Yafüluhun mu amuldunguaiñ Jesús reque

1. ¿Chumngelu Jehová ñi pu che trürlai pu coilaque cristiano meu?

JEHOVÁ ñi pu che rume ayüqueiñ ca yafüluuqueiñ taiñ amuldungual. Pu coilaque cristiano femquelai tüfachi dungu (Tito 2:14). Huelu quiñeque mu, müte yafüluulayafuiñ chi taiñ amuldungual. Quiñe loncolelu rume cüdauquelu feipi: “Quiñeque mu cüpa amuldunguquelan”. Eimi ca femqueimi chi.

2. ¿Chumngelu quiñeque mu cüdautuafuiñ taiñ ayühunquechi amuldungual?

² Jehová ñi troquiñche mu mülei fillque cüdau. Cüdahuafuiñ ñi deumangeal Trahunhue Ruca, ca rupan mu huesaque dungu quelluafuiñ ca yafültucuafuiñ taiñ pu peñi ca pu lamngen. Tüfachi cüdau pürüm cüme tripaquei, fei rume cüme duamelqueiñmeu. Cafei cüdahun mu taiñ pu peñi iñchiñ ca lamngen, mülequei tüngcülen ca piuqueyehun ca falintungequeiñ taiñ femquen. Feimu com tüfachi cüdau doi ayühulafeiñmu chi amuldungun meu. ¿Chumngelu? Fentren tripantu chi yenieiñ taiñ amuldunguqueel quiñe territorio mu, fei pichin che müten allcütuqueiñmu. Quiñeque huesa piqueiñmu. Cafei doi püllelepale Chau Jehová ñi antü, doi caiñetungeaiñ (Mat. 10:22). ¿Chem quelluaiñmu taiñ doi ayüucüleal taiñ amuldungual?

3. Ñi feipin Lucas 13:6-9, ¿chem quimeltuqueiñmu Jesús mu?

³ ¿Chem quelluaiñmu taiñ ayühunquechi amuldungual? Inaduamaiñ Jesús ñi femün. Quisu feipilai fentecünuan ñi cüdau, doi amuldungui (papeltunge Lucas 13:6-9). Quisu trürümuhui quiñe huentru mu dapiniefilu tañi anüm higuera ñi fünal. Cüla tripantu rupafui, turpu fünlai, huelu ti huentru üngümcülequefui ñi fünal tañi anümca. Jesús ca femngechi cüla tripantu amuldungulelfi pu judio, huelu pichin müten inaeyu. Femlu rume, Jesús fentecünulai ñi amuldungulelfiel, doi mai yafüluhui ñi puhual pu che ñi piuque mu.

4. ¿Chem meli dungu quimaiñ Jesús meu?

⁴ Jesús doi nehuen piuquecünuhui tañi amuldungual cayu cüyencülehuelu tañi mongen mapu meu (inaduamnge ti nota de estudio “Después de estas cosas” mülelu Lucas 10:1 meu). Tüfachi troquiñ mu, peaiñ meli dungu ñi femün Jesús taiñ inayentuafiel: 1) eluhui ñi femal Jehová ñi ayüqueel, 2) pengeli tañi mongen mu ñi cüme adümfiel chi profecia, 3) maneluuquefui Jehová tañi quelluaeteu, ca 4) maneluucülequefui tañi allcütungeal.

ELUHUI ÑI FEMAL JEHOVÁ ÑI AYÜQUEEL

5. ¿Chumngechi pengeli Jesús tañi doi falintuquefiel Jehová ñi ayüqueel?

⁵ Jesús yafüluhun mu amuldungui “cümeque dungu Chau Dios ñi ngünenietual ta mapu” (Luc. 4:43). Jesús rume falintuquefui ñi amuldungual tañi mongen mu. Pichilehuelu rume ñi müleal mapu mu, amui ñi amuldungual “fillque huaria ca lof püle” (Luc. 13:22). Ca pepicafi caquelu tañi amuldungual quisu reque (Luc. 10:1).

6. Ti amuldungun, ¿chumngechi nüucülei caquelu cüdau mu? (Ca inaduamnge ti adentun).

⁶ Famülque meu, Jehová ca Jesús ayüquei taiñ doyümafiel ti amuldungun cüdau (Mat. 24:14; 28:19, 20). Chem cüdau rume femliyiñ Jehová ñi troquiñche mu, nüucülei ti amuldungun meu. Deumaqueiñ Trahunhue Ruca, femngechi pu che taiñ amuldungulelquefiel tañi püramyemeafiel Jehová. Ti cüdau femngequelu Betel mu ca caquelu edificio mu quelluntucuquei ti amuldungun mu. Taiñ pu peñi ca pu lamngen rupayüm huesa dungu mu, quelluquefiyiñ ñi nieal tañi duamnieel, femngechi ñi huiño amuldungual engün ca ñi amual trahun mu. Cüme quimtucunieaiñ Jehová ayüquei taiñ doyümafiel tati amuldungun, femngechi doi cüpa amuldunguaiñ ca doi yafüluhuaiñ. Quiñe loncolelu Hungría mapu mu János pingelu feipi: “Rumel acordaquen chem cüdau rume femli Jehová ñi troquiñche mu, doi falin-ngei tañi amuldungual”.

7. ¿Chumngelu ayüquei Jehová taiñ amuldunguleal? (1 Timoteo 2:3, 4).

⁷ Raquiduamliyiñ ti pu che mu Jehová reque, doi yafüluhuaiñ taiñ amuldungual. Jehová ayülei com pu che ñi allcütual tüfachi cümeque dungu (papeltunge 1 Timoteo 2:3, 4). Taiñ amuldungun montulafui ñi mongen ta pu che, feimu Jehová ayülei taiñ cüme pepicaucüleal taiñ amuldungual. Tüfachi folleto Piuqueyenquechi quimeltucheaiñ pingei eluqueiñmu cümeque ngülam taiñ nütramcayafiel pu che. Femngechi taiñ quimeltulelafiel Biblia ca Jesús tañi discipulongerpual engün. Quiñeque allcütunole rume feula, petu ñi afnon chi fütra cutrancahun femafui engün chi. Acordayafuingün chem taiñ amuldungulelfiel, fei eluhuafuingün ñi serfiafiel Jehová. Feimu rume falin-ngei taiñ amuldunguleal.

CÜME ADÜMFI TI PROFECIA

8. Jesús ñi cüme adümfiel mu tati profecia, ¿chumi?

⁸ Jesús quimniefui ñi chum tripayal ti profecia mülelu Biblia mu. Jesús quimniefui cüla tripantu rangiñ ñi amuldungual (Dan. 9:26, 27). Ca quimniefui chumül ca chumngechi ñi layal (Luc. 18:31-34). Jesús cüme quimnielu am tüfachi profecia, feimu cüme pünei ñi tiempo. Feimu yafüluhun mu cüdahui ñi cüme enturpual tañi cüdau ñi elueteu Chau Dios.

9. Ti profecia Biblia mu, ¿chumngechi quelluqueiñmu taiñ amuldungual?

⁹ Cüme adümfiliyiñ ti profecia Biblia mu, fei yafültucuaiñmu taiñ cüme amuldungual. Quimnieiñ ñi epe puucülen ñi afal ti huesaque dungu. Biblia feipicünui ñi chumleal pu che afaelchi antü mu ca chem dungu ñi rupayal. Com tüfachi dungu peniefiyiñ ñi femtripamequen. Ti profecia Biblia mu ca feipilei “afaelchi antü mu” ti rey del sur ca ti rey del norte ñi quehuatumequehual engu. Quimnieiñ tüfa ñi femtripamequen, Reino Unido trür Estados Unidos engu, fei quehuaquei Rusia engün ca ñi quelluqueteu (Dan. 11:40). Ca quimnieiñ Daniel ñi feipin tüfachi adentun ñi namun fei tati Reino Unido ca Estados Unidos (Dan. 2:43-45). Cüme ngüneduamfilu am tüfachi profecia iñchiñ, feimu cüme quimnieiñ Chau Dios ñi Gobierno pichiñma mu apümafi mapu mu mülechi gobierno. Feimu cüme püneaiñ taiñ tiempo taiñ amuldungulelafiel pu che.

10. Ti profecia mülelu Biblia mu, ¿chumngechi yafültucuqueiñmu taiñ amuldunguleal?

¹⁰ Ti profecia Biblia mu quimelqueiñmu cümeque dungu, femngechi ayüqueiñ taiñ quimelelafiel caquelu pu che. Quiñe lamngen Carrie pingelu República Dominicana mülelu feipi: “Raquiduamquen Jehová taiñ feipicünueteu taiñ eluaeteu cümeque dungu, feimu feipiuuquen mülei ñi feipiafiel caquelu. Pefiyüm pu che ñi cutrancaumequen, fei raquiduamquen tüfachi cüme dungu iñche müten ngealu no, ca mülei ñi llohual caquelu pu che”. Ti profecia Biblia mu pengelqueiñmu Jehová quelluqueiñmu taiñ amuldungual, tüfa yafültucuqueiñmu taiñ amuldunguleal. Ca peaiñ cangelu lamngen Leila pingei, Hungría mapu mu. Fei feipi: “Isaías 11:6-9 quimeltuqueneu Jehová quelluquefi chem che rume ñi cüme elcünutual ñi mongen. Feimu quiñe che allcütunoaeteu troquifiyüm, yafüluuquen müten ñi amuldungulelafiel”. Quiñe peñi Christopher pingei Zambia mülelu, feipi: “Chumngechi feipi Marcos 13:10, tüfachi cümeque dungu amuldungumequengei com mapu püle. Tüfachi cüdau mu ñi quelluntucuquen rume falintuquefiñ”. Eimi, ¿chem profecia mülelu Biblia mu yafültucuqueimu tami amuldungual?

MANELUHUI JEHOVÁ TAÑI QUELLUAETEU

11. Jesús, ¿chumngelu duamniefui maneluhual Jehová mu tañi amuldunguleal? (Lucas 12:49, 53).

¹¹ Jesús maneluuquefui Jehová tañi quelluaeteu tañi yafüluhun mu amuldungual. Jesús rume yamniequefui pu che tañi amuldungulelquefiel, huelu quimniefui tüfachi cümeque dungu ñi illculcayafiel, ca quiñeque caiñetuafeyu (papeltunge Lucas 12:49, 53). Ca ti pu loncolechi religioso ayülafi Jesús ñi amuldungun, feimu fentren rupa cüpa langümfui engün (Juan 8:59; 10:31, 39). Huelu Jesús fentecünulai ñi amuldungun, quimniei tañi Chau ñi afcadinieteu. Jesús feipi: “Iñche ta quisulelan, tañi Chau ta quelluqueneu, fei ta huercüeneu” (Juan 8:16). Ca feipi: “Iñche rumel femquen tañi ayünieel, feimu quisucünuquelaeneu” (Juan 8:29).

12. Jesús, ¿chumngechi pepicai tañi pu discipulo ñi amuldungual caiñetungele rume?

¹² Jesús feipiquefi tañi pu inanieteu ñi maneluhual Jehová mu engün tañi quelluaeteu. Jesús quimniefui tañi inantucungeal tañi pu discipulo, feimu fentren rupa feipifi Jehová tañi quelluaeteu (Mat. 10:18-20; Luc. 12:11, 12). Ca feipifi ñi llihuatuleal engün (Mat. 10:16; Luc. 10:3). Ca feipifi ti pu che pinole ñi allcütual, dicümtuculayafimün (Luc. 10:10, 11). Ca ngülamtufi lefmahuaimün caiñetungelmün (Mat. 10:23). Jesús maneluuquefui Jehová mu, ayühun mu amuldunguquefui. Huelu quiñe püle tripaquefui cuñihun-ngechi dungu mu (Juan 11:53, 54).

13. ¿Chumngelu cüme quimnieiñ Jehová taiñ quelluaeteu?

¹³ Fachantü ca femngechi caiñetungequeiñ, feimu duamnieiñ Jehová ñi quellu taiñ amuldunguleal (Apoc. 12:17). ¿Chumngelu maneluucüleiñ Jehová taiñ cuñiutucunieaeteu quisuque iñchiñ? Jesús llellipui tüfachi dungu. Feipifi tañi Chau tañi cuñiutucuafiel pu apostol, femngechi Jehová allcütui. Hechos lifru mu, feipi chumngechi Jehová quellufi ti pu apostol ñi amuldunguleal engün caiñetungele rume. Jesús ca llellipufi Jehová tañi cuñiutucuafiel feitichi pu che allcütulu engün ca pu feyentulu. Tüfachi llellipun mu ca coneltuleiñ iñchiñ. Chumngechi quellufi Jehová pu apostol, ca femngechi quelluaiñmu iñchiñ famülque mu (Juan 17:11, 15, 20).

14. ¿Chumngelu maneluucüleaiñ taiñ amuldunguleal cuñihun-ngechi antü mu rume? (Ca inaduamnge ti adentun).

¹⁴ Doi fülcülepale Chau Dios ñi antü, doi cüdaungeafui taiñ amuldunguleal. Huelu Jesús feipicünueiñmu taiñ quellungeal, femngechi ayühun mu taiñ amuldunguleal (Luc. 21:12-15). Jesús ca tañi pu discipulo reque, ca dicümtucuquelafiyiñ taiñ allcütuaeteu ca notucadunguquelafiyiñ. Quiñeque lof mu catrütungele rume taiñ amuldungun, pu peñi amulequei ñi amuldungulen engün. ¿Chumngelu? Quisu tañi nehuen mu femquelai engün, doi mai maneluucülei Jehová mu engün. Hunen siglo meu, Jehová elufi nehuen tañi pu che, femngechi “ñi amuldungungeal com ñi feipin Chau Ngünechen ñi dungu” (2 Tim. 4:17). Ca femngechi Jehová eluaiñmu nehuen taiñ amuldunguleal, fentecünuaimün pieliyiñmu hula Jehová. Rüfngei tüfa: maneluucüleliyiñ Jehová mu, yafüluhun mu amuldunguleaiñ.

MANELUHUI QUIÑEQUE TAÑI ALLCÜTUAETEU

15. Jesús maneluucülefui ñi amuldungun ñi cüme tripayal, ¿chumngelu feipiafuiñ?

¹⁵ Jesús maneluucülequefui quiñeque che ñi allcütual ti cümeque dungu, fei tüfa quelluquefeyu ñi ayüucüleal, yafüluhun mu ñi amuldunguleal. Quiñe tripantu yenielu ñi amuldungulen, ngüneduami fentren che duamniei ñi allcütual ti cümeque dungu, feimu trürümfi anquechi quetran mu deu puucülen ñi cosechangeal (Juan 4:35). Quiñe tripantu rupalu peno, feipifi tañi pu discipulo: “Fentrelei ti cosecha” (Mat. 9:37, 38). Rupachi antü mu, ca huiño feipi: “Fentrelei ti cosecha [...]. Llellipuafimün mai tati Ngen lelfün, huercüpe cüdaufe tañi püramquetranal” (Luc. 10:2). Jesús maneluucülequefui quiñeque che tañi allcütuaeteu, ayüuquefui ñi allcütun mu engün (Luc. 10:21).

16. Jesús, ¿chumngechi quimfalcünui ñi cüme tripayal tati amuldungun? (Luc. 13:18-21; ca inaduamnge ti adentun).

¹⁶ Jesús quimelelfi tañi pu discipulo ñi rume cüme tripayal tañi cüdau engün, femngechi quellueyu tañi ayühunquechi amuldunguleal. Peaiñ epu pengelün dungu tañi feipin (papeltunge Lucas 13:18-21). Hunelu nütramcai quiñe pichi fün, fei tremürpui, fei quiñe fütra anümcangetui. Feita trürümfi Jehová tañi cümeque dungu, chem no rume catrütulayafui fentrenque che ñi allcütual tati cümeque dungu. Jesús ca feipi Chau Dios ñi cümeque dungu lefaura reque felefui, femngechi pengeli com püle ñi amuldungungeal. Allcütule engün feitachi che, cüme elcünutuafui tañi mongen, ellaca mu quiñeque inaduamngelayafui tañi cüme elcünutun tañi mongen. Femngechi Jesús pengelelfi tañi pu discipulo ñi cüme tripayal tañi amuldungun.

17. ¿Chemu ayühunquechi amuldunguleaiñ?

¹⁷ Taiñ amuldungun cüdau fentrenque che huall mapu mu quelluquefi, tüfa doi yafültucuqueiñmu taiñ amuldungual. Fill tripantu fentren che amuqueingün trahun mu ñi acordayafiel Jesús tañi lan ca enseñalelquefiyiñ ta Biblia. Ca fentrenque che eluhuingün tañi amuldungual ca fautizauqueingün. Quimlaiñ chumten che taiñ allcütuaeteu, huelu quimnieiñ famülque mu Jehová trapümmequefi quiñe fütra troquiñche. Fei montuaingün ti fütra cutrancahun mu (Apoc. 7:9, 14). Jehová tati Ngen lelfün maneluuquei doi fentren che ñi allcütual ti cümeque dungu, fei amuleai mai taiñ amuldungual.

18. ¿Chem ayüqueiñ pu che ñi feipial iñchiñ mu?

¹⁸ Jesús tañi pu rüfngechi discipulo yafüluhun mu rumel amuldunguqueingün. Pu apostol nehuen piuquecünuhuingün ñi amuldungual ayühun mu. Feimu pu che “quimürpuingün Jesús engu ñi miyauquen” (Hech. 4:13). Iñchiñ ca femngechi ayüqueiñ taiñ nehuentu ayühunquechi amuldungual, femngechi caquelu che inaduamai taiñ inayentufiel Jesús.