Amulepe tami ngüneduamfiel ti hunenque quimeltun

1. ¿Chem raquiduameleimu hue quimfilu Biblia ñi dungu?

TATI hunenque quimeltun taiñ quimürpuel Biblia mu, cacünuñmatueiñmu taiñ mongen. Quimfilu iñchiñ Dios tañi üi Jehová pingen, eluhuiyiñ taiñ hueniyeafiel (Is. 42:8). Quimfilu iñchiñ tati pu la ñi cutrancaumequenon, cüme duameleiñmu (Ecl. 9:10). Quimfilu iñchiñ Chau Dios ñi cüme elcünutuafiel ti mapu, llicahuelaiñ chem ñi rupayal cüpalechi antü mu. Maneluhuiyiñ taiñ nienoal 70 cam 80 tripantu müten, doi mai taiñ rumel mongeleal (Sal. 37:29; 90:10).

2. ¿Chumngelu com pu cristiano mülei ñi falintunieafiel ti hunenque quimeltun? (2 Pedro 1:12, 13).

² Tunten tripantu rume yenieliyiñ taiñ quimfiel tati Biblia, rumel falintunieafiyiñ ti hunenque dungu taiñ quimürpuel. Pedro huirintuculelfi tañi epungechi carta tati pu cristiano ‘cüme foliluucülelu tati rüf dungu mu’ (papeltunge 2 Pedro 1:12, 13). Feichi pu trahunqueche mu mülefui huesaque che ayüniefuingün ñi püntünentuafiel pu cristiano Jehová mu (2 Ped. 2:1-3). Feimu Pedro duamniefui ñi quelluafiel pu cristiano ñi ngünencangenoal. Acordalelfi hunenque quimeltun tañi quelluaeteu serfinieafiel Jehová.

3. ¿Chumngelu com pu cristiano raquiduamtucunieafui ti hunenque quimeltun? Feipiaimi quiñe ejemplo.

³ Fentren tripantu coneltufuliyiñ rume trahunche mu, quintuafuiñ hueque quimeltun taiñ hune quimürpuel mu. Raquiduamaiñ tüfachi pengelün dungu mu. Quiñe ñuque quim deumaiyael-lu tañi pepicayafiel quiñe corü tuculelafui poñi, cefolla, acu ca ticün. Tañi püñeñ ca elungeafui feichi ingrediente ñi pepicayafiel ñi corü. Huelu tati ñuque doi quim deumaiyaeli, feimu pepicayafui caque rume iyael nien mu feichi ingrediente. Ca femngechi pu yenielu fentren tripantu ñi papeltuquen Biblia entuafui caque rume quimeltun tachi hune quimürpuelchi versiculo mu. ¿Chumngelu? Yenielu cai fentren tripantu tañi serfiquefiel Jehová, rupayafui caque rume dungu tañi mongen mu ca fillque cüdau nieafui trahunche mu. Feimu raquiduamfiel mu tachi hunenque quimürpuelchi quimeltun, entuafuiñ hueque dungu taiñ quelluaeteu. Tüfachi troquiñ mu, peaiñ cüla falin dungu taiñ hune quimürpuel Biblia mu ca chem quimeltun entuafuiñ.

JEHOVÁ FEI TATI COM DEUMALU

4. Quimfiel mu Jehová ñi com deuman, ¿chum duamelqueimu?

⁴ Quimiyiñ tati mapu ca com mülelu fei mu deumaeyu Chau Dios com quimün ca nehuen nielu. Biblia feipi: “Chau Ngünechen itrocom deumafi” (Heb. 3:4). Jehová am deumaeteu iñchiñ, quimnieñmaeiñmu taiñ mongen caque quiñeque iñchiñ. Huelu feica müten no, cafei poyequeiñmu ca quimniei chem taiñ duamtuqueel. Quimfiel mu tüfa, yenietuiñ cüme mongen ca ayüucüleiñ.

5. ¿Chem quimeltun quelluqueiñmu taiñ ñom chengeal? (Isaías 45:9-12).

⁵ Quimfilu Jehová tañi com deuman, quimeltuqueiñmu taiñ ñom chengeal. Raquiduamaiñ Job tañi femün. Quiñe rupa Job quisutu duamniehui tañi incahual caquelu che mu, feimu hueluca dungui Jehová mu. Huelu Chau Jehová acordaleyu quisu tañi com deuman ca tañi rume nehuen-ngen (Job 38:1-4). Tüfa quellueyu ñi ngüneduamal Jehová ñi femquen rumel norngei. Rupachi tripantu mu, Isaías feipi tati pu che turpu ñi raquiduamnoal ñi doi quimün-ngen Jehová mu, quisu am tañi deumaeteu (papeltunge Isaías 45:9-12).

6. ¿Chumngelu mülei taiñ raquiduamal Jehová ñi doi quimün-ngen ca nehuen-ngen? (Ca inaduamnge ti adentun).

⁶ Quiñe che yeniele fentren tripantu ñi serfiniefiel Jehová, quisu tañi raquiduam mu maneluhurpuafui. Fei quintulayafui ñi adnieaeteu Jehová ca tati Biblia (Job 37:23, 24). Femngechi ñi rupanoal, mülei ñi entual tiempo ñi raquiduamal fente ñi quimün-ngen ca nehuen-ngen Chau Jehová (Is. 40:22; 55:8, 9). Femle, quimürpuai Jehová tañi raquiduam ñi doi alüpüralen, ca quelluayu tañi ñom piuquengeal.

7. ¿Chem quellueyu quiñe lamngen ñi cüme llohuafiel quiñe hue dungu?

⁷ Peaiñ ñi rupan taiñ lamngen Rahela, mülelu Eslovenia mapu mu. Raquiduamal Jehová tañi com deuman quellueyu ñi cüme llohuafiel quiñe hue dungu ñi feipin Jehová ñi troquiñche. Taiñ lamngen feipi: “Quiñeque mu, cüdautuquen tañi ayühunquechi inayafiel pu loncolelu ñi quimeltun. Iñche pefiñ ti video ñi feipiel ti Cuerpo Gobernante ñi payuntual cam payuntunoal pu lamngen.a Femlu rume, pefiel mu quiñe lamngen payuntulelu ñi hulün hueupin, cangentufiñ. Feimu llellipufiñ Jehová tañi cüme llohuafiel tüfachi hue dungu”. Taiñ lamngen ngüneduami Chau Jehová doi pepicaucülei ñi adnieafiel tañi troquiñche, quisu am com deumafilu. Felei llemai, Jehová ñi troquiñche mu quiñeque mu hulngequei hueque dungu ca doi cüme adümngequei quiñeque quimeltun. Cüdautufulmi tami cüme llohuafiel, ¿chem quelluafeimu? Entunge tiempo tami raquiduamal ñi nehuen-ngen ca fentren quimün nien taiñ Chau Ngünechen Jehová (Rom. 11:33-36).

¿CHUMNGELU DIOS PETU APÜMCALAFI TI CUTRANCAHUN?

8. Quimfiel mu chumngelu ñi mülen cutrancahun, ¿chumngechi cümelcaqueiñmu?

⁸ Fentren che ramtuuquei: “¿Chumngelu Chau Dios apümlafi tati cutrancahun?”. Quiñeque che quimnolu ti lloudungun lladcütuquefi ta Chau Dios, ca caquelu feipiquei ngelai ta Dios (Prov. 19:3). Huelu eimi quimimi ñi mülen cutrancahun tati culpan ñi duam mu, Chau Dios ñi duam mu no. Eimi ca quimimi Jehová ñi ñochi duamngen, feimu fentren che quimürpufi ta Jehová ca quimürpui chumngechi ñi afal ti cutrancahun (2 Ped. 3:9, 15). Quimfiel mu tüfa, doi yafüluhurpuimi ca fülcontufimi ta Jehová, ¿felelai am?

9. ¿Chumül doi ngüneduamafuiñ chemu Jehová petu apümcalafi ti cutrancahun?

⁹ Petu taiñ üngümcülen Jehová ñi apümcayafiel huesaque dungu, mülei taiñ ñochi duamngeal. Huelu quiñeque mu doi cüdautuafuiñ taiñ femal. Lale quiñe taiñ piuqueyen che cam huesa rupaliyiñ iñchiñ cam taiñ familia, huesa duamafuiñ. “¿Chumngelu Jehová alüñmai ñi apümcayafiel cutrancahun?” piafuiñ (Hab. 1:2, 3). Femngechi rupaliyiñ, cümei taiñ doi ngüneduamal chumngelu Jehová petu catrütulai taiñ huesa rupamequen (Sal. 34:19).b Ca raquiduamtucunieafuiñ Chau Jehová ayüniei ñi apümafiel ti cutrancahun ñi turpu mülehuetunoal.

10. ¿Chem quellueyu Ana ñi yafüluucüleal?

¹⁰ Quimün mu chumngelu Dios petu apümcalafi ti cutrancahun, quelluqueiñmu taiñ nehuencüleal rupan mu huesaque dungu. Taiñ lamngen Ana pingelu mülelu Mayotte pingechi huapi mu feipi: “Feichi lalu tañi ñuque, rume cutrantui tañi piuque. Huelu raquiduamtucunien ti cutrancahun ñi cüpanon Jehová mu. Fei ayüniei ñi apümafiel ti cutrancahun ca ñi huiñomongeltuafiel taiñ piuqueyen che lalu. Petu hueñancütuquefiñ tañi ñuque. Huelu raquiduamfiel mu tüfachi quimeltun, fei tüngcülequen ca yafüluucülequen”.

11. Jehová ñi petu apümnofiel cutrancahun, ¿chumngechi yafültucuqueiñmu taiñ amuldunguleal?

¹¹ Quimün mu chumngelu Jehová petu apümlafi ti cutrancahun, yafültucuqueiñmu taiñ amuldunguleal. Pedro feipi Jehová ayüniei com che tañi montuluhual, feimu ñom piuque mu üngümcülei. ¿Iñchiñ cai? ¿Chumngechi quelluntucuafuiñ? Pedro ca feipi: “Raquiduamaimün tamün chumngechi chengeal ta eimün: mülei tamün femal lif cümeque dungu ca serfiqueafimün ta Chau Ngünechen com piuque meu” (2 Ped. 3:11). Tüfa femafuiñ amuldungun mu. Chau Jehová reque, piuqueyeniefiyiñ pu che ca ayüniefiyiñ ñi müleal ti hue mapu mu. Jehová ñom piuque mu eluniefi tiempo tati pu che tañi püramyeaeteu. Eimi quiñentrür cüdahuafuimi Chau Jehová mu, quelluconafuimi fentrenque che ñi quimafiel ta Jehová. ¡Rume falin cüdau nieiñ! (1 Cor. 3:9).

MÜLEIÑ AFAELCHI ANTÜ MU

12. Pefiel mu ñi femtripamequen Biblia ñi feipin, ¿chem maneluuqueiñ?

¹² Biblia feipi chumngechi che müleai afaelchi antü mu (2 Tim. 3:1-5). Pefiel mu chumngechi ñi yenien ñi mongen tati pu che famülque mu, quimfali ñi femtripan Biblia ñi feipin. Pefiel mu caque antü ñi doi huesalcalerpuquen pu che, doi maneluuqueiñ ñi rüfngen Biblia ñi feipin (2 Tim. 3:13-15).

13. ¿Chem ramtuhuafuiñ? (Lucas 12:15-21).

¹³ Quimnielu am iñchiñ taiñ mülen afaelchi antü mu, quelluqueiñmu taiñ doyümafiel ti doi falinque dungu. Jesús entui quiñe nütram ñi pengelal fente ñi falin-ngen femal tüfa (papeltunge Lucas 12:15-21). Tüfachi ricu huentru huedhued pingei. ¿Chumngelu? Quisu doyümnielafi ti doi falinque dungu. Feitachi huentru ‘itrofillem ngülümquei, huelu pofrengei Chau Ngünechen ñi adquiñ meu’. Ti huentru ngünamcai ñi tiempo, feimu rume huesalcai. Pichilehuerquei ñi mongen, Chau Dios feipieyu: “Tüfachi pun layaimi”. ¿Chem quimeltun entuafuiñ? Pichilehuei ñi acual Jehová tañi antü, feimu ramtuhuafuiñ: “Tañi cüpa femquen tañi mongen mu, ¿pengelquen tañi doyümniefiel Jehová ñi dungu? ¿Chem yafültucuquefiñ tañi pu yall ñi femal? ¿Chumngechi pünequefiñ tañi nehuen, tañi tiempo ca tañi plata? ¿Tañi nieal fentren chemcün cam tañi cüdahuelafiel Jehová?”.

14. ¿Chem quimeltueiñmu ñi rupan ta Miki?

¹⁴ Raquiduamfiel mu taiñ mülen afaelchi antü mu, quelluqueiñmu taiñ cüme dullial chem chumal taiñ mongen mu. Femngechi rupai lamngen Miki. Feipi: “Tripalu iñche colegio mu, ayüniefun ñi amual universidad mu. Cüpa confun quiñe carrera ñi estudiayafiel pu culliñ. Huelu ca ayüniefun tañi precursorangeal ca huiñamtuhual cheu ñi doi duamniengen amuldunguquelu. Quiñeque hueni trahunche mu quellueneu ñi cüme raquiduamal ñi chumal. Feipieneu: ‘Coneltulelmi universidad mu, ¿nieaimi tiempo tami precursorangerpual?’. Ca raquiduameleneu taiñ mülen pichilehuechi antü mu. Ca feipieneu ti hue mapu mu turpu aflayai tañi estudiayafiel pu culliñ. Feimu amulan universidad mu, doi mai coneltun quiñe pichi curso mu tañi adümuhual quiñe cüdau. Femngechi nierpun quiñe cüdau ca nien tiempo tañi precursorangeal. Rupachi antü mu, huiñamtuhun Ecuador mapu mu tañi quelluntucual amuldungun mu”. Feula taiñ lamngen fütangei, fei tañi füta engu huitrancontuquefi pu trahunche Ecuador mapu mu.

15. ¿Chem quimeltuqueiñmu Santiago ñi femün? (Ca inaduamnge ti adentun).

¹⁵ Quiñeque mu, tati pu che pilayafui ñi allcütual tati cümeque dungu, huelu huesa duamlayaiñ. Fei engün cacünutuafui ñi raquiduam. Raquiduamaiñ Santiago mu, Jesús tañi peñi. Pefi Jesús ñi tremcülerpun, ñi Mesías ngerpun ca ñi cüme quimeltuchequen. Huelu fentren tripantu rupalu hula, feyentui Jesús mu. Deu huiñomongetulu Jesús, Santiago discipulongerpui ca rume cüme cristianongerpui (Juan 7:5; Gál. 2:9).c Feimu llemai quiñeque taiñ pu familia cam caquelu che eluunole ñi allcütual taiñ amuldungun, turpu allcütulayaingün pilayaiñ. Doi mai fentecünulayaiñ taiñ nütramcayafiel Jehová mu. Acordayaiñ taiñ mülen afaelchi antü mu, feimu rume falin-ngei taiñ amuldungual. Taiñ feipifiel fachantü tati pu che, ca antü acordayafui chi ca eluhuafui tañi inayafiel. Deu conle ti fütra cutrancahun, ca femafui chi quiñeque che.d

FALINTUNIEAFIYIÑ HUNENQUE DUNGU TAIÑ QUIMÜRPUEL

16. ¿Eimi chumngechi cümelcaqueimu Jehová tañi quimeltun? (Ca inaduamnge ti huichulechi dungu “Raquiduamnge chumngechi quimeltuafiel caquelu che”).

¹⁶ Quiñeque quimeltun entuquelu Jehová ñi troquiñche pepicalelngei tati pu che müte quimnofilu Biblia. Tati hueupin hulngequelu afchi semana mu, quiñeque troquiñ ca video mülelu jw.org mu ca quiñeque revista pepicangei ñi quelluafiel pu che testigongenolu. Huelu com iñchiñ quelluafeiñmu. ¿Chumngechi? Quelluqueiñmu taiñ doi piuqueyeafiel Jehová, taiñ doi maneluhual Biblia mu ca taiñ doi cüme quimeltucheal Biblia ñi dungu (Sal. 19:7).

17. ¿Chumngechi quellunieafeiñmu taiñ hune quimürpuel Biblia mu?

¹⁷ Fentren tripantu yenieliyiñ taiñ serfiniefiel Jehová, rume ayüuqueiñ doi cüme adümngen mu quiñe quimeltun. Huelu cafei rume falintuquefiyiñ tati hunenque quimeltun taiñ quimürpuel Biblia mu. Chumngechi peiñ tüfachi troquiñ mu, com iñchiñ quellunieiñmu tüfachi hunenque quimeltun. Quiñeque mu cüdautuafuiñ taiñ cüme llohuafiel hueque dungu ñi feipin Jehová tañi troquiñche. Fei, ¿chumafuiñ? Ñom piuque mu acordanieaiñ Jehová taiñ deumaeteu, fei com quimün ca nehuen niei. Fei adniefi tañi troquiñche. Cafei iñchiñ cam quiñe taiñ piuqueyen che rupale huesaque dungu mu, ¿chumaiñ? Acordanieaiñ chemu Jehová petu apümlafi ti cutrancahun, femngechi ñochi duamngeaiñ. Ca dullifiel mu chem chumal taiñ mongen mu, acordanieaiñ taiñ mülen afaelchi antü mu, femngechi ngünamcalayaiñ taiñ tiempo ca taiñ nieel. Raquiduamtucunieafiyiñ taiñ hune quimürpuel Biblia mu ca amulepe taiñ entual quimeltun, femngechi quimchengeaiñ ca rumel serfinieafiyiñ Jehová.