¿Chem am ti Troquiñ Adniechequelu ñi nieel pu Dunguquelu Ineingen Jehová?

Tüfachi Troquiñ Adniechequelu, Cuerpo Gobernante pingei huincadungun mu. Femngechi üitungei quiñeque quimque peñi ñi adniefiel Jehová tañi pu che huall Mapu püle mülelu. Epu falin dungu femquei:

• Adniefingün ñi cüme pepicangeal ti quimeltun tripalu taiñ publicacion mu, taiñ trahun mu ca taiñ escuela mu (Lucas 12:42).

• Adniefingün taiñ amuldungun cüdau ca dulliqueingün chumngechi ñi pünengeal tati hulqueelchi plata.

Fütra cuifi mu, pu apostol ca pu loncolelu mülelu ta Jerusalén quiñentrür dulliquefuingün falinque dungu ñi cümelcayafiel com pu cristiano (Hechos 15:2). Huelu ngencauquelafuingün tati trahunche mu. Ca femngechi femquei tati Cuerpo Gobernante famülque mu. Quisu engün cüme chillcatuqueingün Biblia tañi adnieaeteu. Ca quimnieingün Jehová ñi elfalcünufiel ta Jesús ñi loncoleal ti trahunche mu (1 Corintios 11:3; Efesios 5:23).

¿Inei engün am coneltulei tati Troquiñ Adniechequelu mu?

Famülque mu coneltulei taiñ peñi Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ca Jeffrey Winder. Quisu engün cüdauqueingün tati fütra Betel ruca mülelu Warwick huaria, Estados Unidos mapu mu.

Tati Cuerpo Gobernante, ¿chumngechi adcünuquei ñi cüdau?

Tüfachi pu peñi elcünui cayu troquiñche ñi cüme adnieafiel fillque dungu taiñ cüdau mu. Com tüfachi pu peñi coneltulelu Cuerpo Gobernante mu cüdauquei quiñe, epu cam doi chi tüfachi cayu troquiñche mu.

• Troquiñche Adcünuquelu ñi Quellucheal (Comité de Coordinadores). Adniefingün ñi com femngeal taiñ cüdau chumngechi ñi feipin tati ley dungu. Pürüm quelluntucuqueingün mülen mu huesaque dungu ca inantucungen mu Jehová tañi pu che.

• Troquiñche Adcünuquelu pu Cüdauquelu Betel mu (Comité de Personal). Tüfachi troquiñche cüdauquei tañi cümelcaleal com tati pu cüdauquelu Betel mu.

• Troquiñche Ngüneduamquelu ñi Entuhuiringeal Fillque Papel (Comité de Publicación). Adniefingün ñi deumangeal ca ñi huercüngeal taiñ fillque publicacion, ca femngechi ñi deumangeal Trahunhue Ruca, tati oficina de traduccion ca fillque Betel ruca.

• Troquiñche Adcünuquelu ti Amuldungun Cüdau (Comité de Servicio). Tüfachi troquiñche adniefi huall Mapu püle taiñ amuldungual ti cümeque dungu Ngünechen tañi ngünenietual ta mapu (Mateo 24:14).

• Troquiñche Pepicaquelu ti Quimeltun (Comité de Enseñanza). Feitachi troquiñche adcünuquei ñi pepicangeal ti quimeltun tripalu taiñ trahun mu, taiñ escuela mu ca taiñ fillque audio ca video mu.

• Troquiñche Adcünuquelu ñi Huirintucungeal Fillque Papel (Comité de Redacción). Tüfachi troquiñche adcünuquei chem ñi tripayal taiñ publicacion mu, taiñ pagina internet mu. Ca femngechi adniefi tati rulpadungun cüdau.

Cuerpo Gobernante ca trahuluuquei fill semana ñi ngüneduamal chem duamniei Jehová ñi troquiñche. Trahuluulu engün, inaduamqueingün ñi feipin Biblia ca eluuqueingün ñi adnieaeteu Jehová ñi nehuen, femngechi ñi cüme tripayal tañi cüdau engün (Hechos 15:25).

¿Inei engün am quelluntucuqueingün Cuerpo Gobernante mu?

Tati Cuerpo Gobernante dullifi quiñeque manelfalchi cristiano ñi cüdahual tati cayu troquiñche mu (1 Corintios 4:2). Quisu engün quelluntucuquei tunten ñi adümuhun engün. Fill semana mülei ñi trahuluhual ti troquiñche cheu ñi adcünungeel. Tüfachi pu peñi dulliquelaingün chem ñi femngeal, huelu hulqueingün cümeque ngülam ñi cüme femngeal tati cüdau. Quisu engün ngüneduamqueingün ñi femtripayal chem ñi feipin ti Cuerpo Gobernante. Quiñeque mu, tati Cuerpo Gobernante ca feipiquefi ñi amual caque troquiñ mapu mu ñi yafültucumeafiel pu peñi ca lamngen. Ca hueupiqueingün tati falin trahun fill tripantu femngequelu ca tati graduacion de Galaad mu.