TROQUIÑ ÑI CHILLCATUNGEAL 10
ÜLCANTUN 31 Miyahuaimi Jehová ñi rüpü mu
Inayentuafiyiñ Jehová ca Jesús tañi raquiduam
“Eimün pepicahuaimün tamün raquiduamal chumngechi raquiduamquei Cristo” (1 PED. 4:1).
¿CHEM QUIMAIÑ?
Ti apostol Pedro, ¿chumngechi raquiduamürpui Jesús reque? ¿Iñchiñ cai? ¿Chumngechi femafuiñ?
1, 2. 1) ¿Chem coneltulei taiñ piuqueyefiel ta Jehová? 2) Jesús, ¿chumngechi pengeli ñi piuqueyefiel tañi Chau com tañi raquiduam mu?
MOISÉS tañi ley mu, ¿chem huercün dungu doi falin-ngei? Jesús feipi: “Piuqueyefinge tami Chau Ngünechen Jehová com tami piuque mu, com tami mongen, com tami raquiduam ca com tami nehuen meu” (Mar. 12:30). Tüfa mu coneltulei taiñ nehuen, taiñ ayüqueel ca com taiñ chumngen. Tañi feipin Jesús, taiñ piuqueyefiel mu Jehová ca coneltulei chumngechi taiñ raquiduamqueel. Taiñ chengen mu, com adümlayafuiñ Jehová tañi raquiduamqueel. Huelu quelluafeiñmu ngüneduamafiel “chumngechi raquiduamquei Cristo”, Cristo am rüf cüme inayentufilu tañi Chau ñi raquiduam (1 Cor. 2:16).
2 Jesús piuqueyefi tañi Chau com tañi raquiduam mu. Jesús quimniefui chem tañi ayüniefel tañi Chau, cutrancaule rume eluucülefui ñi femal. Jesús doyümniequefui ñi ayühulafiel tañi Chau, feimu eluulai chem no rume tañi famentuaeteu ñi femal.
3. Pedro, ¿chem quimi Jesús meu ca chem feipifi pu cristiano ñi femal? (1 Pedro 4:1).
3 Pedro ca pu caquelu apostol doi alüñma miyaufuingün Jesús engün, femngechi quimüñmafingün ñi raquiduam. Pedro feipifi pu cristiano: “Pepicahuaimün tamün raquiduamal chumngechi raquiduamquei Cristo” (papeltunge 1 Pedro 4:1). Ñi feipin tüfa griego quehun mu pengeli ñi pepicauquen pu soltau amualu hueichan mu. Feimu pu cristiano adümfile ñi raquiduamal Cristo reque, cüme pepicaucüleaingün tañi chaftuafiel tañi huesaque illutun ca fill huesaque dungu Huecüfü meu cüpalu (2 Cor. 10:3-5; Efes. 6:12).
4. ¿Chem ngüneduamaiñ tüfachi troquiñ mu?
4 Tüfachi troquiñ mu, ngüneduamaiñ Jesús tañi raquiduam ca chumngechi inayentuafuiñ. Peaiñ cüla dungu: 1) chumngechi inayentuafuiñ Jehová tañi raquiduamqueel, 2) chumngechi ñom piuquengeafuiñ, ca 3) chumngechi cüme raquiduam nieafuiñ.
ADÜMAFIYIÑ JEHOVÁ ÑI RAQUIDUAM
5. ¿Chem dungu mu Pedro raquiduamlai Jehová reque?
5 Peafiyiñ quiñe rupa Pedro raquiduamlai Jehová reque. Jesús feipifi tañi pu apostol ñi amual Jerusalén meu, fei üye meu tañi cutrancangeal ca ñi langümngeal (Mat. 16:21). Pedro quimniefui Jesús tañi Mesías ngen ca ñi montulafiel Jehová tañi pu che. Feimu Pedro meu cüdaungepelafui ñi raquiduamal Jehová ñi eluñmayafiel Jesús tañi layal (Mat. 16:16). Feimu Pedro huichunentufi ca feipifi: “¡Cutranpiuqueyeunge Ñidol! Eimi rupalayaimi tüfachi dungu mu” (Mat. 16:22). Feichi mu, Jesús engu Pedro trürlai tañi raquiduam engu, fei Pedro am raquiduamnolu Jehová reque.
6. Jesús, ¿chumngechi pengeli ñi raquiduamquen Jehová reque?
6 Jesús raquiduamquefui tañi Chau reque, fei feipifi Pedro: “¡Püntütripange iñche mu, Satanás! Catrütumequeen ñi femal Chau Ngünechen ñi ayüqueel. Nielaimi Chau Ngünechen tañi raquiduam, huelu mai huentru ñi raquiduam nieimi” (Mat. 16:23). Jesús quimniefui tañi cüme duamelafiel ta Jehová, mülefui tañi cutrancahual ca tañi layal. Feimu Jesús famentufi Pedro tañi feipieteu, feipilu rume cüme piuque mu. Feichi mu, Pedro quimtucui tañi raquiduamal Jehová reque, iñchiñ ca femngechi mülei taiñ femal.
7. ¿Chemu feipiafuiñ Pedro eluucülefui ñi raquiduamal Jehová reque? (Inaduamnge ti adentun).
7 Rupachi antü mu, Pedro pengeli ñi eluucülen tañi raquiduamal Jehová reque. ¿Chemu feipiafuiñ? Feichi mu Jehová eluhui ñi llohuafiel pu judiongenolu tañi troquiñche mu. Jehová feipifi Pedro ñi amuldungulelafiel Cornelio. Judiongelafui rume, cristianongerpuafui. Turpu rupaquelafui tüfachi dungu. Tati pu judio trahuquelafui ti pu che judiongenolu. Feimu Pedro meu, ¿cüdaungepelafui inayal feichi huercün dungu? Huelu adümfilu chem tañi ayüel Jehová, cüme elcünutui tañi raquiduam. Feimu Cornelio mütrümfalfilu Pedro, quisu amufemi (Hech. 10:28, 29). Quimeltulelfi Cornelio ca tañi pu che, fei fautizahuingün (Hech. 10:21-23, 34, 35, 44-48).
Pedro concülepui Cornelio tañi ruca mu. (Inaduamnge parrafo 7).
8. ¿Chumngechi pengelafuiñ taiñ raquiduamquen Jehová reque? (1 Pedro 3:8).
8 Rupachi tripantu, Pedro ngülamtufi pu cristiano: “Quiñeucülepe tamün raquiduam” (papeltunge 1 Pedro 3:8). ¿Chem quelluaiñmu ñi quiñeucüleal taiñ raquiduam? Inayentuafiyiñ Jehová ñi raquiduam mülelu Biblia mu. Quiñe dungu, Jesús feipifi tañi pu inanieteu ñi doyümafiel tañi cüdahuelafiel Jehová (Mat. 6:33). Quiñe peñi cam lamngen tami trahunche mu eluule ñi precursorngeal cam femal caquelu cüdau, ¿chem piafiyiñ? Feipilayafiyiñ ñi rume cüdaungen femngechi mongen ñi dullial, doi mai yafültucuafiyiñ tañi cüme dullin mu ca eluucüleaiñ taiñ quelluafiel.
ÑOM PIUQUENGEAIÑ
9, 10. Jesús, ¿chumngechi pengeli tañi fente ñom piuquengen?
9 Feichi pun petu ñi lanon, Jesús quimeltufi Pedro ca pu caquelu apostol tañi ñom piuquengeal. Jesús feipifi Pedro ca Juan ñi pepicayal ñi trür engün icünual petu ñi lanon. Fei engün yepelafingün quiñe lafatorio ca quiñeque toalla tañi cüchanamun-ngeal pu mülealu fei meu. Huelu, ¿inei cüchanamunai feichi mu?
10 Feichi cüdau femquefui pu esclavo. Huelu Jesús eluufemi tañi femal. Femngechi pengeli tañi fente ñom piuquengen. Jesús huitrapürai, quiñe püle nentui tañi huente tacun, fei nüi quiñe pañu. Fei hula, tucui co quiñe lafatorio meu. Fei quisuque cüchanamunfi tañi pu inanieteu, ¿rume afmatulehuepelaingün? (Juan 13:4, 5). ¿Alüñmapelai Jesús tañi cüchanamunafiel tañi 12 apostol? Judas cütu cüchanamunfi tañi hultucuaeteu rume. Fei hula, Jesús feipifi tañi pu apostol: “¿Loncontucuimün chem tamün femfiel? Eimün ta Quimeltufe ca Ñidol pimuquen. Cüme feipiqueimün. Rüfngei tüfachi dungu. Fei iñche ta Ñidol ca tati Quimeltufe, huelu cüchaleluhuiyiñ tamün namun. Ca femngechi eimün, hueluquentu mülei tamün cüchañmahual tamün namun” (Juan 13:12-14).
Rüf ñom piuquengeliyiñ, cüme raquiduamaiñ iñchiñ mu ca caquelu pu che mu
11. Pedro, ¿chumngechi pengeli ñi ñom piuquengerpun? (1 Pedro 5:5; ca inaduamnge ti adentun).
11 Pedro inayentufi Jesús tañi ñom piuquengen. Deu huiñotulu Jesús huenu mu, Pedro tremoltufi quiñe huentru cüntro choyüngelu (Hech. 1:8, 9; 3:2, 6-8). Ti pu che lefcülen puhui Pedro mu, rume afmatulehueingün (Hech. 3:11). Feichi mu tati pu che rume quintuquefui tañi afmatungeal, huelu Pedro pilafui tañi femngeal. Pedro ñom chengetui, feimu feipifi ñi püramyengeal Jehová ca Jesús. Feipi: “Jesús tañi üi mu ca tayu feyentufiel tañi üi cülfüncületui tüfachi huentru. Eimün pefimün ca quimniefimün” (Hech. 3:12-16). Rupachi tripantu mu, Pedro feipifi pu cristiano ñi duamfalngen tañi ñom piuquengeal engün. Huirintuculu tüfa, Pedro acordaniepelafui chi Jesús ñom piuque mu cüchanamunfilu tañi pu apostol (papeltunge 1 Pedro 5:5).
Pedro ñom piuquengefui. Rupan femlu quiñe afmatufalchi dungu, feipi ñi püramyengeal Jehová ca Jesús. Ca femngechi femliyiñ cümeque dungu caquelu mu, ayüquelaiñ taiñ fampüramngeal. (Inaduamnge parrafo 11, 12).
12. Pedro reque, ¿chumngechi eluhuafuiñ taiñ ñom piuquengeal?
12 Pedro reque, eluhuafuiñ taiñ ñom piuquengeal. ¿Chem quelluafeiñmu? Acordanieaiñ rüf ñom piuquengeliyiñ, pengel-layaiñ taiñ feipin mu müten. Doi mai Pedro tañi feipin enseñalqueiñmu ñom piuquengeliyiñ, cüme raquiduamaiñ iñchiñ mu ca caquelu pu che mu. Cümelcachequeiñ taiñ piuqueyefiel mu Jehová ca caquelu pu che, femquelaiñ caquelu taiñ afmatuaeteu. Ayühunquechi serfifiliyiñ Jehová ca taiñ pu peñi ca lamngen, pengelaiñ taiñ rüf ñom piuquengen caquelu inaduamnofule rume (Mat. 6:1-4).
CÜME RAQUIDUAM NIEAIÑ
13. Cüme raquiduam nieliyiñ, ¿chumaiñ?
13 Cüme raquiduam nieliyiñ, ¿chumaiñ? (1 Ped. 4:7). Petu taiñ dullinon chem chumal, ngüneduamaiñ chem raquiduamquei Jehová. Cafei raquiduamcüleaiñ doi falin-ngei taiñ hueniyefiel ta Jehová. Ca femngechi cüme raquiduam nieliyiñ, doicülelu caquelu mu troquiulayaiñ ca quimcaulayaiñ. Doi mai, recüluhuaiñ Jehová mu ca llellipunieafiyiñ taiñ quelluaeteu.
14. Quiñe rupa, ¿chumngechi pengeli Pedro tañi recüluunon Jehová mu?
14 Feichi pun petu tañi lanon ta Jesús, feipifi tañi pu discipulo: “Tüfachi pun com eimün quisucünumuan”. Pedro rume maneluucülefui quisu mu, feimu feipi: “Com engün quisucünuelmu rume, ¡iñche turpu quisucünulayayu!”. Feichi pun, Jesús ngülamtufi quiñeque tañi pu discipulo: “Trepeluucülemün ca llellipulemün” (Mat. 26:31, 33, 41). Huelu Pedro inalafi feitachi ngülam, feipi tañi quimnofiel ta Jesús. Tañi feipin mu rume huesa duami. Pedro inafule tañi ngülamtueteu Jesús, llicalayafui tañi feipial Jesús tañi discipulongen (Mat. 26:69-75).
15. Feichi pun petu ñi lanon, ¿chem quellueyu Jesús tañi cüme raquiduamcüleal?
15 Jesús com tañi piuque mu maneluhui Jehová mu. Culpan chengelafui rume, feichi pun petu ñi lanon rume llellipufi tañi Chau. Femngechi nehuencünuhui tañi femal Jehová tañi feipiel (Mat. 26:39, 42, 44; Juan 18:4, 5). Pedro, ¿rumel loncontucuniepelafi Jesús tañi fente llellipun?
16. ¿Chumngechi pengeli Pedro tañi cüme raquiduam nierpun? (1 Pedro 4:7).
16 Rupachi antü mu, Pedro doi maneluhui Jehová mu tañi llellipuniefiel mu. Deu huiñomongetulu Jesús, feipifi Pedro ca pu caquelu apostol tañi llohual Ngünechen tañi nehuen tañi amuldungual engün. Huelu ca feipifi tañi esperaleal engün Jerusalén mu (Luc. 24:49; Hech. 1:4, 5). ¿Chumi Pedro esperalelu? Biblia feipi Pedro ca caquelu cristiano “amulei ñi llellipumequen” (Hech. 1:13, 14). Rupachi antü mu, tañi hunen carta mu Pedro feipifi pu cristiano: “Cüme raquiduam nieaimün ca rumel pepicaucülequeaimün tamün llellipual” (papeltunge 1 Pedro 4:7). Pedro doi maneluhurpui Jehová mu, femngechi rume quellurpufi tañi pu peñi ca pu lamngen trahunche mu (Gál. 2:9).
17. Chumte pepiluhun rume nieliyiñ, ¿chem mülei taiñ femal? (Ca inaduamnge ti adentun).
17 Taiñ nieal cüme raquiduam, mülei taiñ llellipunieafiel Jehová. Chumte pepiluufuliyiñ rume, llellipunieafiyiñ ta Jehová taiñ quelluaeteu. Petu taiñ dullinon falinque dungu taiñ mongen mu, doi llellipuquefiyiñ ta Jehová. Com piuque mu maneluucüleiñ Chau Jehová doi quimniei chumngechi taiñ cümelcaleal.
Pedro pengeli ñi maneluuquen Jehová mu tañi llellipufiel mu. Iñchiñ ca nieafuiñ cüme raquiduam feipifiliyiñ Jehová taiñ quelluaeteu, doyelchi mai dulliliyiñ falinque dungu. (Inaduamnge parrafo 17).a
18. Pedro reque, ¿chumafuiñ?
18 Jehová deumaeteu iñchiñ, elueiñmu inayentuafiel tañi chumngen, feimu rume mañumniefiyiñ (Gén. 1:26). Huelu culpan chengelu am iñchiñ, quiñeque mu cüme inayenturpulayafuiñ (Is. 55:9). Pedro reque, iñchiñ raquiduamürpuafuiñ Jehová reque, ñom chengeafuiñ ca cüme raquiduam nieafuiñ.
ÜLCANTUN 30 Ñi Ngünechen, ñi cüme Chau ca tañi Hueni
a ¿CHEM PENGELI TI ADENTUN? Quiñe lamngen llellipumequei petu tañi llounoeteu tati ngen cüdau.