Ti Fütra Quimeltuchefe rumel quimeltuqueyumu

TAÑI PU CHAU ÑI CÜME FEMÜN

Tañi pu chau mülequefui Italia mu. Epe puulu 1960 tripantu, huiñamtuhuingu Canadá meu. Pichiñma rupalu, quimürpufingu Jehová ñi dungu. Taiñ familiahuen-ngen rume falinturpufiyiñ. Pichicalu iñche, tañi familia iñchiñ rume amuldunguquefuiñ. Feimu quiñeque mu feipiquen quiñe ayecan dungu, “pura tripantu müten nielu iñche, precursor auxiliarngequefun” piquen.

Tañi pu chau müte niequelafuingu plata, huelu chumquefuingu rume tañi doi cüdahuelafiel ta Jehová. Feichi 1963 tripantu mu, fendeingün fentren tañi chemcün tañi nieal plata ñi amual quiñe fütra trahun Estados Unidos mu. Feiti 1972 tripantu mu, huiñamtuhuiyiñ cangelu huaria, alü camapulefui. Amuldungupuiñ italiano dungun. Tañi chau conserjengequefui. Feipingefulu rume tañi doi cüdahual tañi doi cullingeal, quisu pilai, femngechi ñi nieal tiempo ñi cüdahuelafiel Jehová.

Rume mañumniefiñ ñi femün tañi pu chau. Rume quellueneu iñche, tañi peñi ca tañi epu lamngen. Ñi femün tañi pu chau pepicaeneu ñi cüdahuelafiel ta Jehová. Com tañi mongen mu acordaquen tañi quimeltueteu tañi pu chau: hune quintufili Jehová, quisu cuidayaeneu llemai (Mat. 6:33).

ELUHUIYU TAYU PRECURSORNGERPUAL

Feichi 1980 tripantu mu, niehuiyu Debbie iñchiu. Quiñe ayüfalngechi lamngen ayühunquechi serfiquefilu ta Jehová. Ayüniefuyu tayu precursorngeal, feimu cüla cüyen rupalu tayu niehun, Debbie precursorangerpui. Quiñe tripantu rupalu tayu niehun, huiñamtuhuiyu ñi quelluafiel quiñe pichi trahunche, ca iñche precursorngerpun.

Rupachi tiempo mu, müte ayüucülehuelafuyu tayu trahunche mu, feimu ayüfuyu tayu huiñamtuhual. Huelu hunelu mu, nütramcafiyu tati huitran-ngepaquechi loncolelu. Quisu piuqueyenquechi ngülamtueiñmu. Feipi: “Eimu quisutu huesalcaumequeimu. Re raquiduamtucunieimu cüdaungechi dungu tamu rupamequen. Huelu quintufilmu cümeque dungu, peafimu”. Yochi cüme acui ti ngülam (Sal. 141:5). Pürüm inafiyu. Rüfngei tañi feipieteu tati peñi. Fentren cümeque dungu mülerquei trahunche mu. Fentren peñi ca lamngen ayünierquefui tañi doi cüdahuelafiel ta Jehová, pichiqueche ca quiñeque lamngen tañi füta testigongenolu. Fei quimürpuyu quiñe falin dungu: inaduamürpuyu tayu quintual cümeque dungu ca maneluhuiyu Jehová ñi norümtual ti dungu puuchi antü mu (Miq. 7:7). Fei doi cüme duamcületuyu ca doi cümelcaletui ti dungu.

Amulu iñchiu tati escuela ñi pepicangeal pu precursor, raquiduamürpuyu tayu misionerongeal. Tati pu instructor misionerongequefui caque mapu mu. Fei pengeleleiñmu foto ca nütramcaeiñmu cüdaungechi dungu ñi rupan ca chumngechi tañi cümelcaeteu Jehová, feimu feipihuiyu tayu ca misionerongerpual.

Pepicauquefuyu tayu misionerongerpual, feimu huiñamtuhuiyu Quebec huaria mu 1984 tripantu. Tüfa doi 4 mil kilometro camapulefui. Üyeu pu che frances quehun dunguquei, feimu quimürpuyu hueque huimtun ca quiñe hue quehun. Ca quiñe cüdaungechi dungu chaftuquefiyu. Quiñeque mu pichin plata müten niequefuyu. Quiñe rupa, quiñe huentru eluquefeiñmu tayu ñimitual ta poñi tañi mapu mu, femngechi mongeluuquefuyu. Debbie caquerumechi iyael deumaquefui poñi mu, rume cümequefui. Cüdaungechi dungu rupalu rume, nehuencülequefuyu ca ayüucülequefuyu, cafei quimniequefuyu tayu cuidaqueteu Jehová (Sal. 64:10).

Quiñe antü mütrümngerumeyu, feipingeyu tayu cüdaumeal Betel Canadá mu. Iñchiu huercüfuyu ti solicitud ñi amual Galaad pingechi Escuela mu. Feimu ayüucülefulu rume tayu amual Betel mu, pichi huesa duamcülefuyu. Huelu amuyu müten Betel mu. Puulu iñchiu, nütramcafiyu taiñ peñi Kenneth Little, cüdauquelu ti Troquiñche Adcünuquelu Betel ruca mu. Ramtufiyu: “¿Chumayu mangelngerumeliyu Galaad mu?”. Fei feipi: “Mangelngen mu hula, fei hula nütramcayaiñ taiñ chumal”.

Quiñe semana rupalu müten, mangelngeyu Galaad mu. Mülefui tayu dullial mülenagal Betel mu cam amual Galaad mu. Taiñ peñi Little feipieiñmu: “Chuchi rume dullilmu, quiñeque mu ramtuhuafuimu: ‘¿Chemu lloulafiyu cangelu mangelün?’. Mür cümei tati, chuchi rume dullilmu, Jehová cümelcayafeimu”. Fei amuyu Galaad mu. Rupalu chi tripantu, ngüneduamiyu ñi rüfngen ñi feipin peñi Little. Feitachi ngülam ca feipiquefiyu pu peñi ca lamngen duamnielu ñi dullial chem cüdau tañi llohual Jehová ñi troquiñche mu.

MISIONERONGERPUYU

Ayühunquechi amuyu ti clase 83 Galaad pingechi Escuela mu, 24 estudiantengefuiñ. Tüfa femngei Brooklyn, Nueva York, abril 1987 tripantu. Taiñ pu quimeltufe Ulysses Glass ca Jack Redford pingeingu. Quechu cüyen müchai müten rupai. Fei tripayu Galaad mu 6 conchi septiembre 1987 tripantu. Feipingeyu tayu amual Haití mapu mu. Quisu amulayu, ca amui John ca Marie Goode.

Cuifi Haití mu, ca mülequefui misionero tripalu Galaad mu, huelu 1962 mu quechanentueyu pu autoridad. Fei hula huercüngeiñ. Cüla semana rupalu taiñ tripan Galaad mu, fei puhuiyiñ quiñe pichi trahunche Haití mapu mu. Tüfachi pichi trahunche 35 chengequefuingün ca rangi mahuidantu mu mülequefui. Iñchiñ huechengequefuiñ ca müte pepiluulafuiñ. Quisulequefuiñ tati hogar misional mu. Haití mu pu che müna pofrengefui ca quim papeltuquelafui. Feichi mu rume pofolcauquei che politica dungu mu ca rume chaftungequefui ti gobierno. Ca rupaquefui fütraque cürüf.

Müna quimeltueiñmu fente ñi nehuencülefel ca ayüucülefel pu peñi ca lamngen Haití mu. Fentren engün rupaquefuingün cüdaungechi dungu, huelu piuqueyefingün Jehová ca ti amuldungun. Quiñe cuse lamngen quim papeltuquelafui, huelu loncontucuniefui fentren texto Biblia mu. Pefiel mu ñi ruparupangen huesaque dungu, doi nehuencünuhuiyu tayu feipiafiel pu che Chau Dios ñi Gobierno müten ñi cüme elcünutual ti dungu. Quiñeque che hune eluulu ñi chillcatuafiel Biblia, precursor regular cam especialngerpuingün, ca loncolelungerpuingün. Feita rume ayühuleiñmu.

Haití mu quimürpufiñ quiñe hueche Trevor pingei, quisu misionero mormon-ngefui. Quiñeque rupa nütramcaquefuyu Biblia mu. Rupachi tripantu mu, acurumei quiñe carta tüfachi hueche tañi mandaleteu. Feipieneu: “Cüpalechi fütra trahun mu, fautizahuan. Ayüniefun tañi precursor especialngeal ca huiñotual Haití mu ñi amuldungual cheu tañi misionero mormon-ngequefel”. Fentren tripantu mu feitachi hueche femi tañi feipicünuel tañi domo engu.

EUROPA CA ÁFRICA

Huercüngeyu Europa mu, quiñe troquiñ mapu mu cheu müte catrütungehuequelafui taiñ amuldungun. Fei 1992 mu, puhuiyu quiñe fütra huaria Eslovenia mu. Tüfa püllelequefui cheu tañi tremün tañi pu chau. Feichi mu inafül mülequefui hueichan. Feichi troquiñque mapu mu ti amuldungun cüdau adniequefeyu quiñeque peñi Austria, Croacia ca Serbia mapu mu. Huelu feula quisuque ti troquiñ mapu mülefui ñi nieal Betel.

Feimu mülefui taiñ quimürpual ca quehun ca huimtun. Tati pu che mülelu Eslovenia mu feipiquefui: “Taiñ quehun rume cüdaungei”. Rume cüdaungei llemai. Rume afmatulehueyu ñi femün pu peñi, pu lamngen. Ayühunquechi inafingün com ñi feipieteu Jehová ñi troquiñche cüdaungefulu rume, fei Jehová cümelcaeyu engün. Ca quiñe rupa ngüneduamfiyu tüfachi falin dungu: Jehová rumel piuqueyenquechi norümtuquefi ti dungu puuchi antü mu. Quimürpuiñ fentren cümeque dungu Eslovenia mu. Ca caque dungu taiñ quimürpuel cuifi quellueiñmu taiñ nehuencüleal Eslovenia mu.

Huelu tayu mongen doi calerputui. Feiti 2000 tripantu mu huercüngeyu ñi amual Costa de Marfil, África Occidental mu mülelu. Huelu noviembre 2002 tripantu mülerpui hueichan, fei huercüngeyu ca mapu. Raquiduamlafuyu tayu elcünual Costa de Marfil, feimu hueñancüyu. Puhuiyu Sierra Leona mapu mu. Hue affui ti hueichan Sierra Leona mu, alüñmafui. Huelu falinque dungu taiñ quimürpuel cuifi, quelluqueiñmu taiñ ayüucüleal.

Raquiduamtucuniefiyu com pu che ayülu ñi quimafiel tati rüf dungu. Ca duamtuquefiyu taiñ pu peñi ca pu lamngen fentren tripantu mu huesa rupaquefulu hueichan mu. Pofrelefuingün rume, ayüniefuingün ñi hulal tañi nieel. Quiñe lamngen ayüfui ñi eluafiel tacun iñche tañi domo. Tañi domo pilafui tañi elungeal, huelu ti lamngen feipieyu ñi llohual müten. “Rupachi hueichan mu, pu lamngen caque mapu mülelu rume quellueiñmu. Feula iñchiñ ayüqueiñ eimün tamün quelluafiel” pi. Fei eluhuiyu tayu inayentuafiel feitachi pu peñi ca lamngen.

Rupachi antü mu, huiñotuyu Costa de Marfil mu. Huelu politica dungu mu ca mületui quehuan, fei noviembre 2004 tripantu enturumengeyu helicoptero mu. Epu pichique folson müten yeniefuyu. Umautupuyu cheu ñi umañpual pu soltau frances mu, huelu ngelai cahuitu. Ca antü yengeyu Suiza mu. Rangipun puhuiyu Betel mu, rume cüme lloungeyu. Mülequefui pu peñi coneltulelu ti Troquiñche Adcünuquelu Betel ruca ca pu quimeltulu Escuela de Entrenamiento Ministerial ca tañi domo engün. Piuqueyenquechi pancocaeiñmu (rofüleiñmu), elueiñmu eñum iyael ca cümequechi chocolate. Tayu fente cüme lloungen, rume cüme duamiyu.

Huercüngeyu tayu pichiñma mülepual Ghana mapu mu. Doi tüngnaglu ti dungu Costa de Marfil mu, ca huiñotuyu. Cüdaungefui taiñ femngechi miyahual, tayu entungequefel ca tayu huiñolngequetun. Huelu taiñ pu peñi ca lamngen ñi piuqueyen quellueiñmu tayu aguantayal. Debbie ca iñche fentren rupa ngüneduamqueyu ñi fente piuqueyeuquen Jehová ñi pu che, huelu eluucülequeyu tayu rumel falintuafiel. Rupachi antü mu, ngüneduamiyu tayu rupan cüdaungechi dungu ca entuqueyu falinque quimeltun.

HUERCÜNGEYU ORIENTE MEDIO MU

Feiti 2006 tripantu mu ti fütra Betel huercüeiñmu tayu amual Oriente Medio mu. Ca quiñe rupa caletui tayu mongen. Quimürpuyu caque quehun, huimtun ca chaftufiyu cüdaungechi dungu. Feitachi mapu mu mülefui fentren huesaque dungu politica ca religion ñi duam mu. Tayu mülepun fei meu quimeltueiñmu falinque dungu. Rume ayühulquefeiñmu ñi mülen caquerumechi quehun tati pu trahunche mu, fei inaduamiyu taiñ quiñeucülen inafiliyiñ Jehová ñi feipin. Fentren taiñ pu peñi ca lamngen caiñetuquefeyu tañi pu familia, compañ cüdau, colegio ca tañi pu carucatu. Huelu fei engün nehuencünuhuingün, feimu rume saquiquefiyu.

Feichi 2012 tripantu amuyu quiñe fütra trahun Tel Aviv huaria, Israel mu. Tüfachi fütra trahun mu, trahuluhui fentren peñi ca lamngen. Femngechi dungu rupaquelafui feichi troquiñ mapu mu, ti Pentecostés 33 tripantu mu müten. Rume ayühun-ngerquei feichi antü.

Feichique tripantu mu, huercüngeyu ñi huitranmayafiel quiñe troquiñ mapu cheu catrütungequei taiñ amuldungun cüdau. Yefiyiñ quiñeque publicacion, amuldunguiñ pu peñi ca pu lamngen iñchiñ ca amuyu pichique asamblea mu. Fill püle mülefui soltau armaucülelu ca catrütuquefuingün che ñi ramtucadunguafiel. Huelu miyauquefuiñ pu peñi pu lamngen iñchiñ, feimu tüngcülequefuiñ.

HUIÑOTUYU ÁFRICA MEU

Feichi 2013 mangelngeyu tayu femal cangelu cüdau, amuyu tati Betel mülelu Congo mu. Congo fütra pais ca adelcalei, huelu rume pofrelequefui che ca rupaquefuingün hueichan dungu mu. Ellaca mu feipiyu: “Quimniefiyu ta África, deu pepicaucüleyu”. Huelu quimtucuyu tayu pepicaucülenon. Cüdaungefui taiñ miyahual, ngelafui carretera ca puente no rume. Cüdaungefui, huelu mülefui fentren cümeque dungu tayu ngüneduamal. Pu peñi, pu lamngen pofrelefuingün rume, yafüluucüleingün ca ayühunquechi amuldunguqueingün, amuingün trahun ca fütraque trahun mu. Ca pefiyu Jehová ñi rume cümelcafiel ti amuldungun cüdau, feimu fentren che eluhui ñi allcütual ti cümeque dungu. Taiñ fill antü cüdahuelquefiel Jehová Congo meu, entuiñ falinque quimeltun ca elueiñmu rume cümeque hueni, iñchiu tayu familia ca müten piafuyu.

Epe aflu 2017, puhuiyu cangelu Betel mu, Sudáfrica mu mülelu. Feitachi Betel doi fütrai caquelu Betel mu cheu tayu mülequefel. Elungeyu cangelu cüdau tayu femquenofel cuifi. Ca quiñe rupa mülefui tayu quimal hueque dungu, huelu tayu quimürpuel cuifi ca quellueiñmu feula. Rume piuqueyefiyu pu peñi ca pu lamngen serfiquefilu Jehová fentren tripantu. Pu peñi ca pu lamngen cüdauquelu Betel mu caque rume tuhun nieingün, huelu com quiñeucüleingün. Rume afmatufali tüfa. Jehová ñi pu che amulei ñi huecünutufiel ñi chumngen ca inaquefingün Biblia ñi feipin, feimu llemai Jehová eluqueyu tañi tüngcüleal engün.

Com tüfachi tripantu mu elungeyu rume ayüfalchi cüdau. Quimürpuyu caque huimtun ca caque quehun. Quiñeque mu cüdaungefui, huelu Jehová tañi pu che mu rumel pengelqueiñmu tayu rume piuqueyeteu (Sal. 144:2). Tayu cüdahuelquefiel Jehová fill antü, quimürpuyu fentren dungu. Com tüfa quelluqueiñmu taiñ doi cüme cristianongeal.

Rume mañumcülen tañi pu chau ñi quimeleteu, tañi quelluntucueteu ñi poyen domo ca ñi cümeque femquen tati pu peñi ca lamngen mülelu com mapu meu. Raquiduamlu tayu femal cüpalechi antü mu, eluucüleyu tayu quimelaeteu tayu Fütra Quimeltuchefe: Jehová llemai.