¿Chem quimeltueiñmu?

Biblia mu mülei cümeque dungu taiñ yafültucuaeteu ca taiñ quelluaeteu contueliyiñmu huesaque raquiduam. Biblia ca eluqueiñmu maneluhun, pichin antü mu hueñancühuelayai taiñ piuque.

¿Chumngechi quelluafeiñmu?

Com iñchiñ illcuqueiñ ca hueñancüqueiñ quiñeque mu, huelu tiyechi nielu ansiedad cam depresion cutran rumel cutrancaniequeyu. ¿Chumngechi quelluafeyu ta Biblia?

Biblia eluqueiñmu fentren cümeque raquiduam, femngechi ñi chaftuafiel huesaque raquiduam cutrancachequelu (Filipenses 4:8). Rüfcünu, Biblia eluqueiñmu cümeque quellu femngechi taiñ tüngcüleal, yafüluucüleal ca taiñ cüme raquiduamcületual (Salmo 94:18, 19).
Falintunieunoliyiñ, Biblia quelluaiñmu femngechi raquiduamhuetunoal (Lucas 12:6, 7).
Rume fentren rupa Biblia feipi taiñ quisulenon. Ca feipi Chau Ngünechen, taiñ Deumaeteu, cüme quimnieiñmu chumngechi taiñ cutrancaucülen (Salmo 34:18; 1 Juan 3:19, 20).
Biblia feipi Chau Dios ñi quellun mu, acordahuelayaiñ chem dungu no rume taiñ huesa duamelqueteu (Isaías 65:17; Apocalipsis 21:4). Quimfiel mu tüfa, quelluaiñmu taiñ nehuencületual contueliyiñmu huesaque raquiduam.

Biblia quellufi ta Jessica

Chumngechi huesalcaqueneu ti depresion

“Fei 25 tripantu nielu iñche, pepi femquelafun tañi fillque duam. Ti doctor feipieneu ñi nien depresion cutran. Acordarumequefun cuifique cutrancahun-ngechi rupan dungu, fei rume cutrantupiuquelqueneu. Pu doctor feipieneu cuifi rupan chi huesaque dungu, fei ürque huesa raquiduamelquefeneu, feimu contupaeneu feichi cutran. Tañi llouquen lahuen ca duamnierquefun llohual cangelu tratamiento, femngechi ñi ngüneduamal tañi huesaque raquiduam ñi famentutuafiel”.

Chumngechi quelluqueneu ta Biblia

“Feichi rume huesalcanieteu ti depresion cutran pepi umautuhuelan, llicalen ca fillque raquiduam contupaeneu. Epe fill pun pepi ngüneulan tañi fill raquiduam, fei rume huesa duamelquefeneu. Chumngechi feipi Salmo 94:19, Chau Dios yafültucuqueiñmu ca tüngduamelqueiñmu taiñ rume huesa rupalen mu. Feimu inafül ñi cahuitu mu niequefun ti Biblia ca quiñe cuaderno nielu fentren texto tañi yafültucuaeteu. Pepi umautunolu papeltuquefun Biblia, femngechi tañi tüngduamelaeteu Chau Dios ñi raquiduam”.

“Biblia feipiqueiñmu taiñ famentual feichi raquiduam chaftuquelu Chau Dios ñi feipin. Cuifi mu, falintuuquelafun ca pepi piuqueyengenolu troquiuquefun. Huelu quimürpun femngechi raquiduam chaftuquefi Biblia ñi feipiqueel. Biblia feipi Dios quiñe poyen Chau reque cutranpiuqueyequeiñmu ca com caque quiñeque iñchiñ duamtuniequeiñmu. Pichique antü eluhun tañi ngüneniehuenoaeteu tañi raquiduam, doi mai iñche ngüneniefiñ. Quimürpun tañi falintuhual chumngechi tañi falintueteu Chau Dios”.

“Maneluucülen ñi acual chi antü ñi niehuetunoal huesaque raquiduam ca hueñancün. Tüfachi maneluhun yafültucuqueneu fill antü ñi amuleal. Ca rume ayühuelqueneu tañi quimal pichiñma mu tañi contuhuenoaeteu ti depresion cutran, fei hueutripayan llemai”.