3 | Quelluafeimu ñi rupan che Biblia mu
BIBLIA MU TRIPAI: Cümeque huentru ca domo ‘iñchiñ reque duamcülequefulu tañi piuque’ (SANTIAGO 5:17).
¿Chem quimeltueiñmu?
Biblia mu mülei alün nütram ñi rupan tañi mongen mu pu cuifique che yem, tüfa engün caque rume duamcülefui ñi piuque engün. Papeltufilu iñchiñ fei tañi rupan, trürümuhuafuiñ chi taiñ rupamequen.
¿Chumngechi quelluafeiñmu?
Taiñ chengen mu, com iñchiñ duamnieiñ taiñ duamtunieaeteu caquelu pu che. Huelu huesa duamcülele taiñ piuque, doi duamqueiñ tüfa. Papeltufilu Biblia iñchiñ, quimqueiñ ca mülefui che tañi raquiduamquefel ca duamcülequefel iñchiñ reque. Fei, ¿chumngechi quelluafeimu? Tami quimürpun caquelu che tañi cutrancahun eimi reque, quisulelu troquiuhuelayaimi.
Biblia mu huirintucungei ñi chem pin quiñeque che rume huesa duamcülelu ca quisulelu troquiulu. ¿Quiñeque mu feipipelaimi: “Com fentecünuan, yafüngehuelan” pipeimi chi? Moisés, Elías ca David ca femngechi duamcülefui (Números 11:14; 1 Reyes 19:4; Salmo 55:4).
Biblia nütramcaquei ñi rupan quiñe domo Ana pingelu. Ana pepi nielafui püñeñ, feimu rume huesa duamcülequefui. Tañi müri domo ayentuquefeyu ñi huesa duamelafiel (1 Samuel 1:6, 10).
Biblia mu ca mülei Job tañi mongen. Chumngechi ñi huesa duamün ta Job, eimi ca femngechi duamcüleafuimi chi. Maneluufulu rume ta Chau Dios mu, fente tañi hueñancülen ta Job, cüpa mongelehuelai (Job 7:16).
Tüfachi pu che hueufingün reque ñi huesaque raquiduam. Inayentufiliyiñ engün, iñchiñ ca femngechi hueutripayafuiñ llemai.