Septiembre

Jehová elufi nehuen ta Jesús ñi apümafiel huesaque dungu. Ñi femün mu afmatun dungu ta Jesús, pengeli ñi nien ta nehuen ñi apümafiel huesaque dungu iñchiñ taiñ femnoafel. Iñchiñ taiñ culpan chengen mu, cutranqueiñ ca laqueiñ. Huelu Jesús pengeli ñi nien ta nehuen taiñ lifrenentuaeteu ti culpan dungu mu (Mat. 9:1-6; Rom. 5:12, 18, 19). Cafei ñi femün mu afmatun dungu, Jesús pengeli ñi tremoltuafiel “fillque cutran” ca ñi huiñomongeltuafiel pu layelu (Mat. 4:23; Juan 11:43, 44). Jesús ca niei nehuen tañi tüngcünuafiel ti cürüftucu mahun ca ñi huehuafiel pu huesaque püllü (Mar. 4:37-39; Luc. 8:2). Müna cümei Jehová ñi elufiel nehuen ta Jesús ñi femal femngechi dungu. Maneluucüleaiñ Jehová ngünenietufile mapu, com huechutripayai ñi feipicünuel. Jesús mülepalu mapu mu, femi alünque afmatun dungu. Tüfa raquiduameleiñmu doi cümeque dungu ñi femal loncolele Jehová ñi Gobierno meu. w23.04 pag. 3 parr. 5-7

Mülelmi quiñe fütra trahunche mu, fei elungelan comentario pilmi, raquiduamürpuimi chi tami huitrañpüramhuenoal tami cuhu. Huelu fentecünulayaimi. Müfüquen comentario pepicayaimi fill trahun mu. Femngechi pürüm elungenolmi comentario hunenque parrafo mu, cüpalelu mu elungeafuimi. Papeltumequelmi Ti Huerquen, cüme ngüneduamnge caque quiñeque parrafo, fei ramtunge: “Tüfachi parrafo, ¿chumngechi nüucülei tañi papeltumequen mu?”. Femngechi chem parrafo mu rume huiñoldunguafuimi. Quiñeque parrafo nütramcai falinque quimeltun doi cüdaungei tañi adümngeal, feimu cüdaungei tañi huiñoldungungeal, feimu feitachi parrafo cüme pepicayafimi. Huelu elungelayafuimi ta comentario, ¿ca chumafuimi? Petu ñi connon ti trahun, feipiafuimi tati peñi chem parrafo mu tami huiñoldungual. w23.04 pag. 21, 22 parr. 9, 10

José eluhui ñi adnieaeteu Jehová, feimu cüme fütangefui. Cüla rupa Jehová yefaltuculeyu chumngechi ñi adcünual tañi familia. Cüdaungefulu rume, José eluhui ñi fementufemal (Mat. 1:20; 2:13-15, 19-21). Allcütuquefiel mu ta Dios, José cüme cuidafi ta María. Ñi femün mu ta José, ¿María doi poyepelaeyu ca yamnieyu? Pu füta, ¿chumngechi inayentuafuimün ta José? Quintumün Biblia mu chumngechi cuidayafiel tamün familia. Inafilmün ñi feipilen Biblia tunte cüdaungefule rume, pengelaimün tamün piuqueyeniefiel tamün domo, femngechi doi quiñeucüleaimün. Quiñe lamngen Vanuatu mapu mu doi 20 tripantu yeniei ñi fütangen, fei feipi: “Iñche tañi füta inafiel mu Jehová ñi ngülam, doi yamquefiñ, doi cüme cuidaqueneu ca doi maneluuquen quisu meu”. w23.05 pag. 21 parr. 5

Pu judio huiñotulu Israel mu, mülefui ñi lif troquiñchengeal (Deut. 7:6). Quisu engün mülefui ñi norcünutual ñi mongen ñi ayühuelafiel ta Jehová. Epe com pu judio choyüngefui Babilonia mu, feimu fei engün reque raquiduamquefuingün. Fentren tripantu deu ñi huiñotun Israel mu, Nehemías quimürpui fei engün tañi yall quim hebreo dunguquelafui (Deut. 6:6, 7; Neh. 13:23, 24). Feimu feitachi pu hueche, ¿chumngechi am quimürpuafuingün ta Jehová? Feichi mu, Chau Dios ñi Dungu huirintucungefui hebreo quehun dungu mu (Esd. 10:3, 44). Feimu pu judio mülefui ñi cüme elcünutual tañi mongen. Deu mületulu engün am Israel mapu mu, feimu doi cüdautulayafuingün ñi femal, üyeu pu che eluucülefui ñi poyeafiel ta Jehová (Neh. 8:8, 9). w23.05 pag. 15 parr. 6, 7

Quiñeque mu eluucüleafuiñ taiñ dirpuafiel taiñ ayünieel, huelu huesaque dungu catrütuafeiñmu. Huesa dungu ruparumeafui, fei müntuñmayafeiñmu taiñ tiempo taiñ dirpunoafiel tañi ayünieel (Ecl. 9:11). Yafüngehuelayafuiñ cam nehuen-ngehuelayafuiñ rume (Prov. 24:10). Ca quiñeque mu taiñ culpafe chengen mu huesaque dungu femafuiñ, fei eluñmalayafeiñmu taiñ dirpuafiel taiñ ayünieel (Rom. 7:23). Ca quiñeque mu cansaleafuiñ (Mat. 26:43). ¿Chem quelluafeiñmu taiñ chaftuafiel huesaque dungu? Quiñeque dungu catrütuelmu dirpuafiel tami ayünieel, fentecünuquilnge, amulenge. Biblia feipieiñmu taiñ rupayal huesaque dungu mu, huelu ca feipieiñmu taiñ dirpual taiñ ayünieel. Feimu huesaque dungu mu rupaliyiñ rume, huelu fentecünunoliyiñ taiñ cüdahuelafiel Jehová, ayühuelafiyiñ. w23.05 pag. 30 parr. 14, 15

Precursorngelmi, quelluaimu tami cüdahual caquerumechi che engün ca ñi cüme püneafiel tami plata (Filip. 4:11-13). Hunelu mu, precursor auxiliarngeafuimi, fei rume quelluquefi pu che ñi precursor regularngerpual. Precursorngelmi, ca mangelngeafuimi ñi femal caquelu cüdau, coneltuafuimi deumarucan mu cam cüdahuafuimi Betel mu chi. Com pu peñi mülei ñi pepicaucüleal ñi loncolerpual trahunche mu. Biblia feipi pu peñi ayülu ñi loncolerpual trahunche mu “müna cüme cüdau ayüniei” (1 Tim. 3:1). Petu ñi loncolenon trahunche mu, hune siervo ministerialngeafui. Tati pu siervo ministerial quelluntucuquei pu loncolelu tañi cuidayafiel tati pu peñi ca pu lamngen. Pu siervo ministerial ca pu loncolelu ñom piuque mu quelluquefi tati pu peñi ca pu lamngen, ca ayühun mu amuldunguqueingün. w23.12 pag. 28 parr. 14-16

Ti lonco ülmen Josías eluhui ñi quintuafiel Jehová hueche huentrungelu. Quisu ayüquefui ñi cüme quimafiel Jehová ca femal quisu ñi ayüqueel. Feichi antü mu epe com che poyequefui coilaque dios, feimu Josías mülefui ñi nehuen piuquengeal, femngechi pu che ñi huiño poyetuafiel Jehová. Fei Josías 20 tripantu nielu, eluhui ñi apümcayafiel com dungu nüucülelu coilaque dios mu (2 Crón. 34:1, 2). Huechengelmi, ¿chumngechi inayentuafuimi Josías? Eluhuaimi tami doi cüme quimafiel ta Jehová. Femngechi femülmi, elurpuafimi tami mongen ta Jehová. Femülmi, ¿chumaimi tami mongen mu? Quiñe hueche, Luke pingelu, fautizahui nielu 14 tripantu. Fei feipi: “Deu ñi fautizahun iñche, hunentucuquefiñ Jehová tañi mongen mu ca cüpa ayühuelquefiñ” (Mar. 12:30). Eimi hueche ca femngechi femülmi, Jehová cümelcayaimu. w23.09 pag. 11 parr. 12, 13

Peafiyiñ ñi rupan Tesalónica trahunche. Ti apostol Pablo huirintuculelfilu tüfachi carta, ti trahunche epe quiñe tripantu niefui. Feimu ti pu loncolelu müte pepiluulafuingün chi, feimu huelulcaufuingün, huelu mülefui ñi respetangeal. Iñchiñ ca mülei ñi piuqueyeafiel ca respetayafiel pu loncolelu huelulcaufule rume. Doi püllelepale ti fütra cutrancahun, llouhuelayafuiñ chi taiñ adnieaeteu pu peñi central mundial mu cam Betel mu, feimu mülefui taiñ maneluhual müten pu loncolelu mu. Feimu chem rupafule rume, cüme raquiduam nieaiñ ca loncontucuaiñ Jehová Jesús mu adniefi pu loncolelu. Tati casco cuñiutucuquefi ti hueichafe ñi lonco. Ca femngechi taiñ maneluucülen cuñiutucuñmaqueiñmu taiñ raquiduam, feimu falinolu troquiquefiyiñ tati mülelu ti mapu mu (Filip. 3:8). Tati maneluhun quelluqueiñmu taiñ tüngcüleal taiñ piuque. w23.06 pag. 11, 12 parr. 11, 12

Com pu che ñi mangeleteu “ti domo cüme raquiduamquenolu” mülei ñi cüme raquiduamal ñi llohuafiel ti mangelün cam ñi llounoafiel. Rume falin-ngei taiñ connoal pod cudumuhun mu, ¿chumngelu? Peafiyiñ ñi feipin Proverbios. Ti quim raquiduamnochi domo feipi: “Hueñen co cochüi” (Prov. 9:17). ¿Chem mu adentulei ti “hueñen co”? Biblia trürümfi ti curehuen ñi cudumuhun mu quiñe füshcülechi co reque felei (Prov. 5:15-18). Jehová eluñmafi ti rüfngechi curehuen ñi nieal lifngechi cudumuhun. Huelu ti “hueñen co” ¿adentulepelai podngechi cudumuhun mu? Pu conquelu pod cudumuhun mu respetaquelafingün Chau Dios tañi ley. Feichi pu che ellcaquechi femqueingün feitachi dungu chumngechi ñi femquen quiñe hueñefe. Raquiduamqueingün inei no rume tañi penoeteu, feimu rume cochülu troquiquefingün tati “hueñen co”. Huelu inei no rume encañalayafui ta Jehová, quisu com peniei. Ca hueniyehuenofilu Jehová, rume huesa tripai ñi mongen (1 Cor. 6:9, 10). w23.06 pag. 22 parr. 7-9

¿Chumafuimi cai piuque mu tripanole tami ngillatun? Ayühuelhuenoelmu cai ti amuldungun cuifi reque, ¿ca chumafuimi? Femngechi rupalmi, quelluhuelaeneu Jehová piquilnge. Culpan chengelu am iñchiñ, femngechi rupaqueiñ quiñeque mu. Müte ayühuelhuenoelmu tami poyefiel ta Jehová, raquiduamnge chumngechi ñi rupan apostol Pablo. Tunte yafüluuquefui rume inayafiel ta Jesús, quiñeque mu tañi piuque müte eluuquelafui ñi cüdahual. Pablo ayülafui rume ñi entual tañi cüdau quiñeque mu, huelu yafüluuquefui ñi entuafiel müten. Ca femngechi inaquilnge quisu tami raquiduam tami dullial chem chumal, doi mai eluucülenge tami femal ti cümeque dungu yafüngehuenolmi rume. Müte ayünofilmi rume, huelu fentecünunolmi tami femal cümeque dungu, rupachi antü mu doi ayühuelaimu (1 Cor. 9:16). w24.03 pag. 11 parr. 12, 13

Doi quimfiliyiñ ca hueniyefiliyiñ taiñ pu peñi ca lamngen, ca pengelelafiyiñ taiñ piuqueyeniefiel. Femliyiñ, fei engün ca piuqueyenieaiñmu (2 Cor. 6:11-13). Trahunche mu caquerume peñi, lamngen mülei ca fillque tuhun-ngei. ¿Chem quelluafeiñmu taiñ doi piuqueyeafiel engün? Ngüneduamafiyiñ ñi cüme piuquengen engün. Feimu, ¿chumngechi pengelafuiñ taiñ piuqueyeniefiel pu peñi ca pu lamngen? Eluhuaiñ taiñ peafiel engün chumngechi ñi pequeteu ta Jehová. Acule ti fütra cutrancahun, mülei taiñ piuqueyeafiel taiñ pu peñi ca pu lamngen. ¿Chumngelu? Peafiyiñ Jehová ñi feipifiel pu Israel che maloncontungelu Babilonia, femngechi ñi montual engün: “Amunge, iñche tañi pu che, concülenge ponhui ti catrüntucu ruca mu, ca racümcünunge ti hulngiñ tami furi püle. Pichintu ellcaucülenge fentepuule ñi rupan tati fütra illcun” (Is. 26:20). Acule ti fütra cutrancahun, ¿ca femngechi inapelayafiyiñ tüfachi dungu? w23.07 pag. 6, 7 parr. 14-16

Mülei taiñ ngünefal chengeal. Ramtuhuaiñ: “¿Caquelu che chem raquiduamquei iñche mu? ¿Feipiqueingün tañi ngünefal chengen iñche? ¿Ca cüme allcütuquefi caquelu che ñi raquiduam piquepeneu engün mai? Cam, ¿feipiqueingün tañi yafü piuquengen iñche? ¿Re femquei quisu tañi ayüel müten piqueingün iñche mu? ¿Eluuquepen mai tañi cüme llohuafiel caquelu che ñi feipin, femngechi ñi femngenoal iñche tañi ayüel müten?”. Feimu ngünefal chengeliyiñ, inayentuafiyiñ ta Jehová ca Jesús. Calerumetule taiñ mongen, eluhuaiñ taiñ cüme chaftuafiel chem dungu rume rupafule. Por ejemplo cutranrumeafuiñ, ruparumeafuiñ cüdaungechi dungu mu ti plata ca ti gobierno ñi duam mu (Ecl. 9:11). Cafei Jehová tañi troquiñche eluafeiñmu quiñe hue elfal cüdau cam feipiafeiñmu taiñ amual cañpüle, fei cüdautuafuiñ taiñ cüme llohuafiel. ¿Chem quelluafeiñmu taiñ cüme chaftuafiel com tüfa? Meli dungu: 1) quimtucuaiñ ñi caletun ti dungu, 2) raquiduamhuelayaiñ taiñ femquefel cuifi, huelu mai taiñ femürpual, 3) raquiduamaiñ com cümeque dungu taiñ rupamequen, ca 4) quellucheaiñ. w23.07 pag. 21, 22 parr. 7, 8

Huechengelu Daniel, Babilonia huaria mu yengei, fütra camapu. Elcünui tañi mapu ca tañi familia. Ñi huechengen mu rume, afmatufalngefui. Pu Babilonia che peniefui ta Daniel quiñe hueche huentru cüme adngelu ca quiñe falin familia mu tuhui (1 Sam. 16:7). Feimu quimelelngei ta Daniel fei ñi falin chengeal pu Babilonia che mu (Dan. 1:3, 4, 6). Jehová, peniefi ñi chumngechi chengen ta Daniel, feimu piuqueyefi. ¿Chemu quimiyiñ tüfa? Quiñe rupa Chau Jehová nütramcai ñi nor chengen ta Noé ca Job, tüfa engu fentren tripantu poyeniefi ta Jehová. Huelu ca nütramyefi ta Daniel, ¿fei niepelafui 20 tripantu? (Gén. 5:32; 6:9, 10; Job 42:16, 17; Ezeq. 14:14). Daniel fentren tripantu mongelefui ca fentren afmatun dungu mu rupai, huelu Chau Jehová amulei ñi piuqueyeniefiel ta Daniel (Dan. 10:11, 19). w23.08 pag. 2 parr. 1, 2

Ayünielmi tami ngillayal quiñe ruca, cüme ngüneduamafimi petu tami ngillanofiel. Iñchiñ ca femngechi femafuiñ papeltufiliyiñ ta Biblia. Huenche papeltufiliyiñ müten, quimaiñ ti “hunenque dungu mülelu Chau Dios ñi dungu meu”, huelu pichi quimafuiñ müten (Heb. 5:12). Fei, ¿chumngechi cüme estudiayafuiñ Biblia? Papeltufiliyiñ quiñe troquiñ, raquiduamaiñ chumngechi nüucülei cangelu dungu ñi feipin Biblia. Raquiduamaiñ chem taiñ feyentuqueel ca chumngelu quimürpuiñ ñi rüfngen tüfa. Taiñ cüme adümafiel com ñi feipilen Biblia mülei taiñ estudiayal ti doi ellcalechi quimeltun. Ti apostol Pablo feipifi pu cristiano ñi cüme inaduamafiel Chau Dios ñi huirintucun, feimu feipifi engün: “Cüme adümafimün ti rüf dungu ñi tunte rupan, tunte tuhui, tunte pürai ca tunte coni”. Femngechi femfule pu cristiano, nehuencüleafuingün tañi feyentun mu, quiñe anümca reque cüme foliluucülelu (Efes. 3:14-19). Iñchiñ ca femngechi femaiñ. w23.10 pag. 18 parr. 1-3

Biblia mu mülei fentren che ñochi duamngequefulu. Iñchiñ doi cüme inaduamafuiñ ñi femün engün. Peafiyiñ ñi rupan quiñeque engün. David rume huechengelu müten feipingei tañi reyngeal, huelu esperafui fentren tripantu tañi reycünungeal. Ca femngechi Simeón ca Ana petu ñi esperaniefiel ñi cüpayal ti Mesías, ayühunquechi serfifingu Jehová (Luc. 2:25, 36-38). Papeltufiliyiñ ñi femün engün, ramtuhuaiñ: “¿Chem quellueyu feitachi pu che ñi ñochi duamngeal? ¿Chem cümeque dungu rupai tañi ñochi duamngen mu? ¿Chumngechi inayentuafuiñ?”. Ca inaduamafuiñ ñi femün pu ñochi duamngenochi pu che, fei entuafuiñ falinque quimeltun (1 Sam. 13:8-14). Ramtuhuafuiñ: “¿Chumngelu am nielaingün ta paciencia? ¿Chem huesaque dungu mu rupafuingün tañi nienon mu ta paciencia?”. w23.08 pag. 24 parr. 15

Ti apostol Pedro turpu püntütripalai Jesús mu, chem no rume famentulaeyu tañi inanieafiel ta Jesús. Quiñe rupa Jesús feipi quiñe dungu, fei tañi pu discipulo entedelafingün (Juan 6:68). Cüme entendenolu engün am, feimu quiñeque püntütripai Jesús mu. Huelu Pedro femlai, doi mai feipifi ta Jesús: “Eimi tami feipin hulquei rumel mongen”. Jesús quimniefui Pedro ca caquelu pu apostol tañi quisucünuaeteu. Femfulu rume, Jesús maneluhui Pedro mu tañi huiñotual tañi serfinieafiel ta Jehová (Luc. 22:31, 32). Jesús quimniefui quiñe che tunte ayüfule rume ñi femal cümeque dungu, huelu huelulcahuafui (Mar. 14:38). Feimu Pedro quimlafiñ ta Jesús pilu rume, Jesús maneluucülefui quisu mu. Feimu huiñomongetulu Jesús, peufaluhui ta Pedro mu (Mar. 16:7; Luc. 24:34; 1 Cor. 15:5). Pedro rume huesa duamcülequefui, feimu ¿rume yafültucupelaeyu tañi peel? w23.09 pag. 22 parr. 9, 10

Jehová rulpacünuñmaquefi ñi culpan com tañi pu feyentuqueteu (Sal. 32:1, 2). Tañi feyentulen mu engün culpanolu reque felei Jehová ñi adquiñ mu. Abrahán, David ca caquelu che nor che pingefuingün rume, huelu culpafengefuingün. Huelu tañi feyentun mu engün, doicülefuingün pu feyentulenolu meu. Culpan-ngenolu troquinieyu Jehová (Efes. 2:12). Apostol Pablo huirintuculelfilu pu Roma che cüme quimfalcünui tüfa: ayüliyiñ taiñ hueniyeaeteu Jehová, mülei taiñ feyentual quisu meu. Abrahán engu David hueniyequefuingu Jehová tañi feyentun mu. Iñchiñ ca femngechi femafuiñ. w23.12 pag. 3 parr. 6, 7

Com pu cristiano hulafuiñ taiñ nehuen, taiñ tiempo ca taiñ falinque fillem taiñ serfiafiel ta Chau Jehová. Jehová elueiñmeu taiñ serfiafiel, ¿chumngechi mañumafuiñ? Com taiñ nehuen mu cüdahuelqueafiyiñ. Ti apostol Pablo feipifi pu hebreo che ñi fentecünunoal ñi llellipuafiel ta Chau Jehová, amuldungucheal taiñ nieelchi maneluhun, trahuluhual ca hueluconque yafültucuhual “doyelchi mai püllelepalu cai Chau Dios ñi antü” (Heb. 10:22-25). Ti cüme püllü taiñ nütramcael ellaca mu, ca epu rupa feipi: “¡Chau Ngünechen mai ta püramyefinge!” (Apoc. 19:10; 22:9). Rume falin-ngei taiñ femal tüfa. Feimu llemai, ti falin dungu taiñ quimürpuel Jehová ñi adcünuelchi ruca mu turpu ngoimaquelayaiñ. Rumel falintuqueafiyiñ ñi serfinieafiel taiñ Chau Jehová. w23.10 pag. 29 parr. 17, 18

Com iñchiñ ayünieiñ inayal tüfachi huercün dungu: “Amulepe taiñ hueluconquechi piuqueyehun”. Huelu ngoimalayaiñ ñi feipin ta Jesús: “Epe com che niehuetulayai piuqueyehun” (Mat. 24:12). Tüfa mu, Jesús nütramcalai pu cristiano mu. Huelu com iñchiñ mülei taiñ cuñiutucuhual, femngechi taiñ inayentunoafiel pu che piuqueyechequenolu. Feimu ngüneduamaiñ cüpalechi ramtun: ¿chumngechi quimafuiñ taiñ rüf piuqueyefiel taiñ pu peñi ca pu lamngen? Quiñe dungu, chem femqueiñ rupan mu huesaque dungu (2 Cor. 8:8). Feimu ti apostol Pedro feipi: “Doi mai, hueluconque rume piuqueyehuaimün. Tati piuqueyechequelu rumel eluucülequei ñi perdonacheal” (1 Ped. 4:8). Feimu huelulcaule taiñ pu peñi ca pu lamngen ca huesa duameleliyiñmu, femngechi quimafuiñ tunte taiñ piuqueyefiel engün. w23.11 pag. 10, 11 parr. 12, 13

Piuqueyefiliyiñ quiñeque müten taiñ pu peñi, pu lamngen, feyentulayafiyiñ ñi feipin ta Jesús. Cümei taiñ doi hueniyeafiel quiñeque peñi ca lamngen trahunche mu, Jesús ca femquefui (Juan 13:23; 20:2). Huelu ti apostol Pedro feipieiñmu taiñ piuqueyenieafiel com pu peñi ca pu lamngen taiñ familia reque (1 Ped. 2:17). Pedro ca feipi: “Com piuque meu hueluquentu piuqueyeuqueaimün” (1 Ped. 1:22). Quiñeque mu cüdautuafuiñ ñi piuqueyeafiel quiñeque peñi cam lamngen, huelu ca eluhuaiñ taiñ piuqueyenieafiel com piuque mu chumngechi ñi feipin Pedro. Huesa duameleliyiñmu quiñe peñi cam lamngen, iñchiñ ca femngechi ayüafuiñ taiñ huiñoleltuafiel. Huelu femngechi femliyiñ, ayühuel-layafuiñ ta Jehová. Jesús femngechi dungu quimelelfi ta Pedro (Juan 18:10, 11). Pedro feipi: “Huiñoleltulayafimün tamün huesa femeteu. Lucatulayafimün feiti tamün lucatueteu. Doi mai cümelcaqueafimün ta caquelu che” (1 Ped. 3:9). Feimu com piuque mu piuqueyeniefiliyiñ taiñ pu peñi, pu lamngen ca cüme troquiafiyiñ. w23.09 pag. 28, 29 parr. 9-11

Pichiqueche chumngequelai rume, fei quisutu tremqueingün, quimlaiñ rume chumngechi tañi tremquen engün. ¿Ca femngechi femquepeiñ mai taiñ cüme cristianongerpual? Femlai. Taiñ femngechi chengerpual mülei taiñ cüdahual (1 Cor. 13:11; Heb. 6:1). ¿Chem mülei taiñ femal? Mülei taiñ cüme hueniyeafiel ta Jehová. Ca duamnieiñ Jehová taiñ eluaeteu ñi nehuen, femngechi taiñ cüme cristianongeal, taiñ doi adümuhual ca taiñ pepicaucüleal mongen meu (Prov. 1:5). Jehová deumafi tati huentru ca tati domo (Gén. 1:27). Ti huentru ca ti domo trürlaingu. Por ejemplo, Jehová eluyefi engün caquerumen cüdau, feimu caquerumei ñi adümuhun engün tañi huechunentuafiel (Gén. 2:18). w23.12 pag. 18 parr. 1, 2

Jesús ayüquefui caquelu che ñi üituafiel Chau Dios ñi üi. Pu loncolechi judio feipiquefuingün chi ñi üitungenoal Jehová ñi üi fente ñi yamfalngen. Huelu ñi feipin pu huentru catrütulaeyu ta Jesús ñi püramyeafiel Chau Dios tañi üi. Raquiduamaiñ ñi femün ta Jesús Gerasa mapu mu. Tremoltufilu quiñe huentru conhuecüfülelu, fente ñi llicalen pu che feipifi tañi amutual (Mar. 5:16, 17). Jesús am ayüfulu com che ñi quimafiel Jehová tañi üi, feimu petu ñi amutunon feipifi ti huentru ñi quimelelafiel pu che ñi femün ta Jehová quisu meu (Mar. 5:19). Jesús ca ayüfui iñchiñ taiñ quimelelafiel pu che Jehová tañi üi (Mat. 24:14; 28:19, 20). Femliyiñ, ayühuelafiyiñ ta Jesús. w24.02 pag. 10 parr. 10

Müna ayühun-ngei coneltuleal Jehová tañi troquiñche mu. Taiñ mülen mu fentepun antü meu, doi huesalcalerpui taiñ mongen. Huelu Jehová elueiñmu taiñ pu peñi, pu lamngen taiñ quellunieaeteu (Sal. 133:1). Jehová quelluqueiñmu ayüucüleal taiñ familia iñchiñ (Efes. 5:33–6:1). Jehová eluqueiñmu quimün ca quelluqueiñmu taiñ cüme raquiduamcüleal ca ayüucüleal. Mülei taiñ nehuencünuhual taiñ serfinieafiel ta Jehová. ¿Chumngelu? Hueluraquiduamelafeiñmu ñi chem piquen ca ñi femquen pu peñi pu lamngen. Ca huesa duamcüleafuiñ taiñ huelulcan mu, doi mai huelulcaumequeliyiñ quiñe dungu meu. Duamfali taiñ serfinieafiel ta Jehová rupaliyiñ cüla dungu mu: 1) huesa duameleliyiñmu quiñe peñi cam lamngen, 2) huesa duameleliyiñmu taiñ afcadi, ca 3) huesa duamcüleliyiñ taiñ culpan mu. w24.03 pag. 14 parr. 1, 2

Allcütuqueimi chi ñi femün quiñeque peñi ca lamngen ñi doi cüdahuelfiel ta Jehová. Amuingün chi tati Escuela ñi Pepicangeam pu Amuldunguquelu Ngünechen ñi Gobierno, cam amuingün chi cheu ñi doi duamfalngen amuldunguquelu. ¿Eluucüleimi tami femngechi femal? Yafüluunge tami huechurpual. Pu peñi ca lamngen rumel quintuquei chumngechi ñi doi cüdahuelafiel ta Jehová (Hech. 16:9). Huelu pepilnolmi tami doi cüdahuelafiel ta Jehová, falinolu troquiuquilnge. Doi falin-ngei mai taiñ rumel nehuentuleal Jehová ñi rüpü mu (Mat. 10:22). Ngoimaquilnge Jehová rume ayüuquei taiñ rumel serfinieafiel com taiñ nehuen mu, femngechi rumel inanieafimi ta Jesús deu tami fautizahun mu (Sal. 26:1). w24.03 pag. 10 parr. 11

Taiñ Huenu Chau feipicünui taiñ perdonayaeteu repentiutuliyiñ (Sal. 86:5). Feimu rüf piuque mu huesa duamliyiñ taiñ culpan mu, Jehová perdonayaiñmu. Quisu feipicünui ñi femal, fei femürpuai llemai. Loncontucunieaiñ, Chau Jehová dicümtucuquelaeiñmu taiñ hulal chem taiñ nienon. Com taiñ nehuen mu cüdahuelfiliyiñ ta Jehová, quisu rume falintuñmayaiñmu tunten-ngefule rume. Ca raquiduamafuiñ quiñeque che com ñi piuque mu serfiquefilu ta Jehová cuifi mu. Raquiduamaiñ ti apostol Pablo mu. Quisu rume cüdaufui fentren tripantu. Fentrenque mapu mu amui, fei elcünui fentren trahunche. Huelu caletulu tañi mongen, fente cüdauhuequelafui. ¿Feipiafuiñ Pablo ñi ayühuelhuenofiel ta Jehová? ¡Femlai llemai! Pablo amulerpui tañi cüdahuelnieafiel ta Jehová, feimu quisu cümelcaeyu (Hech. 28:30, 31). Ca femngechi iñchiñ fente cüdahuelhuelafiyiñ chi ta Jehová, huelu Jehová doi falintuquei chemu taiñ femquen. w24.03 pag. 27 parr. 7, 9

Jesús rumel llellipuquefui tañi Chau, feimu inayentufali. Jesús rume duamngemequelu rume ca rume fentren che ñi hualloñmanieteu, huelu elquefui antü tañi llellipuafiel ta Jehová (Mar. 6:31, 45, 46). Jesús epe huntu huitraquefui tañi nütramcayafiel tañi Chau. Quiñe rupa Jesús com pun llellipufi tañi Chau ñi dulliafiel tañi pu apostol, fütra falin dungu am ta tüfa (Luc. 6:12, 13). Cafei feichi pun petu ñi lanon, Jesús fentren rupa llellipufi ta Jehová quimnielu am ñi rupayal cüdaungechi dungu mu (Mat. 26:39, 42, 44). ¿Chem quimeltueiñmu ñi femün ta Jesús? Fentren duamngemequeliyiñ rume, huelu mülei taiñ elcünual tiempo taiñ llellipuafiel Jehová. Por ejemplo, doi pulihuentu huitrayafuiñ taiñ llellipuafiel Jehová. Cafei alü punle rume, ca llellipuafuiñ taiñ huenu Chau. Femngechi entuliyiñ tiempo taiñ llellipual, pengelaiñ taiñ falintuquefiel ti llellipun. w23.05 pag. 3 parr. 4, 5

Ñi feipin ti texto griego quehun dungu mu pengeli Jehová ñi piuqueyeniefiel pu dullinque cristiano trürümngeafui huitrunco reque. Tüfa pengeli Jehová ñi fente piuqueyefiel pu dullingelu. Fei engün quimniei ñi piuqueyenieteu Chau Dios (Jud. 1). Apostol Juan reque, com pu dullinque cristiano feipingün: “¡Müna piuqueyenieiñmu taiñ Fütra Chau! ¡Chau Dios ñi pu yall pingeiñ!” (1 Juan 3:1). Jehová, ¿pu dullinche müten piuqueyequefi? Femlai, piuqueyequefi com tañi pu che. Chau Jehová ñi pengelal taiñ piuqueyenieteu, ¿chem doi falin dungu femi? Huli tañi Fotüm ñi lapayal iñchiñ mu. Chem che no rume pengelquelai femngechi piuqueyechen (Juan 3:16; Rom. 5:8). w24.01 pag. 28 parr. 9, 10

David, ¿chumi tañi llicalenoal? Cuñihun mu mülelu tañi mongen, raquiduami ñi chumal ta Jehová cüpalechi antü mu. Jehová feipifi ta David tañi lonco ülmencünuafiel. Feimu maneluucülefui Jehová tañi montulaeteu (1 Sam. 16:1, 13). David quimniefui Jehová ñi femürpual tañi feipicünuel. Iñchiñ cai, ¿chem feipicünueiñmu Jehová? Jehová feipilaeiñmu taiñ rupanoal huesaque dungu ta fachantü. Doi mai ti hue mapu mu, Jehová feipieiñmu ñi ngehuenoal huesaque dungu (Is. 25:7-9). Jehová niei com nehuen ñi huiñomongeltuafiel com pu layelu, ñi tremoltuafiel com tati pu cutrancülelu ca ñi apümcayafiel com taiñ pu caiñe (1 Juan 4:4). w24.01 pag. 6 parr. 12, 13

Raquiduamafuiñ chumngelu hultucuiñ taiñ mongen Jehová mu ca fautizahuiyiñ. Femiyiñ taiñ quelluntucuafiel ta Jehová. Raquiduamnge chumngelu quimimi tami mülen ti rüf dungu mu. Cüme quimürpufimi ta Jehová, yamnierpufimi ca piuqueyerpufimi. Cafei doi feyentufimi ta Jehová ca repentiuhuimi tami culpan mu. Famentufimi com tañi üdequeel ta Jehová. Femimi Jehová tañi ayüqueel. Doi cüme duamtuimi perdonaeteu ta Jehová ta eimi (Sal. 32:2). Ca eluhuimi tami amual trahun mu ca tami amuldungual. Hulcünulu eimi tami mongen Jehová mu ca fautizaulu eimi, feimu conimi ti cüme rüpü mu, turpu elcünulayafimi (Mat. 7:13, 14). Eluucüleaiñ taiñ piuque mu taiñ piuqueyenieafiel Jehová ca taiñ inayafiel ñi huercün dungu. w23.07 pag. 17 parr. 14; pag. 19 parr. 19

Raquiduamliyiñ taiñ feipicünufiel ta Jehová, quelluaiñmu taiñ connoal huesaque dungu mu. Quiñe ejemplo, ¿quiñe huentru daquelcantuafui quiñe fütangechi domo? Cam, ¿quiñe domo daquelcantuafui quiñe curengeelchi huentru? Femlai llemai. Hulcünulu iñchiñ taiñ mongen Jehová mu, feipicünufiyiñ taiñ chumcaunorume taiñ femnoal. Eluuliyiñ taiñ foliluunoal feitachi huesaque raquiduam taiñ piuque mu, cüdautulayaiñ taiñ famentuafiel. Femliyiñ, famentuhuaiñ huesaque che ñi rüpü mu (Prov. 4:14, 15). Inayentuafuiñ ta Jesús. Quisu eluucülefui tañi ayühuelafiel tañi Chau. Iñchiñ ca femngechi femaiñ. Nehuentun mu famentufemafiyiñ com ñi ayüquenoel ta Jehová. Iñchiñ deu eluntucuiñ Jehová mu (Mat. 4:10; Juan 8:29). Huesaque dungu rupaliyiñ cam ngüchaltucungeliyiñ taiñ huesa femal, pengelafuiñ taiñ eluucülen taiñ inayafiel ta Jesús. Jehová quelluaiñmu taiñ femal. w24.03 pag. 9, 10 parr. 8-10