Mülelu chi huesa cutran coronavirus huall Mapu quelluquefiyiñ pu che

Marzo 2020 allcütuiñ ñi tripan quiñe huesa cutran coronavirus pingei, raquiduamlafuiñ rume tüfachi virus amulei ñi doi huesalcayafiel pu che doi tripantu. Tüfachi virus ñi duam fentren che huesa rupai, taiñ pu peñi ca pu lamngen cütu cutrancahuingün, huesa duamingün, ca filla dungu mu rupaingün. ¿Chumqueiñ taiñ quelluafiel pu peñi, pu lamngen?

Quelluquefiyiñ pu peñi, pu lamngen fillalelu

Adcünungei ñi müleal doi 950 troquiñche ñi quelluafiel pu che huall Mapu mu, Comite de Socorro ca pingequei huincadungun mu. Tüfachi fillque Comite de Socorro quelluntucuquefi pu peñi, pu lamngen tañi mapu mu. Caquelu pu peñi ca pu lamngen ca quelluntucueyu pu autoridad. Fillque Comite de Socorro fentren cüdau niefuingün ñi quellucheal.

Peafiyiñ chem rupai Paraguay mapu mu. Ti pandemia rume huesalcafi pu che mülelu üye mu. Fentren che nielaingün rume iyael. Huelu ti Comite de Socorro deu huercülelfi quiñeque peñi, lamngen quiñeque paquete epu semana ñi mongeluhual. Fentren paquete caque quiñeque doi 20.000 pesos fali. Niei iyael, articulos de limpieza ca fillque articulo de limpieza personal pingequei huincadungun mu. Puhuafui ñi iyal quiñe familia ñi mülen meli che.

Pu peñi, pu lamngen adcünuquelu ti paquete ca hulquelu cüme cuñiutuculei, tacungequei tañi hun mascarilla mu ca müte fülmaniequelafingün caquelu che. Ca tañi pu eluqueteu iyael mülei ñi lifchengeal ca cuñiutucuucüleal ti virus mu. Com pu cüdauquelu ñi cüme adcüleal ti paquete mülei ñi cuñiutucuucüleal: tucuniefingün mascarilla, guantes, liftuquefingün ca desinfectaquefingün tañi auto ca cheu tañi müleal tati paquete. Ca pu hulquelu ti paquete fülmanielafingün pu llouquelu.

Cüme ngüneduamngequei chumngechi ñi gastangeal ti plata

Enero 2021 tripantu mu, ti Troquiñche Adcünuquelu ñi Quellucheal feipi ñi gastangeal doi 18.000 millones de pesos chilenos ñi quelluafiel pu huesa rupamequelu feiti coronavirus mu. Fillque Betel ca Comite de Socorro cüme cuñiutucuniequefi ti hulngeelchi plata ñi cüme gastangeal. Fei quintuquefi müte falinochi iyael ca fillque chemcün. Por ejemplo, ngüneduamnge ñi rupan Chile mapu mu. Ti Comite de Socorro ngillayalu 750 kilo lenteja, huelu quiñe cüyen mu müten, rume falitui chi lenteja. Fente falilu rume ti lenteja, eluhuingün ñi ngillayafiel. Huelu epu hora rupalu hula, ti fendequelu lenteja feipieyu engün: “Huiñolelngetun lenteja, feimu fendeleluhuayiñ eimün hula, cuifi tañi nien feichi precio felecai müten” pi. Fei doi faratuletui ti lenteja.

Huelu yemengelu chi lenteja, tati fendequelu pilafui ñi eluafiel ti lenteja feichi precio ñi feipin. Ca feipintucufi: “Eimün nor duam mu quelluquelafimün ta che” pifi. Quiñe peñi llellipufi ta Jehová ñücüfcülen mu, fei feipifi tati fendequelu: “Com taiñ pu trahunche ramtuquefiyiñ taiñ quimal inei doi duamniei ñi quellungeal”. Cafei feipifingün ti fendequelu taiñ quelluquefiel caquerume tuhun-ngechi pu che, fei ngüneduamngequei ñi huimtun taiñ eluafiel iyael tañi duamnieel. Feimu huichuque deumangequei quiñeque paquete ñi elungeal caquerume tuhun-ngechi familia. Ca feipifingün pu Dunguquelu Ineingen Jehová pediquelaingün plata, doi mai pu che ayühunquechi piuque mu hulquei plata ñi quelluntucual. Afmatulehuei chi huentru, feimu fendequefi tati lenteja tati precio niequefel cuifi, doi mai regalafi 400 kilo lenteja ca rupa.

‘Rüf piuqueyeuqueingün’

Quiñe cushe lamngen, Lusu pingei lantulei ca mülei Liberia mapu mu tañi familia engün, cayungeingün. Quiñe pulihuen, petu papeltumequeingün ti texto diario, quiñe tañi chuchu regle tripantu nielu ngüneduami ñi ngehuenon iyael. Feimu ramtui: “¿Chem am iaiñ hula?”. Tañi chuchu feipieyu: “Deu llellipufiñ ta Chau Jehová taiñ quelluaeteu, rüf maneluucülen taiñ quelluaeteu” pifi tañi chuchu. Femngechi tüngduamelfi. Feichi nagantü mu müten, mütrümeyu pu loncolelu ñi yemeal iyael. Taiñ lamngen Lusu feipi: “Tañi chuchu feipi: ‘Fei hula quimün Jehová tañi allcütuquen ti llellipun’”.

Congo mapu mu, mülei quiñe domo carucatuniefilu quiñe familia testigongelu, feimu ngüneduami ñi cüpalelngen iyael pu testigo. Fei feipi: “Rupale chi pandemia, testigongerpuaiñ. Fei engün cuñiutucuniefingün tañi pu lamngen”. Tañi füta feipieyu: “Testigongerpuaimi tami elungeal quiñe bolsa de arroz müten”. Tañi domo huiñoldungueyu: “No, feimu no tati. Huelu feichi bolsa de arroz pengelquei ñi rüf piuqueyehun engün”.

Rume mañumuhuiyiñ tamün quelluntucumufiel plata mu. Femngechi matumatu quelluquefiyiñ pu peñi ca pu lamngen tüfachi pandemia mu. Rume mañumuhuiyiñ com pu hulquelu plata taiñ pagina donate.jw.org internet mu.