¿Chem quelluafeyu pu domo ñi cuñiutucuucüleal? ¿Chem pilei ti Biblia?
Fentren domo ca pichique malen mapu meu fill huesaque dungu femngequei. ¿Femngechi rupaqueimi? Tüfachi papel mu peaimi chumngelu Chau Dios duamquei tami cuñiutucuhual ca chem femal tañi cutrancangehuenoal pu domo.
Quiñe domo Madhua pingelu, India mapu mu, feipi: “Petu pichicalu iñche, tañi huentru lamngen hulelcaqueneu ca fill piquefeneu fill antü. Deu fütangelu iñche, tañi nanüng amulei tañi huesalcaquefeteu. Ñi nanüng ca tañi püñmo quiñe esclava reque troquiquefeneu. Feimu raquiduamquefun ñi langümuhual”.
Ti Organización Mundial de la Salud feipi: “Huall mapu mu pu domo cutrancangequei”. Cüla domo meu, quiñe peno ahucangequei cam nüntucangequei tañi mongen mu.
Femngechi dungu mu rupalmi, llican mu miyahuafuimi. Raquiduamcüleafuimi tami fill huesa pingeal, ahucangeal cam nüntucangeal cheu püle rume mülelmi. Raquiduamafuimi chi epe com pu che falintuquelafi pu domo. Huelu Chau Ngünechen, ¿falintuquepefi mai pu domo?
Biblia pengeli Chau Dios duamquei ñi cuñiutucungeal pu domo
¿Chem raquiduamquei Chau Dios pu domo mu?
Biblia feipi: ‘Chau Ngünechen deumai huentru ca domo’ (Génesis 1:27, Hue Mapu ñi Biblia).
¿Chem quimeltueiñmu?: Chau Dios deumai huentru ca domo. Fei trür yamquefi. Chau Dios ca feipi ti füta “mülei ñi piuqueyeafiel tañi domo chumngechi quisu piuqueyeuquei”. Feipilai ñi ngünenieafiel, hulelcayafiel ca huesa piafiel pu domo (Efesios 5:33; Colosenses 3:19). Felei llemai, Chau Dios duamquei ñi cuñiutucungeal pu domo.
María, Argentina mapu tuulu, feipi: “Pichicalu iñche, quiñeque tañi pu pariente nüntucaeneu engün. Nielu iñche 17 tripantu, tañi jefe feipieneu ‘pinolmi cudumuhual iñchiu, amutuaimi’ pieneu. Deu tremlu iñche, tañi füta, chau, ñuque ca tañi pu carucatu yamquelaeneu. Huelu rupachi antü mu quimfiñ ta Chau Jehová,b tati Deumalu itrocom. Quisu yamquefi pu domo. Fei quimün tañi piuqueyeteu ca ñi falin-ngen quisu tañi adquiñ meu”.
¿Chem quelluafeimu tami cüme duamcületual?
Biblia feipi: “Mülei ti huenihuen doi piuqueyeuquei tati pu peñihuen mu” (Proverbios 18:24).
¿Chem quimeltueiñmu? Quiñe cüme hueni quelluaimu. Maneluucülelmi quiñe che mu, feipiafuimi tami chum duamcülen.
Elif, mülelu Turquía mu, feipi: “20 tripantu rupai, feipilafiñ inei no rume tañi nüntucangen. Feimu huesa duamcülequefun, fill raquiduamcülequefun ca rume hueñancülequefun. Huelu eluulu iñche entudungulelafiel quiñe hueni, tañi allcütueteu mu rume cüme duameleneu”.
Biblia feipi: “Chau Ngünechen duamtunieimünmeu. Fei tañi cuhu mu elcünuafimün com tamün fill raquiduamelnieteu” (1 Pedro 5:7).
¿Chem quimeltueiñmu? Llellipufilmi ta Chau Dios, fei allcütuaimu (Salmo 55:22; 65:2). Quisu duamtunieimu, feimu cüpa quellueimu tami tunte falintuniehual.
Ana, Belice mapu mu tuhui, feipi: “Quimfilu Jehová quellueneu tañi hueñancülehuetunoal. Feula llellipuafun ta Chau Dios ca feipiafiñ tañi chum duamcülen. Fei ta quiñe cüme hueni quimnielu cai chum duamcülen tañi piuque”.
¿Chem femai Chau Dios ñi cutrancangehuenoal pu domo?
Biblia feipi: ‘Jehová norümcünutuafi ti huesaque dungu ñi femngeel pu cuñifall ca pu cutrantupiuquelelu, fei eluhuelayafi chem che no rume ñi llicalcayaeteu engün’ (Salmo 10:17, 18).
¿Chem quimeltueiñmu?: Dios pichiñma mu apümcünutuafi com norngenochi dungu, tüfa mu coneltuleai ti huesaque dungu ñi femngequen pu domo.
Roberta, México mapu mu, feipi: “Iñche yafültucuqueneu quimal Chau Dios ñi feipin pichiñma mu tañi huesalcangehuenoal pu domo ca pu pichique malen. Tüfa tüngduamelqueneu”.
¿Chem maneluhun hulquei ti Biblia?, ¿chumngelu maneluhuafuimi Biblia ñi feipicünuelchi dungu? ca, ¿chumngechi quelluafeimu Biblia mu pu Dunguquelu Inei Ngen Jehová? Tami doi quimal pepayaen piafuimi.
Ayülmi impresora mu tami deumayafiel tüfachi papel, entufinge tüfachi archivo.
a Tüfachi troquiñ mu, ca üi tuculelngei pu che.
b Chau Dios ñi üi Jehová pingei (Salmo 83:18). Inaduamnge ti troquiñ “¿Inei am ta Jehová?”.