Quiñe pichi caja yafültucuñmafilu ñi feyentun ta che

Famülque mu, pu Dunguquelu Ineingen Jehová nieiñ doi publicacion ca video taiñ entungequen internet mu. Huelu quiñeque troquiñ Mapu mu pepi femquelai pu peñi, pu lamngen. Quiñeque troquiñ mu, rume ñochingei ti internet, catrüquei. Cangelu troquiñ mu, ngelai.

Huelu famülque mu, fentren pu peñi ca lamngen pepi nacümafui publicacion nienole rume internet. ¿Chumngechi pepi femqueingün?

Trahunche mu nienolu internet huercüngei quiñe pichi caja JW Box pingelu. Feichi pichi caja ngillangequei quiñe empresa mu. Pu peñi coneltulelu ti troquiñche adniequefilu pu electronico chemcün Betel mu deumaingün quiñe programa, fei tuculelfingün feichi pichi caja mu. 58.000 peso chileno peno fali tati pichi caja.

Trahunhue ruca mu, pu peñi, pu lamngen conectaqueingün ti pichi caja mu, femngechi nacümqueingün tati publicacion. Cuifique electronico chemcün rume conectayafui ti pichi caja mu. Quiñe trahunche mu nienole internet pepi nacümlayafui tati pu publicacion ca video. Feimu Betel huercüquei pichique electronico chemcün, memoria USB pingelu. Tüfa fali 3.000 peso chileno peno. Fei tuculelfingün hueque video ca publicacion mülelu jw.org mu. Feiti pichi electronico chemcün conectafingün ti pichi caja mu, fei hula entuqueingün tati hueque video ca publicacion.

¿Chumngechi quellueyu taiñ pu peñi JW Box pingechi pichi caja? Taiñ peñi Nathan Adruandra pingei, mülei República Democrática del Congo mu. Quisu feipi: “Mufüque rupa ayüfun ñi nacümafiel ti video ‘Awem Jewba, eymi mu maneluwkülen’ ca ti video Akordafimün Lot ñi domo. Pepi nacümlafiñ, feimu huesa duamnagün. Feula pepi nacümafun ti video, femngechi doi cüme quimelelafuiñ taiñ pu yall”.

Quiñe peñi mülelu Nigeria mapu mu quelluquei ñi pünengeal JW Box pingechi caja. Quisu feipi: “Pu peñi pequefingün JW Box quiñe regalo cüpalu Jehová mu. Taiñ pu peñi rume ayüucüleingün ñi nacümafiel fillque quellu taiñ quimeltucheal”.

Doi 1.700 pichique caja huercüngei pu peñi África mu, Oceanía mu ca Sudamérica mu. Ca huercüngeai fentren pichique caja trahunche mu cheu ñi duamniengeel. ¿Cheu tripaquei tati plata? Taiñ pu peñi, pu lamngen ñi trapümqueel mu. Fentren peñi coni ti pagina internet mu, donate.jw.org mu ñi hulal plata. Mañumuhuiyiñ tamün hulqueel mu.