Pu Dunguquelu Ineingen Jehová, ¿chumngelu fiestañmaquelafingün ti Domingo Pascual?
Pu che ñi nütramcaqueel ca ti rüf dungu
Pu che ñi nütramcaqueel: pu Dunguquelu Ineingen Jehová inaniequelafingün ta Jesús, feimu fiestañmaquelafingün ti Domingo Pascual.
Ti rüf dungu: feyentuqueiñ Jesucristo meu fei taiñ montuleteu, ca eluuqueiñ taiñ “inayentuñmayafiel ñi femelchi dungu” (1 Pedro 2:21; Lucas 2:11).
Pu che ñi nütramcaqueel: eimün feyentuquelaimün Jesús ñi huiñomongetun mu.
Ti rüf dungu: cüme feyentuqueiñ Jesús ñi huiñomongetun, ca tüfachi huiñomongetun mu tuhui ti maneluhun taiñ nieel pu cristiano. Feimu taiñ amuldungun mu, rume nütramcaqueiñ Jesús ñi huiñomongetun mu (1 Corintios 15:3, 4, 12-15).
Pu che ñi nütramcaqueel: eluñmaquelaimün tamün pu pichiqueche ñi ayüucüleal tüfachi fiesta mu.
Ti rüf dungu: rume piuqueyequefiyiñ taiñ pu pichiqueche, ca eluuqueiñ taiñ cüme quimeltuafiel ca quelluquefiyiñ ñi ayüucüleal engün (Tito 2:4).
Pu Dunguquelu Ineingen Jehová, ¿chumngelu fiestañmaquelafingün ti Domingo Pascual?
Ñi femngequeel Domingo Pascual meu tuulai Biblia mu.
Jesús feipilaeiñmeu taiñ fiestañmayafiel quisu ñi huiñomongetun, huelu mai taiñ elcünual quiñe antü ñi raquiduamal tañi lan mu. Feimu Jehová ñi pu che fill tripantu mu trahuqueiñ feichi antü ñi lan ta Jesús chumngechi ñi pengelqueel ti raquin tripantuhue nüucülelu ti cüyen Biblia ñi antü meu (Lucas 22:19, 20).
Quimnieiñ Chau Ngünechen ñi ayüquenoel fillque huimtun ñi femngequeel feichi Domingo Pascual meu, tüfa tuulu am fillque huimtun ñi femngequeel cuifi mu pu che ñi yallühual. Chau Ngünechen feipiquei ‘tati pu che ñi eluucüleael tañi poyeaeteu quisu müten’, feimu dulliliyiñ huesaque huimtun ñi nieel ti coila religion, tüfa lladcülcayayu ta Ngünechen ñi ayüquenofiel meu (Éxodo 20:5; 1 Reyes 18:21).
Rüf feyentuleiñ llemai Biblia ñi feipiel taiñ fiestañmaquenoal ti Domingo Pascual. Biblia ta yafültucuqueiñmeu taiñ nieal quimün ca ngüneduamafiel chem dungu ñi cümen cam ñi cümenon, femngechi taiñ re inanoafiel quiñe huimtun (Proverbios 3:21; Mateo 15:3). Feimu feipiquefiyiñ tati pu che taiñ ramtueteu chem raquiduamqueiñ tüfachi dungu mu, huelu eluñmaquefiyiñ quisuque pu che ñi dullial tañi chumal (1 Pedro 3:15).