TROQUIÑ ÑI CHILLCATUNGEAL 13
ÜLCANTUN 4 Jehová iñche ñi Camañfe
Maneluucüleaiñ Jehová taiñ rumel quellunieaeteu
“¿Chau Jehová femlayafui tüfa?” (NÚM. 11:23).
¿CHEM QUIMAIÑ?
Tüfachi troquiñ quelluaiñmu taiñ doi maneluhual Jehová taiñ eluaeteu com taiñ duamnieel.
1. ¿Chumngechi maneluhui Moisés entufilu pu Israel che Egipto mu?
HEBREOS pengeli fentrenque che tañi rume feyentuquefel Jehová mu, quiñe tüfa ta Moisés (Heb. 3:2-5; 11:23-25). ¿Chumngechi pengeli tañi feyentulen Moisés? Entufilu tati pu Israel che Egipto mu, llicalafi faraon ca tañi pu hueichafe. Adniefilu tañi pu che rumelu ti Quelü lafquen mu ca ñi miyahun ti huellin mapu meu, maneluhui Jehová mu (Heb. 11:27-29). Alün pu Israel che maneluuhuelaingün Jehová tañi cuñiutucuaeteu, huelu Moisés amulei tañi maneluucülen. Moisés ngünam maneluulai. Jehová elueyu engün com tañi duamniefel tañi mongeluhual huellin mapu mu, elueyu co ca iyael (Éx. 15:22-25; Sal. 78:23-25).a
2. Jehová ramtufi ta Moisés “¿Chau Jehová femlayafui tüfa?”, ¿chemu feipi? (Números 11:21-23).
2 Quiñe tripantu peno ñi tripan pu Israel che Egipto mu, Jehová feipicünui ñi eluafiel ilo com engün. Huelu Moisés maneluulu rume Jehová mu, adümlafui chumngechi ñi femal. Fei Jehová ramtueyu: “¿Chau Jehová femlayafui tüfa?” (papeltunge Números 11:21-23). Hebreo quehun mu, tüfachi versiculo feipilei “¿Chau Jehová ñi cuhu femlayafui tüfa?”. Tüfa mu, Jehová tañi cuhu adentulei tañi fütra nehuen, feimu Jehová ramtufi reque ta Moisés: “Tañi feipin, ¿pepi femlayafun am?”.
3. ¿Chemu ngüneduamafuiñ Jehová ñi ramtufiel Moisés?
3 Eimi ramtuuquefuimi chi: “Jehová, ¿elupeaeneu mai iñche ca tañi pu che tañi duamnieel?”. Com iñchiñ rume quelluaiñmu ngüneduamafiel ñi rupan Moisés ca pu Israel che feichi mu, chumngelu maneluulaingün Jehová mu ñi eluaeteu tañi duamniefel. Ca peaiñ quiñeque texto, femngechi doi maneluhuaiñ Jehová taiñ rumel quelluaeteu.
¿CHEM QUIMELTUAFEIÑMU ÑI FEMÜN MOISÉS CA PU ISRAEL CHE?
4. ¿Chemu pu Israel che maneluuhuelaingün Jehová ñi eluaeteu tañi duamnieel?
4 ¿Chemu pu Israel che maneluuhuelaingün Jehová ñi eluaeteu tañi duamnieel? Tripalu engün Egipto mu, fentren catripanche compañeyu. Deu alüñmaingün ñi miyahun ti huellin mapu meu (Éx. 12:38; Deut. 8:15). Fill antü iquefuingün ti mana, feimu pu catripanche pihuelaingün tañi iyafiel. Ca femngechi femingün quiñeque Israel che, feimu huesa pifingün Moisés (Núm. 11:4-6). Rume illutuquefuingün fillque iyael ñi mülequefel Egipto mu. Feipifilu engün ta Moisés ñi cüpa ilotulen engün, Moisés raquiduami: “¿Cheu chi iñche peafun ilo ñi eluafiel tüfachi pu che?” (Núm. 11:13, 14).
5, 6. Ti pu catripanche ñi hueluraquiduamelfiel ti pu Israel che, ¿chem quimeltuqueiñmu?
5 Feiti pu catripanche mañumquelafuingün Jehová tañi elueteu mu, feimu quiñeque Israel che inayentueyu. Iñchiñ ca femngechi püllecontufiliyiñ pu che quim mañumquenolu, mañumhuelayafuiñ Jehová taiñ cümelcaqueteu. Raquiduamafuiñ chi chem taiñ niequefel cuifi ca ütrirafuiñ chi caquelu ñi nien mu. Doi mai cüme duamcüleaiñ chem taiñ nieel mu, femngechi doi ayüucüleaiñ.
6 Pu Israel che mülefui ñi raquiduamtucual Jehová tañi feipicünueteu. Jehová feipifeyu tañi llohual engün alün cümeque dungu conpule ti Feipicünuelchi Mapu mu, feipilafi tañi eluafiel miyaule ti huellin mapu meu. Ca femngechi iñchiñ müte raquiduamlayaiñ taiñ nienoel feula. Doi mai raquiduamliyiñ chem taiñ eluaeteu Jehová ti hue mapu mu, ayüucüleaiñ. Ca raquiduamafuiñ quiñeque texto mülelu Biblia mu, fei quelluaiñmu taiñ doi maneluhual Jehová mu.
7. ¿Chemu maneluhuafuiñ Jehová taiñ rumel quelluaeteu?
7 Jehová ramtufilu ta Moisés: “¿Chau Jehová femlayafui tüfa?”, duamfui chi Moisés ñi raquiduamal epu falin dungu: 1) Chau Jehová tañi nehuen turpu afquelai, 2) Jehová tañi nehuen puhuafui cheu rume. Felei llemai, tati pu Israel che mülefulu rume huellin mapu mu, Jehová eluafeyu ilo tañi tuduamal engün. Jehová tañi fütra nehuen mu quelluafui tañi pu che cheu rume mülele engün (Sal. 136:11, 12). Rupafuliyiñ huesaque dungu mu, Jehová quisuque quelluafeiñmu cheu rume müleliyiñ (Sal. 138:6, 7).
8. ¿Chem quelluafeiñmu taiñ inayentunoafiel pu Israel che? (Ca inaduamnge ti adentun).
8 Jehová femi tañi feipicünuel, feimu elufi rume fentren codorniz. Huelu pu Israel che mañumtulafingün ta Jehová tüfachi afmatun dungu meu. Alün fei engün ayüingün tañi ngülümal doi tañi duamnieel engün. Feimu doi quiñe antü mequeingün ñi ngülümfiel codorniz. Jehová rume illcui tañi tuduamnon mu engün ca tañi diñmatufengen, feimu castigafi (Núm. 11:31-34). ¿Chem quimeltun entuiñ? Cuñiutucuhuaiñ taiñ diñmatufengenoal. Feimu tunten plata nieliyiñ rume, doi falin-ngei taiñ ngülümal falinque dungu huenu meu. ¿Chem pin tüfa? Mülei taiñ yafüluhual taiñ doi hueniyeafiel Jehová ca Jesús (Mat. 6:19, 20; Luc. 16:9). Femngechi femliyiñ, maneluhuafuiñ Jehová taiñ eluaeteu taiñ duamnieel.
Pu Israel che elungelu codorniz, ¿chumingün? ¿Chem quimeltuafeiñmu? (Inaduamnge parrafo 8).
9. ¿Chem dungu mu maneluucüleafuiñ?
9 Fachantü, Jehová ca femngechi eluucülei tañi quelluafiel tañi pu che. Huelu feipilayafuiñ taiñ turpu faltalenoal plata ca iyael.b Femfule rume, maneluhuafuiñ Jehová turpu quisucünulayaiñmu. Yafültucuaiñmu taiñ chaftuafiel cüdaungechi dungu. ¿Chumngechi pengelafuiñ taiñ maneluuquen Jehová mu? Ngüneduamaiñ epu dungu: 1) quintufiel mu cüdau, ca 2) raquiduamliyiñ taiñ chem duamal doi füchaliyiñ.
MÜTE NIENOLIYIÑ PLATA
10. ¿Chem cüdaungechi dungu chaftuafuiñ?
10 Doi püllelepale ñi afal Huecüfü ñi ngünenieel, doi huesalcalerpuai dungu. Doi calerumetuafui chi pu gobierno, doi müleafui hueichan, nüyün, cürüftucu mahun ca doi huesaque cutran. Feimu niehuetulayafuiñ chi taiñ cüdau ca taiñ niequeel, müleafui chi taiñ lefmahual ca doi cüdautuafuiñ taiñ nieal chem taiñ duamnieel. Femngechi dungu rupale, ¿chumngechi pengelafuiñ taiñ maneluucülen Jehová mu?
11. Müte nienoliyiñ plata, ¿chem quelluafeiñmu? (Lucas 12:29-31).
11 Rume quelluaiñmu feipifiliyiñ Chau Jehová chem taiñ raquiduameleteu (Prov. 16:3). Llellipuafiyiñ taiñ eluaeteu quimün taiñ cüme dullial ca taiñ rumeñma raquiduamcülenoal (papeltunge Lucas 12:29-31). Ca quelluen piafiyiñ taiñ cüme duamcüleal taiñ nieel mu (1 Tim. 6:7, 8). Taiñ publicacion mu ngüneduamafuiñ cümeque ngülam taiñ chaftuafiel müte nienoliyiñ plata. Alün che quellueyu quiñeque video ca quimeltun mülelu taiñ pagina mu.
12. Ñi cümelcaleal taiñ familia, ¿chem ramtuhuafuiñ taiñ cüme dullial?
12 Quiñeque eluuquei tañi cüdahual cañpüle, huelu quisucünuquefi tañi pu che. Fei rupachi antü, ngüneduamingün tañi femnoafel. Petu taiñ connon quiñe cüdau mu, ngelai taiñ raquiduamal taiñ huehual plata müten. Doi mai ngüneduamaiñ ¿quellupeaeneu mai iñche ca tañi pu che ñi pülleconcüleal Jehová mu? (Luc. 14:28). Feimu ramtuhuaiñ: “¿Chem rupayafui tañi curehuen mu camapuleli? ¿Amupean mai com ti trahun meu ca amuldungun meu? Ca, ¿trürcülean tati trahunche mu?”. Niele pichiqueche, ca mülei ñi ramtuhual: “¿Cüme quimeltuafiñ tañi pu pichiqueche ñi hueniyeafiel Jehová iñche camapulefuli?” (Efes. 6:4). Dullilmi tami chumal, inayafimi Jehová tañi raquiduam. Inalayafimi ñi raquiduam tami pu che ca tami pu hueni poyequenofilu ta Jehová.c Ngüneduamaiñ ñi rupan taiñ peñi Tony mülelu Asia occidental mu. Elungei quiñeque cüdau tañi doi huehuafel plata, huelu ca pais mu. Fei llellipui, nütramcai tañi domo engu, fei famentufi chi cüdau ca ngüneduamingu chumngechi doi pichin plata mu ñi mongeluhual. ¿Chum duameleyu tañi dullin? Tony feipi: “Cüme tripai ñi dullin. Quellufiyiñ alün che ñi pülleconal Jehová mu ca tañi pu pichiqueche cüme hueniyefingün ta Jehová. Rüfngei ñi feipin Mateo 6:33, doyümfiliyiñ taiñ cüdahuelafiel Jehová, fei eluaiñmu com taiñ duamnieel”.
RAQUIDUAMCÜLELIYIÑ CHEM CHUMAL DOI FÜCHALIYIÑ
13. ¿Chumngechi pepicahuafuiñ petu taiñ füchanon?
13 Raquiduamcüleliyiñ chem chumal doi füchaliyiñ, pengelafuiñ tunte taiñ maneluucülen Jehová mu. Biblia yafültucuqueiñmu taiñ cüdahual, femngechi taiñ pepicaucüleal acule ti antü taiñ doi füchayal (Prov. 6:6-11). Tati plata quelluquei, feimu pepi femliyiñ, pichi guardacünuafuiñ plata taiñ nieal doi füchaliyiñ. Huelu doyümlayafiyiñ ti plata taiñ mongen mu (Ecl. 7:12).
14. ¿Chumngechi quelluafeiñmu Hebreos 13:5 taiñ rume raquiduamcülenoal doi füchaliyiñ?
14 Jesús quiñe pengelün dungu mu, feipi quiñe che re ngülümquelu plata huelu femnole Jehová ñi ayüqueel, pengeli ñi huedhuedngen (Luc. 12:16-21). Inei no rume quimlayafui chem ñi rupayal cüpalechi antü meu (Prov. 23:4, 5; Sant. 4:13-15). Jesús ca feipifi tañi pu discipulo tañi eluucüleal tañi elcünual chem tañi nieel (Luc. 14:33). Hunen siglo mu, tati pu Judea cristiano ayühunquechi elcünuingün tañi niequefel engün (Heb. 10:34). Ca femngechi fachantü, alün taiñ pu peñi niehuelai tañi cüdau ca tañi niequefel quelluntucunofilu politica dungu (Apoc. 13:16, 17). ¿Chumngelu femingün? Fei engün rüf maneluucülei Jehová ñi feipicünun: “Turpu elcünulayayu, quisucünulayayu rume” (papeltunge Hebreos 13:5). Pepicauqueiñ taiñ ngülümnieal pichin plata doi füchaliyiñ, huelu maneluuqueiñ Jehová mu ruparumele quiñe dungu taiñ raquiduamquenofel.
15. Pu chau, ¿chem mülei ñi raquiduamal tañi pu yall mu? (Ca inaduamnge ti adentun).
15 Quiñeque troquiñ mapu meu, pu che eluuquei tañi nieal yall, femngechi füchale engün ñi eluaeteu chumngechi mongeluhuam. Huelu Biblia feipi tati pu chau mülei ñi cüme dapiafiel pichiqueche ca eluafiel com tañi duamnieel (2 Cor. 12:14). Feingei, fücharpule tati pu chau, duamnieafui tañi quellungeal plata mu cam caquelu chemcün meu, fei tañi pu yall ayühunquechi femqueingün (1 Tim. 5:4). Huelu tati pu chau maneluuquelu Jehová mu doi falintuquefi tañi pu yall ñi serfiafiel Jehová, feita doi ayühulqueyu. Feimu doyümquelafi tañi pu yall ñi huehual fentren plata tañi quelluaeteu (3 Juan 4).
Pu curehuen inaquefingün ñi feipin Biblia tañi dullial chem chumal. (Inaduamnge parrafo 15).d
16. Pu chau, ¿chumngechi pepicayafui tañi pu yall ñi mongeluhual? (Efesios 4:28).
16 Pu chau, pepicafilmün tamün pu yall chumngechi ñi mongeluhual, pengelelafimün tamün maneluucülen Jehová mu. Quimelelafimi fente falin-ngei tañi cüdaufengeal. Petu pichicalu engün, quimelelafimi tañi cüdaufengeal (Prov. 29:21; papeltunge Efesios 4:28). Mülele colegio mu engün, quelluafimi tañi cüme estudiantengeal. Pu chau ngüneduamafui taiñ publicacion mu cümeque ngülam, femngechi ñi quelluafiel tañi pu yall cüme dullial tunteñma estudiayal. Quelluafui tañi pu yall tañi nieal quiñe cüdau ñi mongeluhual, huelu cafei tañi doi amuldungual ca precursorngerpuafuingün.
17. ¿Chem dungu mu maneluucüleiñ?
17 Tati pu hueniyefilu Jehová maneluuquei tañi eluaeteu tañi duamnieel. Quisu pepiluucülei ca ayüquei ñi femal. Doi püllelepale ñi afal Huecüfü ñi ngünenieel, doi falin-ngeai taiñ maneluhun Jehová mu. Chem rupafule rume, com piuque mu maneluucüleaiñ Jehová taiñ eluaeteu taiñ duamnieel. Cüme quimnieiñ Jehová niei ti nehuen taiñ quelluaeteu cheu rume müleliyiñ.
ÜLCANTUN 150 ¡Jehová montulaimu llemai!
a Inaduamnge ti troquiñ “Pu papeltuquelu ñi ramtuqueel” tripalu Ti Huerquen octubre 2023 tripantu mu.
b Inaduamnge ti troquiñ “Preguntas de los lectores” tripalu La Atalaya 15 septiembre, 2014 tripantu mu.
c Inaduamnge ti troquiñ “Nadie puede servir a dos amos” tripalu La Atalaya 15 conchi abril, 2014 tripantu mu.
d ¿CHEM PENGELI TI ADENTUN? Quiñe curehuen nütramcamequefi internet mu tañi püñeñ, fei tañi füta engu cüdauquei ñi deumayafiel quiñe Trahunhue Ruca.