Taiñ canal satelital puuquei cheu ñi puuquenon internet

Iñchiñ fill cüyen rume ayüniefiyiñ ñi peafiel com ti video tripaquelu JW Broadcasting mu. Huelu pu peñi, pu lamngen África mapu mu mülelu pepi pelafingün internet mu. ¿Chumngelu?

Fentren lof África mapu mu nielaingün internet. Quiñeque lof niei internet, huelu rume falin-ngei ca rume cüdaungei ñi cargangeal. Quiñe ejemplo, quiñe huitran-ngepaquechi loncolelu Madagascar mapu mu mülelu amui cheu ñi arrendangequen internet ñi nacümafiel ti Broadcasting, fei culli 16 dolar. Fentren che quiñe semana mu rume cullingelayafui fenten plata tañi cüdau mu.

Felen mu rume, feula millonque che África mapu mu pequefingün JW Broadcasting nienon mu rume internet engün. ¿Chumngechi am tüfa?

2017 tripantu mu, pengelngequei JW Broadcasting quiñe canal satelital mu ñi pengeal África mapu mu sur püle. Tüfachi canal mu pengelngequei video 16 quehun dungu mu fill antü ca com antü, ca cullingequelai rume.

Pu Dunguquelu Ineingen Jehová fill cüyen culliquefingün 12.000 dolar quiñe empresa nielu satelite huenu mu, femngechi pengelngequei JW Broadcasting 35 pais mu África mu. Doi pünequefiyiñ quiñe canal müten, huelu mülen mu quiñe falin-ngechi trahun, fei pünequefiyiñ cangelu canal. Femngechi mülele fütraque trahun ca cüpale quiñe peñi central mundial mu tuulu, allcütungeafui ti hueupin petu ñi hueupingequen ca lof mu.

Fentren pu peñi ca pu lamngen ca testigo ngenolu rume pequefingün ti canal. Huelu fentrenque pu peñi ca lamngen rume pofreleingün, feimu nielai chumngechi ñi peafiel engün. Feimu 3.670 Trahunhue Ruca mu, tucungei ti antena ca fillque chemcün ñi llohuafiel ti satelite. Femngechi pu peñi ca pu lamngen trahuluuqueingün ñi pemeafiel ti Broadcasting. Ti Trahunhue Ruca niele televisor ca proyector, 70 dolar pünengeafui ñi ngillangeal faltalelu. Huelu nienole televisor ca proyector, fei pünengeafui 530 dolar.

Pu peñi ca pu lamngen rume mañumcüleingün tüfachi canal mu. Quiñe loncolelu Camerún mu tuulu feipi: “Iñche ca tañi familia mana troquiquefiyiñ ti canal”. Quiñe peñi Odebode pingei, Nigeria mapu mu tuulu, feipi: “Iñche ca tañi familia pequefiyiñ ti canal cüla rupa semana mu. Tañi pu fotüm rume ayüleingün ñi acual feichi antü. Doi alünque rupa ‘tuculelmuaiñ’ piqueneu engün”. Ca Rose, Nigeria mapu mu mülelu, feipi: “¡Rume ayüucülen! Cuifi rume pequefuiñ ti canal noticia hulquelu, huelu feula rume ayüniefiñ ñi peafiel ti canal JW. Ñi pefiel mu ti noticia, illcufemquefun ca püraquefui tañi presion. Huelu ñi pefiel mu ti canal JW, cüme duamelqueneu ca tüngcülequei tañi raquiduam. Tüfa ta doi cüme canal, ca Jehová mu tuulu troquiquefiñ”.

Quiñe huitran-ngepaquechi loncolelu Mozambique mu tuulu feipi fei ñi circuito mu quiñeque Trahunhue Ruca mu tucungei antena ca fillque chemcün ñi pengeal ti canal JW. Pu peñi ca lamngen puuqueingün ti Trahunhue Ruca mu quiñe hora petu ñi connon ti trahun ñi peafiel JW Broadcasting.

2019 tripantu mu, Johannesburgo huaria mu (Sudáfrica), femngei quiñe fütra trahun cheu ñi cüpan fentren che fillque lof mapu mu. Hueupi quiñe peñi concülelu Cuerpo Gobernante mu. Satelite mu pengelngei ti doi falinque hueupin, femngechi ñi allcütual pu peñi ca lamngen ailla lof mapu mu. Peñi Sphumelele cüdauquei ti Betel mu Sudáfrica mapu mu mülelu. Fei feipi: “Cuifi mu, ti hueupin hulngequefui internet mu. Huelu quiñeque mu, ti internet nehue cümequelafui ca fentren plata cullingequefui. Feula ti hueupin hulngequei satelite mu, ca doi pichin plata cullingequei, ca doi cüme allcütufali”.

Mañumuhuiyiñ tamün hulqueelchi plata mu, femngechi cullingequei tati canal satelital. Tamün quellun mu, pu peñi ca pu lamngen África mu mülelu pepi pequefingün JW Broadcasting. Tati pagina donate.jw.org mu quimeltungequei chumngechi ñi hulngeal plata.