Lunes 22 conchi septiembre
Com troquiñ mapu mülechi pu che meu quimeltuafimün iñche tañi inayaeteu engün. Fei ti Chau, ti Fotüm ca Chau Ngünechen ñi nehuen tañi üi meu fautizayafimün engün (Mat. 28:19).
Jesús ayüquefui caquelu che ñi üituafiel Chau Dios ñi üi. Pu loncolechi judio feipiquefuingün chi ñi üitungenoal Jehová ñi üi fente ñi yamfalngen. Huelu ñi feipin pu huentru catrütulaeyu ta Jesús ñi püramyeafiel Chau Dios tañi üi. Raquiduamaiñ ñi femün ta Jesús Gerasa mapu mu. Tremoltufilu quiñe huentru conhuecüfülelu, fente ñi llicalen pu che feipifi tañi amutual (Mar. 5:16, 17). Jesús am ayüfulu com che ñi quimafiel Jehová tañi üi, feimu petu ñi amutunon feipifi ti huentru ñi quimelelafiel pu che ñi femün ta Jehová quisu meu (Mar. 5:19). Jesús ca ayüfui iñchiñ taiñ quimelelafiel pu che Jehová tañi üi (Mat. 24:14; 28:19, 20). Femliyiñ, ayühuelafiyiñ ta Jesús. w24.02 pag. 10 parr. 10
Martes 23 conchi septiembre
Amuleimi iñche tañi üi ñi duam mu (Apoc. 2:3).
Müna ayühun-ngei coneltuleal Jehová tañi troquiñche mu. Taiñ mülen mu fentepun antü meu, doi huesalcalerpui taiñ mongen. Huelu Jehová elueiñmu taiñ pu peñi, pu lamngen taiñ quellunieaeteu (Sal. 133:1). Jehová quelluqueiñmu ayüucüleal taiñ familia iñchiñ (Efes. 5:33–6:1). Jehová eluqueiñmu quimün ca quelluqueiñmu taiñ cüme raquiduamcüleal ca ayüucüleal. Mülei taiñ nehuencünuhual taiñ serfinieafiel ta Jehová. ¿Chumngelu? Hueluraquiduamelafeiñmu ñi chem piquen ca ñi femquen pu peñi pu lamngen. Ca huesa duamcüleafuiñ taiñ huelulcan mu, doi mai huelulcaumequeliyiñ quiñe dungu meu. Duamfali taiñ serfinieafiel ta Jehová rupaliyiñ cüla dungu mu: 1) huesa duameleliyiñmu quiñe peñi cam lamngen, 2) huesa duameleliyiñmu taiñ afcadi, ca 3) huesa duamcüleliyiñ taiñ culpan mu. w24.03 pag. 14 parr. 1, 2
Miercoles 24 conchi septiembre
Tunte amulele rume taiñ serfiquefiel ta Chau Dios, amulepe taiñ femmequen (Filip. 3:16).
Allcütuqueimi chi ñi femün quiñeque peñi ca lamngen ñi doi cüdahuelfiel ta Jehová. Amuingün chi tati Escuela ñi Pepicangeam pu Amuldunguquelu Ngünechen ñi Gobierno, cam amuingün chi cheu ñi doi duamfalngen amuldunguquelu. ¿Eluucüleimi tami femngechi femal? Yafüluunge tami huechurpual. Pu peñi ca lamngen rumel quintuquei chumngechi ñi doi cüdahuelafiel ta Jehová (Hech. 16:9). Huelu pepilnolmi tami doi cüdahuelafiel ta Jehová, falinolu troquiuquilnge. Doi falin-ngei mai taiñ rumel nehuentuleal Jehová ñi rüpü mu (Mat. 10:22). Ngoimaquilnge Jehová rume ayüuquei taiñ rumel serfinieafiel com taiñ nehuen mu, femngechi rumel inanieafimi ta Jesús deu tami fautizahun mu (Sal. 26:1). w24.03 pag. 10 parr. 11