Taiñ hueniyehun cümelcaqueiñmu

1, 2. Jehová, ¿chem doi falintuquei? Ca, ¿chem ayüquei taiñ femal?

JEHOVÁ rume falintuquei chumngechi taiñ troquiquefiel pu che. Jesús quimeltueiñmu taiñ piuqueyeafiel caquelu pu che chumngechi taiñ piuqueyeucülen iñchiñ (Mat. 22:37-39). Tüfa mu ca coneltulei caquelu pu che tunte serfiquenofilu rume ta Jehová. Cüme duamelafiyiñ com pu che, femngechi inayentuquefiyiñ taiñ Chau Jehová, “fei eluquefi antü tati cümeque che ca huesaque che. Cafei eluquefi mahun tati norngelu ca pu norngenolu” (Mat. 5:45).

² Chau Jehová com pu che piuqueyefi, huelu doi cüme piuqueyefi tañi feyentunieteu (Juan 14:21). Jehová ayülei taiñ inayentuafiel, feimu feipiqueiñmu taiñ rume piuqueyeafiel taiñ pu peñi, pu lamngen (Rom. 12:10; 1 Ped. 4:8). Tüfachi piuqueyen trürümngeafui chumngechi piuqueyequefiyiñ taiñ pu che ca taiñ pu cümeque hueni.

3. ¿Chem femafuiñ taiñ doi piuqueyehual?

³ Tati piuqueyen trürümngeafui quiñe anümca mu, mülei ñi hutrucongeal tañi doi tremcüleal. Ca femngechi tati piuqueyen mülei taiñ hutrucoafiel reque tañi tremcüleal. Apostol Pablo feipifi pu cristiano: “Piuqueyeniehuaimün chumngechi piuqueyeuquei pu familia” (Heb. 13:1). Jehová ayüquei taiñ piuqueyeucüleal taiñ pu peñihuen ca lamngenhuen. Tüfachi troquiñ mu, peaiñ chumngelu taiñ doi hueniyeafiel taiñ pu peñi, pu lamngen ca chumngechi femafuiñ.

CHUMNGELU DOI HUENIYEAFIYIÑ TAIÑ PU PEÑI CA LAMNGEN

4. ¿Chem chumafuiñ taiñ falintunieafiel taiñ quiñeucülen? (Salmo 133:1; ca inaduamnge ti adentun).

⁴ (Papeltunge Salmo 133:1). Ti salmista reque, iñchiñ ca feipiafuiñ: “¡Müna cümei ca ayüfalngei pu peñi ca lamngen ñi quiñentrür müleal!”. Huelu rupachi tripantu mu, femngechi raquiduamhuelayafuiñ chi. Raquiduamnge tüfa: fill antü pefiliyiñ quiñe fütra anümca, ngüneduamhuelayafuiñ tañi fente adcülen. Ca femngechi fill antü pefiliyiñ ñi quiñeucülen Jehová tañi pu che, ca femngechi rupayafui. Fei, ¿chem quelluafeiñmu taiñ rumel falintunieafiel taiñ pu peñi, pu lamngen? Raquiduamaiñ ñi falin-ngen caque quiñeque engün iñchiñ mu ca trahunche mu.

5. Pefiyüm pu che taiñ fente piuqueyeucülen, ¿chem quimtucuqueingün?

⁵ Quiñeque che hue amulu taiñ trahun mu, afmatulehuequei fente taiñ piuqueyeuquen, quimtucuqueingün taiñ rüf cristianongen. Jesús feipi: “Hueluquentu piuqueyehulmün, com pu che quimai tamün inaniemufiel ta iñche” (Juan 13:35). Peaiñ ñi rupan quiñe domo. Concülefui universidad mu, fei eluhui ñi chillcatual Biblia. Amui quiñe fütra trahun mu cüla antüngelu. Ti hunen antü mu aflu ti fütra trahun, feipifi tañi quimeltuqueteu Biblia: “Tañi chau ca tañi ñuque turpu pancoquelafeneu (rofülquelafeneu). Huelu hunen antü mu müten, doi 52 che pancoeneu. Tüfachi pu che mu Jehová pengeleneu ñi piuqueyeteu. Ayün ñi coneltual tüfachi troquiñche mu”. Tüfachi domo amulei ñi chillcatun Biblia, fei fautizahui 2024 tripantu meu. Felei llemai, hue amuyüm quiñeque che trahun mu, ngüneduamquei taiñ cüme femquen ca taiñ piuqueyeuquen, feimu ca ayüqueingün ñi serfiafiel Jehová (Mat. 5:16).

6. Taiñ hueniyefiel pu peñi, pu lamngen, ¿chumngechi cuñiutucuqueiñmu?

⁶ Hueniyefiel taiñ pu peñi, pu lamngen ca quelluqueiñmu taiñ pülleleal Jehová mu. Pablo feipifi pu cristiano: “Fill antü hueluconque yafültucuniehuaimün”, “yafü piuquecünuulayaimün tati culpan ñi pepiluhun mu, feiti ngünencachequelu” (Heb. 3:13). Ñochiquechi famtripalerpuliyiñ Jehová tañi rüpü mu, fei adnieafui quiñe peñi cam lamngen taiñ quelluaeteu (Sal. 73:2, 17, 23). ¡Müna cüme quellu nieiñ!

7. ¿Chemu taiñ piuqueyehun quelluqueiñmu taiñ quiñeucüleal? (Colosenses 3:13, 14).

⁷ Jehová tañi pu chengen, com yafüluuqueiñ taiñ hueluconque piuqueyehual, feimu nieiñ alün cümelcan (1 Juan 4:11). Quiñe tüfa: taiñ piuqueyehun mu hueluconque perdonauqueiñ, feimu rüf quiñeucüleiñ (Efes. 4:2-6; papeltunge Colosenses 3:13, 14). Feimu taiñ trahun mu mülei ayühun ca hueniyehun, tüfa pengequelai chem cangelu troquiñche mu no rume.

HUELUCONQUE YAMUHUAIÑ

8. ¿Chumngechi quelluqueiñmu Jehová taiñ quiñeucüleal?

⁸ Taiñ culpafengen mu rume, quiñeucüleiñ taiñ pu peñi, pu lamngen com mapu mu. Jehová tañi duam mu müten rupaquei tüfa (1 Cor. 12:25). Biblia feipi: “Chau Ngünechen mai ta quimeltueimünmeu tamün hueluconque piuqueyehual” (1 Tes. 4:9). Biblia mu, Chau Jehová quimeltuqueiñmu chumngechi taiñ hueluconque hueniyehual. Iñchiñ cüme chillcatuquefiyiñ Biblia ca inaquefiyiñ tañi feipin, femngechi eluuqueiñ taiñ quimeltuaeteu Jehová (Heb. 4:12; Sant. 1:25). Femngechi femqueiñ com pu testigo.

9. ¿Chumafuiñ taiñ huelucontu yamuhual? (Romanos 12:9-13).

⁹ Biblia, ¿chumngechi quelluqueiñmu taiñ hueluconque hueniyehual? Peafiyiñ Pablo ñi ngülam (papeltunge Romanos 12:9-13). Quisu feipi: “Huneleaimün tamün huelucontu yamuhual”. ¿Chumngechi femafuiñ tüfa? Raquiduamaiñ chumafuiñ taiñ pengelal rüf piuqueyehun. Por ejemplo, perdonayafiyiñ taiñ pu peñi, pu lamngen, cüme llohuafiyiñ engün ca eluafiyiñ taiñ nieel (Efes. 4:32). Esperalayaiñ caquelu taiñ püllecontuaeteu, iñchiñ mai huneleaiñ taiñ femal. Femngechi femliyiñ, femtripayai ñi feipin Jesús: “Tati llouquelu ñi elungeel niei ayühun. Huelu doi niei ayühun tati hulquelu ñi nieel” (Hech. 20:35).

10. Taiñ quellucheal, ¿chumngelu mülei taiñ cüdaufengeal? (Ca inaduamnge ti adentun).

¹⁰ Pablo nütramcalu taiñ yamuhual, ca feipi: “Cüdaufengeaimün, chofüngelayaimün”. Quiñe che cüdaufengelu cüme entuquei tañi cüdau. Biblia ca ngülamtueiñmu: “Pepi quellulmi, catrütuuquilnge tami femal cümeque dungu feichi pu felelu ñi llohual” (Prov. 3:27, 28). Feimu ngüneduamliyiñ quiñe peñi cam lamngen ñi duamnien quellu, pürüm eluhuaiñ taiñ quelluafiel. “Ca antü hula feman” pilayaiñ, ca raquiduamlayaiñ “¿ca che quellupelayai?” (1 Juan 3:17, 18).

11. ¿Chem quelluafeiñmu taiñ doi quiñeucüleal?

¹¹ ¿Ca chumngechi pengelafuiñ taiñ hueluquentu yamuhun? Perdonahuaiñ. Biblia feipi: “Elcünulayaimün tañi rupayal ti antü tamün illculen” (Efes. 4:26). ¿Chumngelu fente falin-ngei taiñ femal? Femngechi ‘eluulayaiñ taiñ ngüchaltucuaeteu tati Huecüfü’ (Efes. 4:27). Biblia mu, Chau Jehová fentren rupa feipiqueiñmu taiñ perdonahual. Quiñe tüfa feipilei: “Hueluquentu perdonahuaimün com piuque mu” (Col. 3:13). Perdonafiliyiñ taiñ pu peñi, pu lamngen, doi hueniyeafiyiñ engün. Femngechi femliyiñ, taiñ trahunche cüme yeucüleai ca quiñeucüleai (Efes. 4:3). Felei llemai, ñi quiñeucüleal ca tüngcüleal Jehová tañi troquiñche, duamfali taiñ perdonahual.

12. ¿Chumngechi quelluqueiñmu Jehová taiñ perdonahual?

¹² Cüdautuafuiñ taiñ perdonayafiel quiñe che taiñ huesa duameleteu. Huelu Jehová tañi nehuen mu femafuiñ llemai. Pablo deu feipilu taiñ yamuhual ca taiñ cüdaufengeal, ca feipi: “Chau Ngünechen ñi nehuen mu yafüluucülemün” (Rom. 12:11). Feimu Chau Dios tañi nehuen mu yafüluhuafuiñ taiñ piuqueyehual ca taiñ perdonahual com piuque mu. Feimu rume llellipuquefiyiñ Jehová taiñ quelluaeteu (Luc. 11:13).

ELUHUAIÑ TAIÑ QUIÑEUCÜLEAL

13. ¿Chem dungu püntülafeiñmu?

¹³ Jehová ñi troquiñche mu coneltulei “itrofill che” (1 Tim. 2:3, 4). Com iñchiñ caquerumeiñ, feimu trürlai quiñeque dungu taiñ dulliqueel. Caquerumequei taiñ tucutuuquen, chem lahuen taiñ pütocoal ca chumngechi taiñ cüme rupayal. Cuñiutucuunoliyiñ, taiñ caquerumen iñchiñ püntülafeiñmu (Rom. 14:4; 1 Cor. 1:10). Huelu Chau Jehová quimeltuqueiñmu taiñ hueluconque piuqueyehual, feimu respetaquefiyiñ caquelu che ñi raquiduam, “femngepe iñche ñi feipin müten” piquelaiñ (Filip. 2:3).

14. ¿Chem eluhuaiñ taiñ femal ca chumngelu?

¹⁴ ¿Ca chem femafuiñ ñi püntüunoal ti trahunche? Rumel yafültucuafiyiñ taiñ pu peñi ca lamngen (1 Tes. 5:11). Famülque mu, fentren che amuldunguhuenolu ca entungelu trahunche mu huiñotuingün Jehová mu. Iñchiñ eluuqueiñ taiñ piuqueyenquechi llohuafiel (2 Cor. 2:8). Quiñe lamngen 10 tripantu amuldunguhuelafui, fei huiñotulu Trahunhue Ruca mu, feipi: “Com tañi pu lamngen ayühunquechi chalipaeneu” (Hech. 3:19). ¿Chum duameleyu femngechi tañi lloungen? Fei feipi: “Ngüneduamün Jehová tañi petu quellueteu tañi huiño ayüucületual”. Eluuliyiñ taiñ yafültucucheal, Jesús adnieafeiñmu taiñ füshcüduamelafiel pu huesa duamcülelu (Mat. 11:28, 29).

15. ¿Ca chem femafuiñ taiñ quiñeucüleal? (Ca inaduamnge ti adentun).

¹⁵ Taiñ püntüunoal, ca cuñiutucuhuaiñ chem taiñ feipin. Biblia feipi: “Ti quehun cümecümetuquei iyael, ca femngechi ti pilun ñi allcüelchi dungu ngüneduamquefi ñi cümen cam ñi cümenon” (Job 12:11). Ti deumaiyaelfe hune ngüneduamquefi ñi cümentufalngen tañi iyael petu tañi hulnofiel. Ca femngechi iñchiñ petu taiñ dungunon, ngüneduamaiñ taiñ chum duamelafiel caquelu che taiñ feipin mu, femngechi taiñ rumel yafültucucheal (Sal. 141:3; Efes. 4:29).

16. ¿Inei engün doi mülei ñi yafültucual tañi feipin mu?

¹⁶ Pu füta, pu chau, ñuque mülei ñi doi ngüneduamal chem ñi feipiquen ñi yafültucuafiel caquelu (Col. 3:19, 21; Tito 2:4). Ca femngechi tati pu loncolelu tañi feipin mu yafültucuquefi ti trahunche ufisa reque felelu (Is. 32:1, 2; Gál. 6:1). Biblia feipi: “Quiñe dungun feipingelu puuchi antü meu, ¡müna cüme dungu tati!” (Prov. 15:23).

RÜF PIUQUEYEHUAIÑ

17. ¿Chumafuiñ rüf piuque mu ñi tripayal taiñ piuqueyehun?

¹⁷ Apostol Juan feipi: “Re huenche hun mu müten piuqueyechequelayaimün. Doi mai tamün femün mu quimfalngepe tamün piuqueyehun, piuque mu tripape” (1 Juan 3:18). ¿Chumafuiñ rüf piuque mu ñi tripayal taiñ piuqueyehun? Doi fentren tiempo trürcüleliyiñ taiñ pu peñi ca lamngen mu, doi cüme hueniyehuaiñ, femngechi doi piuqueyehuaiñ. Trahun mu ca amuldungun mu eluhuaiñ taiñ nütramcayafiel taiñ pu peñi ca lamngen. Elcünuaiñ tiempo taiñ pemeafiel engün. Femngechi femliyiñ, quimfalai Jehová taiñ quimeltuqueteu taiñ hueluconque piuqueyeuquen (1 Tes. 4:9). Ti salmista reque, feipiaiñ: “¡Müna cümei ca ayüfalngei pu peñi ca lamngen ñi quiñentrür müleal!” (Sal. 133:1).