Feipiafimi pu loncolelu tami quelluaeteu

1. ¿Chumngechi pengeli Jehová ñi piuqueyefiel tañi pu che?

CHAU JEHOVÁ rume piuqueyefi tañi pu serfiqueteu ca cuñiutucuquefi chumngechi femquei quiñe cuidaufisaquelu. Jehová hultucui tañi Fotüm tañi pu che mu ca elcünufi pu loncolelu tañi cuidayafiel (Hech. 20:28). Jehová ayüquei tati pu loncolelu ñi piuqueyenquechi cuidayafiel tañi pu che. Jesús cai loncolelu pu trahunche mu, tati pu loncolelu inaquei Jesús ñi feipin. Feimu yafültucuquefingün ca quelluquefingün pu trahunche ñi cüme hueniyeafiel Jehová (Is. 32:1, 2).

2. Jehová, ¿inei doi duamtuniefi? (Ezequiel 34:15, 16).

² Jehová rume duamtuniefi com tañi pu che, huelu doi mai tati pu cutrancaumequelu. Quiñeque cutrancaumequeingün tañi huesa femün mu, feimu Jehová adniefi pu loncolelu tañi quelluaeteu (papeltunge Ezequiel 34:15, 16). ¿Chem mülei taiñ femal duamliyiñ taiñ quellungeal? Jehová ayüquei taiñ llellipuafiel, huelu ca taiñ feipiafiel pu loncolelu taiñ quelluaeteu (Efes. 4:11, 12).

3. Tüfachi troquiñ, ¿chumngechi quelluaiñmu com iñchiñ?

³ Tüfachi troquiñ mu, peaiñ chumngechi Jehová adniefi pu loncolelu taiñ quelluaeteu taiñ cüme hueniyeafiel Jehová. Ngüneduamaiñ tüfachi ramtun: ¿chumül feipiafuiñ pu loncolelu taiñ quelluaeteu? ¿Chumngelu mülei taiñ femal? ¿Chumngechi quelluqueiñmu pu loncolelu? Feula duamlaiñ chi taiñ quellungeal, cüme hueniyefiyiñ Jehová. Femliyiñ rume, tüfachi troquiñ quelluaiñmu taiñ doi mañumcüleal Jehová ñi adniefiel pu loncolelu, cafei quimeltuaiñmu taiñ chumal duamliyiñ taiñ quellungeal.

¿CHUMÜL QUELLUEN PIAFUIÑ PU LONCOLELU?

4. ¿Chumngechi quimiyiñ Santiago nütramcalai tati cutrancülelu mu? (Santiago 5:14-16, 19, 20; ca inaduamnge ti adentun).

⁴ Santiago feipi chumngechi Jehová adcünuquefi pu loncolelu taiñ quelluaeteu. Feipi: “¿Eimün meu mülei quiñe che cutrancülelu? Mülei ñi mütrümafiel pu loncolelu trahunche mu” (papeltunge Santiago 5:14-16, 19, 20). Santiago nütramcai quiñe che duamnielu ñi cümelcautual Jehová engu. ¿Chumngelu quimiyiñ? Santiago feipi feiti cutrancülelu mülei ñi mütrümal pu loncolelu, feipilai ñi mütrümafiel quiñe doctor. Ca feipi feichi che tremoquetui perdonañmangelu ñi culpan. Quiñe che cutrancülelu amuquei doctor mu, feipiquefi chem tañi cutrancülen ca inaquefi tañi chem pieteu ti doctor ñi tremotual. Ca femngechi quiñe che tañi cümelcautual Jehová engu, mülei ñi feipiafiel pu loncolelu chem tañi rupamequen ca inayafiel tañi ngülamtueteu Biblia mu, fei ñi hueniyeutual Jehová engu.

5. ¿Chumngechi ngüneduamuhuafuiñ taiñ cüme hueniyefiel Jehová?

⁵ Santiago capitulo 5 yafültucueiñmu taiñ feipiafiel pu loncolelu taiñ quelluaeteu. Ngüneduamlu iñchiñ taiñ müte cüme hueniyenofiel Jehová, rume falin-ngei taiñ feipiafiel pu loncolelu petu taiñ famentuunon Jehová mu. Biblia feipieiñmu taiñ cuñiutucuhual. Raquiduamafuiñ taiñ rume cüme hueniyefiel Jehová, huelu famentuumequeafuiñ (Sant. 1:22). Cuifi mu, femngechi felefuingün Sardis trahunche mu. Raquiduamquefuingün tañi cüme hueniyefiel Jehová, huelu Jesús feipieyu ñi felenon (Apoc. 3:1, 2). ¿Chumngechi quimafuiñ taiñ cüme hueniyefiel Jehová? Trürümafuiñ tunte taiñ duamtuniefiel Jehová ñi dungu feula ca feichi antü taiñ fautizahun (Apoc. 2:4, 5). Ramtuhuafuiñ: “¿Ayühulqueneu papeltuafiel ca raquiduamal Biblia ñi feipin mu cuifi reque? ¿Amuquen com ti trahun meu ca cüme pepicauquen? ¿Falintupefiñ mai ti amuldungun cuifi reque? ¿Cam doi falinturpufiñ ñi cüme rupaleal ca nieal falinque chemcün?”. Chuchi rume tüfachi ramtun rüfngefule, pengelafui taiñ ñochiquechi famentuumequen Jehová mu. Femcünuuliyiñ müten, feita doyelcüleafui. Quisu pepi norümtunofiliyiñ ti dungu, quelluen piafiyiñ pu loncolelu. Ca femaiñ deu conliyiñ quiñe huesa dungu mu.

6. Quiñe che fütra culpale, ¿chem mülei tañi femal?

⁶ Quiñe che fütra culpale entungeafui trahunche mu. Femngechi culpan dungu mu conle quiñe che, mülei ñi nütramcayafiel quiñe loncolelu (1 Cor. 5:11-13). Feichi che duamniei ñi quellungeal tañi cüme hueniyetuafiel Jehová. Tañi perdonayaeteu Jehová, feichi che mülei ñi pengelal tañi rüf repentiucülen (Hech. 26:20). Quiñe tüfa, tañi entudungual pu loncolelu mu.

7. ¿Ca inei duamniei ñi quelluaeteu pu loncolelu?

⁷ Pu loncolelu quelluquelafi müten tati culpalu, ca quelluquefi pu rume cüdautulu chaftuafiel huesaque raquiduam (Hech. 20:35). Doi cüdautuafuimi chi petu tami testigongenon drogatuquefuimi, pequefuimi pornografia ca conquefuimi pod cudumuhun mu. Quisulelaimi tati, quelluen piafimi quiñe loncolelu. Fei cüme allcütuaimu, eluaimu cümeque ngülam ca raquiduamelaimu tami ayühulafiel Jehová chaftuniefilmi huesaque raquiduam (Ecl. 4:12). Huesa duamcüleimi chi tami conturumequeteu huesaque raquiduam. Huelu ti loncolelu feipiafeimu: “Cüme femimi tami quintufiel quellu, pengelimi tañi quisutu maneluuquenon ca tami cüpa ayühulfiel Jehová” (1 Cor. 10:12).

8. ¿Chem dungu duamfal-lai ñi feipiafiel pu loncolelu?

⁸ Duamfal-lai tami feipiafiel pu loncolelu com tami huelulcauquen fill antü. Raquiduamnge tüfa, huesa duamelfimi chi quiñe peñi ca lamngen tami huesa pifiel mu cam rume illcutufimi chi. Femngechi dungu meu duamlaimi tami feipiafiel quiñe loncolelu, doi mai cümei tami inayafiel Jesús ñi ngülam tamu cümelcautual (Mat. 5:23, 24). Ca quintuafuimi publicacion mu tami doi tüng chengeal ca tami doi quim ngünehual. Huelu cümelcaletunole ti dungu, feipiafuimi quiñe loncolelu tami quelluaeteu. Cuifi mu, Evodia ca Síntique pepi cümelcautulaingu, fei Pablo feipifi quiñe peñi tañi quelluaeteu engu. Fachantü ca femngechi quelluafeimu quiñe loncolelu tami trahunche mu (Filip. 4:2, 3).

¿CHEMU QUELLUEN PIAFIYIÑ PU LONCOLELU?

9. Yehueliyiñ rume taiñ entudunguafiel pu loncolelu, ¿chumngelu mülei taiñ femal? (Proverbios 28:13).

⁹ Pepi chaftunoafilu huesaque raquiduam troquiuliyiñ cam fütra culpaliyiñ, duamnieiñ nehuen piuquengeal ca maneluhual Jehová mu taiñ quintual quellu. Yehueafuiñ chi taiñ entudungual, huelu mülei taiñ nütramcayafiel pu loncolelu, ¿chumngelu? Jehová elcünui pu loncolelu taiñ quelluaeteu taiñ hueniyenieafiel Jehová. Fei quelluen pifilu iñchiñ pu loncolelu, pengelaiñ taiñ maneluuquen Jehová mu ca taiñ inaquefiel ñi feipin. Maneluucüleiñ Jehová taiñ quelluaeteu ñi chaftuafiel taiñ huesaque raquiduam (Sal. 94:18). Ca maneluucüleiñ Jehová taiñ perdonayaeteu entudunguliyiñ taiñ culpan ca conhuenoliyiñ feichi dungu mu (papeltunge Proverbios 28:13).

10. Ellcacünuliyiñ taiñ culpan, ¿chem rupayafui?

¹⁰ Iñchiñ quelluen pifilu pu loncolelu, rume cümelcaqueiñ. Huelu ellcacünuliyiñ taiñ culpan, quisu huesalcahuafuiñ. Femngechi rupai David, pichiñma mu ellcacünui tañi culpan. Quimniefui tañi ayühulnofiel Jehová, feimu rume hueñancülerpui ca cutranürpui cütu (Sal. 32:3-5). Raquiduamnge tüfa, cutrancülelu iñchiñ müchai amunoliyiñ doctor mu, doi cutranürpuafuiñ. Ca femngechi fütra culpaliyiñ müchai entudungunofiliyiñ pu loncolelu, doi huesalcalerpuaiñ taiñ ayühulhuenofiel mu Jehová. Chau Jehová ayünielai taiñ cutrancaucüleal, feimu mangelqueiñmu taiñ quelluen piafiel pu loncolelu taiñ cüme hueniyetuafiel Jehová (Is. 1:5, 6, 18).

11. ¿Ca chem rupayafui ellcacünuliyiñ culpan dungu?

¹¹ Ellcacünufilu taiñ culpan iñchiñ, ca huesalcaquefiyiñ caquelu. Catrütuafuiñ reque ñi müleal Jehová tañi nehuen trahunche mu, feimu mülerpuafui huesaque dungu ti trahunche meu (Efes. 4:30). Ca femngechi quimnieliyiñ quiñe taiñ pu peñi cam lamngen culpalu, feipiafiyiñ tañi entudunguafiel pu loncolelu. Fei rupale tiempo ca entudungunole, iñchiñ mülei taiñ femal. Femnoliyiñ, culpaconafuiñ (Lev. 5:1). Taiñ piuqueyefiel mu Jehová, ellcacünulayaiñ caquelu che ñi culpan. Femngechi quelluntucuaiñ ti trahunche ñi cümelcaleal ca feiti culpalu ñi cüme hueniyetuafiel Jehová.

¿CHUMNGECHI QUELLUQUEIÑMU TATI PU LONCOLELU?

12. Pu loncolelu, ¿chumngechi quelluquefi quiñe che ñi hueniyetuafiel Jehová?

¹² Biblia feipi pu loncolelu ñi quelluafiel pu duamlu quellu ñi hueniyetuafiel Jehová (1 Tes. 5:14). Culpalmi, pu loncolelu entuai cümeque ramtun tami quimal chem ñi mülen tami piuque mu ca chem tami raquiduamcülen (Prov. 20:5). Tami yehuelen mu cüdaungeafui tami feipial com tañi rupan, huelu nehuencünuhuaimi tami femal müten. Rume raquiduamquilnge chumngechi entun tami dungu (Job 6:3). Pu loncolelu müchai juzgafemlayaimu tami feipin mu, doi mai cüme allcütuaimu. Doi cüme quimle ti dungu, fei hula ngülamtuaimu Biblia meu (Prov. 18:13). Pu loncolelu quimnieingün quiñeque che doi duamnieafui tiempo tañi quellungeal, feimu duamfalafui nütramcayal doi quiñe rupa.

13. Pu loncolelu ñi llellipun ca tañi cümeque ngülam, ¿chumngechi quelluqueiñmu? (Ca inaduamnge ti adentun).

¹³ Tati pu loncolelu doi huesa duamel-layaimu tami culpan mu, doi mai llellipuai eimi mu. Jehová allcütuai ti llellipun, femngechi quelluaimu tami doi nehuencontual. Biblia ca feipi tati culpalu “lonco meu tuculelngeai aceite Chau Jehová ñi üi meu” (Sant. 5:14-16). Tüfachi aceite adentulei Biblia tañi quimeltun. Feimu pu loncolelu nütramcayaimu feiti quimeltun mülelu Biblia mu, femngechi yafültucuaimu ca quelluaimu tami cüme hueniyetuafiel Jehová (Is. 57:18). Tati ngülam mülelu Biblia mu nehuentucuaimu tami inayafiel Jehová ñi feipin. Pu loncolelu ñi quellun mu, allcütuaimi reque Jehová tami feipieteu: “Tüfa tati rüpü, fau püle miyaunge” (Is. 30:21).

14. Tati pu loncolelu, ¿chumngechi quelluafui pu “cüme miyaunolu”? (Gálatas 6:1; ca inaduamnge ti adentun).

¹⁴ (Papeltunge Gálatas 6:1). Quiñe cristiano “cüme miyaunolu” inalai Jehová ñi feipin, huelulcahui chi cam fütra culpai Jehová mu. Pu loncolelu ñi piuqueyefiel mu tati cüme miyaunolu, norümtuquefingün. Griego quehun mu, Biblia feipilu “norümtuafimün”, raquiduamelafeiñmu quiñe ngütamchefe. Quiñe ngütamchefe cuñihunquechi ngütamquefi ta che tañi doi cutrantunoal. Ca femngechi tati pu loncolelu norümtuafiel quiñe che, piuqueyenquechi ngülamtuquefi, femngechi tañi huesa duamelnoafiel. Biblia ca feipi pu loncolelu mülei ñi quisu ngüneduamuhual. Mülei ñi loncontucunieal tañi ca huelulcauquen engün, feimu cuñiutucuhuai tañi doi norngelu troquiunoal ngülamtuchen mu, doi mai ñom piuquengeai ca cutrantupiuqueyecheai (1 Ped. 3:8).

15. ¿Chumafuiñ rupamequeliyiñ huesa dungu mu?

¹⁵ Maneluhuafuiñ taiñ pu loncolelu trahunche mu. Jehová quimeltuqueyu tañi feipiyaunoal caquelu che tañi nütramcaeteu. Ca quimürpuingün tañi entunoal ngülam quisu tañi raquiduam mu, doi mai tati Biblia meu. Jehová ca quimeltuquefi pu loncolelu taiñ quellunieaeteu taiñ chaftuafiel taiñ huesa rupamequen (Prov. 11:13; Gál. 6:2). Tati pu loncolelu caquerumei tañi chumngen. Cafei, quiñeque fentren tripantu yeniei tañi loncolen, caquelu müte no. Huelu huesa dungu mu rupaliyiñ, nütramcayafuiñ chuchi rume. Huelu cuñiutucuhuaiñ tüfachi dungu mu: quiñe che nütramcayafui com pu loncolelu tañi trahunche mu, feipingele hula tañi ayüniefel, fentecünui. Cümelayafui taiñ femngechi femal. Femfuliyiñ, eluucülelayafuiñ taiñ llohual Jehová tañi quimeltun (2 Tim. 4:3). Nütramcafiliyiñ quiñe loncolelu, ramtuafeiñmu chi taiñ deu nütramcafiel caquelu loncolelu ca chem ngülamtueiñmu. Cafei petu taiñ ngülamtunoeteu, ti loncolelu ñom piuque mu ramtuafui cangelu loncolelu chem tañi raquiduamcülen (Prov. 13:10).

¿CHUMAFUIÑ CAQUE QUIÑEQUE IÑCHIÑ?

16. ¿Chem mülei taiñ femal caque quiñeque iñchiñ?

¹⁶ Tati pu loncolelu cuidaqueiñmu ca ngülamtuqueiñmu, huelu feipiquelaeiñmu taiñ chumal. Taiñ feipin ca taiñ femün mu, caque quiñeque iñchiñ pengelelquefiyiñ Jehová taiñ piuqueyeniefiel. Fei quelluaiñmu taiñ cüme femal ca taiñ püntütripanoal quisu mu (Rom. 14:12). Feimu tati pu loncolelu feipiquelaeiñmu taiñ chumal, doi mai pengelelqueiñmu Biblia mu chem tañi raquiduamquen Jehová, fei taiñ cüme dullial. Inafiel mu Biblia tañi ngülam, inayenturpuafuiñ Jehová tañi raquiduam, femngechi cüme dulliaiñ taiñ chumal (Heb. 5:14).

17. ¿Chem eluucüleaiñ taiñ femal?

¹⁷ Chumngechi ñi femquen quiñe cuidaufisaquelu, Chau Jehová piuqueyenquechi cuidaqueiñmu, feimu rume mañumcüleiñ. Jehová huercüi ta Jesús taiñ montulaeteu, fei taiñ nierpual rumel mongen (Juan 10:11). Jehová ca elcünufi tati pu loncolelu trahunche mu taiñ cuidayaeteu, femngechi femtripai ñi feipicünuel: “Iñche eluhuaiñ pu cuidaufisaquelu ñi femal iñche tañi ayüqueel, fei engün eluaimünmu quimün ca quim ngüneduamün” (Jer. 3:15). Feimu cüme hueniyehuenofiliyiñ Jehová cam culpaliyiñ, llicalelayaiñ taiñ feipiafiel pu loncolelu taiñ quelluaeteu. Femngechi peaiñ Jehová tañi adnieteu taiñ cuñiutucuaeteu.