Turpu quisulelaiñ

1, 2. 1) ¿Chemu feipiafuiñ taiñ quisulenon rupan mu huesaque dungu mu? 2) ¿Chem ngüneduamaiñ tüfachi troquiñ mu?

QUIÑE che ñamle dumiñcülechi mahuida mu, llicayafui ca quimlayafui ñi chumngechi tripayal. Ca femngechi troquihuafuiñ iñchiñ rupan mu alün cüdaungechi dungu mu. Huelu quisulelaiñ, taiñ Chau Jehová ngüneduamquei taiñ rupamequen. Caque quiñeque iñchiñ feipiqueiñmu: “Iñche ta quelluayu” (Is. 41:10).

² Tüfachi troquiñ mu ngüneduamaiñ chumngechi quelluqueiñmu Jehová: 1) adnieiñmu, 2) eluqueiñmu taiñ duamnieel, 3) cuñiutucuqueiñmu, ca 4) yafültucuqueiñmu. Fei feipicünui taiñ quisucünunoaeteu chem cüdaungechi dungu rupaliyiñ rume. Felei, quisulelaiñ.

JEHOVÁ ADNIEIÑMU

3, 4. ¿Chumngechi adniequeiñmu Jehová? (Salmo 48:14).

³ (Papeltunge Salmo 48:14). Jehová quimniei iñchiñ taiñ quisutu adnienoafel taiñ mongen, feimu eluuquei taiñ adnieaeteu. ¿Chumngechi femquei? Quiñe tüfa, elueiñmu ti Biblia (Sal. 119:105). Ngüneduamfiel mu ti Biblia, Jehová quelluqueiñmu taiñ cüme dullial ca taiñ inayentuafiel ñi chumngen. Inafiliyiñ ñi feipin Biblia, ayüucüleaiñ feula ca nieafuiñ afnoachi mongen.a Jehová quimeltuqueiñmu taiñ perdonacheal, taiñ nor chengeal, ca taiñ rüf piuque mu piuqueyehual (Sal. 37:8; Heb. 13:18; 1 Ped. 1:22). Femngechi femliyiñ, doi cüme fütangeaiñ, doi cüme chaungeaiñ ca doi cüme hueningeaiñ.

⁴ Biblia mu, ca huirintuculei quiñeque che ñi rupan cüdaungechi dungu iñchiñ reque (1 Cor. 10:13; Sant. 5:17). Papeltufilu iñchiñ ca inafilu chumngechi ñi chaftufiel, quelluqueiñmu epu dungu mu. Quiñe dungu, quimtucuiñ iñchiñ müten taiñ rupanon cüdaungechi dungu mu. Caquelu che ca femngechi rupaingün, huelu Jehová quellueyu engün (1 Ped. 5:9). Ca epu dungu, quimqueiñ chumngechi chaftuafiel ti dungu ca taiñ ayüucüleal (Rom. 15:4).

5. ¿Ca chumngechi adnieiñmu Jehová?

⁵ ¿Ca chumngechi adnieiñmu Jehová? Taiñ pu peñi ca pu lamngen mu.b Pu huitran-ngepaquechi loncolelu alün rupa pemequefi pu trahunche. Tañi cümeque hueupin meu yafültucuquefi ca quelluquefi ñi quiñeucüleal (Hech. 15:40–16:5). Pu loncolelu eluucülei taiñ quelluaeteu com iñchiñ taiñ pülleconal Jehová mu (1 Ped. 5:2, 3). Tati pu chau quelluquefi tañi pu yall ñi piuqueyeafiel ta Jehová ca tañi cüme dullial. Ca quimeltuquefi ñi papeltuafiel Biblia, amual trahun mu ca ñi amuldungual (Prov. 22:6). Doi adümuuchi lamngen quelluquefi tati doi üllchaque lamngen, yafültucufi ca elufi cümeque ngülam. Cafei tañi cüme femün mu, pu üllchaque lamngen inayentuafeyu engün (Tito 2:3-5).

6. ¿Chumngechi falintuquefiyiñ Jehová taiñ adnieteu?

⁶ Jehová elueiñmu com taiñ duamnieel taiñ adnieaeteu. ¿Chumngechi pengelafuiñ taiñ falintuquefiel? Biblia feipi: “Maneluunge Jehová meu com tami piuque mu, ca eimi tami raquiduam mu recüluuquinolnge”. Femngechi femliyiñ, Jehová ‘norümaiñmu cheu taiñ miyahual’ (Prov. 3:5, 6). Cuñiutucuqueiñmu taiñ connoal huesaque dungu meu, fei doi ayüucülequeiñ. Rume mañumcüleiñ fente taiñ piuqueyeteu Jehová ca taiñ eluqueteu cümeque ngülam (Sal. 32:8).

JEHOVÁ ELUQUEIÑMU TAIÑ DUAMNIEEL

7. Ñi feipilen Filipenses 4:19, ¿chumngechi quelluqueiñmu Jehová?

⁷ (Papeltunge Filipenses 4:19). Jehová adnieiñmu ca eluqueiñmu taiñ duamnieel: iyael, ropa ca cheu taiñ müleal (Mat. 6:33; 2 Tes. 3:12). Taiñ chengen mu raquiduamcüleafuiñ chumngechi nieal taiñ duamnieel, huelu Jehová ayünielai taiñ rume raquiduamtucunieafiel tüfachi dungu (Mat. 6:25). ¿Chumngelu? Chau Jehová feipicünui taiñ turpu quisucünunoaeteu (Mat. 6:8; Heb. 13:5). Maneluhuafuiñ Jehová ñi femal tañi feipicünuel ca eluaeteu taiñ duamnieel.

8. Jehová, ¿chumngechi quellufi David?

⁸ Raquiduamaiñ Jehová chumngechi quellufi David. Lefmauquiyaulu tañi huesa femnoaeteu Saúl, cüdaungechi dungu rupai. Feichi mu, Jehová elueyu fei ca tañi pu compañ com tañi duamnieel tañi mongeleal. David acordalu chumngechi tañi cuidaeteu Jehová, feipi: “Cuifi huechengequefun, fei feula füchalehuen, huelu turpu pequelafiñ ñi quisucünungen ti norngelu, ca tañi pu yall ñi mongetuyauquen cofque” (Sal. 37:25). David reque, eimi ca femngechi ngüneduampelaimi chumngechi tami cuidaeteu Jehová ca tañi cuidafiel tami pu peñi ca lamngen.

9. Jehová, ¿chumngechi quelluquefi tati pu huesa rupalu? (Ca inaduamnge ti adentun).

⁹ Jehová ca cuidaquefi tañi pu che rupan mu fütra huesaque dungu. Hunen siglo mu, tati pu cristiano ngüñüutulu engün, caquelu tañi pu peñi yeleleyu iyael (Hech. 11:27-30; Rom. 15:25, 26). Ca femngechi fachantü, Jehová tañi troquiñche quelluquefi tañi pu peñi ca lamngen duamlu tañi quellungeal. Rupan mu nüyün, cürüftucu mahun ca fütra mangin co, Jehová tañi duam mu tati pu trahunche eluufemquei tañi quellual. Eluquefingün iyael, co, lahuen, ropa tañi pu peñi ca lamngen mülelu cheu ñi rupan feichi dungu. Ca adcünungequei pu peñi cüme elcünutualu ti ruca ca ti Trahunhue Ruca ñi huesañmahun. Ca müchai müten yafültucungequei Biblia mu feichi pu huesa rupalu.c

10, 11. ¿Chem quimeltueiñmu Boris tañi rupan?

¹⁰ Chau Jehová rume duamtuchequei ca cümelcaquefi tañi pu serfiquenoeteu rume. Iñchiñ inayentuquefiyiñ Jehová, feimu eluuqueiñ taiñ cümelcayafiel pu che testigongenole rume (Gál. 6:10). Tüfa taiñ femün mu, pu che eluhuafui tañi pülleconal Jehová mu. Peafiyiñ ñi rupan quiñe huentru Boris pingelu. Fei directorngefui quiñe colegio Ucrania mu mülelu. Fei testigongelafui, huelu cüme femquefui ca respetaquefui pu estudiante testigongelu. Conlu ti hueichan, lefmahui cangelu lof mu fente cuñihun-ngenolu. Üye mu, taiñ pu peñi ca lamngen quellueyu. Pichi rupalu, amui ti Trahun Jesús tañi lan ñi acordangeal. Acordalu tañi fente quellungen, Boris feipi: “Pu Dunguquelu Ineingen Jehová rume duamtueneu ca cuidaeneu. Rume mañumniefiñ engün”.

¹¹ Com iñchiñ inayentuafuiñ Jehová tañi cutranpiuqueyechen, ¿chumngechi femafuiñ? Quelluafiyiñ pu duamnielu quellu testigongenole rume (Luc. 6:31, 36). Maneluuqueiñ pu che ngüneduamle taiñ piuqueyefiel, eluhuafui ñi doi quimafiel Jehová ca ñi serfiafiel (1 Ped. 2:12). Huelu femnole engün rume, iñchiñ ayüucüleaiñ taiñ quellufiel mu, iñchiñ cai ayühulqueteu taiñ hulün mu (Hech. 20:35).

JEHOVÁ CUÑIUTUCUQUEIÑMU

12. Jehová, ¿chem feipicünui ñi femal tañi pu che mu? (Salmo 91:1, 2, 14).

¹² (Papeltunge Salmo 91:1, 2, 14). Jehová feipicünui taiñ eluaeteu com taiñ duamnieel taiñ hueniyenieafiel. Jehová cuñiutucunieafi tañi pu che tañi poyeaeteu chumngechi tañi ayüqueel, Huecüfü pepi catrüconquelai (Juan 17:15). Acule ti “fütra cutrancahun”, Jehová quelluafi ca montulafi ñi pu che ñi serfinieaeteu. Jehová feipicünulu cai, maneluuqueiñ tañi femal (Apoc. 7:9, 14).

13. Jehová, ¿chumngechi cuñiutucuqueiñmu caque quiñeque iñchiñ?

¹³ Jehová, ¿chumngechi cuñiutucuquefi caque quiñeque tañi pu che? Elcünui Biblia, femngechi quimeltuqueiñmu chem ñi cümen ca chem ñi cümenon (Heb. 5:14). Inaniefiel mu Biblia ñi feipin, cuñiutucuqueiñ taiñ hueniyefiel Jehová. Cafei cüme dulliqueiñ taiñ chumal, femngechi nieiñ ayühun ca cüme felen (Sal. 91:4). Ca femngechi Chau Jehová cuñiutucuqueiñmu trahunche mu (Is. 32:1, 2). Taiñ pu peñi ca lamngen piuqueyefingün Jehová ca inaqueingün ñi feipin. Trürcülelu iñchiñ, yafüluuqueiñ ca nehuencünuuqueiñ taiñ connoal huesaque dungu mu (Prov. 13:20).

14. 1) Jehová, ¿chemu montulquelaeiñmu com taiñ huesa rupamequen mu? 2) ¿Chem dungu mu maneluhuafuiñ? (Salmo 9:10; ca inaduamnge ti quimal dungu).

¹⁴ Cuifi mu, Jehová montulfi quiñeque tañi pu che ñi huesalcangenoal ca ñi langümngenoal. Huelu rumel femlai tüfa. Biblia feipi com pu che “huesa ruparumeafui” (Ecl. 9:11). Cuifi mu ca fachantü, quiñeque mu Jehová montulquelafi tañi pu che ñi caiñetungeal ca ñi langümngeal cütu. ¿Chemu? Ñi pengelal Huecüfü ñi fütra coilangen (Job 2:4-6; Mat. 23:34). Quiñeque mu, Jehová entuñmalayaiñmu taiñ huesa rupamequen, huelu maneluucüleafuiñ taiñ turpu quisucünunoaeteu (Sal. 9:10).d

JEHOVÁ YAFÜLTUCUQUEIÑMU

15. Jehová, ¿chumngechi yafültucuqueiñmu llellipun mu, Biblia mu ca trahunche mu? (2 Corintios 1:3, 4).

¹⁵ (Papeltunge 2 Corintios 1:3, 4). Quiñeque mu fill raquiduamcülequeiñ, fei cutrancülei taiñ piuque ca ngañhuadcülequeiñ. Feula chi femngechi dungu mu rupamequefuiñ ca quisulelu troquihuafuiñ. Huelu Jehová quimniei com taiñ rupamequen, ca “yafültucuqueiñmeu chem huesa dungu mu rume rupaliyiñ”. ¿Chumngechi yafültucuqueiñmu? Tati llellipun mu, Biblia meu ca taiñ pu peñi ca pu lamngen mu. Llellipufiliyiñ Jehová, fei eluaiñmu tañi cüme tüngün (Filip. 4:6, 7). Biblia mu, Jehová pengeleiñmu taiñ piuqueyenieteu, ngülamtuqueiñmu taiñ quimchengeal ca eluqueiñmu maneluhun. Trahun mu, taiñ pu peñi ca pu lamngen pengeleiñmu taiñ piuqueyenieteu ca yafültucuqueiñmu Biblia mu.

16. Ñi rupan Natán ca Priscila, ¿chem quimeltueimu?

¹⁶ Ngüneduamaiñ chumngechi Jehová yafültucufi Biblia meu quiñe curehuen Estados Unidos mu. Cuifi mu, Natán ca Priscila eluhuingu tañi huiñamtuhual ca mapu ñi doi amuldungual. Natán feipi: “Maneluuquefuyu taiñ cümelcayaeteu Jehová”. Huelu puulu tañi hue trahunche mu, cutraningu ca niehuelaingu plata. Feimu huiñotuingu tañi cuifi trahunche mu, huelu amulei tañi nienon plata. Natán feipi: “Ramtuuquefun chumngelu Jehová cümelcalaeiñmu chumngechi taiñ raquiduamquen. Ca feipin ‘¿huesa fempen mai?’”. Huelu rupachi antü, ngüneduamingu tañi quisucünunoeteu Chau Jehová. Natán ca feipi: “Doi huesa rupamequelu iñchiu, doi papeltuquefiyu Biblia, fei yafültucuqueiñmu ca ngülamtuqueiñmu quiñe cüme hueni reque. Quimürpuyu tayu fente raquiduamnoal tayu rupamequen, doi mai chumngechi yafültucuqueiñmu Jehová. Femngechi doi maneluuqueyu Jehová tayu quelluaeteu cüpalechi antü mu”.

17. ¿Chumngechi yafültucungei taiñ lamngen Helga? (Ca inaduamnge ti adentun).

¹⁷ Taiñ pu peñi ca pu lamngen rume yafültucuafeiñmu. Ngüneduamaiñ ñi rupan Helga, mülelu Hungría mapu mu. Fentren tripantu mu cüdaungechi dungu rupai, feimu hueñancülefui ca falinolu troquiuquefui. Huelu feula ngüneduami chumngechi yafültucueyu Jehová ti trahunche meu. Feipi: “Iñche mülefui tañi cüdahual, dapiafiel tañi püñeñ cutrancülelu ca chaftuafiel fillque dungu, feimu quiñeque mu nehuen-ngehuenolu troquiuquefun. Huelu Jehová rumel quellueneu. Deu amulei 30 tripantu, huelu fill antü Jehová yafültucuqueneu chumngechi ñi feipicünuel. Fentren rupa mu yafültucuqueneu tañi pu lamngen ñi feipin mu. Doi duamnielu iñche ñi yafültucungeal, pu lamngen saquieneu cam huercüeneu quiñe mensaje cam tarjeta”.

18. ¿Chumngechi yafültucucheaiñ?

¹⁸ Inayentuafuiñ ta Jehová yafültucufiel mu taiñ pu peñi ca pu lamngen. ¿Chem femafuiñ? Cüme allcütuafuiñ, yafültucuafuiñ taiñ feipin mu ca quelluntucuafuiñ chem tañi duamnieel (Prov. 3:27). Yafültucuafiyiñ com pu che, pu serfiquenofilu Jehová cütu. Taiñ carucatu hueñancülele lan mu quiñe tañi pu che, cutrancülele cam huesaque dungu rupamequele, pemeafiyiñ taiñ yafültucuafiel Biblia ñi dungu mu. Inayentufiliyiñ Chau Jehová ñi yafültucuchequen, quelluntucuafiyiñ taiñ pu peñi ca lamngen ñi chaftuafiel tañi huesa rupan ca quelluafuiñ quiñeque che ñi quimafiel ta Chau Jehová (Mat. 5:16).

JEHOVÁ RUMEL MÜLEI IÑCHIÑ MU

19. Chau Jehová, ¿chem femquei iñchiñ mu? Ca, ¿chumngechi inayentuafuiñ?

¹⁹ Jehová rume duamtuniefi com tañi pu piuqueyenieteu, quisucünuquelaeiñmu rupan mu huesaque dungu. Piuqueyequeiñmu ca cuñiutucuqueiñmu chumngechi femquei quiñe cüme chau. Jehová adnieiñmu, eluqueiñmu taiñ duamnieel, cuñiutucuqueiñmu ca yafültucuqueiñmu. Iñchiñ inayentuafuiñ yafültucufiliyiñ ca quelluntucufiliyiñ pu rupamequelu huesaque dungu. Chem dungu rupaliyiñ rume, maneluhuaiñ Jehová taiñ quelluaeteu. Quisu feipicünueiñmu: “Llicaquilnge, iñche am eimi mu mülen” (Is. 41:10). Feimu maneluhuafuiñ llemai Jehová rumel afcadinieaiñmu. Turpu quisulelaiñ.