Jehová incañpequefi tañi pu che

Tati gobierno Francia 1999 mu feipi Betel ñi cullial impuesto tañi llohuelchi plata 1993 puulu 1996 tripantu. Amufuiñ fillque tribunal Francia mu, huelu quellungelaiñ. Ca huiño feipiyiñ taiñ quellungeal, huelu cüme tripalai. Ca ti gobierno Francia mu entuñmaeiñmu alün millon tati banco mu. Quiñe dungu müten mülehuefui ñi femal: taiñ amual ti Tribunal Europeo de Derechos Humanos. Huelu petu taiñ amunon juicio mu, feipingeiñ taiñ trahuluhual iñchiñ, tati pu abogado ñi nieel ti gobierno ca quiñe che corte mu cüdauquelu, femngechi taiñ quiñehual fei duamfalngehuenoal ñi amual ta juicio mu.

Raquiduamquefuiñ taiñ dicümtucungeal ñi pichi cullial ti gobierno Francia, huelu iñchiñ raquiduamiyiñ Jehová ayülafui taiñ pichi cullial rume. Tati pu peñi, pu lamngen hulingün feichi plata femngeal Jehová tañi cüdau, feimu ngelafui ñi eluafiel tati gobierno (Mat. 22:21). Femfulu rume, amuiñ feitachi trahun mu taiñ respetaniefiel mu ti corte.

Trahuluhuiyiñ quiñe adcülechi catrüntucu ti corte mu. Pürüm feipifemngeiñ ñi cullial ti impuesto Francia mu, huelu Jehová ñi nehuen adnieiñmu taiñ feipiafiel ti domo cüdauquelu corte mu: “¿Eimi quimquefuimi tati gobierno deu entuñmaeiñmu fentren millon tati banco mu?”.

Tati domo quimürquelai, feimu afmatulehuei. Tati gobierno ñi pu abogado feipilu engün tañi rüfngen, tati cüdauquelu corte mu feipi ñi huesa femün engün, ca fentepui ti trahun pi. Fei raquiduamün Jehová tañi com cüme elcünun, chumngechi taiñ raquiduamquenofel rume. Ayüucülen tripaiñ tati corte mu, leliniehuefuiñ taiñ cüme tripan.

Ti Tribunal Europeo de Derechos Humanos feipi taiñ huehun 30 junio, 2011 tripantu. Feipi ngelai taiñ cullial impuesto, ca ti gobierno Francia mülefui ñi huiñoleltuaeteu taiñ plata ca taiñ doi culliaeteu. Feitachi dungu tañi rupan ta feichi mu, petu quelluquefi taiñ pu peñi pu lamngen Francia mu ñi serfiafiel Jehová lifrelen mu. Fente cüme tripai ti ramtun taiñ feipifiel ti domo cüdauquelu ti corte mu. Trürümafuiñ ti cura reque langümfilu Goliat. ¿Chemu huehuiyiñ? Chumngechi ñi rupan David, Jehová coneltui taiñ incayaeteu (1 Sam. 17:45-47).

Feita mu müten hueulaiñ corte mu. Fütraque gobierno ca religion caiñetueiñmu rume, hueuqueiñ 1.225 juicio falinque corte mu 70 pais mu ca fentren corte internacional. Taiñ huehun com feitachi juicio mu, quelluqueiñmu taiñ amuldungual, taiñ coneltunoal politica dungu mu ca taiñ llounoal ta mollfüñ. Cafei tañi quimngeal taiñ religion ley dungu mu.

Feichi tripantu mu, iñche coneltulequefun ti fütra Betel mülelu Nueva York huaria mu. ¿Chumngechi am conelturumen tüfachi juicio Europa mu? Feipihuaiñ.

TAÑI PU CHAU QUIMELTUENEU ÑI PIUQUEYEAFIEL TI AMULDUNGUN

Tañi chau George, tañi ñuque Lucille pingei. Amuingu clase 12 Galaad pingechi Escuela mu. Hue choyüngelu iñche 1956 tripantu mu, Etiopía mu mülefuingu. Philip pintucueneu engu, femngechi üitulelngen Felipe tati amuldunguquelu ñi duam mu (Hech. 21:8). Tañi hunen lamngen Judy ca tañi inan peñi Leslie ca choyüngeingu Etiopía mu. Fei 1957 mu, pu autoridad catrütueiñmu taiñ amuldunguhuenoal ca pepi trahuluulafuiñ rume. Pichicalu rume iñche, inaduamün tañi ellcanquechi poyequefiel Jehová. Pichicalu am iñche, müna ayüfal-lu troquifiñ. Huelu ti gobierno quechanentueiñmu Etiopía mu 1960 mu.

Huiñamtuhuiyiñ tañi familia iñchiñ Kansas mapu mu, Estados Unidos mu. Feimu tañi chau ca ñuque misionerongehuelafuingu, huelu yeniefingu tañi piuque mu ti amuldungun cüdau. Rume quellueneu iñche, tañi lamngen ca tañi peñi taiñ piuqueyeafiel Jehová. Fei 13 tripantu nielu iñche, fautizahun. Cüla tripantu rupalu, huiñamtuhuiyiñ Arequipa, Perú mapu mu, cheu ñi doi duamniengen amuldunguquelu.

Feichi 1974 mu nielu iñche 18 tripantu, pu peñi cüdauquelu Betel Perú mu elfalcünueiñmu iñche ca caquelu meli peñi taiñ precursor especialngeal. Huercüngeiñ ñi amuldungual Cordillera de los Andes mu. Inei no rume amuldunguquelafui fei mu, ca amuldungulelquefuiñ tati pu quechua dunguquelu ca tati pu aimara. Miyauquefuiñ quiñe casa rodante quiñe fütra furgon quechilelu. Rume piuquentucuniefiñ feichi antü. Biblia mu pengelelquefiyiñ pu che Jehová ñi apümafiel filla, cutran ca lan dungu (Apoc. 21:3, 4). Fentren che allcütueiñmu ca poyerpufingün ta Jehová.

MANGELNGEN TI FÜTRA BETEL MU

Feichi 1977 tripantu mu, peñi Albert Schroeder huitrancontufi Perú. Feichi peñi coneltulefui ti Troquiñ Adniechequelu. Feipieneu ñi huercüal ti solicitud ñi cüdahual ti fütra Betel Estados Unidos mu. ¡Femngechi femün llemai! Pichi rupalu 17 junio 1977 tripantu mu, conün ñi cüdahual ti fütra Betel mu. Meli tripantu mu cüdahun ñi liftuafiel ca cüme adnieafiel ti Betel ruca.

Junio 1978 mu amun quiñe fütra trahun Louisiana mapu mu, fei quimfiñ Elizabeth Avallone. Feichi lamngen pichicalu müten tañi pu chau quimeleyu ñi piuqueyeafiel Jehová, iñche reque. Quimfilu iñche ta Elizabeth, meli tripantu yenierquefui tañi precursora regularngen, eluucülefui ñi turpu fentecünunoal. Doi cüme quimürpuhuiyu, fei epuñpüle mür ayühuiyu. Fei niehuiyu 20 conchi octubre, 1979 tripantu. Fei eluhuiyu tayu trür cüdahual Betel mu.

Hunelu mu, puhuiyu quiñe trahunche huincadunguquelu Brooklyn mu, fei piuqueyenquechi lloungeyu. Rupachi tripantu mu, mülerpuyu caquelu cüla trahunche mu. Fei pu peñi, pu lamngen piuqueyenquechi quellueiñmu tayu cüdaucüleal Betel mu. Müna mañumniefiyu engün. Cafei taiñ pu hueni ca taiñ pu che quellueiñmu ñi cuidayafiel tayu pu chau, fei müna mañumcüleyu.

CÜDAUQUEN TI TROQUIÑCHE INADUAMQUELU LEY DUNGU

Enero 1982 tripantu mu, elfalngen ñi cüdahual ti Troquiñche Inaduamquelu Ley Dungu Betel mu. Rupalu cüla tripantu, Betel mu feipingen ñi amual universidad mu, femngechi tañi abogadongerpual. Universidad mu quimürpun fentren juicio ñi huehun pu testigo quelluquefi pu peñi ca pu lamngen Estados Unidos ca caquelu pais mu, huelu ca inaye quelluquefi caquelu che, femngechi ñi incañpengeal tañi raquiduam engün. Clase mu rume nütramcangequefuiñ feitachi juicio mu.

Feichi 1986 mu feipingen ñi loncoleal ti Troquiñche Inaduamquelu Ley Dungu Betel mu. Iñche niefun 30 tripantu müten, feimu rume ayüucülefun tañi dullieteu Betel ñi femal tüfachi falin cüdau. Huelu ca cüme pepicaucülenolu troquiuquefun, feimu rume raquiduamcülefun.

Abogadongerpun 1988 tripantu mu. Inaduamlafun rume, huelu tañi amun mu universidad mu hueluraquiduamfun ca pichi famtripalefun Jehová mu. ¿Chemu? Tati universidad raquiduamelquefi pu che ñi doicülen caquelu mu, ca ayüquei ñi doi falin che troquingeal. Huelu Elizabeth cüme raquiduameltueneu. Petu connolu universidad mu, fillque dungu femquefun taiñ pülleleal Jehová mu, huelu rupachi antü mu müte femhuelan. Fei tañi domo quellueneu tañi ca huiño femtual. Rupachi antü mu, ca huiño fülcontun Jehová mu. Tañi rupan mu quimürpun doi falin-ngelai taiñ mongen mu nieal fentren estudio, doi falin-ngei mai taiñ cüme hueniyenieafiel Jehová, piuqueyeafiel quisu ca tañi troquiñche.

INCAQUEFIYIÑ JEHOVÁ ÑI DUNGU LEY DUNGU MU

Tripalu universidad mu, doi nierpun tiempo tañi quelluntucual ñi cüdau Betel mu. Jehová ñi troquiñche mu, müchai müten calerumetuquei dungu, feimu tañi cüdau ayüfalngefui, huelu ca cüdaungefui. Cuifi mu amuldungun mu, pediquefuiñ pichin plata taiñ elcünual publicacion, huelu pu peñi Betel mu ayüniefui ñi femhuenoal tüfa. Feimu 1991 tripantu mu, ti Troquiñche Inaduamquelu Ley Dungu feipingei ñi quelluntucual chumngechi cacünutual tüfa. Feichi mu ca fantepu mu, pedihuequelaiñ plata taiñ elcünual taiñ publicacion. Entungelu chumngechi ñi femngequefel, doi cüdaungelai ñi amuleal ti cüdau Betel mu ca pu trahunche mu. Tüfa cuñiutucuquefi Jehová ñi troquiñche ñi cofrangenoal impuesto. Caletulu ti dungu, quiñeque raquiduamingün: “Feula ngehuelayai plata ñi deumangeal publicacion ca ñi yelelngeal pu che, ca cüme tripalayai ti amuldungun” pingün. Huelu, ¡femlai llemai! Doi cüme tripai taiñ amuldungun cüdau. Fei 1990 tripantu mu, doi fentren che coni tañi serfiafiel Jehová. Fantepu com pu che ayülu nieafui fentren publicacion tañi cullinon chem no rume. Fantepu mu pefiñ alün dungu caletuquei Jehová ñi troquiñche mu. Huelu cüme tripaquei Jehová ñi quellun mu müten ca taiñ adnieteu ti quim manelfal cüdaufe (Éx. 15:2; Mat. 24:45).

Tati corte mu cüme tripaquelai taiñ dungu re taiñ nien mu cümeque abogado müten, fillque rupa tati pu juez quelluntucuquei ngüneduamün mu taiñ cüme miyauquen. Femngechi rupai 1998 tripantu mu. Cüla peñi coneltulelu ti Troquiñ Adniechequelu, tañi domo engün amuingün fütraque trahun Cuba mapu mu. Fei engün piuqueyechefengeingün ca respetachefengeingün, femngechi pu autoridad ngüneduami pu testigo ñi conquenon politica dungu meu.

Huelu quiñeque mu femngen mu norngenochi dungu mu, amuqueiñ tribunal mu taiñ incayafiel Jehová ñi dungu ley dungu mu (Filip. 1:7). Alüñma mu, Europa mu ca Corea del Sur meu pu autoridad eluñmaquelafi pu peñi ñi femnoal servicio militar. Feimu 18.000 peñi Europa mu ca doi 19.000 peñi Corea del Sur mu, presuntucungei tañi femnon mu servicio militar.

Feichi 7 conchi julio 2011 tripantu, tati Tribunal Europeo de Derechos Humanos entui quiñe huercün dungu, turpu ñi femngequenoel cuifi. Tati tribunal feipicünui com Europa mu tati pu hueche eluucülenolu ñi femal servicio militar tañi feyentun meu, tati pu autoridad mülei ñi eluñmayaeteu ñi femal caquelu cüdau. Ca femngechi dungu feipicünui tati Tribunal Constitucional de Corea del Sur, feichi 28 junio 2018 tripantu. Pichin taiñ huecheque peñi eluufule ñi femal servicio militar, tati tribunal feipilayafui femngechi dungu.

Iñchiñ, taiñ coneltulen ti Troquiñche Inaduamquelu Ley Dungu fau ca caquelu Betel mu, rumel cüdaucülequeiñ taiñ lifrelen püramyeafiel Jehová. Cüme duamelqueiñmu taiñ incayafiel taiñ pu peñi ca lamngen ñi caiñetuqueteu ti gobierno. Hueunolu rume juicio mu, amuldungulelquefiñ reque tati pu autoridad (Mat. 10:18). Juicio mu incaulu iñchiñ, nütramyequeiñ Biblia ñi feipin. Feimu tati pu juez, pu autoridad, pu periodista ca caquelu che ca allcütuingün Jehová ñi dungu. Femngechi tati pu che cüme piuquengelu quimürpufi ineingen pu testigo ca cheu ñi tuhun tañi feyentun. Quiñeque tüfachi che feula testigongerpuingün.

MAÑUMEYU JEHOVÁ PIQUEFIÑ

Rupachi 40 tripantu mu, quiñentrür cüdahun caquelu Betel engün mülelu huall mapu mu. Fentren rupa amuquefun doicülechi tribunal meu ca falinque che cüdauquelu corte mu. Afmatuquefiñ ca saquiquefiñ tañi pu compañ cüdaulu ti Troquiñche Inaduamquelu Ley Dungu fau ca caquelu Betel mu. Tañi mongen mu llohun alün cümelcan, feimu rume ayüucülen.

Tüfachi 45 tripantu tañi domo Elizabeth rumel compañeneu, poyenquechi quelluntucueneu cümeque rupan ca huesaque rupan mu. Cutran chengehuelu rume femi tüfa, feimu rume saquiquefiñ.

Iñchiu ngüneduamiyu iñchiñ taiñ adümuhun mu hueutripaquelaiñ, doi mai Jehová tañi duam mu. Chumngechi feipi David, Chau Jehová eluquefi nehuen tañi pu che (Sal. 28:8). Chau Jehová coneltulequei ñi incañpeafiel tañi pu che, ¡fei hueutripaquei llemai!