¿Quimürpuimi tami ayüucüleal chem rupalmi rume?

1. Ayüucüleliyiñ taiñ mongen mu, ¿chumaiñ?

TAMI mongen mu, ¿ayüucülepeimi mai? Tati pu falintuquelu com tati cümelcan ñi elueteu Jehová ayüucülequei ca tüngcülequei. Illcuduamquelaingün tañi nienoel mu quiñeque dungu. Huelu ayüucüleliyiñ rume taiñ mongen mu, “felei tañi mongen, femcünuhuan müten” pilayaiñ. Feimu eluhuafuiñ quintual chumngechi taiñ doi cüdahuelafiel Jehová (Rom. 12:1; 1 Tim. 3:1). Huelu elungenoliyiñ rume quiñe elfal cüdau taiñ ayünieel, ca ayüucüleafuiñ.

2. ¿Chemu cuñihun-ngei taiñ ayüucülenon?

² Ayüucülenoliyiñ taiñ nieelchi dungu mu, huesa dullirpuafuiñ. Rumeñma cüdahuafuiñ taiñ ngillayal quiñeque chemcün taiñ duamnoel rume. Quiñeque peñi, lamngen hueñerpuingün cütu plata ca caquelu chemcün. ¿Chemu femngechi femingün? Quiñeque raquiduamingün chi: “Tüfa iñchengeafulu”, cam “Feula duamniefiñ tüfachi chemcün, üngümhuelayan” pingün, cam “Yeñmufuli tüfachi plata, ca antü huiñoltuafun”. Huelu tati hueñen dungu püramyelafi Jehová, feimu üdequefi (Prov. 30:9). Caquelu peñi, lamngen elungenon mu chi elfal cüdau tañi ayüniefel, rume huesa duamingün, fei püntütripaingün Jehová mu (Gál. 6:9). ¿Chumngechi Jehová tañi pu che femrumeafui femngechi dungu? Pichiquentu ayüucülehuelai chi chem tañi nieel.

3. ¿Chem quimeltueiñmu Filipenses 4:11, 12?

³ Cüdautuafuiñ taiñ cüme duamcüleal, huelu quimürpuafuiñ taiñ femal tüfa. Ti apostol Pablo feipi: “Iñche quimürpun ñi ayüucüleal chem dungu mu rupali rume” (papeltunge Filipenses 4:11, 12). Feipilu tüfa Pablo presulefui, huelu elcünulai tañi ayüucülen. Quimürpui tañi ayüucüleal fill dungu mu. Pablo ñi rupan pengeli com iñchiñ ayüucüleafuiñ cüdaungefule rume. ¿Chumngechi femafuiñ tüfa? Tüfachi troquiñ mu peaiñ cüla dungu taiñ quelluaeteu.

MAÑUMCÜLEAIÑ

4. Taiñ mañumcülen, ¿chumngechi quelluaiñmu taiñ ayüucüleal? (1 Tesalonicenses 5:18).

⁴ Doi mañumfengeliyiñ, doi ayüucüleaiñ (papeltunge 1 Tesalonicenses 5:18). Mañumtuleliyiñ chem taiñ nieel mu, müte raquiduamcülelayaiñ chem taiñ nienon mu. Falintufiliyiñ tati elfal cüdau taiñ nieel feula, ngüneduamcüleaiñ chumngechi doi cüme huechunentuafuiñ taiñ cüdau, ca müte raquiduamcülelayaiñ taiñ quintuafiel caquelu elfal cüdau. Jehová quimniei chumngechi taiñ cümelcaqueteu taiñ mañumcüleal, feimu Biblia feipi taiñ llellipun mu taiñ mañumafiel. Mañumcüleliyiñ, Chau Jehová eluaiñmu tañi “cüme tüngün” (Filip. 4:6, 7).

5. ¿Chemu mülefui ñi mañumal pu Israel che? (Ca inaduamnge ti adentun).

⁵ Raquiduamaiñ ñi femün pu Israel che. Alün rupa pengelingün tañi ayüucülenon niehuenolu ti iyael ñi niequefel cuifi (Núm. 11:4-6). Ti desierto mu cüdaungefui tañi müleal engün. Huelu raquiduamfule engün com tati cümelcan tañi elueteu Jehová, doi ayüucüleafuingün. Mülefui ñi acordayal engün tañi huesalcamequengen esclavongelu engün, Jehová huercüi 10 plaga tañi lifrenentuaeteu. Tripalu engün Egipto mu, Jehová quellueyu tañi yeal plata, oro ca tacun (Éx. 12:35, 36). Cafei Jehová hudamfi ti lafquen ñi lefmahual ti faraon ca tañi ejercito mu. Ca fill antü Jehová elueyu ti mana tañi mongeluhual engün. Fei ramtuhuafuiñ, ¿chemu ayüucülelaingün pu Israel che? Tañi quim mañumnon. Fei engün niefuingün iyael, huelu mañumcülelaingün tañi elueteu Jehová.

6. ¿Chem femafuiñ taiñ mañumcüleal?

⁶ ¿Chem quelluaiñmu taiñ mañumcüleal? Quiñe, ngüneduamafuiñ caque quiñeque antü taiñ nien cümeque dungu ca mañumaiñ. Ca huirintucuafuiñ quiñeque cümelcan taiñ ayühueleteu (Lam. 3:22, 23). Epu, fill antü mañumafuiñ chuchi taiñ cümelcaeteu, doi mai Jehová (Sal. 75:1). Ca cüla, quintuaiñ hueni quim mañumlu, femngechi iñchiñ ca femaiñ. Huelu taiñ hueni quim mañumnole, inayenturpuafuiñ (Deut. 1:26-28; 2 Tim. 3:1, 2, 5). Eluuliyiñ taiñ mañumfengeal, huesa duamlayaiñ nienoliyiñ quiñeque dungu.

7. ¿Chem quellueyu quiñe lamngen tañi doi ayüucületual?

⁷ Peafiyiñ ñi rupan quiñe lamngen mülelu Indonesia mu. Feipi: “Mülelu ti pandemia, trürümün tañi mongen caquelu mu, feimu huesa duamcülefun” (Gál. 6:4). ¿Chem quellueyu taiñ lamngen ñi cüme elcünutual tañi raquiduam? Feipi: “Raquiduamün tati cümelcan ñi llouqueel fill antü, ca cümeque dungu tañi nien tañi mülen Jehová ñi troquiñche mu. Feimu mañumfiñ ta Jehová, feita quellueneu tañi doi ayüucületual”. Inayentufiliyiñ tüfachi lamngen, rume quelluaiñmu ayüucülenoliyiñ taiñ mongen mu.

ÑOM PIUQUENGEAIÑ

8. ¿Chem dungu rupai Baruc?

⁸ Jeremías tañi secretario, Baruc, quiñe rupa ayüucülehuelafui tañi mongen mu. Jehová elfalcünufi ta Baruc quiñe cüdaungechi dungu ñi femal: mülefui ñi quelluafiel Jeremías ñi feipiafiel pu Israel che tañi huesa rupayal tañi feyentunon mu. Huelu pichiñma mu ngüneduamhuelai chem tañi ayünieel Jehová, doyelchi mai fei tañi ayünieel ñi femal. Feimu Jehová feipieyu: “Quintuyahulimi fütraque dungu eimingealu. Quintuyahulhuequilnge femngechi dungu” (Jer. 45:3-5). Jehová feipicai reque: “Ayüucülenge tami rupamequen mu”. Baruc allcütufi ta Jehová, ca amulei ñi hueniyefiel.

9. ¿Chem quimeltueiñmu 1 Corintios 4:6, 7? (Ca inaduamnge ti adentun).

⁹ Quiñeque mu, quiñe cristiano raquiduamafui ñi cümeafel ñi elungeal quiñe falin cüdau. Rume adümuhui, rume cüdaufengei ca alün tripantu serfiniefi Jehová. Huelu cangelu cristiano elungeafui feichi elfal cüdau tañi ayüniefel. ¿Chem quelluafeyu tañi huesa duamnoal? Raquiduamafui tañi huirintucuel Pablo (papeltunge 1 Corintios 4:6, 7). Com tati adümuhun ca tati elfal cüdau Jehová mu cüpai. Chau Jehová eluquelaeiñmu feichi dungu taiñ doi cümen caquelu meu. Eluqueiñmu com tüfachi dungu taiñ rume piuqueyeteu, feimu quiñe regalo reque felei (Rom. 12:3, 6; Efes. 2:8, 9).

10. ¿Chumngechi ñom piuquengeafuiñ?

¹⁰ Raquiduamliyiñ Jesús ñi femün mu, quelluaiñmu taiñ ñom piuquengeal. Fei Jehová ñi Fotümngefui ca elfalcünungei falinque cüdau, huelu cüchanamunfi tañi pu apostol. Ti apostol Juan feipi: “Jesús quimnierquei tañi Chau com ñi elfalcünueteu. Cafei quimnierquei Chau Dios ñi tuhun-ngen ca ñi huiñotual ta quisu meu. […] Fei cüchanamunfi tañi pu inanieteu” (Juan 13:3-5). Jesús raquiduamafui fei engün tañi cüchanamunaeteu, huelu femlai. Fei raquiduamlai Jehová tañi Fotümngen mu tañi nieal ülmen mongen (Luc. 9:58). Jesús rume ñom piuquengefui, feimu ayüucülefui tañi mongen mu, ¡inayentufali llemai! (Juan 13:15).

11. ¿Chem quellueyu Dennis tañi doi ayüucüleal?

¹¹ Quiñe peñi Dennis pingelu mülelu Países Bajos mu eluuquei ñi ñom piuquengeal Jesús reque, huelu cüdautuquei. Feipi: “Pefiel mu ñi elungen cangelu peñi quiñe elfal cüdau iñche ñi ayünieel, lladcüduamquen. Iñche elungeafulu piquen. Femngechi duamlu iñche, chillcatun chumngechi ñi doi ñom piuquengeal. JW Library^® mu marcacünun quiñeque texto tañi doi matu peafiel tañi huiño chillcatual. Tañi telefono meu ca guardaniefiñ quiñeque hueupin quimeltuquelu taiñ ñom piuquengeal.a Quimürpun com tañi femqueel iñche, tüfa tañi püramyeafiel Chau Jehová, iñche tañi saquingeal no. Jehová eluqueiñmu taiñ pichiquentu quellual, huelu fei com adniei tañi dungu”. Eimi ca femngechi dungu rupalmi, eluhuafuimi tami doi ñom piuquengeal. Femngechi, doi hueniyeafimi Jehová ca ayüucüleaimi (Sant. 4:6, 8).

PIUQUENTUCUNIEAIÑ TAIÑ MANELUHUN

12. ¿Chem maneluhun quelluqueiñmu taiñ ayüucüleal? (Isaías 65:21-25).

¹² Doi ayüucüleafuiñ raquiduamliyiñ taiñ feipicünueteu Jehová. Feiti lifru Isaías mu, Jehová feipi ñi quimnien huesaque dungu taiñ rupaquen. Huelu ca feipicünui tañi apümcayafiel com feitachi dungu (papeltunge Isaías 65:21-25). Feiti hue mapu meu nieaiñ cümeque ruca, ayüfalchi cüdau ca iyael taiñ cümelcayaeteu. Ca llicahuelayaiñ taiñ huesa rupayal iñchiñ cam taiñ pu yall (Is. 32:17, 18; Ezeq. 34:25). Rüf maneluhuafuiñ com feitachi cümeque dungu ñi femürpual.

13. ¿Chem dungu meu doi falin-ngei taiñ raquiduamal ti maneluhun meu?

¹³ Fachantü, ¿chemu doi falin-ngei taiñ raquiduamal taiñ maneluhun meu? Taiñ mülen afaelchi antü mu, ‘mülei cüdaungechi dungu ca cuñihun-ngei ta mongen’ (2 Tim. 3:1). Jehová fill antü eluqueiñmu ngülam, nehuen ca tañi quellu taiñ chaftuafiel huesaque dungu (Sal. 145:14). Ca eluqueiñmu maneluhun taiñ yafültucuaeteu. Quiñeque rume cüdauquei ñi eluafiel tañi pu che tañi duamnieelchi chemcün müten. Huelu tüfa rumel felelayai, Jehová feipicünui taiñ eluaeteu doi taiñ duamnieel ti hue mapu meu (Sal. 9:18; 72:12-14). Ca quiñeque chaftuquefi huesa cutran, fill antü cutrancülei cam niei depresion cutran. Huelu afai tati, ti hue mapu mu ngehuelayai cutran ca lan (Apoc. 21:3, 4). Feitachi maneluhun quelluqueiñmu taiñ huesa duamcülenoal taiñ huesa rupamequen mu. Huesa femngeliyiñ, lale quiñe taiñ pu che ca chem huesa dungu rume rupaliyiñ, quimnieiñ taiñ cutrancahun “pichiñmayai müten”. Feiti hue mapu mu turpu ngehuetulayai, feimu ayüucülequeiñ (2 Cor. 4:17, 18).

14. ¿Chumngechi doi maneluucüleafuiñ Jehová ñi feipicünuel mu?

¹⁴ ¿Chem quelluaiñmu taiñ doi maneluucüleal Jehová ñi feipicünuel mu? Peyeniehuaiñ taiñ mülen feiti hue mapu meu. Raquiduamnge tüfa mu: quiñe che cüme pelonole, tucule ñi lente, doi cüme peafui. Taiñ maneluhun quiñe lente reque felei taiñ peal cüpalechi antü meu. Huesa duamcüleliyiñ taiñ nienon duamnieelchi plata taiñ mongeluhual, ¿chumafuiñ? Raquiduamaiñ hue mapu mu taiñ duamhuenoal plata ca inei no rume pofrelehuenoal. Cafei huesa duamcüleliyiñ taiñ llounon quiñe elfal cüdau, ¿chumafuiñ? Raquiduamaiñ taiñ fente cüme mongen nieal ti hue mapu meu. Fentren tripantu ayühunquechi serfinieafiyiñ Jehová, fei raquiduamlayaiñ rume taiñ llohual elfal cüdau (1 Tim. 6:19). Famülque mu, fill dungu meu raquiduamcülequeiñ, feimu cüdautuafuiñ raquiduamal taiñ maneluhun mu. Huelu doi raquiduamcüleliyiñ Chau Jehová ñi feipicünuel mu, doi piuquentucuafiyiñ taiñ maneluhun.

15. ¿Chem quimeltuqueiñmu ñi rupan Christa?

¹⁵ Peaiñ ñi rupan lamngen Christa, tüfa Dennis ñi domo taiñ nütramcapeel parrafo 11. Quisu feipi: “Nien quiñe cutran, tañi cuerpo yafüngelai, pepi trecaquelan. Silla de ruedas mu miyauquen, huelu doi mai tranaconcülen cahuitu mu. Fill antü cutrancülequei ñi cuerpo. Tañi doctor tremotulayaimi pieneu, cüpalechi antü mu doi huesalcayaimi pieneu. Huelu quisu pequelafi cüpalechi antü chumngechi ñi pequefiel iñche. Iñche raquiduamcülequen tañi maneluhun mu, feimu tüngduamcülen. Famülque mu amulei ñi cutran, huelu cüpalechi antü mu cüme mongen nietuan, fei ayüucületuan ti hue mapu meu”.

PU YAMNIEFILU JEHOVÁ “CHEM NO RUME FALTAQUELAI”

16. David feipi pu yamniefilu Jehová “chem no rume faltaquelai”, ¿chemu feipi?

¹⁶ Feingei, tunte ayüucüleliyiñ rume taiñ mongen mu, ca rupaqueiñ huesaque dungu meu. Raquiduamaiñ rey David ñi rupan meu. Lai cüla tañi pu fotüm, dalluntucungei coilaque dungu meu, huesalcaeyu tañi pu hueni ca fentren tripantu inantucuyahulngei ñi langümngeal. Femfulu rume, huelu ayüucülei. Feipi pu yamniefilu Jehová “chem no rume faltaquelai” (Sal. 34:9, 10). ¿Chumngelu feipi? David quimniei Jehová catrütuquelai taiñ rupayal huesaque dungu, huelu eluqueiñmu taiñ duamnieel (Sal. 145:16). David reque, iñchiñ ca femngechi maneluuqueiñ Jehová taiñ quelluaeteu, feimu tüngcülequeiñ ca ayüucülequeiñ tunte rupayüm rume huesaque dungu meu.

17. ¿Chumngelu eluuqueaiñ taiñ ayüucüleal?

¹⁷ Jehová ayülei taiñ ayüucüleal chem dungu rume rupaliyiñ (Sal. 131:1, 2). Quimnieiñ chumngechi taiñ ayüucüleal, yafüluuqueaiñ taiñ quim mañumal, taiñ ñom chengeal ca piuquentucual taiñ maneluhun. Femngechi feipiafuiñ: “Iñche quimürpun ñi ayüucüleal chem dungu mu rupali rume” (Filip. 4:11).