TROQUIÑ ÑI CHILLCATUNGEAL 14
ÜLCANTUN 8 Jehová incañpeaiñmu
“Dulliaimün inei tamün serfiafiel”
“Iñche ca tañi pu che serfiafiyiñ ta Chau Jehová” (JOS. 24:15).
¿CHEM QUIMAIÑ?
Acordayaiñ chem dungu mu eluhuiyiñ taiñ serfinieafiel Jehová.
1. Taiñ ayüucüleal, ¿chumaiñ? ¿Chemu? (Isaías 48:17, 18).
TAIÑ Huenu Chau Jehová rume piuqueyenieiñmu, feimu ayüquei taiñ ayüucüleal fachantü ca cüpalechi antü mu (Ecl. 3:12, 13). Eluqueiñmu fentren pepiluhun taiñ nieal. Huelu deumalaeiñmu taiñ quisutu mandahual ca taiñ dullial chem ñi cümen ca ñi cümenon (Ecl. 8:9; Jer. 10:23). Jehová quimniei iñchiñ taiñ ayüucüleal mülei taiñ serfiafiel ca allcütuafiel (papeltunge Isaías 48:17, 18).
2. 1) ¿Chem ayüquei taiñ raquiduamelaeteu Huecüfü? 2) Jehová, ¿chumi tañi feipin mu ta Huecüfü?
2 Huecüfü cüpa raquiduameleiñmu ayüucüleafuiñ serfinienofiliyiñ rume Jehová. Cüme miyahuafuimün pi ta Huecüfü (Gén. 3:4, 5). ¿Chumi Jehová ñi pengelal Huecüfü ñi coilangen? Elcünui ti pu huentru ñi quisutu ngünehual. Quimfali llemai, pu huentru ñi gobierno huesa tripaquei. Huelu Biblia pengeli fentrenque huentru ca domo ayühunquechi serfiquefiel mu ta Jehová. Jesús doi ayüucülefui ñi serfiniefiel mu Jehová. Feitachi troquiñ mu, peaiñ chumngelu Jesús eluhui ñi serfinieafiel Jehová, chemu püramyefali Jehová ca chemu eluhuiyiñ taiñ serfiafiel Jehová.
¿CHEMU JESÚS ELUHUI TAÑI SERFIAFIEL TA JEHOVÁ?
3. ¿Chem feipifi Huecüfü ta Jesús? ¿Chumi Jesús?
3 Jesús mülepalu mapu mu, dulli inei tañi serfiafiel. Pichi rupalu Jesús ñi fautizahun, Huecüfü pengelelfi com ti gobierno mapu meu. Fei feipi: “Püramyeeli quiñe rupa müten, com tüfa eimingeai”. Huelu Jesús feipieyu: “¡Püntütripange Satanás! Chau Ngünechen ñi huirintucuel feipilei: ‘Mülei tami püramyeafiel ta Chau Ngünechen Jehová, fei müten mülei tami poyeafiel’” (Mat. 4:8-10). Peaiñ chemu Jesús feipifi tati Huecüfü.
4, 5. ¿Chemu Jesús eluhui tañi serfiafiel ta Jehová?
4 ¿Chemu Jesús eluhui tañi serfinieafiel Jehová? Hunelu mu, fente tañi piuqueyeniefiel mu (Juan 14:31). Ca quimniei Jehová mülei ñi püramyengeal (Juan 8:28, 29; Apoc. 4:11). Ca quimniefui Jehová mu ñi tuhun ta mongen ca fentrenque cümeque dungu ca ñi maneluhun-ngen (Sal. 33:4; 36:9; Sant. 1:17). Jesús turpu coilatulaeyu Jehová ca com tañi nieel eluquefeyu tañi Chau (Juan 1:14). Huelu ti Huecüfü coilatufengefui, ütrirfengefui ca quisutu duamuuquefui. Tañi duam mu, pu che culpai ca larpui (Juan 8:44). Jesús cüme quimniefui ta Jehová ca Huecüfü. Fei raquiduamlafui rume tañi inayentuafiel ta Huecüfü ñi caiñetuafiel Jehová (Filip. 2:5-8).
5 Jesús ca quimniefui serfiniefile Jehová, cümeque dungu rupayafui (Heb. 12:2). Püntütripanofule Jehová mu, püramyeafui tañi Chau ñi üi ca ngehuelayai culpan ca lan dungu.
¿CHEMU MÜLEI TAÑI PÜRAMYENGEAL JEHOVÁ?
6, 7. 1) ¿Chemu fentrenque che poyequelafi ta Jehová? 2) ¿Chumngelu Jehová müten mülei ñi püramyengeal?
6 Fachantü, fentrenque che serfilafi ta Jehová tañi quimnofiel mu. Quimlaingün ñi chumngen ta Jehová, tañi fente cüme Dios ngen ca com tañi femqueel com pu che mu. Femngechi chengequefui pu che tañi amuldungulelfiel Pablo Atenas mu (Hech. 17:19, 20, 30, 34).
7 Pablo feipifi feichi pu che tati rüfngechi Dios “eluquefi ta com pu che mongen, neyen ca com dungu”. “Fei ñi duam mu mai ta mongeleiñ, trecayauqueiñ, fei müleiñ tüfa mu”. Ca feipi: “Quiñe huentru meu müten deumai com pu troquiñche”, feimu Jehová müten mülei ñi püramyengeal (Hech. 17:25, 26, 28).
8. 1) ¿Chem dungu femlayafui Jehová iñchiñ mu? 2) Jehová, ¿chumngechi pengelqueiñmu taiñ piuqueyenieteu?
8 Jehová deumaeteu am iñchiñ, quisu pifule obligayafeiñmu taiñ serfiafiel, huelu Jehová obligaquelaeiñmu llemai. Quisu ayüquei com che tañi rumel hueniyeaeteu (1 Tim. 2:3, 4). Feimu pengelqueiñmu quisu ñi mülen ca taiñ rume piuqueyenieteu. Cafei pepicaqueiñmu taiñ feipiafiel caquelu pu che cümeque dungu ñi femal pu che mu ca chumngechi tañi femürpual (Mat. 10:11-13; 28:19, 20). Jehová fill püle elcünui trahunche taiñ püramyeafiel ca elcünui pu loncolelu taiñ quelluaeteu (Hech. 20:28).
9. ¿Chumngechi Jehová pengelelquefi com che tañi piuqueyeniefiel?
9 Jehová eluquefi cümeque dungu com che tañi feyentunoeteu rume, femngechi pengeli fente ñi piuqueyechequen. Fentren tripantu mu, fentren pu che femqueingün quisu tañi ayüqueel müten. Femfulu rume, Jehová eluqueyu com tañi duamnieel ñi mongeleal ca ayüucüleal (Mat. 5:44, 45; Hech. 14:16, 17). Femngechi nieingün hueni ca tañi pu familia, cüdahuafuingün ca ayüucüleafuingün (Sal. 127:3; Ecl. 2:24). Feimu feipiafuiñ taiñ Chau Jehová rüf piuqueyequefi com pu che (Éx. 34:6). Feula, cüme raquiduamaiñ chemu taiñ serfiquefiel Chau Dios ca chumngechi cümelcaqueiñmu.
CHEMU ELUUQUEIÑ TAIÑ SERFIAFIEL TA JEHOVÁ
10. 1) ¿Chemu serfiquefiyiñ Jehová? (Mateo 22:37). 2) ¿Chumngechi cümelcaqueiñmu Jehová tañi perdonachequen? (Salmo 103:13, 14).
10 Jesús reque, iñchiñ serfiquefiyiñ Jehová fente taiñ piuqueyeniefiel mu (papeltunge Mateo 22:37). Doi quimfiel mu Jehová, doi fülconqueiñ quisu mu. Por ejemplo, Jehová eluuquei taiñ perdonayaeteu. Feyentunoeteu mu tati pu Israel che, Jehová feipifi: “Fürenemuchi, elcünumün tamün huesa rüpü” (Jer. 18:11). Jehová quimniei iñchiñ taiñ huelulcauquen (papeltunge Salmo 103:13, 14). Raquiduamün mu chumtenque rupa tami perdonaqueteu Jehová, ¿nengümelqueimu tami piuque tami rumel serfinieafiel?
11. ¿Ca chem dungu mu eluucülequeiñ taiñ serfinieafiel Jehová?
11 ¿Ca chem dungu mu eluucülequeiñ taiñ serfinieafiel Jehová? Quimiyiñ Jehová felei ñi püramyengeal, feimu serfifiyiñ (Mat. 4:10). Cafei püntütripanoliyiñ Jehová mu, quimnieiñ ñi rupayal cümeque dungu. Quelluqueiñ ñi fampüramafiel Jehová tañi üi. Pengelqueiñ Huecüfü ñi coilatufengen ca ayühulquefiyiñ Jehová. Eluuliyiñ taiñ serfiafiel ta Jehová, rumel mongen nieafuiñ, femngechi aflayai taiñ serfiniefiel (Juan 17:3).
12, 13. ¿Chem quimeltueiñmu ñi rupan Yanet ca Pamela?
12 Pichicalu müten iñchiñ, piuqueyerpuafuiñ ta Jehová. Doi tripantu rupale, doi piuqueyerpuafuiñ. Peaiñ ñi rupan epu lamngenhuen, Yanet ca Pamela pingelu.a Hue eluulu engu tañi papeltuafiel ta Biblia, Yanet 11 tripantu niefui, Pamela 10 tripantu niefui. Tañi chau ca tañi ñuque pilaingu tañi papeltuafiel ta Biblia. Huelu elungeingu permiso ñi estudiayal ta Biblia pu testigo engün. Huelu feipingeingu afchi semana mu ñi amual iglesia mu quiñentrür tañi familia engu. Yanet feipi: “Tañi quimürpuel Biblia mu quellueneu ñi chaftuafiel tañi pu compañ, tañi drogatunoal ca connoal pod cudumuhun mu”.
13 Petu huechengelu Yanet ca Pamela, eluhuingu tañi amuldungual. Rupachi tripantu mu, precursorangerpui engu ca cuidaquefuingu tañi chau ca ñuque deu füchalu engu. Com tañi femün Jehová quisu engu mu, Yanet feipi: “Quimürpun Jehová quisucünuquelafi tañi pu hueni. Rüfngei tañi feipin 2 Timoteo 2:19: ‘Chau Jehová quimniefi tañi pu che’”. Rüfngei llemai, Jehová cuidaquefi tañi pu serfiqueteu.
14. ¿Chumngechi incayafuiñ Jehová? (Ca inaduamnge ti adentun).
14 Fentren coilaque dungu feipingei Jehová mu, feimu ayüqueiñ ñi liftuñmangeal Chau Jehová ñi üi. Raquiduamnge tüfa mu: nielmi quiñe hueni cüme piuquengelu, quelluchefengelu ca perdonachequelu. Huelu feipingelmi tami hueni ñi huesa chengen, ñi coilatufengen, ¿chumafuimi? Incayafuimi llemai. Ca femngechi feipingelmi coilaque dungu Jehová mu, ayüqueiñ taiñ incayafiel (Sal. 34:1; Is. 43:10). Ayüliyiñ taiñ serfiafiel Jehová com taiñ piuque mu, incayafiyiñ tañi üi taiñ feipin mu ca taiñ femquen mu.
¿Incañpeafimi Jehová tañi üi? (Inaduamnge parrafo 14).b
15. Pablo eluulu ñi serfinieafiel Jehová, ¿chem cümeque dungu llohui? (Filipenses 3:7, 8).
15 Taiñ ayühulafiel Jehová ca taiñ doi cüdahuelafiel, cüme duam mu adcünuqueiñ taiñ mongen. Femngechi femi Pablo. Elcünui tañi falin huentrungequefel pu judio mu ñi inayentuafiel Jesús ca serfiafiel ta Jehová (Gál. 1:14). Feimu ayüucülequefui tañi mongen mu ca elungei tañi amual huenu mu ñi ngünenieal Jesús engu. Pablo turpu huiño huitraulai tañi femün mu. Iñchiñ ca femngechi femlayaiñ serfifiliyiñ ta Jehová (papeltunge Filipenses 3:7, 8).
16. ¿Chem quimeltuqueiñmu tañi rupan ta Julia? (Ca inaduamnge ti adentun).
16 Doyümfiliyiñ taiñ poyeafiel ta Jehová, fei cümelcayaiñmu feula ca cüpalechi antü mu. Tüfa ñi rupan taiñ lamngen Julia. Pichicalu Julia, ülcantuquefui tañi iglesia mu. Julia adümuulu ñi ülcantual, quimeltungei ñi cantante de operangerpual. Pichiñma mu, yengequefui tañi ülcantual falinque escenario mu. Fei fentrenque che quimürpueyu. Quisu mülelu quiñe falin academia de musica mu, quiñe tañi compañ nütramcaeyu Chau Dios meu, “Dios ta Jehová pingei” pieyu. Pichin rupalu, Julia papeltui ta Biblia epu rupa semana mu. Rupachi antü mu, Julia pihuelai tañi cantante de operangerpual. Doi mai eluhui tañi serfiafiel ta Jehová. Tüfa rume cüdaungefui. Julia feipi: “Fentrenque che feipieneu tañi ngünamcamequen tañi tiempo ca tañi adümuhun. Huelu iñche ayüniefun com tañi piuque mu ñi serfiafiel ta Jehová”. Rupalu 30 tripantu, ¿chem raquiduamquei Julia? Feipi: “Ayüucületun, iñche quimnien Jehová eluaeneu com tañi ayüqueel piuque mu cüpalechi antü mu” (Sal. 145:16).
Doyümfiliyiñ taiñ serfiafiel Jehová, rüf ayühun mongen nieaiñ. (Inaduamnge parrafo 16).c
SERFINIEAFIMI JEHOVÁ
17. 1) ¿Chem mülei ñi femal pu petu serfiquenofilu Jehová? ¿Chumngelu? 2) Pu serfiquefilu Jehová, ¿chem mülei ñi quimtucual?
17 Pichilehuei ñi acual Chau Jehová ñi antü. Ti apostol Pablo huirintucui: “‘Pichiñma mu’ ‘feiti cüpalelu acuai, alüñmalayai’” (Heb. 10:37). ¿Chem pengeli tüfa? Pichilehuei tiempo, feimu pu serfiquenofilu Jehová mülei ñi pürüm eluhual tañi serfiafiel (1 Cor. 7:29). Iñchiñ cai pu serfiquefilu Jehová, ¿chem mülei taiñ quimtucual? Quimnieiñ ñi rupayal cüdaungechi dungu, huelu “pichiñma mu” müten.
18. ¿Chem ayüquei Jehová ca Jesús taiñ femal?
18 Jesús feipifi tati pu che tañi discipulongerpual ca tañi inanieaeteu (Mat. 16:24). Fentren tripantu yenieliyiñ rume taiñ serfiniefiel Jehová, fentecünulayaiñ. Rüfngei taiñ rume cüdaucüleal ca quiñeque mu cüdaungeafui. Huelu ayüucüleafuiñ ca cümeque dungu llohuafuiñ feula ca cüpalechi antü mu (Sal. 35:27).
19. ¿Chem quimeltuqueiñmu tañi rupan quiñe hueche peñi?
19 Quiñeque che feipiquei: “Serfifiliyiñ Jehová, cüme rupalayafuiñ ca ayüucülelayafuiñ”. Huechengelmi, “serfifili Jehová ¿ayüucülepean mai?” piafuimi chi. Peaiñ ñi rupan quiñe hueche peñi. Feipi: “Cüme rupanoalu troquiuquefun tañi serfiquefiel mu Jehová. Fentrenque hueche taiñ trür tremün, cüme rupalu fiesta mu troquiquefuiñ engün. Tripaquei üllchaque domo engün ca aucantuquefuingün videojuego quehuan dungu mu. Iñche mülefui ñi amual müten trahun mu ca amuldungual”. Tañi femngechi raquiduamün mu, ¿chumi ti hueche? Feipi: “Femün quiñeque huesaque dungu ñi femqueel caquelu pu hueche. Ellaca mu, cüme rupafun. Huelu rüf ayüucülelafun. Fei raquiduamürpun chumngechi cümelcaqueiñmu inayal Jehová ñi huercün dungu. Feimu eluhun tañi poyeafiel ta Jehová com tañi piuque mu. Femlu iñche, inaduamün Jehová ñi allcütumequen com tañi llellipufiel”.
20. ¿Chem eluucülequeiñ taiñ femal?
20 Quiñe salmista ülcantulelfi ta Jehová: “Ayühun niei tati huentru eimi tami dullifiel tañi mongeleam tami ruca meu” (Sal. 65:4). Eluucüleaiñ taiñ rumel poyenieafiel ta Jehová. Josué reque, feipiaiñ: “Iñche ca tañi pu che serfiafiyiñ ta Chau Jehová” (Jos. 24:15).
ÜLCANTUN 28 ¿Chumngechi hueniyerpuafuiñ Jehová?
a Tüfachi troquiñ mu, ca üi tuculelngei ta quiñeque che.
b ¿CHEM PENGELI TI ADENTUN? Huecuntu cheu ñi femngen quiñe fütra trahun, mülei quiñe troquiñche huesa dungumequelu pu testigo mu. Quiñe domo inafül rupai. Fei hula, quisu rumei cheu ñi mülen tati carrito ñi allcütual ti rüf dungu.
c ¿CHEM PENGELI TI ADENTUN? Adentucünungei ñi femün ta Julia ñi serfirpuafiel Jehová.