Maneluhuaimi Jehová tami adnieteu mu

1. ¿Chemu fente ayüucülefui Pablo tañi cüme mongen ñi yeniequefel?

PABLO quimniefui pichiñma mu ñi langümngeafel, huelu rume ayüucülefui tañi cüme mongen ñi yeniequefel. Feimu feipi: “Huechunentun ñi lefün ti cuden meu. Amulnien tañi feyentulen” (2 Tim. 4:6-8). Pablo eluhui ñi serfiafiel ta Jehová com tañi mongen mu. Feimu quimniefui Jehová tañi ayüucülen ta quisu meu, iñchiñ ca femngechi cüme dulliafuiñ taiñ ayühulafiel ta Jehová. ¿Chumngechi femafuiñ? Peafiyiñ.

2. ¿Chem pifui Pablo 2 Corintios 5:7 mu?

² Pablo feipi: “Feyentun mu ta mongeleiñ, re taiñ pequeel mu müten no” (2 Cor. 5:7). ¿Chem pifui chi ta Pablo? Tati pu che feyentunolu Jehová mu inaqueingün müten tañi peel mu, tañi allcüqueel ca tañi chem pieteu tañi piuque tañi dullial chem chumal. Huelu tati pu che feyentulu Jehová mu ngüneduamquei chem tañi ayüqueel Jehová tañi cüme dullial. Tati feyentulu Jehová mu eluucülequei tañi piuque mu tañi inayal engün Biblia tañi ngülam. Femle engün, cümelcayayu feula ca cüpalechi antü mu (Sal. 119:66; Heb. 11:6).

3. Inafiliyiñ Jehová taiñ adnieteu, ¿chumngechi cümelcayafeiñmu? (2 Corintios 4:18).

³ Com iñchiñ quiñeque mu inayafuiñ chem taiñ peel ca allcüqueel taiñ dullial chem chumal. Huelu re ngüneduamliyiñ tüfa müten taiñ dullial falinque dungu, huelulcayafuiñ llemai. ¿Chemu am? Com taiñ pequeel ca taiñ allcütuqueel maneluhun-ngelai llemai. Inafiliyiñ tüfa taiñ dullial chem chumal, hueñancülafuiñ ta Jehová (Ecl. 11:9; Mat. 24:37-39). Doi mai inafiliyiñ Jehová taiñ adnieteu taiñ cüme dullial, ayühulafiyiñ (Efes. 5:10). Cafei tüngcüleaiñ ca rüf ayüucüleaiñ (Sal. 16:8, 9; Is. 48:17, 18). Rumel inaniefiliyiñ Jehová tañi ngülam, nieafuiñ rumel mongen (papeltunge 2 Corintios 4:18).

4. ¿Chumngechi quimafuiñ taiñ inaniefiel Jehová tañi ngülam cam iñchiñ taiñ raquiduam?

⁴ ¿Chumngechi quimafuiñ taiñ inaniefiel Jehová tañi ngülam cam iñchiñ taiñ raquiduam? Fei ramtuhuafuiñ: “¿Chumquen tañi cüme dullial? ¿Maneluuquen tañi pequeel mu müten cam Jehová mu ca tañi huercün dungu?”. Tüfachi troquiñ mu ngüneduamaiñ chumngechi inayafuiñ Jehová tañi ngülam dulliliyiñ quiñe hue cüdau, inei engu tañi niehual, ca elueliyiñmu huercün dungu Jehová tañi troquiñche. Feitachi cüla dungu mu inaduamaiñ chem quelluafeiñmu taiñ cüme dullial.

DULLIFIEL MU QUIÑE CÜDAU

5. Dullifiel mu quiñe cüdau, ¿chem inaduamafuiñ?

⁵ Com iñchiñ ayüqueiñ taiñ nieal quiñe cüdau, femngechi taiñ faltalenoal chem no rume iñchiñ ca taiñ familia (Ecl. 7:12; 1 Tim. 5:8). Quiñeque cüdau mu alünque plata cullingequeingün pu cüdaufe, feimu niequeingün com tañi duamnieel engün ca pichi guardaqueingün. Ca quiñeque cüdau mu tati pu cüdaufe doi pichi cullingequeingün, fei niequeingün tañi ngillacayal tañi duamnieel müten. Feimu pen mu quiñe cüdau, inaduamqueiñ chumte taiñ cullingeal. Huelu inaduamliyiñ fei mu müten, maneluulayafuiñ Jehová mu.

6. Dullifiel mu quiñe cüdau, ¿chumngechi pengelafuiñ taiñ maneluucülen Jehová mu? (Hebreos 13:5).

⁶ ¿Chumngechi pengelafuiñ taiñ recüluucülen Jehová tañi ngülam mu? Petu taiñ llounon quiñe cüdau, raquiduamafuiñ chumngechi feitachi cüdau fültucuafeiñmu Jehová mu cam püntünentuafeiñmu. Fei ramtuhuafuiñ: “¿Chem cüdau femafun? ¿Feipingeafun chi ñi femal Jehová tañi üdequeel? Lloufili feitachi cüdau, ¿catrütupeafeneu mai tañi amual trahun mu, ñi amuldungual ca ñi chillcatual Biblia? Alüñma mu, ¿quisucünupeafun mai tañi pu familia?” (Prov. 6:16-19; Filip. 1:10). Femngechi femle, doi cümeafui taiñ llounoafiel chi cüdau müte ngenole rume cüdau. Taiñ femün mu pengelaiñ taiñ maneluucülen Jehová mu taiñ eluaeteu com taiñ duamnieel (Mat. 6:33; papeltunge Hebreos 13:5).

7, 8. ¿Chumngechi pengeli quiñe peñi tañi maneluuquen Jehová mu? (Ca inaduamnge ti adentun).

⁷ Peaiñ quiñe dungu ñi rupan quiñe peñi Javier pingelu,a Sudamérica mu mülelu. Quisu quimniefui ñi rume falin-ngen tañi maneluhual Jehová mu. Javier feipi: “Pen quiñe cüme cüdau, fentren plata cullingeafun ca rume ayühulafeneu pin”. Huelu Javier rume ayüniefui tañi precursorngeafel. Quisu ca feipi: “Feipingen tañi entrevistangeal. Petu tañi conpunon, llellipufiñ ta Jehová. Maneluucülefun Chau Jehová quimniei chem doi cümeafui ñi femal iñche. Ayüniefun quiñe cüme cüdau, huelu ti cüdau catrütuelimu ñi doi cüdahuelafiel ta Jehová, fei lloulayafiñ pin”.

⁸ Javier feipi: “Entrevistangelu ta iñche, tati gerente feipieneu tañi tarde tripayal ti cüdau mu fentren rupa. Yamquechi feipifiñ tañi pepi femnoal, feichi hora iñche cüdahuelquefiñ ta Jehová pifiñ”. Fei Javier lloulafi ti cüdau. Epu semana rupalu, precursorngerpui. Rupachi antü, perpui quiñe cüdau quiñeque antü müten ñi cüdahual. Taiñ peñi ca feipi: “Chau Jehová allcütuñmaeneu llemai tañi llellipufiel, feimu pen quiñe cüdau ca ñi elueteu ñi precursorngeal. Rume ayüucülen tañi nien tiempo tañi cüdahuelafiel Jehová ca ñi quelluafiel tañi pu peñi ca lamngen”.

9. ¿Chem quimeltuqueiñmu ñi rupan ta Trésor?

⁹ Nieliyiñ quiñe cüdau taiñ ñochiquechi famentumequeteu Jehová mu, ¿chumafuiñ? Peaiñ ñi rupan quiñe peñi Trésor pingelu, Congo mapu mu mülelu. Quisu feipi: “Tati hue cüdau tañi peel fei tañi ayüquefel. Fentren plata cullingequefun. Caquelu pu che rume respetaquefeneu”. Huelu feitachi peñi tarde tripaquefui tañi cüdau mu, feimu fentrenque rupa amuquelafui trahun mu. Tañi cüdau mu ca feipingequefui tañi coilatual, femngechi tañi ellcayal ñi huesa femmequen tati empresa. Taiñ peñi ayüquefui ñi elcünual tañi cüdau. Huelu femli, pehuelayafun ca cüdau pifui. ¿Chem quellueyu? Quisu feipi: “Habacuc 3:17-19 raquiduameleneu nienoli rume cüdau, Jehová quisucünulayaeneu pin, feimu elcünun tañi cüdau. Fentren pu jefe feipiquei quiñe che cüme cullingele, chumafui rume tañi cüdahual, famentuafui tañi familia ca tañi serfifiel ta Dios. Huelu iñche doyümfiñ ta Jehová, feimu rume ayüucületun. Quiñe tripantu rupalu, Jehová quellueneu tañi peal quiñe cüme cüdau, femngechi nien chem tañi duamnieel ca nien tiempo tañi serfiafiel Jehová. Doyümfiliyiñ taiñ cüdahuelafiel Jehová, quiñeque mu pichin plata chi nieafuiñ, huelu Jehová rumel eluaiñmu llemai tañi duamnieel”. Felei llemai, maneluuliyiñ Jehová mu ca tañi feipicünuel, fei cüme dulliaiñ taiñ ayühulafiel, quisu cümelcayaiñmu llemai.

DULLIFIEL MU QUIÑE AFCADI

10. Quiñe che dullifiel mu afcadi, ¿chem dungu mu cuñiutucuhuafui?

¹⁰ Tati curehuen feita quiñe regalo reque cüpalu Jehová mu, feimu quiñe che ayüle ñi nieal afcadi huesa dungu no. Quiñe lamngen ayüle tañi fütangeal, inaduamafui chi tati che ñi chumngen, tañi cüme adngen, tañi chum duamelqueteu, chumngechi pequeyu caquelu che, niepei mai ta plata, niepei mai tañi familia tañi cuidayal.b Com feitachi dungu falin-ngei tañi quimngeal. Huelu tati lamngen raquiduamcülele feitachi dungu mu müten, maneluucülelayafui Jehová tañi ngülam mu.

11. Ayüle nieal quiñe afcadi, ¿chumngechi pengelafui tañi maneluucülen Jehová mu? (1 Corintios 7:39).

¹¹ Pu peñi ca pu lamngen ayülu ñi nieal afcadi inafile Jehová tañi ngülam, fei rume ayühulafingün. Quiñe feitachi ngülam feipilei quiñe che rume huechengele, raquiduamcülelayai tañi quintual afcadi (1 Cor. 7:36). Ca mülei ñi ngüneduamal chem pilen tati Biblia ñi femal quiñe cüme füta ca quiñe cüme domo. Fei ramtuhuafuingün: “¿Femngechi chengepei mai tañi ayünieelchi che?” (Prov. 31:10-13, 26-28; Efes. 5:33; 1 Tim. 5:8). Quiñe che testigongenolu feipieliyu tañi ayünieteu, famentuquefingün. Doi mai inaqueingün Biblia ñi feipin, mür engu mülei ñi serfiafiel Jehová (papeltunge 1 Corintios 7:39). Com piuque mu maneluucüleingün Jehová tañi eluaeteu com tañi duamnieel tañi cüme duamcüleal (Sal. 55:22).

12. ¿Chem quimeltueiñmu ñi femün ta Rosa?

¹² Peaiñ ñi rupan ta Rosa quiñe precursora mülelu Colombia mu. Tañi cüdau mu quimürpufi quiñe huentru testigongenolu, fei ti huentru ayürpueyu. Rosa ca femngechi ayürpufi. Quisu feipi: “Cüme huentrungefui, quelluquefui tati pu che cheu tañi mülemum ca yeniequefui cüme mongen. Cüme duamelqueneu. Tañi chumngen mu cüme fütangealu troquiquefun, huelu poyequelafui ta Jehová. Iñche müna cüdautun tañi pilan piafiel. Feichi mu iñche quisulelu troquiuquefun, ayüniefun tañi fütangeal. Huelu Jehová ñi troquiñche mu turpu pelafiñ compañ”. Huelu Rosa maneluucülefui Jehová tañi cümeque ngülam mu. Eluhui ñi raquiduamal tripafule feitachi huentru engu, hueñancülafui llemai ta Jehová. Feimu Rosa nütramcahuelafi tati huentru, doi cüdahuelniefi müten ta Jehová. Pichi rupalu, amui tati Escuela ñi Pepicangeam pu Amuldunguquelu Ngünechen ñi Gobierno. Feula precursora especialngetui. Quisu feipi: “Jehová fente cümelcaeneu, feimu rume ayüucületun”. Cüdaungei llemai taiñ chaftuafiel taiñ chem feipieteu taiñ piuque. Huelu inafiliyiñ Jehová tañi cümeque ngülam, cümelcangeaiñ llemai.

JEHOVÁ ÑI TROQUIÑCHE FEIPIELIYIÑMU TAIÑ CHUMAL

13. Feipingeliyiñ taiñ chumal, ¿chem raquiduamafuiñ?

¹³ Tati pu loncolelu, ti huitran-ngepaquechi loncolelu, Betel ruca ca ti Troquiñ Adniechequelu ngülamtuqueiñmu chumngechi taiñ serfiafiel ta Jehová. Huelu quiñeque mu adümlayafuiñ chumngelu taiñ feipingen, ramtuhuafuiñ chi: “¿Cümepei mai com taiñ feipingeel?”. Cam raquiduamafuiñ chi: “Pu peñi taiñ elueteu feitachi dungu huelulcauqueingün, ¿manelfalngepei mai?” piafuiñ. Huelu femngechi raquiduam nieliyiñ, maneluucülelayafuiñ Jehová taiñ adnieteu mu.

14. ¿Chem quelluaiñmu taiñ inayal taiñ feipieteu Jehová tañi troquiñche? (Hebreos 13:17).

¹⁴ Feyentuqueiñ Jehová ñi adniefiel ñi troquiñche ca quimniei chem dungu taiñ rupaquen, feimu cüme duam mu inafemquefiyiñ taiñ feipingeel (papeltunge Hebreos 13:17). Quimnieiñ inafiliyiñ taiñ feipingeel, femngechi tati trahunche quiñeucüleai (Efes. 4:2, 3). Ca quimnieiñ tati pu loncolelu huelulcauquefuingün rume, huelu inaniefiliyiñ taiñ feipieteu, Jehová cümelcayaiñmu (1 Sam. 15:22). Ca mülele quiñeque dungu tañi norümtual, Jehová femai puuchi antü mu (Miq. 7:7).

15, 16. ¿Chem quellueyu quiñe peñi ñi inayal ñi feipin Jehová tañi troquiñche? (Ca inaduamnge ti adentun).

¹⁵ Peaiñ quiñe rupan dungu, pengeli fente ñi cüme tripan inayafiel ñi feipin Jehová tañi troquiñche. Perú mapu mu tati pu che huincadunguqueingün, huelu fentren che niequeingün quisu tañi quehun. Quiñe feitachi quehun fei tati quechua. Fentren tripantu mu, pu peñi ca lamngen coneltulelu quechua trahunche mu quintuquefuingün pu quechua dunguquelu tañi amuldungulelafiel engün. Huelu ti gobierno entui hue ley dungu, feimu pu peñi feipingeingün ñi cacünutual chumngechi quintuafiel pu quechua (Rom. 13:1). Feimu quiñeque peñi ca lamngen raquiduamcülehueingün, ¿chumngechi am peafiyiñ pu che quechua dunguquelu? pingün. Huelu inafingün müten tañi feipingeel, fei Jehová quellueyu engün tañi peafiel fentren che quechua dunguquelu.

¹⁶ Quiñe peñi Kevin pingelu loncolei quiñe quechua trahunche mu, fei cüdautui ñi entendeafel tañi feipingeel. Quisu feipi: “Ramtuuquefun, ¿feula cai? ¿Chumngechi amuafuiñ pu quechua mu? Huelu raquiduamün ñi feipin Proverbios 3:5. Ca inaduamün Moisés tañi rupan, Jehová feipieyu tañi entuafiel pu Israel che Egipto mu ca tañi yeafiel Quelü lafquen mu. Pepi montunoalu troquiucülefuingün, feimu Moisés cangentupelafi ñi feipieteu Jehová. Huelu feyentui müten, fei Jehová femi quiñe afmatun dungu tañi montulafiel tañi pu che” (Éx. 14:1, 2, 9-11, 21, 22). Kevin eluucülefui tañi cacünutual chumngechi ñi amuldunguquen, fei ¿chum tripai? Quisu feipi: “Chau Jehová rume cümelcaeiñmu. Cuifi pütrüqueñma trecaquefuiñ, huelu pequefuiñ quiñe cam epu quechua müten. Feula amuqueiñ cheu tañi mülemum fentrenque che quechua dunguquelu. Doi nütramcaquefiyiñ pu che, huiño pemequetufiyiñ ca quimeltuquefiyiñ Biblia mu. Ca doi che amuquei trahun mu”. Felei llemai, inafiliyiñ Jehová taiñ feipieteu, quisu cümelcaqueiñmu.

17. ¿Chem quimürpuiñ tüfachi troquiñ mu?

¹⁷ Tüfachi troquiñ mu, ngüneduampeiñ fente ñi duamfalngen inayal Jehová tañi ngülam cüla falinque dungu mu. Huelu ca mülei taiñ femal fillque dungu taiñ mongen mu. Tüfa ta quiñeque: dulliliyiñ chem pelicula taiñ peal, chumngechi taiñ cüme rupaleal, chumten estudiayaiñ ca chumngechi ñi tremümngeal pu pichiqueche. Petu taiñ chumnon rume, loncontucunieaiñ ñi doi falin-ngen taiñ hueniyefiel ta Jehová. Ca raquiduamtucunieafiyiñ tañi cümeque ngülam ca tañi feipicünuel taiñ cuidayaeteu. Maneluulayaiñ quisu taiñ raquiduam mu müten, femngechi “rumel miyahuaiñ taiñ Chau Ngünechen Jehová ñi üi mu” (Miq. 4:5).