¿Chumngechi quelluqueiñmu Jehová taiñ nehuencüleal?

1. ¿Chem dungu chaftuquefiyiñ, huelu inei quelluafeiñmu? (1 Pedro 5:10).

MÜLEIÑ cüdaungechi antü mu, feimu com rupaqueiñ huesaque dungu mu. Quiñeque peñi, lamngen contueyu quiñe cutran nienolu lahuen, caquelu layeluhuingün, ca quiñeque caiñetueyu tañi pu familia cam tati gobierno (Mat. 10:18, 36, 37). Feimu chem dungu rume rupalmi, maneluhuafuimi Jehová tami nehuentucuaeteu tami chaftuafiel (papeltunge 1 Pedro 5:10).

2. ¿Chumngechi chaftuafuiñ ti huesaque dungu?

² Quiñe che nehuencülelu maneluuquei ñi doi cümelcaletual ti dungu, feimu ayühunquechi serfiniefi Jehová chem dungu rupale rume, caiñetungele rume cam ngüchaltucungele rume. Quisu taiñ nehuen mu cüme chaftulayafuiñ ti huesaque dungu, doi mai duamnieiñ Jehová tañi nehuen (2 Cor. 4:7). Tüfachi troquiñ mu, peaiñ meli regalo taiñ elueteu Jehová ca chem femafuiñ taiñ quelluaeteu.

TI LLELLIPUN

3. ¿Chemu afmatufali taiñ llellipufiel Jehová?

³ Jehová elueiñmu quiñe falin regalo taiñ nehuentuleal. Elueiñmu taiñ nütramcayafiel culpafengelu rume iñchiñ (Heb. 4:16). Tüfa afmatufali, llellipuafuiñ Jehová chem dungu mu rume, chumül rume, chem quehun rume nieliyiñ ca cheu rume müleliyiñ, carcel mu cütu cam püntücünungeliyiñ rume, fei allcütuaiñmu (Jon. 2:1, 2; Hech. 16:25, 26). Quiñeque mu fente taiñ fill raquiduamcülen, quimlayafuiñ taiñ chem piafiel ta Jehová, huelu Jehová quimüñmaqueiñmu taiñ chem pifel (Rom. 8:26, 27). Afmatufali llemai taiñ nütramcayafiel taiñ Fütra Huenu Chau.

4. ¿Chumngelu cümei llellipuafiel Jehová taiñ nehuentucuaeteu?

⁴ Biblia feipi: “Chem rume nüucülelu Chau Dios tañi ayünieel mu llellipuafuiñ, fei allcütuqueiñmeu” (1 Juan 5:14). Feimu cümei taiñ llellipuafiel Jehová taiñ nehuentucuaeteu, quisu am ayünielu taiñ nehuencüleal. ¿Chumngelu feipiafuiñ? Taiñ nehuentulen mu, Jehová pengelquei Huecüfü tañi coilatufengen (Prov. 27:11). Biblia ca feipi Jehová eluuquei ñi “pengelal tañi nehuen ñi füreneafiel feichi che poyequeteu com tañi piuque mu” (2 Crón. 16:9). Felei llemai, Chau Jehová ayüniei taiñ quelluaeteu ca com nehuen niei, feimu maneluucüleafuiñ taiñ nehuentucuaeteu (Is. 30:18; 41:10; Luc. 11:13).

5. ¿Chumngechi quelluqueiñmu ti llellipun taiñ tüngcüleal? (Isaías 26:3).

⁵ Biblia feipi taiñ feipiafiel Jehová chem taiñ raquiduamelnieteu, fei Jehová eluaiñmu tañi cüme tüngün. Femngechi ‘cuñiutucuaiñmeu taiñ piuque ca taiñ raquiduam taiñ inaniefiel ta Cristo Jesús. Pu che pepi adümquelafi tüfachi tüngün’ (Filip. 4:7). Rume mañumcüleiñ Jehová mu. Pu che poyequenofilu ta Jehová fillque dungu femquei ñi tüngcüleal rupan mu huesaque dungu. Quiñeque che quintuquei ñi huellicünuafiel reque ñi lonco tañi raquiduamnoal chem dungu no rume, femngechi ñi tüngcüleal. Huelu tüfa cuñihun-ngeafui. Femngechi femle che, ngünenielai ñi raquiduam, fei contuafeyu Huecüfü (ca ngüneduamnge Mateo 12:43-45). Feichi pu che huellicünuquefilu reque ñi raquiduam pichi tüngduamafui chi. Huelu lloulaingün Jehová tañi cüme tüngün, feimu rüf tüngcülelaingün. Huelu iñchiñ maneluucüleiñ Jehová mu. Feimu llellipufiliyiñ, fei eluaiñmu taiñ tüngcüleal chem dungu rume rupaliyiñ (papeltunge Isaías 26:3). Taiñ tüngduamelaeteu, Jehová acordalelqueiñmu quiñeque troquiñ Biblia. Feitachi versiculo pengelqueiñmu Jehová taiñ duamtuqueteu ca taiñ quelluqueteu (Sal. 62:1, 2).

6. ¿Chumafuiñ taiñ doi quelluaeteu ti llellipun? (Ca inaduamnge ti adentun).

⁶ ¿Chumafuiñ taiñ llohual Jehová ñi quellu? Huesa dungu mu rupaliyiñ, llellipuafiyiñ Jehová. Elcünuaiñ Jehová mu taiñ fanetunieteuchi dungu ca quelluen piafiyiñ (Sal. 55:22). Ca llellipuafiyiñ taiñ eluaeteu quimün taiñ cüme dullial (Prov. 2:10, 11). Ca acordanieaiñ taiñ mañumafiel (Filip. 4:6). Ca raquiduamaiñ chumngechi taiñ quelluqueteu Jehová fill antü ca chem cümeque dungu taiñ eluqueteu, femngechi mañumafiyiñ. Huesaque dungu rupamequelmi rume, ngüneduamnge chumngechi tami quellumequeteu Jehová (Sal. 16:5, 6).

TATI BIBLIA

7. Taiñ papeltuquefiel Biblia, ¿chumngechi nehuentucuqueiñmu?

⁷ Chau Jehová elueiñmu ti Biblia taiñ nehuentuleal. Papeltufilu Biblia iñchiñ, pequeiñ fentren versiculo pengelquelu Jehová taiñ quelluqueteu. Quiñe tüfa Mateo 6:8, Jesús feipi: “Petu tamün llellipunon rume, tamün Chau deu quimniei chem tamün duamnieel”. Jesús am doi cüme quimnielu tañi Chau, rüfngei ñi feipin. Feimu cutrancaulu iñchiñ, maneluhuafuiñ Jehová ñi quimnieel chem taiñ duamnieel ca taiñ quelluaeteu. Biblia mu Jehová feipicünui fentren cümeque dungu tañi mületual, feita rume nehuentucueiñmu (Sal. 94:19).

8. 1) ¿Chem ngülam Biblia mu quelluafeiñmu taiñ nehuentuleal? 2) ¿Chem quelluafeiñmu taiñ acordayal Biblia ñi ngülam?

⁸ Biblia eluqueiñmu cümeque ngülam taiñ nehuencüleal rupan mu huesaque dungu. Feiti ngülam quelluqueiñmu taiñ cüme dullial (Prov. 2:6, 7). Quiñe tüfa taiñ raquiduamcülenoal ti cüpalechi antü meu, doi mai raquiduamcüleaiñ taiñ nieelchi antü mu müten (Mat. 6:34). Fill antü papeltufiliyiñ Biblia ca raquiduamliyiñ taiñ papeltuqueel mu, doi cüdautulayaiñ taiñ acordayal chem ngülam mülelu Biblia mu quelluafeiñmu.

9. Papeltufiliyiñ Jehová ñi quellufiel tañi pu che cuifi, ¿chumngechi yafültucuqueiñmu?

⁹ Biblia mu ca papeltuqueiñ ñi rupan quiñeque che maneluhuingün Jehová, fei quellueyu. Tüfachi pu che iñchiñ reque femngefui (Heb. 11:32-34; Sant. 5:17). Papeltufiliyiñ ñi rupan engün, yafültucuaiñmu taiñ doi maneluhual Jehová mu, “fei taiñ ellcaupeyüm ca nehuen, quellufemqueiñmeu mai müleyüm ta hueñancün” (Sal. 46:1). Tüfachi pu che pengelingün tañi maneluhun Jehová mu ca ayühunquechi serfiniefingün cüdaungechi antü mu rume. Ngüneduamfiliyiñ ñi femün engün, inayentuafiyiñ (Sant. 5:10, 11).

10. ¿Chumafuiñ taiñ doi quelluaeteu Biblia?

¹⁰ ¿Chumafuiñ taiñ llohual Jehová ñi quellu? Fill antü papeltuafiyiñ Biblia ca huirintucuafiyiñ ti versiculo taiñ doi quelluafeteu. Fentren peñi ca lamngen fill pulihuen papeltuqueingün ti texto diario, tripalu ti folleto Fill antü ngüneduamaiñ tati Biblia. Femngechi com antü raquiduamcüleingün tañi papeltuel, feita rume yafültucuqueyu. Femngechi femi quiñe lamngen María pingelu.a Tañi chau ca tañi ñuque mür contueyu cancer cutran, fei pichilehuefui ñi mongeleal engu. Taiñ lamngen mülefui ñi cuidayafiel engu. ¿Chem quellueyu tañi nehuencüleal? Taiñ lamngen feipi: “Fill pulihuen papeltuquefun ti texto diario ca raquiduamquefun chem tañi papeltuel. Femngechi re raquiduamcülequelan tañi huesa rupamequen mu. Doi mai, raquiduamtucuquefiñ Jehová ca tañi falinque quimeltun” (Sal. 61:2).

TAIÑ PU PEÑI CA LAMNGEN

11. Quimfiel taiñ pu peñi ca lamngen ñi nehuencülen, ¿chumngelu yafültucuqueiñmu?

¹¹ Chau Jehová elueiñmu taiñ pu peñi ca lamngen taiñ nehuentuleal. Quisulelaiñ taiñ huesa rupamequen. “Com pu peñi, com pu lamngen ca femngechi cutrancaumequeingün”, huelu nehuencüleingün (1 Ped. 5:9). Ngüneduamlu fei engün ñi chaftufiel tañi huesa rupamequen, maneluhuafuiñ taiñ ca femngechi femal iñchiñ. Quimfiel tüfa, rume nehuentucuqueiñmu (Hech. 14:22).

12. ¿Chumquei taiñ pu peñi ca pu lamngen, ca chumqueiñ iñchiñ? (2 Corintios 1:3, 4).

¹² Taiñ pu peñi ca lamngen yafültucuafeiñmu tañi femquen ca tañi feipin mu. Ti apostol Pablo femngechi yafültucungei. Tañi carta mu üitufi quiñeque peñi ca lamngen tañi quellueteu feichi presuconcülelu tañi ruca mu ca mañumniefi engün (Filip. 2:25, 29, 30; Col. 4:10, 11). Fachantü ca, taiñ pu peñi ca lamngen iñchiñ quelluuqueiñ ca yafültucuuqueiñ rupan mu huesaque dungu (papeltunge 2 Corintios 1:3, 4).

13. ¿Chem quellueyu lamngen Maya ñi nehuentuleal?

¹³ Peafiyiñ chem ñi rupan taiñ lamngen Maya, Rusia mu mülelu. Feiti 2020 tripantu mu, quiñeque soltau conrumei tañi ruca mu tañi ngüneduamafiel fei tañi chemcün. Ca juiciantucungei tañi amuldungulelfiel caquelu che tañi feyentun. Maya feipi tañi pu lamngen ñi rume quellueteu rupan mu feichi dungu. Taiñ lamngen feipi: “Feichi afduamcülelu iñche, tañi pu lamngen mütrümeneu, huirintuculeneu carta ca mensaje, ca feipingen tañi fente piuqueyengen. Iñche quimniefun tañi coneltulen quiñe fütra familia mu. Huelu tañi fente cüme femngen, doi cüme ngüneduamürpun ti piuqueyen”.

14. ¿Chumafuiñ taiñ doi quelluaeteu taiñ pu peñi ca lamngen? (Ca inaduamnge ti adentun).

¹⁴ ¿Chumafuiñ taiñ llohual Jehová ñi quellu? Rupan mu huesaque dungu pülleconcüleaiñ taiñ pu peñi ca lamngen mu ca nütramcayafiyiñ. Ca quelluen piafiyiñ taiñ pu loncolelu, fei engün ‘quiñe ellcaupeyüm cürüf mu reque felei, quiñe ellcaupeyüm tati cürüftucu mahun meu’ (Is. 32:2). Ca acordanieaiñ, taiñ pu peñi ca lamngen ca chaftuquefingün huesaque dungu. Cümelcafiliyiñ tati duamnielu, doi nehuentuleaiñ ca doi ayüucüleaiñ (Hech. 20:35).

TAIÑ MANELUHUN

15. 1) Jesús, ¿chumngechi quellueyu ti maneluhun? (Hebreos 12:2). 2) Iñchiñ cai, ¿chumngechi quellueiñmu ti maneluhun?

¹⁵ Chau Jehová elueiñmu quiñe rüf maneluhun taiñ nehuentuleal (Rom. 15:13). Feichi antü tañi layal Jesús, rupai doi cüdaungechi dungu mu. Huelu tañi maneluhun nehuentucueyu (papeltunge Hebreos 12:2). Jesús quimniefui püntütripanole Jehová mu, quelluntucuafui Jehová müten tañi püramyengeal. Jesús ca maneluucülefui tañi huiño mületual tañi Chau engu ca tañi ngünenieal huenu mu trür tati pu dullingelu engün. Ca femngechi taiñ maneluuquen ti hue mapu mu quelluqueiñmu taiñ nehuencüleal rupaliyiñ rume huesaque dungu mu.

16. 1) Quiñe lamngen, ¿chumngechi quellueyu ñi maneluhun? 2) Eimi, ¿chem quimeltueimu ñi feipin ti lamngen?

¹⁶ Peafiyiñ chumngechi quellueyu tañi maneluhun taiñ lamngen Ana mülelu Rusia mu. Tañi füta presuntucungei tañi serfifiel mu Jehová. Taiñ lamngen feipi: “Rumel llellipuquefiñ Jehová ca raquiduamquen ti maneluhun Jehová taiñ elueteu, tüfa quelluqueneu ñi nehuencünuhual. Taiñ huesa rupamequen feula afai, cümeque dungu acuai. Jehová hueutripayafi tañi pu caiñe, fei iñchiñ cümelcayaiñmu”.

17. ¿Chumngechi pengelqueiñ taiñ falintufiel ti maneluhun? (Ca inaduamnge ti adentun).

¹⁷ ¿Chumafuiñ taiñ llohual Jehová ñi quellu? Eluhuaiñ taiñ raquiduamal tañi feipicünuel Jehová. Peniehuaiñ reque taiñ mülen ti hue mapu mu taiñ pu hueni engün ca taiñ pu che, ca fente taiñ ayüucüleal. Femngechi femliyiñ, “taiñ cutrancahun fütra dungu” troquilayafiyiñ, ca “pichiñmayai müten” piaiñ (2 Cor. 4:17). Cafei feipiafiyiñ caquelu che Jehová ñi feipicünuel. Tati pu che serfiquenofilu Jehová ca rupaqueingün huesaque dungu meu, huelu quimlaingün ti maneluhun taiñ elueteu Jehová. Pichiquen quimeltufiliyiñ rume, eluhuafuingün ñi doi quimafiel Jehová ñi feipicünuel.

18. ¿Chemu maneluhuafuiñ Jehová ñi feipicünuel?

¹⁸ Deu rupalu alün huesaque dungu meu, Job feipifi ta Jehová: “Feula cüme quimnien tami pepilqueel itrocom dungu. Ca chem rume tami raquiduamqueel, pepilfalngei eimi mu” (Job 42:2). Job quimtucui chem no rume catrütulayafui Jehová ñi femal tañi feipicünuel. Acordalu tüfa iñchiñ, nehuentucuqueiñmu taiñ amuleal. Raquiduamnge tüfa mu: quiñe domo cutrancülei pemefi alün doctor, huelu pepi quellungelai. Quiñe antü quimfi quiñe adümuhun-ngechi doctor, fei quimüñmaeyu tañi cutran ca feipi tañi quelluaeteu. Allcülu ti cüme dungu, rume ayühui quimlu rume tañi matu rupanoal ti cutran, huelu maneluucülei. Nehuencünuhui ñi chaftuafiel ti cutran quimlu cai tañi tremotual. Ca femngechi iñchiñ nehuencüleafuiñ quimlu cai Jehová ñi feipicünuel femtripayai llemai.

19. ¿Chem duamnieiñ taiñ nehuencüleal?

¹⁹ Chumngechi ngüneduampeiñ, Jehová elueiñmu ti llellipun, tati Biblia, taiñ pu peñi ca pu lamngen ca ti maneluhun, femngechi taiñ nehuencünuhual. Petu ngüneniele Huecüfü, chaftuafiyiñ huesaque dungu. Huelu eluuliyiñ taiñ cümelcayaeteu tüfachi regalo taiñ elueteu Jehová, nehuencüleaiñ chem huesa dungu rume rupale (Filip. 4:13).