¿Chumngelu falin-ngei tami trahuluhual Trahunhue Ruca mu?

Pu Dunguquelu Ineingen Jehová (testigos de Jehová) fillque semana epu rupa trahuqueingün Trahunhue Ruca mu. ¿Chem femqueingün tüfei meu? Eimi amulmi, ¿chumngechi quelluaimu? Ngüneduamnge.

• ¿Chem dungu quimeltungequei feita mu?

• ¿Chumngelu cümeafui tami trahuluhual?

• Pu huechequeche ñi feipin

¿Chem dungu quimeltungequei fei mu?

Feiti Trahunhue Ruca mu, pu che quimeltungequei chem pin Biblia. Tüfachi trahun meu, quelluaimu tami quimal quiñeque falin dungu:

• Cüme quimafimi ta Chau Dios.

• Quimaimi chem pengeli fillque dungu ñi ruparupangen Mapu meu.

• Doi cüme piuquengeaimi.

• Cümeque hueni peaimi.

¿Quimquefuimi tüfa? Ti Trahunhue Ruca mu doi quimeltungequei ñi chumal Chau Dios ngünenietule ta Mapu (Mateo 6:⁠9, 10, Traducción del Nuevo Mundo; 24:⁠14, TNM; Lucas 4:⁠43, Ngünechen ñi Neyuntükumuyümchi Chillka [NCH]).

¿Chumngelu cümeafui tami trahuluhual?

Chem ñi quimeltungeal, quelluaimu. Fillque ngülam ñi quimeltungequeel trahun mu, cüpai Biblia meu. Feimu quelluaimu tami nieal quimün (Proverbios 4:⁠5). Tati Biblia rume quelluafeimu tami cüme dullial chem tami femal. Ca quelluafeimu quimal tüfachi falinque ramtun:

• ¿Chumal mongeleiñ?

• ¿Chau Dios ñi pin mu mai cutrancauqueiñ?

• Lan mu pu che, ¿chem rupaquei?

Tüfa ta quiñeque hueupin ñi entungequen afchi semana mu:

• ¿Chumngelu mülei taiñ ngüyülaeteu chi Biblia?

• ¿Inei mu fülconpuafuiñ mülele cutrancahun?

• ¿Chummequei Ngünechen ñi ngünenien ta iñchiñ mu?

Brenda feipi: “Quiñe compañ colegio mu invitafiñ ñi amual ta trahun. Fei amulu, anüiñ quiñentrür tañi familia iñchiñ. Fei iñche pengelfiñ tati lifru ñi inaduamngequeel. Rupalu chi antü, ñi compañ feipieneu: ‘Müna cüme entuimün tamün feipin’ pieneu. Ca feipi: ‘Tañi iglesia mu, nielaingün femngechi lifru’”.

¿Quimquefuimi tüfa? Quiñe che ayüle ñi amual quiñe trahun ñi femqueel pu Dunguquelu Ineingen Jehová, cullilayai. Conpucayafui müten.

Fentren che quimafimi, fei yafültucuaimu. Biblia feipi pu cristiano quiñentrür trahuluuquei ñi ‘hueluconque yafültucuhual’ (Hebreos 10:⁠24, 25). Feimu trahuluhuaimi cüme piuquengechi che engün, duamtuchequelu ca poyequefilu ta Chau Ngünechen. ¿Cümenoafulu tüfa?

Elisa feipi: “Fillque duam ñi nieel, ürcütripaquen, ca hueñancülqueneu cütu. Huelu amun meu trahunhue ruca, feiti pu che yafültucuqueneu. Fei rume ayüucülen huiñotuquen tañi ruca meu”.

¿Quimquefuimi tüfa? Com huall mapu meu, mülei doi 120.000 trahunche pu Dunguquelu Ineingen Jehová ngelu. Ca mülei doi 60.000 Trahunhue Ruca, cheu ñi trahuluuquen engün. Doi fentren che puhulmequeingün ti Trahunhue Ruca, feimu fill tripantu epe 1.500 Trahunhue Ruca deumanentungequei.⁠a