Famentuafimi llemai huesaque raquiduam

1. Com iñchiñ, ¿chem dungu chaftuquefiyiñ?

QUIÑEQUE mu, ¿cüdautuqueimi tami femnoal Jehová tañi üdequeel? Femngechi rupalmi, huesa duamquilnge. Biblia feipi: “Chumngechi ngüchaltucungequeimün huesa dungu mu, ca ngüchaltucungequei com pu che” (1 Cor. 10:13). Feita pengeli eimi müten femngechi dungu mu rupalaimi, caquelu tami pu peñi ca lamngen ca mülei ñi chaftuafiel tañi huesaque raquiduam. Loncontucunge, eimi quisulelaimi, Jehová quelluaimu llemai tami hueutripayal.

2. ¿Chem dungu chi chaftuquei quiñeque cristiano ca estudiaquelu Biblia? (Ca inaduamnge ti adentun).

² Biblia feipi: “Caque quiñeque che ngüchaltucuqueyu quisu tañi illutuqueel, fei tüfa mainatunieyu reque” (Sant. 1:14). Tüfa pengeli com che trürlai, feimu ca trürlai chumngechi ñi ngüchaltucungequen. Quiñe peñi cüpa cudumafui quiñe domo, huelu cangelu peñi cüpa cudumafui chi chaf huentru. Quiñe lamngen ca femngechi huesa raquiduam nieafui chi. Quiñeque huimtulefulu ñi pequefiel pornografia pehuelafuingün, huelu ayüafui tañi ca huiño peafiel. Ca femngechi, quiñeque drogatuquefulu ca rume putufengefulu cüdautuquei tañi huiño femhuenoal. Quiñeque cristiano ca pu estudiaquelu Biblia chaftuquefingün femngechi dungu ca caquelu dungu. Com iñchiñ quiñeque mu raquiduamqueiñ ti apostol Pablo reque. Quisu feipi: “Cüpa femün cümeque dungu, huelu huesaque dungu mülei iñche meu” (Rom. 7:21).

3. Quiñe che cüdautule ñi famentuafiel quiñe huesa dungu, ¿chem raquiduamafui?

³ Eimi rume cüdautulmi tami famentuafiel quiñe huesa raquiduam, feipiafuimi: “Nehuen-ngelan tañi chaftuafiel ca turpu ayühul-layafiñ Jehová” piafuimi chi, huelu tüfa rüfngelai. Taiñ feipin tüfa, ngüneduamaiñ 2 ramtun tüfachi troquiñ mu: 1) ¿Inei ayüquei taiñ femngechi raquiduamal? 2) ¿Chem quelluafeiñmu taiñ chaftuafiel taiñ huesaque raquiduam?

HUECÜFÜ, ¿CHEM AYÜQUEI TAIÑ RAQUIDUAMELAETEU?

4. 1) Ngüchaltucungeliyiñ, ¿chem ayüquei Huecüfü taiñ raquiduamelaeteu? 2) ¿Chumngelu quimnieiñ taiñ chaftuafiel ngüchaltucungeliyiñ?

⁴ Ngüchaltucungeliyiñ taiñ femal huesaque dungu, Huecüfü raquiduamelqueiñmu taiñ pepi famentunoafiel. Feimu Jesús quimeltueiñmu taiñ llellipuafiel Jehová: “Cüpa huelulcangeliyiñ, quellumuiñ ñi connoal huesaque dungu mu, doi mai montulmuiñ Huecüfü meu” (Mat. 6:13). Huecüfü feipiquei tati pu che ngüchaltucungele ñi femal huesaque dungu, famentuafingün Jehová (Job 2:4, 5). ¿Chemu Huecüfü femngechi feipi? Fei quim ngüneulai, feimu inafi tañi huesaque raquiduam ca püntütripai Jehová mu. Huecüfü cai femngechi femlu, raquiduamquei chi taiñ ca femngechi femal iñchiñ. Jesús mu cütu ca femngechi raquiduami culpan chengenolu rume (Mat. 4:8, 9). Huelu, ¿rüfngepei mai ñi feipin Huecüfü? ¿Pepi chaftuquelafiyiñ taiñ huesaque raquiduam? Felelai, chaftuafuiñ llemai. Pablo reque, feipiafuiñ: “Itrofill dungu mu yafüluucülequen Chau Ngünechen ñi duam mu, fei eluqueneu nehuen” (Filip. 4:13).

5. ¿Chemu feipiafuiñ Jehová maneluucülei iñchiñ mu?

⁵ Jehová raquiduamquelai Huecüfü reque. Jehová maneluucülei iñchiñ mu taiñ chaftuafiel huesaque raquiduam. ¿Chemu feipiafuiñ? Chau Jehová feipicünui fentren norngechi che ñi mongetripayal ti fütra cutrancahun mu. Biblia feipi fei engün “fütraque lig tacun tucutuucülei engün”, femngechi pengelingün tañi lifcülen Jehová tañi adquiñ mu (Apoc. 7:9, 13, 14). Jehová am coilatuquenolu, femtripayai ñi feipin, femngechi quimfali ñi maneluucülen iñchiñ mu taiñ chaftuafiel huesaque raquiduam.

6, 7. ¿Ca chem ayüquei taiñ raquiduamelaeteu Huecüfü?

⁶ Huecüfü raquiduamelqueiñmu taiñ huesa raquiduam taiñ nien mu turpu ayühul-layafuiñ Jehová. Huecüfü, ¿chemu ayüquei taiñ femngechi raquiduamelaeteu? Quisu mai ta turpu ayühul-layafi ta Jehová, elungelayai tañi rumel mongeleal, doi mai apümcangeai (Gén. 3:15; Apoc. 20:10). Fei quimniei iñchiñ taiñ nien maneluhun, feimu ütrirnieiñmu ca raquiduamelqueiñmu taiñ nienon maneluhun quisu reque. Huelu Biblia feipilei Jehová ayüniei taiñ quelluaeteu taiñ rumel mongeleal. Chau Jehová “ayünielai ta inei no rume ñi apümcangeal. Ayüniei ta com pu che ñi nor raquiduamtual” (2 Ped. 3:9). Feimu llemai Huecüfü rüfngei tañi apümcangeal, iñchiñ mai maneluucüleiñ taiñ rumel mongeleal.

⁷ Quiñeque mu, nehuen-ngenolu taiñ chaftuafiel taiñ huesaque raquiduam troquihuafuiñ, cam turpu ayühul-layafiñ Jehová piafuiñ. Huelu, loncontucuaiñ Huecüfü mu ñi cüpan feichi huesa raquiduam. Acordanieliyiñ tüfa, nehuencünuhuaiñ ca eluulayaiñ taiñ huehuaeteu Huecüfü (1 Ped. 5:8, 9).

CHUMNGECHI TROQUIHUAFUIÑ TAIÑ CULPAN CHENGEN MU

8. ¿Chem cüpa feipi culpan dungu? (Salmo 51:5; ca inaduamnge ti “Falin dungu”).

⁸ Ca huesa duamelafeiñmu taiñ culpafe chengen taiñ rulpaleleteu Adán ca Eva (Job 14:4; papeltunge Salmo 51:5).a Taiñ culpan chengen mu raquiduamafuiñ taiñ chaftunoafiel huesaque raquiduam ca taiñ turpu ayühulnoafiel Jehová.

9, 10. 1) ¿Chumngechi troquihuingu Adán engu Eva culpalu engu? (Ca inaduamnge ti adentun). 2) Taiñ culpan chengen mu, ¿chumngechi troquiuqueiñ?

⁹ Raquiduamaiñ chumngechi troquihuingu Adán Eva engu culpafengerpulu engu. Culpalu Jehová mu, llicaingu, feimu ellcahuingu. Ca inaduamlu engu tañi triltrangcülen, tacuhuingu. ¿Chemu femingu? Tañi culpan mu huesa duamingu ca yehueingu. Adán ca Eva chumcaunorume huiño hueniyehuelayafuingu ta Jehová. Chumfule engu rume, amuleafui tañi culpan chengen.

¹⁰ Iñchiñ trürlaiñ Adán engu Eva mu, ¿chemu feipiafuiñ? Adán Eva engu niehuelafuingu maneluhun, huelu iñchiñ nieiñ quiñe quellu: Jesús tañi lan. Fei tañi duam mu perdonangeafuiñ taiñ culpan ca cüme hueniyeafuiñ Jehová (1 Cor. 6:11). Femfuliyiñ rume, culpan chengeiñ, feimu huesa duamqueiñ ca yehuequeiñ taiñ huesa femün mu. Biblia feipi ti culpan ngüneniefi com pu che, ca tati pu “culpanolu Adán reque” (Rom. 5:14). Culpafengeliyiñ rume, feipilayaiñ taiñ chaftunoafiel ti huesaque raquiduam ca taiñ turpu ayühulnoafiel Jehová. ¿Chem quelluafeiñmu taiñ femngechi raquiduamnoal? Peafiyiñ.

11. Cüdautuliyiñ taiñ famentuafiel taiñ huesaque raquiduam, ¿chem ngülamtuqueiñmu Romanos 6:12?

¹¹ Quiñeque mu taiñ culpafe chengen mu, taiñ piuque feipiafeiñmu reque: “Turpu chaftulayafimi tami huesaque raquiduam”. Huelu allcütulayafiyiñ tañi feipieteu. Biblia feipi eluulayaiñ taiñ ngünenieaeteu ti culpan dungu (papeltunge Romanos 6:12). Feimu contueliyiñmu huesaque raquiduam, iñchiñ dulliafuiñ taiñ femnoal (Gál. 5:16). Chau Jehová maneluuquei taiñ chaftuafiel ti huesaque raquiduam, feimu feipiqueiñmu taiñ femal. Pepi femnofuliyiñ, feipilayafeiñmu Jehová (Deut. 30:11-14; Rom. 6:6; 1 Tes. 4:3). Feimu contueliyiñmu rume huesaque raquiduam, famentuafuiñ llemai.

12. Turpu ayühulnoafilu Jehová troquiuliyiñ, ¿chumaiñ ca chumngelu?

¹² Ca quiñeque mu taiñ culpan chengen mu, taiñ piuque feipiafeiñmu reque: “Tami nien mu huesa raquiduam, turpu ayühul-layafimi Jehová” piafeiñmu. Huelu allcütulayaiñ taiñ feipieteu. Acordayaiñ, Biblia pengeli Chau Jehová cüme quimniei taiñ culpafe chengen (Sal. 103:13, 14). Quisu com quimniei iñchiñ mu, ca quimniei chumngechi ti culpan dungu huesa raquiduamelqueiñmu caque quiñeque iñchiñ (1 Juan 3:19, 20). Feimu llemai, chaftunieafiyiñ taiñ huesaque raquiduam ca inalayafiyiñ, femngechi lif che troquiaiñmu Jehová.

13, 14. Nieliyiñ rume quiñe huesa raquiduam, ¿chumngelu quimnieiñ taiñ ayühulafiel Jehová?

¹³ Biblia pengeli quiñe che nierumeafui huesa raquiduam, huelu dulliafui ñi inayafiel cam inanoafiel feichi huesa raquiduam. Peaiñ quiñe ejemplo. Cuifi mu Corinto huaria mu, quiñeque cristiano petu tañi cristianongenon homosexualngequefuingün, huelu Pablo feipi ñi elcünun engün femngechi mongen. Huelu, ¿feipiafuiñ tañi niehuenon femngechi raquiduam? Femlai. ¿Rume cüdautupelaingün ñi elcünual feichi raquiduam? Huelu pu ngüneulu ñi inahuenoafiel tañi huesa raquiduam, lifcületuingün Jehová tañi adquiñ mu, femngechi hueniyefingün Jehová (1 Cor. 6:9-11).

¹⁴ Ca femngechi dungu rupaquei fachantü. Chem huesa raquiduam niefulmi rume, famentuafuimi. Quiñeque mu ca conturumeelmu, ngünehuafuimi tami inanoafiel tami “huesaque illutun” ca raquiduam (Efes. 2:3). Feula peaiñ chem quelluafeimu tami famentuafiel tami huesaque raquiduam.

¿CHUMNGECHI FAMENTUAFUIMI HUESAQUE RAQUIDUAM?

15. Taiñ famentuafiel ti huesaque raquiduam, ¿chumngelu falin-ngei taiñ ngünencaunoal?

¹⁵ Tami famentuafiel tami huesaque raquiduam, hunelu mu cüme ngüneduamuhuaimi chem tami doi cüdautuquen, ‘quisu ngünencaulayaimi coilaque raquiduam meu’ (Sant. 1:22). Peaiñ quiñeque ejemplo. Quiñe che putufengelu feipiafui: “Caquelu doi putuquei iñche mu, feimu müte huesalcamequelan” piafui. Quiñe huentru pequelu pornografia feipiafui: “Doi piuqueyeelimu tañi domo, iñche pelayafun ta pornografia”. Femngechi raquiduamle che, doi cüdautulayai tañi conal huesaque dungu meu. Feimu huesa femmequelmi, quisu incaulayaimi tami tüngcüleal, tami raquiduam mu rume femlayaimi. Quimtucunieaimi, eimi tami duam mu huesalcamequeimi (Gál. 6:7).

16. ¿Chumngechi nehuentucuhuafuimi tami femnoal huesaque dungu?

¹⁶ Cafei doi eluucüleaimi tami inanoal huesaque raquiduam (1 Cor. 9:26, 27; 1 Tes. 4:4; 1 Ped. 1:15, 16). Raquiduamnge chem doi cüdautuqueimi tami famentuafiel. Ca raquiduamnge chem hora conturumeafeimu huesaque raquiduam, pun mu chi cam cansalelmi. Pepicahuaimi ca raquiduamaimi chumngechi tami famentuafiel ti huesaque raquiduam. Feimu, taiñ famentuafiel tüfachi huesaque raquiduam, mülei taiñ pepicahual petu ñi acunon (Prov. 22:3).

17. ¿Chem quimeltuqueiñmu José ñi femün? (Génesis 39:7-9; ca inaduamnge ti adentun).

¹⁷ Raquiduamaiñ ñi chumün ta José. Potifar tañi domo cudumuhuayu pieteu, pürüm famentufemfi (papeltunge Génesis 39:7-9). ¿Chem pengeli tüfa? Petu tañi chem pinoeteu rume Potifar tañi domo, José deu quimnieuyefui tañi chumal. ¿Chem quimeltueiñmu José ñi femün? Petu tañi acunon ti huesaque raquiduam, tami piuque mu eluucüleaimi tami femal Jehová tañi ayüqueel. Femngechi cüdautulayaimi tami famentuafiel.

“QUISU NGÜNEDUAMNIEHUAIMÜN”

18. ¿Chem quelluafeimu tami famentuafiel huesaque raquiduam? (2 Corintios 13:5).

¹⁸ Tami famentuafiel huesaque raquiduam, ca mülei tami ngüneduamniehual (papeltunge 2 Corintios 13:5). Femngechi quimaimi chem dungu mu tami norümuhual. Deu tami famentufiel quiñe huesa dungu, ramtuunge: “¿Pürüm famentupefiñ mai?”. Famentufemnofilmi, huesa duamquilnge. Doi mai raquiduamnge chumngechi doi cuñiutucuhuafuimi ca femngechi dungu rupale. Ramtuhuafuimi: “Conturumeelimu huesaque raquiduam, ¿doi pürüm famentupeafun mai? Tañi pequeel, tañi papeltuqueel ca tañi allcütuqueel, ¿doi cüdautuquen tañi famentuafiel huesaque raquiduam? Huefrumele podngechi dungu, ¿cañpüle adquintufemquen? Cüdautufuli rume Jehová tañi huercün dungu, ¿maneluucülen tañi cümelcayaeteu?” (Sal. 101:3).

19. Huesa dulliliyiñ pichique dungu mu rume, ¿chumngelu cuñihun-ngeafui?

¹⁹ Acordayaimi, Biblia feipi: “Tati piuque doi ngünencachefengei chem dungu mu rume ca ngünefalngelai” (Jer. 17:9). Jesús ca feipi: “Piuque mu tripaquei huesaque raquiduam” (Mat. 15:19). Feimu ngüneduamuhulmi, eluulayaimi tami ngünencayaeteu tami piuque. Por ejemplo, quiñe che pehuequenolu pornografia, rupachi antü mu peafui adentun tañi huesa raquiduameleteu, huelu “pornografia no fel tati, feimu cuñihun-ngelai” piafui. Cam tañi raquiduam mu peyehuafui reque tañi femmequen pod dungu, huelu “femnoli tüfachi dungu, huesa dungu no tati” piafui. Femngechi raquiduamcülele, quisu ngünencaumequei, fei tañi piuque yeafeyu ñi femal tañi huesa illutuqueel (Rom. 13:14). ¿Chumafuiñ taiñ ngünencanoaeteu taiñ piuque? Loncontucuaiñ: huesa dulliliyiñ pichique dungu mu, huesa dullirpuafuiñ doi fütraque dungu mu.b Culpaliyiñ, quintulayaiñ taiñ incañpehual, fente huesalcamequelan pilayaiñ.

20. 1) ¿Chem maneluucüleiñ? 2) ¿Inei quelluaiñmu taiñ hueutripayal?

²⁰ Taiñ peel tüfachi troquiñ mu, Chau Jehová nehuentucuqueiñmu taiñ famentuafiel ti huesaque raquiduam. Cafei, Jesús tañi lan mu maneluucüleiñ taiñ rumel mongeleal ti hue mapu mu. Feichi mu contuhuelayaiñmu huesaque raquiduam, feimu doi ayühunquechi serfiafiyiñ Jehová. Petu acunole feichi antü, nehuencünuhuaiñ taiñ chaftuafiel taiñ huesaque raquiduam. Femliyiñ, Jehová quelluaiñmu taiñ hueutripayal.