TROQUIÑ ÑI CHILLCATUNGEAL 15
ÜLCANTUN 30 Ñi Ngünechen, ñi cüme Chau ca tañi Hueni
Hueniyefiel Jehová cümelcaqueiñmu
“Iñche cai, cümei ñi fülconcülen Ngünechen mu” (SAL. 73:28).
¿CHEM QUIMAIÑ?
Chumafuiñ taiñ doi cüme hueniyeafiel Jehová ca chumngechi cümelcaqueiñmu.
1, 2. 1) ¿Chem mülei taiñ femal taiñ nieal quiñe cüme hueni? 2) ¿Chem ngüneduamaiñ feitachi troquiñ mu?
¿NIEIMI quiñe cüme hueni? ¿Acordaimi chumngechi tami hueniyefiel? ¿Fentrenque rupa trür mülequepelaimu? Quimürpupelafimi chem ñi rupan tañi mongen mu ca chem tañi ayüqueel ca chem tañi ayüquenoel. Ayüpelafimi tañi chumngen, fei cüpa inayentufimi, feimu rume piuqueyerpufimi tami hueni.
2 Tami cüme hueniyeafiel quiñe che, mülefui tami entual tiempo. Ca femngechi mülei taiñ femal taiñ cüme hueniyeafiel ta Jehová. Feitachi troquiñ mu, peaiñ chumngechi doi hueniyeafuiñ Jehová. Huelu hunelu mu, peaiñ chumngechi cümelcayafeiñmu taiñ hueniyeafiel.
3. ¿Chumngelu raquiduamafuiñ taiñ cümelcaqueteu hueniyefiliyiñ Jehová?
3 Rume falin-ngei taiñ raquiduamal chemu fente cümelcayafeiñmu hueniyefiliyiñ Jehová (Sal. 63:6-8). Taiñ adümafiel tüfa, raquiduamaiñ quiñe ejemplo mu. Fentrenque che quimniei tañi cüme feleal mülefui tañi iyal cümeque iyael, pütocoal, ejercicioal ca cüme umautual. Huelu fentren engün raquiduamcülelai tüfachi dungu mu, feimu cuidauquelaingün tañi tremoleal. Huelu quiñe che raquiduamcülele fente ñi cümelcayaeteu femal tüfachi dungu, doi eluhuai ñi femal. Ca femngechi iñchiñ quimnieiñ fente cümelcayaiñmu hueniyeafiel Jehová. Feimu raquiduamliyiñ chumngechi cümelcayaiñmu, doi eluhuaiñ taiñ hueniyeafiel (Sal. 119:27-30).
4. ¿Chem ngüneduami ti huirintuculu Salmo 73:28?
4 (Papeltunge Salmo 73:28). Tati huirintuculu ti Salmo 73 Leví tuhun chengefui ca musicongefui ti templo mu. ¿Fentren tripantu serfiquepelafui ta Jehová? Huelu ngüneduami quiñe falin dungu: mülefui ñi quisu raquiduamal ñi cümelcaqueteu hueniyefiel Jehová ca quimelelafiel caquelu che. ¿Iñchiñ cai? ¿Chumngechi cümelcaqueiñmu? Ngüneduamafiyiñ.
HUENIYEFILIYIÑ JEHOVÁ, CÜME DUAMCÜLEAIÑ
5. 1) Hueniyefiliyiñ Jehová, ¿chemu cüme duamcülequeiñ? 2) Jehová ñi fütra quimün, ¿chumngechi cuñiutucuqueimu eimi? (Proverbios 2:6-16).
5 Doi hueniyefilu iñchiñ Jehová, doi cüme duamcülequeiñ (Sal. 65:4). ¿Chemu feipiafuiñ tüfa? Fillque dungu mülei. Iñchiñ inafilu ti ngülam mülelu Biblia mu, cüme miyauqueiñ. Jehová tañi quimeltuqueel cuñiutucuqueiñmu huesaque dungu meu ca taiñ huesa femnoal (papeltunge Proverbios 2:6-16). Feimu llemai Biblia feipilei: “Ayühun-ngei tati che quimchengerpulu, ca tati che quim ngüneduamürpulu” (Prov. 3:13).
6. ¿Chemu fente huesa duamcülehuei ti salmista?
6 Hueniyefiliyiñ rume Jehová, ca hueñancüafuiñ quiñeque mu. Ti huirintuculu ti Salmo 73 hueñancürpui huelulcalelu ñi raquiduam. Feiti che inaquenolu Jehová ñi ngülam doi cümelcalelu troquifi ca ütrirfi, femngechi raquiduam huesa duameleyu ca illculerpui. Quisu raquiduamfui tati pu huesaque che ca mallma piuquengelu doi ricungei ca cutrancauquelai rume, huelu tüfa rüfngelai (Sal. 73:3-7, 12). Tati salmista fente tañi huesa duamcülen, ramtuufui: “¿Cümepei mai tañi serfiquefiel Jehová?”. Fente tañi hueñancülen mu, feipi: “Rüfcünu, ngünam lif piuquengen ca ngünam pengelquen tañi nor piuquengen” (Sal. 73:13).
7. Hueñancülen mu iñchiñ, ¿chem chumafuiñ? (Ca inaduamnge ti adentun).
7 Tati salmista fütra hueñancülelu rume, huelu femcünuulai. Conpui Jehová tañi “yamfal ruca mu”, üyeu Jehová norümtueyu ñi raquiduam (Sal. 73:17-19). Jehová iñchiñ taiñ doi cüme hueni. Hueñancün mu iñchiñ, fei quimniei. Feimu llellipuafuiñ taiñ adnieaeteu chem chumal. Yafültucungeafuiñ Biblia mu ca tati trahunche mu, femngechi doi nehuen-ngeaiñ taiñ serfinieafiel Jehová hueñancülen mu rume. Fill raquiduamcüleliyiñ rume, Jehová quelluaiñmu taiñ tüngcüleal (Sal. 94:19).a
Tati huirintuculu Salmo 73 huitralei Jehová ñi “yamfal ruca mu”. (Inaduamnge parrafo 7).
HUENIYEFIEL MU JEHOVÁ, AYÜUCÜLEIÑ CA NIEIÑ MANELUHUN
8. ¿Chem epu dungu meu quelluqueiñmu hueniyefiel Jehová?
8 Hueniyefiliyiñ Jehová quelluqueiñmu epu falin dungu meu. Hunen dungu: doi adümuuqueiñ chem chumal taiñ mongen mu. Ca epungechi dungu: maneluucüleiñ cümeque dungu ñi mületual, tüfa rüf femtripayai (Jer. 29:11). Doi ngüneduamafiyiñ tüfachi epu dungu.
9. ¿Chemu ayühulqueiñmu hueniyefiel Jehová?
9 Hueniyefilu Jehová iñchiñ, adümfiyiñ taiñ mongen, feimu ayüucüleiñ. Fachantü, alün che feipiquei ngelai Dios, feimu adümquelaingün chemu mülei mongen. Ca raquiduamqueingün cüpalechi antü mu ñi apümcangeal che mapu meu. Huelu iñchiñ ngüneduamfilu Biblia, rüf quimnieiñ ñi mülen ta Dios. Ca feipilayafuiñ taiñ ngünam serfiquefiel, Biblia cai feipilu Chau Dios “ñi fürenequefiel feichi pu che tañi serfiqueteu com piuque mu” (Heb. 11:6). Chumngechi taiñ deumangen, duamqueiñ taiñ serfiafiel Jehová. Feimu femün mu tüfa, rume ayüucülequeiñ (Deut. 10:12, 13).
10. ¿Chem feipicünufi Jehová tati pu maneluulu fei meu? (Salmo 37:29).
10 Alün che nielaingün chem maneluhun no rume. Fei engün cüdauqueingün, nierpuquei tañi afcadi, niequeingün tañi pu yall, ngülümqueingün plata fente puule ñi cüdau engün, fei ca müten. Raquiduamtucunielafingün ta Dios tañi mongen mu. Huelu iñchiñ taiñ serfiquefiel ta Jehová, quimnieiñ fei taiñ cuidaqueteu (Sal. 25:3-5; 1 Tim. 6:17). Iñchiñ hueniyefilu cai Chau Jehová, maneluucüleiñ fei meu ca üngümcüleiñ ñi femal com tañi feipicünuel. Fei feipicünui alün cümeque dungu taiñ eluaeteu, quiñe tüfa: taiñ rumel püramyeafiel Jehová ti hue mapu meu (papeltunge Salmo 37:29).
11. 1) ¿Chumngechi cümelcaqueiñmu taiñ hueniyefiel Jehová? 2) ¿Chum duamquei Jehová taiñ hueniyefiel mu?
11 Hueniyefiel mu Jehová, cümelcaqueiñmu fillque dungu meu. Quiñe tüfa: Jehová feipicünui taiñ perdonayaeteu repentiutuliyiñ taiñ culpan mu (Is. 1:18). Feimu ngelai taiñ rumel huesa duamcüleal taiñ cuifi culpan meu (Sal. 32:1-5). Ca quimnieiñ hueniyefiel mu Jehová, ayühulquefiyiñ (Prov. 23:15). Tami cüme hueniyefiel mu Jehová, ¿ca mülepelai alün caquelu dungu tami cüme duamelqueteu? Feula ngüneduamaiñ ca chem femafuiñ taiñ doi hueniyeafiel Jehová.
¿CHUMNGECHI DOI CÜME HUENIYEAFUIÑ JEHOVÁ?
12. ¿Chem chumimi tami cüme hueniyeafiel Jehová?
12 Petu taiñ fautizaunon, femiyiñ alün dungu taiñ cüme hueniyeafiel Jehová. Quimfiyiñ ti rüf dungu Jehová mu ca Jesús, repentiutuiñ taiñ culpan mu, pengeliyiñ taiñ feyentun Jehová mu ca eluhuiyiñ taiñ inayafiel Biblia mu müleyechi ngülam. Huelu taiñ doi cüme hueniyerpuafiel Jehová, fentecünulayaiñ taiñ femal com tüfachi dungu (Col. 2:6).
13. ¿Chem cüla dungu femafuiñ taiñ doi hueniyeafiel Jehová?
13 ¿Chem mülei taiñ femal taiñ doi cüme hueniyeafiel Jehová? 1) Mülei taiñ cüme papeltunieafiel Biblia. Papeltufilu iñchiñ, ngelai taiñ adümafiel quiñeque dungu müten. Doi mai eluhuaiñ taiñ adümafiel Jehová tañi raquiduam ca chem ayüniei iñchiñ taiñ femal. Ca taiñ mongen mu inayafiyiñ ti ngülam mülelu Biblia mu (Efes. 5:15-17). 2) Ngüneduamaiñ chumngechi pengelqueiñmu Jehová taiñ fente piuqueyeteu, femngechi doi foliluhuai taiñ maneluhun. 3) Üdenieafiyiñ com dungu Jehová ñi üdequeel ca hueniyelayafiyiñ pu che huesa dungu femquelu (Sal. 1:1; 101:3).
14. ¿Chem femafuiñ fill antü taiñ ayühulafiel Jehová? (1 Corintios 10:31; ca inaduamnge ti adentun).
14 (Papeltunge 1 Corintios 10:31). Rume falin-ngei taiñ femal cümeque dungu taiñ ayühulafiel ta Jehová. Re amulayaiñ müten trahun meu ca re amuldungulayaiñ, doi mai com taiñ femqueel fill antü mülei taiñ ayühulafiel Jehová. Quiñe tüfa: nor chengeaiñ ca ayühunquechi eluafiyiñ caquelu taiñ nieel (2 Cor. 8:21; 9:7). Jehová ca feipiquei taiñ falintuafiel ti mongen taiñ elueteu, feimu ngüneuqueiñ ti putun dungu mu ca tunte taiñ iqueel ca cuidauqueiñ taiñ tremoleal. Eluulu iñchiñ taiñ ayühulafiel Jehová pichique dungu meu rume, doi piuqueyequeiñmeu (Luc. 16:10).
Cuñiutucuhuaiñ taiñ manejayafiel ti auto, ejercicioaiñ taiñ tremoleal, iyaiñ iyael taiñ cümelcaqueteu ca misayaiñ taiñ nieel. Femliyiñ, ayühulafiyiñ Jehová. (Inaduamnge parrafo 14).
15. ¿Chem ayüquei Jehová taiñ femal caquelu pu che meu?
15 Chau Jehová cümelcaquefi pu norngelu ca tati pu norngenolu (Mat. 5:45). Fei ayüniei taiñ ca femngechi cümelcayafiel com pu che. Chau Jehová ayüniei tañi pu che ñi dunguyechenoal ca yafcahulchenoal ca ñi rumel ñom piuquengeal com pu che meu (Tito 3:2). Feimu doicülelu troquiuquelaiñ feichi pu che meu serfiquenofilu Jehová (2 Tim. 2:23-25). Cümelcafiliyiñ caquelu che, doi hueniyeafiyiñ Jehová.
HUELULCAULIYIÑ RUME, FÜLCONAIÑ JEHOVÁ MU
16. ¿Chum duami ti huirintuculu ti Salmo 73?
16 Quiñeque mu, raquiduamafuiñ Jehová taiñ fente hueniyenoeteu taiñ huelulcan mu. Femngechi dungu mu rupaliyiñ, raquiduamafuiñ ñi feipin ti Salmo 73. Ti salmita feipi: “Tañi namun epeque huelu amufui, tañi trecan epe trayaftucufui” (Sal. 73:2). Ca feipi: “Iñche quim raquiduamquelafun, ngüneduamquelafun chem no rume. Tami adquiñ mu, culliñ reque felequefun” pifi ta Jehová (Sal. 73:21, 22). Tati salmista raquiduami chi tañi huelulcan mu Jehová piuqueyehuelaeyu ca perdonalayayu.
17. 1) Huesa duamcülelu, ¿chumi ti salmista? 2) ¿Chem quimeltuqueiñmu ñi rupan ti salmista? (Ca inaduamnge ti adentun).
17 Tati salmista huesa duamcülelu rume, quimniefui ñi duamfalngen tañi pülleconal Jehová meu. Feimu feipifi: “Feula eimi mu mülen fill antü. Eimi nünieñmaen tañi man cuhu. Eimi adniequeen tami ngülam mu. Rupachi antü mu, ca cümelcayaen” (Sal. 73:23, 24). Ca femngechi iñchiñ huesa duamcüleliyiñ taiñ huelulcan mu ca yafüngehuenoliyiñ, llellipuafiyiñ Jehová taiñ quelluaeteu (Sal. 73:26; 94:18). Fütra culpaliyiñ rume, huiñotuafuiñ Jehová mu. Quisu pepicaucülei taiñ perdonayaeteu (Sal. 86:5). Huesa duamcülen mu iñchiñ, doi falin-ngei taiñ pülleconal Jehová mu (Sal. 103:13, 14).
Müte hueniyenofilu Jehová troquiuliyiñ, doi llellipuafiyiñ Jehová ca rumel trahuluhuaiñ. (Inaduamnge parrafo 17).
TURPU AFLAYAI TAIÑ DOI HUENIYEAFIEL JEHOVÁ
18. ¿Chemu turpu aflayai taiñ doi hueniyeafiel Jehová?
18 Rumel amuleai taiñ doi hueniyeafiel Chau Jehová. Biblia feipi fentrelei Chau Jehová ñi quimün ca tañi adümuhun, feimu turpu aflayai taiñ doi cüme quimfiel (Rom. 11:33).
19. ¿Chem maneluhun eluqueiñmu ñi feipilen ti Salmos?
19 Ti Salmo 79:13 feipi: “Iñchiñ, tami pu chengen ca tati pu ufisa tami camañquefiel, rumel mañumtuhuaiñ, iñchiñ ca taiñ pu cüpanche fampüramuhuaiñ”. Maneluhuafuimi llemai: doi hueniyefilmi Chau Jehová, fei rumel cümelcayaimu. Feimu feipiafuimi: “Chau Dios nehuentucuqueneu tañi piuque. Iñche rumel nieafiñ ta Chau Ngünechen” (Sal. 73:26).
ÜLCANTUN 32 ¡Coneltupange Chau Jehová ñi pu che mu!
a Quiñe che rume alüñmale ñi fill raquiduamcülen cam ñi hueñancülen, duamnieafui tañi amual doctor mu. Tami doi quimal, peafimi Ti Huerquen numero 1 tripalu 2023 tripantu mu.