Octubre

¿Cüdaungei inayal tami feipingeel? Femngechi rupai David, feimu feipifi ta Jehová: “Quelluen tañi eluucüleal ñi inayal tami feipin” (Sal. 51:12). David piuqueyefilu rume ta Jehová, quiñeque mu cüdautuquefui ñi inayal tañi feipin. Iñchiñ ca cüdautuafuiñ ñi feyentual, ¿chumngelu cai? Hunelu mu, culpafe chengeiñ. Epu, Satanás ayüniei taiñ caiñetuafiel ta Chau Jehová, fei reque (2 Cor. 11:3). Cüla, iñchiñ hualloñmanieiñmeu feyentuquenochi che (Efes. 2:2). Tüfachi cüla dungu mu cüdautuafuiñ taiñ feyentual, feimu nehuentuqueaiñ taiñ inayal Chau Jehová ñi feipin ca ti pu che ñi elufiel autoridad. w23.10 pag. 6 parr. 1

¿Chem quimeltuafeiñmu Jesús tañi femün afmatufalchi dungu? Quimürpuafuiñ Jesús tañi ñom piuquengen. Jesús mallmaulai tañi pulcucünufiel ti co ca turpu mallmauquelafui tañi femürpun mu. Doi mai tañi ñom chengen mu, püramyeniefi tañi Chau müten (Juan 5:19, 30; 8:28). Inayentufiliyiñ Jesús ñi ñom piuquengen, mallmaulayaiñ taiñ femün mu. Quisutu saquiulayaiñ, doi mai püramyenieafiyiñ ta Jehová (Jer. 9:23, 24). Com cümeque dungu femliyiñ, Jehová tañi quellun mu müten. Feimu fei müten püramyenieafiyiñ (1 Cor. 1:26-31). Ñom piuquengeliyiñ, ayüquelaiñ taiñ püramyengeal cümeque dungu taiñ femquen mu caquelu mu. Quimnieiñ Jehová taiñ peniefiel taiñ femquen ca ñi falintuquefiel, feimu rume ayüucülequeiñ (ca ngüneduamafuimi Mateo 6:2-4; Heb. 13:16). Taiñ inayentufiel mu ta Jesús ca taiñ ñom piuquengen mu, püramyequefiyiñ ta Jehová (1 Ped. 5:6). w23.04 pag. 4 parr. 9; pag. 5 parr. 11, 12

Chau Dios ñi duam mu Pablo feipifi pu cristiano ñi duamnieafiel pu peñi ca pu lamngen. ¿Chumngechi inayafuiñ feitachi ngülam trahun mu? Loncontucuaiñ iñchiñ reque taiñ pu peñi ca pu lamngen ca ayüqueingün tañi huiñoldungual. Raquiduamnge, nütramcahun mu eimi tami pu hueni eimün, eimi müten nütramcaquelaimi, ca eluquefimi tami nütramcayal engün. Ca femngechi trahun mu iñchiñ ayüqueiñ taiñ pu peñi ca pu lamngen com ñi huiñoldungual engün, femngechi ayühuaingün (1 Cor. 10:24). Fentre amul-layaiñ taiñ huiñoldungun, femngechi caquelu peñi ca lamngen ca huiñoldunguafui trahun mu. Fei müten no, cafei com feipilayaiñ ñi mülen ti parrafo mu. Com feipiliyiñ, caquelu nielayai chem tañi feipial engün. w23.04 pag. 22, 23 parr. 11-13

Rume falin-ngei taiñ quelluafiel caquelu pu che, doyelchi mai amuldungun mu. Amuldungun mu inayentuafuiñ ti apostol Pablo. Ti apostol Pablo ‘huercüngei pu catripanche meu’ (Rom. 11:13). Feimu Pablo amuldungulelquefui fillque che: judio, griego, adümuhungechi che, pu che lelfün meu mülelu ca pu gobernadorcülelu. Feimu Pablo ñi puhual com che ñi piuque mu, ‘itrofill che meu, chem che rume femcünuuquefui’ (1 Cor. 9:19-22). Pablo raquiduamquefui pu che ñi tuhun mu ca ñi feyentun mu. Femngechi ñi femün mu, Pablo cacünuquefui chumngechi ñi amuldunguquen, femngechi ñi puhual caque quiñeque che ñi piuque mu. Ca femngechi iñchiñ amuldungulelquefiyiñ caquerumechi che, fillque tuhun nielu, caque raquiduam ca feyentun nielu. ¿Chumngechi inayentuafuiñ ti apostol Pablo? Raquiduamaiñ caque quiñeque che ñi duamnieel, femngechi cacünuaiñ taiñ amuldungun ca puhuaiñ ñi piuque mu engün. w23.07 pag. 23 parr. 11, 12

Pu ñom piuquengechi che nehuen-ngeingün, ¿chumngelu feipiafuiñ? Duamfali ñi nehuen-ngeal ñi ngünehual ca tüngcüleal rupan mu cüdaungechi dungu mu. Cafei duamnieiñ ñi nieal Jehová tañi nehuen taiñ ñom piuquengeal (Gál. 5:22, 23). Ti dungun “ñom piuque” griego quehun dungu mu, trürümngeafui deu ñomümngechi cahuell. Ñomümngele rume ti cahuell, nehuencülequei. Iñchiñ ñom piuquengeliyiñ rume, nehuencülequeiñ. Iñchiñ taiñ duam mu femngechi felelafuiñ, llellipuaiñ Jehová taiñ eluaeteu tañi nehuen taiñ ñom piuquengeal. Fentren testigo ñom piuquengerpui, iñchiñ ca femngechi femafuiñ. Fentrenque taiñ pu peñi, pu lamngen quintucaduamngelu rume, pengelingün tañi ñom piuquengen. Ñi femün engün, quellufingün caquelu che ñi cüme raquiduamal pu testigo mu (2 Tim. 2:24, 25). w23.09 pag. 15 parr. 3

Ti apostol Juan quiñe vision mu pengelelngei 24 loncolelu püramyemequefingün Jehová huenu meu. Fei engün feipifingün Jehová: ‘Eimi mülei tami püramyengeal ca yamniengeal’ (Apoc. 4:10, 11). Pu cümeque püllü ca püramyequefingün ta Jehová. ¿Chumngelu am femqueingün? Mülelu engün am huenu meu Chau Jehová engün, feimu cüme quimniefingün. Cafei quimfilu engün am ñi chumquen ta Jehová, feimu quimfingün ñi chumngechi chengen. Feimu ayühunquechi püramyequefingün (Job 38:4-7). Iñchiñ ca mülei taiñ püramyeafiel Jehová llellipun mu. ¿Chumngechi femafuiñ? Feipiafiyiñ chem mu taiñ afmatuquefiel ca taiñ piuqueyefiel. Chillcatuyüm Biblia, raquiduamaiñ chem dungu mu afmatulqueiñmu Jehová mu (Job 37:23; Rom. 11:33). Raquiduamliyiñ tüfa, fei ¿ayüupelayai taiñ piuque? Feimu feipiafiyiñ Jehová llellipun mu. Ca püramyeafuiñ Jehová taiñ quelluqueteu mu iñchiñ ca com taiñ pu peñi ca pu lamngen (1 Sam. 2:1, 2). w23.05 pag. 3, 4 parr. 6, 7

Feichi 1919 tripantu mu, ti Fütra Babilonia ngünehuelafi Chau Dios ñi pu che. Feichi tripantu mu ca elcünungei ti “quim manelfal cüdaufe”, femngechi ti cüme piuquengechi che ñi miyahual ti “Lifngechi Rüpü” mu (Mat. 24:45-47; Is. 35:8). Ñi femün caquelu cuifi mu, quellufi pu che ñi miyahual feitachi rüpü mu, femngechi quimafuingün ta Jehová ca tañi ayüqueel (Prov. 4:18). Ca quellufi pu che ñi cüme yenieal tañi mongen ñi ayühuelafiel ta Jehová. Jehová feipilaeyu ñi cüme elcünufemtual com ñi mongen engün, huelu mai ñochiquechi quellufi ñi femal engün. Acuai chi antü itrocom dungu mu ayühuelafiyiñ ta Jehová, fei müna ayüucüleaiñ. Quiñe rüpü ñi cümelcaleal, mülei ñi cümelngetual. 1919 ca fantepu mu, ti “Lifngechi Rüpü” ca cüme elngetuquei reque, femngechi pu che tripayal coilaque religion mu. w23.05 pag. 17 parr. 15, 16

Ti Troquiñ Adniechequelu quimeltuquefi quiñeque pu peñi ñi quelluaeteu ñi cüdau mu engün. Feitachi pu peñi deu adniequefingün fütraque cüdau, ca rume cüme enturpuquefingün. Feimu feipiafuiñ ñi pepicaucülen engün ñi adnieafiel Jesús tañi pu ufisa. Tati pu dullinque cristiano yengele huenu mu, Jehová tañi pu che amuleaingün tañi serfinieafiel ta Jehová. Jesús adnieaeyu engün, feimu huiño huitraulayaingün ñi serfiafiel ta Jehová. Feichi mu, Jehová tañi pu che lefcontuaeyu quiñe troquiñque gobierno, Gog tuulu Magog pingelu (Ezeq. 38:18-20). Huelu Jehová tañi pu che hueungelayai, serfinieafingün müten ta Jehová. Quisu montulaeyu engün. ¿Chemu quimiyiñ? Quiñe vision mu, Juan pei quiñe “fütra troquiñche” mongetripalu ti fütra cutrancahun mu, tüfa engün tati caquelu ufisa (Apoc. 7:9, 14). w24.02 pag. 5, 6 parr. 13, 14

¿Chumafuiñ taiñ llohual Jehová ñi nehuen? Ngillatunieafiyiñ Jehová taiñ eluaeteu, papeltuafiyiñ Biblia ca püntütripalayaiñ Jehová ñi troquiñche mu. Femngechi femliyiñ, doi cüme cristianongeaiñ (Gál. 5:22, 23). Taiñ quelluaeteu Jehová ñi nehuen, mülei taiñ femal cümeque dungu ca nieal cümeque raquiduam. Nieliyiñ huesaque raquiduam ca eluuliyiñ ñi foliluhual reque taiñ lonco mu, fei llouhuelayaiñ Jehová ñi nehuen (1 Tes. 4:7, 8). ¿Ca chumaiñ? ‘Illamcalayafiyiñ Chau Ngünechen ñi feipicünuel’ (1 Tes. 5:20). Tüfa mu Pablo nütramcai com dungu ñi feipicünuel Jehová tañi nehuen mu. Por ejemplo, Jehová feipicünui ñi püllelepan quisu tañi antü ca chem dungu ñi rupayal acule feichi antü. Iñchiñ raquiduamquelaiñ ñi fente faltan ñi acual Jehová ñi antü ca tati Armagedón. Doi mai raquiduamtucuniefiyiñ. Feimu eluuqueiñ taiñ femal cümeque dungu ca taiñ serfinieafiel Jehová com piuque mu (2 Ped. 3:11, 12). w23.06 pag. 12 parr. 13, 14

¿Chem mülei taiñ femal perumeliyiñ quiñe podngechi adentun? Mülei taiñ cañpüle lelihulfemal. ¿Chem quelluaiñmu? Quimtucuaiñ taiñ doi falin-ngen taiñ hueniyeafiel Jehová. Ca mülei quiñeque adentun pornografiangenolu, huelu ca huesa raquiduamelafeiñmu. Ca mülei taiñ famentufemafiel, ¿chumngelu? Ngelai taiñ raquiduamal rume taiñ connoal podngechi cudumuhun mu (Mat. 5:28, 29). Quiñe loncolelu David pingelu Tailandia mapu mu feipi: “Ramtuuquen, ¿cüme duamquepei mai Jehová ñi pefiel tüfachi adentun pornografiangenon mu rume? Fei quelluqueneu tañi femal cümeque dungu”. Yamniefiliyiñ Jehová cüme raquiduamaiñ chem taiñ femal. Feimu Biblia feipi: “Quiñe che ñi quimchengeal, hunelu mülei tañi rume yamnieafiel ta Jehová”. w23.06 pag. 23 parr. 12, 13

Feitachi catrüntucu ruca, ¿adentulepelai taiñ trahunche? Feimu fütra cutrancahun mu serfifiliyiñ Jehová taiñ pu peñi ca pu lamngen iñchiñ, fei quisu cuñiutucuaiñmu. Feimu llemai, feula mülei taiñ doi piuqueyeafiel taiñ pu peñi ca pu lamngen, femngechi montuaiñ. Acule “Jehová ñi fütra antü”, cüdaungechi dungu rupayai huall mapu mu (Sof. 1:14, 15). Iñchiñ Jehová ñi pu chengen ca rupayaiñ cüdaungechi dungu mu. Huelu cüme pepicaucüleliyiñ, tüngcüleaiñ ca quelluafiyiñ caquelu pu che. Nehuencüleliyiñ, chaftuafiyiñ chem huesa dungu rume. Cutranpiuqueyecheliyiñ, eluhuaiñ taiñ quelluafiel taiñ pu peñi ca pu lamngen chem ñi faltalen engün. Ca piuqueyefiliyiñ taiñ pu peñi ca pu lamngen feula, ca piuqueyenieafiyiñ cüpalechi antü mu. Femliyiñ, Jehová eluaiñmu rumel mongen, femngechi cutranhuelayaiñ ca rupahuelayaiñ huesaque dungu mu (Is. 65:17). w23.07 pag. 7 parr. 16, 17

Biblia nütrami fentren poyequefilu Jehová ñi nieel yafüluhun. Huelu quiñeque mu, nehuen-ngenolu troquihuingün. Femngechi rupai ti rey David. Quiñeque mu, nehuen-ngefui “fütra huincul reque”, huelu ca rupa yafüngehuelafui, “müna llicaletun” pifui (Sal. 30:7). Cafei Sansón fütra nehuen-ngefui Chau Dios ñi quellun mu. Huelu ca quimniefui nienolu Jehová ñi nehuen, ‘ngañhuadcüleafui com caquelu huentru reque’ (Juec. 14:5, 6; 16:17). Tüfachi pu huentru, ¿cheu entui tañi nehuen? Chau Jehová mu llemai.Ti apostol Pablo ca duamniefui Jehová ñi nehuen tañi yafüluucüleal (2 Cor. 12:9, 10). Pablo ca cutrancülefui (Gál. 4:13, 14). Quiñeque mu, cüdautuquefui ñi cüme femal (Rom. 7:18, 19). Ca quiñeque mu, fill raquiduamcülefui ca llicalequefui chem dungu ñi rupayal (2 Cor. 1:8, 9). Huelu ngañhuadcülelu rume, nehuencontui. ¿Chumngelu cai? Jehová elueyu nehuen ñi chaftuafiel huesaque dungu ñi rupan. w23.10 pag. 12 parr. 1, 2

Quiñeque mu feipiliyiñ taiñ falinon, loncontucuaiñ Jehová mai cüpaleiñmu tañi troquiñche mu (Juan 6:44). Quiñeque mu iñchiñ ngüneduamuulayafuiñ chi taiñ cüme femmequen, huelu Jehová peñmaqueiñmu llemai ca quimnieñmaeiñmu taiñ piuque (2 Crón. 6:30). Feimu rüf maneluhuafuiñ Jehová taiñ falintuqueteu (1 Juan 3:19, 20). Quiñeque iñchiñ petu huesa duamcüleafuiñ chi taiñ femün mu ta cuifi petu taiñ quimnofiel ta Jehová (1 Ped. 4:3). Caquelu peñi ca lamngen fentren tripantu yeniei ñi serfiquefiel ta Jehová, huelu quiñeque mu conturumequeyu huesa raquiduam, fei huesa duamqueingün. Eimi cai, ¿ca femngechi huesa duamquei tami piuque quiñeque mu? Femngechi dungu mu rupalmi, yafüluhuafuimi. Quiñeque poyequefilu ta Jehová cuifi mu ca femngechi dungu mu rupaingün. Quiñe tüfa tati apostol Pablo. Raquiduamlu tañi huelulcauquen mu, huesa duamquefui (Rom. 7:24). Pablo deu repentiutufui ca fautizaufui, huelu feipifui: “Com pu apostol mu, iñche tati doi falinolu” ca “iñche tati doi fütra culpafe” (1 Cor. 15:9; 1 Tim. 1:15). w24.03 pag. 27 parr. 5, 6

Ñi huesa femün mu ta lonco ülmen Jehoás, ¿chem quimeltuafeiñmu? Mülei taiñ dullial cümeque hueni poyequefilu ta Jehová, fei engün quelluaiñmu taiñ femal cümeque dungu. Hueniyenieafiyiñ pu peñi ca pu lamngen tunten tripantu niele rume. Jehoiadá rume hunencülefui Jehoás mu. Raquiduamnge tami pu hueni mu, ca ramtuunge: “Tañi pu hueni, ¿quelluqueneu ñi doi hueniyeafiel ta Jehová? ¿Yafültucuqueneu engün ñi feyentuafiel ta Jehová? ¿Dunguqueingün Jehová mu? ¿Falintuquefingün ñi quimeltun ta Biblia? ¿Yamquefingün Jehová ñi feipin? ¿Ngülamtuqueneu engün chem tañi duamnien cam feipiqueneu engün ñi femal tañi ayüqueel müten?” (Prov. 27:5, 6, 17). Rüf dungu tüfa: tami pu hueni piuqueyenofile Jehová, duamquifilnge engün. Huelu tami pu hueni piuqueyeniefile Jehová, püntütripaquilnge fei engün mu, rume quellunieaimu (Prov. 13:20). w23.09 pag. 9, 10 parr. 6, 7

Alfa fei tati hunen letra pu Grecia che ñi abecedario mu, omega tati inangechi letra. ¿Chumngelu Jehová feipi: “Iñche tati Alfa ca tati Omega”? Eluule ñi femal quiñe dungu huechunenturpuquefi. Chau Jehová deumafilu müten Adán ca Eva, feipifi: “Nieaimün yall, fentren-ngeaimün, apolfimün ti mapu ca ngünenieafimün” (Gén. 1:28). Feita mu Chau Jehová feipi reque “Alfa”, fei feipicünui tañi chumal. Huelu ¿chumül tripayafui? Adán Eva engu ñi pu yall apolfile ti mapu ca quelluntucufile ñi ayüfalngeal ti mapu. Femtripale tüfa, fei hula Chau Jehová feipiai reque “Omega”. Cafei fentecünulu deumafiel ti huenu, ti mapu ca com ñi mülen, Chau Jehová femi quiñe dungu pengelquelu ñi rüf femtripayal tañi ayüqueel mapu mu ca tati pu che mu. Com femtripayai afle ti regle antü mu (Gén. 2:1-3). w23.11 pag. 5 parr. 13, 14

Israel alü camapulefulu Babilonia mu, feimu cüdaungefui ñi puhual engün. Pu judio, ¿meli cüyen peno mülefui ñi trecayal engün? Huelu Jehová feipicünueyu ñi nülalelafiel reque ti rüpü ñi miyahual engün. Tati pu judio cüme hueniyefilu ta Jehová, ¿chem raquiduamingün? Cüdautufule rume, quisu ayüniefuingün ñi huiñotual tañi mapu mu, femngechi ñi cüme poyetuafiel ta Jehová. Babilonia mu Jehová niequelafui quiñe templo no rume tañi poyengeal. Mülequelafui altar cam sacerdote ñi chalintuculelngeal cullin ta Jehová chumngechi ñi feipiel Moisés ñi ley. Cafei Babilonia mu pichilequefui müten pu poyequefilu ta Jehová, feimu tati pu judio poyequefilu ta Jehová ayüquefuingün ñi huiñotual tañi mapu mu, femngechi ñi cüme poyengetual ta Jehová. w23.05 pag. 14, 15 parr. 3, 4

Pu che taiñ hualloñmanieteu yeniei pod mongen. Feimu duamnieiñ Jehová tañi nehuen, femngechi taiñ miyahual pelon mu reque (1 Tes. 4:3-5, 7, 8). Jehová tañi nehuen quelluaiñmu taiñ inanoafiel huesaque raquiduam chaftuquefilu Jehová tañi ayüqueel. Ca quelluaiñmu “taiñ cüme piuquengeal fillque dungu mu, taiñ nor dungu femal ca taiñ miyahual rüf dungu mu” (Efes. 5:9). Jesús feipi Jehová “eluafi ñi nehuen feichi che ñi llellipuqueteu” (Luc. 11:13). Feimu mülei taiñ llellipuafiel ta Jehová taiñ eluaeteu ñi nehuen. Jehová ca eluqueiñmu tañi nehuen trahuluhun mu taiñ pu peñi, pu lamngen iñchiñ (Efes. 5:19, 20). Jehová tañi nehuen ñi duam mu quelluaiñmu taiñ ayühuelafiel ta Jehová taiñ mongen mu. w24.03 pag. 23, 24 parr. 13-15

¿Ayüafuimi tami doi nieal ta paciencia? Ngillatufinge ta Jehová tami quelluaeteu. Tati nielu Chau Dios ñi nehuen ñochi duamngequei (Gál. 5:22, 23). Feimu Jehová feipiafiyiñ taiñ eluaeteu ñi nehuen ca taiñ adnieaeteu. Feimu cüdautuliyiñ taiñ ñochi duamngeal, llellipunieafiyiñ Jehová taiñ eluaeteu ñi nehuen femngechi taiñ ñochi duamngeal (Luc. 11:13). Ca llellipuafuiñ Jehová taiñ quelluaeteu cüme raquiduamal quisu reque. Huelu deu llellipuliyiñ, fill antü mülei taiñ cüdahual femngechi taiñ ñochi duamngeal. Iñchiñ llellipuliyiñ ca eluuliyiñ taiñ ñochi duamngeal, Jehová ta quelluaiñmu. Ca raquiduamaiñ Biblia mu tripachi che inayentufalngelu. Biblia nütramcai fentren che ñochi duamngequelu. Inaduamliyiñ ñi femün engün, quimürpuafuiñ chumngechi taiñ ñochi duamngeal. w23.08 pag. 22 parr. 10, 11

Jesús pengelelfi tati apostol Pedro Jehová tañi quelluaeteu. Huiñomongetulu Jesús, ca quiñe rupa quellufi tañi pu discipulo ñi entual fentren challhua (Juan 21:4-6). Tüfachi dungu ñi rupan, Pedro quimtucui Jehová ñi eluaeteu com tañi duamnieel. Feichi mu Pedro, ¿ca acordarumepelai ñi feipin ta Jesús? Jesús feipi com pu doyümquelu Jehová ñi dungu fei Jehová cuidanieaeyu (Mat. 6:33). Feimu Pedro doyümlafi tañi challhuayal, doi mai ñi cüdahuelafiel ta Jehová com ñi mongen mu. Ca llicanon mu, amuldungui Pentecostés 33 tripantu mu, ca quellufi fentren che ñi inayentuafiel ta Jesús (Hech. 2:14, 37-41). Rupachi antü mu, ca quellufi pu Samaria che ca judiongenochi che ñi inayafiel ta Jesús (Hech. 8:14-17; 10:44-48). Jehová ñi quellun mu, Pedro quellufi fillque tuhun-ngechi che ñi conal Jehová ñi troquiñche mu. w23.09 pag. 20 parr. 1; pag. 23 parr. 11

Rupalu epu tripantu peno pu Babilonia che apümcafilu ta Jerusalén, ti lonco ülmen Nabucodonosor peumai. Pei quiñe fütra adentun, fei rume pellquelefui. Feimu feipifi com pu quim huentru, Daniel cütu, ñi feipiaeteu chem ñi peuman ca chem pifel. Femnolmün, com langümngeaimün pifi (Dan. 2:3-5). Fentren che langümngeafulu, feimu Daniel amufemi ti lonco ülmen mu, fei llellipufi ñi eluaeteu tiempo. Fei pengelelayu chem pifel tami peuma pifi (Dan. 2:16). Ñi femal tüfa, mülefui ñi feyentuleal ca nehuen piuquecünuhual, ¿chumngelu? Biblia feipilai Daniel ñi quimeltuchequen peuma cuifi. Daniel feipifi tañi pu cüla hueni ñi ngillatuafiel Chau Ngünechen tañi cutranpiuqueyeaeteu, fei ñi quimal ti ellcalechi dungu (Dan. 2:18). Jehová lloudungueyu tañi llellipun. Tañi quellun mu, Daniel quimelelfi ta Nabucodonosor chem pifel tañi peuma. Femngechi Daniel ca tañi pu hueni montuingün ñi lanoal. w23.08 pag. 2 parr. 4

Raquiduamaiñ cümeque dungu taiñ rupayal ñochi duamngeliyiñ. Femngechi chengeliyiñ, tüngcüleaiñ ca ayüucüleaiñ. Ca femngechi nieliyiñ paciencia, quelluaiñmu taiñ cümelcaleal taiñ raquiduam ca taiñ cülfüncüleal. Nielfiliyiñ ta paciencia caquelu che, doi cüme yeucüleaiñ ca taiñ trahunche doi quiñeucüleai. Quiñe che huesa pieliyiñmu, illcufemlayaiñ femngechi doyelcülerpulayai ti dungu (Sal. 37:8, nota; Prov. 14:29). Doi mai inayentuafiyiñ ta Jehová ca doi fülconcüleaiñ quisu mu. Rume ayüfali taiñ ñochi duamngeal. Quiñeque mu cüdautuafuiñ taiñ nieal ta paciencia. Huelu Jehová ñi quellun mu femafuiñ llemai. Ñochi duam mu esperanieafiyiñ ñi acual ti hue mapu. Ca maneluucüleaiñ “Jehová ngüneduammequefi tañi pu yamnieteu, tati pu maneluuquelu tañi nor piuqueyeaeteu” (Sal. 33:18). Feimu caque quiñeque iñchiñ eluhuaiñ taiñ ñochi duamngeal. w23.08 pag. 21 parr. 7; pag. 25 parr. 16, 17

Santiago feipi quiñe huentru feipiafui ñi feyentun Chau Jehová mu, huelu tañi femün mu pengeli tañi femquenon (Sant. 2:1-5, 9). Santiago ca nütramcai quiñe che pefile quiñe peñi cam quiñe lamngen nienolu tacuhun ca iyael, fei quellunofile, ¿chem pengeli? Tunte feyentulen pifule rume, huelu tañi femün pengeli ñi feyentulenon (Sant. 2:14-17). Santiago nütramcai Rahab mu, quisu pengeli ñi feyentun tañi cüme femün mu (Sant. 2:25, 26). Rahab allcütuquefui Jehová mu, ca quimniefui Jehová ñi quelluquefiel pu Israel che (Jos. 2:9-11). Fei, ¿chumi? Ellcalfi epu lloftumapuyaulu ñi montual tañi mongen engu. Tañi femün mu, Rahab pengeli ñi feyentulen Jehová mu. Tüfachi domo culpafengefui ca inanielafui Moisés ñi ley, huelu Jehová nor che troquieyu, Abrahán reque. ¿Chem quimeltueiñmu ñi femün Rahab? Mülei taiñ pengelal taiñ feyentun taiñ cüme femquen mu. w23.12 pag. 5 parr. 12, 13

Iñchiñ pu cristiano ayüquelaiñ taiñ huenche quimafiel müten Biblia ñi feipin, doi mai Chau Dios ñi nehuen mu inaduamquefiyiñ Chau Dios ñi ellcalechi quimün (1 Cor. 2:9, 10). Fei, ¿chumafuiñ? Estudiayaiñ quiñe dungu mülelu Biblia mu, femngechi taiñ doi fülconal Jehová mu. ¿Chem dungu estudiayafuiñ? Quiñeque dungu tüfa: inaduamafuiñ Jehová chumngechi piuqueyefi tañi pu che cuifi mu, ca femngechi femquei fachantü. Ca inaduamafuiñ chumngechi püramyengequefui Jehová cuifi Israel mu, ca chumngechi püramyengequei fachantü. Ca peafuiñ quiñeque profecia ñi femtriparpun Jesús mülepalu mapu mu. ¿Ayüafuimi tami estudiayal ellcalechi quimün mülelu Biblia mu? Inaduamafuimi ti Índice de las publicaciones Watch Tower ca ti Guía de estudio para los testigos de Jehová, tüfa quelluafeimu tami doi maneluhual Jehová mu ca tami peal ti quimün Chau Ngünechen mu cüpalu (Prov. 2:4, 5). w23.10 pag. 18, 19 parr. 3-5

Pedro feipi “rume piuqueyehuaimün”. Ca feipi ti piuqueyechequelu rumel eluucülequei ñi perdonacheal. Ñi feipin apostol Pedro griego quehun mu, raquiduamelafeiñmu ñi “huinüfcünungen” quiñe dungu. Feimu feipiafuiñ ti piuqueyen quiñe pañu quechilei huinüfcülelu. Raquiduamnge tüfa: com püle manchalele quiñe mesa, huinüfcünungeafui quiñe pañu, femngechi com tacucünungeafui ti mancha. Ca femngechi, rume piuqueyefiliyiñ taiñ pu peñi, pu lamngen, com tacucünuafiyiñ reque com ñi huelulcan engün, femngechi ‘rumel eluucüleaiñ ñi perdonacheal’. Rume piuqueyeniefiliyiñ taiñ pu peñi ca pu lamngen, eluucüleaiñ taiñ perdonayafiel ñi huelulcan engün, cüdaungefule rume (Col. 3:13). Perdonafiliyiñ pu che, pengelqueiñ tunte nehuencülei taiñ piuqueyen ca ayühuelquefiyiñ ta Chau Jehová. w23.11 pag. 11, 12 parr. 13-15

Ti lonco ülmen Josías 26 tripantu nielu, eluhui ñi cüme elcünutuafiel ti ngillatuhue ruca. Quiñeque huentru petu cüdaulu ti ngillatuhue ruca mu, pefingün ti lifru nielu Jehová tañi ley. Josías allcütulu ñi chem pin Jehová ñi ley, eluhui ñi feyentufemafiel (2 Crón. 34:14, 19-21). ¿Ayüafuimi tami rumel chillcatuafiel ta Biblia? Deu femmequeimi chi, huelu ¿rüf ayühuelqueimu tami papeltuafiel? Quiñeque versiculo tami quelluaeteu, ¿chumqueimi tami loncontucuafiel? Josías nielu 39 tripantu, huesa femi. Quintulai Jehová tañi quelluaeteu, doi mai quisutu maneluhui. Ñi huesa femün mu, lai (2 Crón. 35:20-25). ¿Chem quimeltueiñmu tüfa? Tunten tripantu nieliyiñ rume cam fentren tripantu yenieliyiñ taiñ papeltuniefiel ta Biblia, quintunieaiñ Jehová taiñ adnieaeteu. ¿Chumngechi femafuimi? Ngillatuafimi Jehová tami quelluaeteu, papeltuafimi Biblia ca allcütuafimi quimque pu peñi ca pu lamngen. Femngechi femülmi, Jehová quelluaimu tami fütra culpanoal, ca doi ayüucüleaimi (Sant. 1:25). w23.09 pag. 12 parr. 15, 16

Biblia nütramcai fentrenque domo mu, piuqueyefilu Jehová ca serfiquefilu. Fei engün quim ngünenieuquefuingün ca feyentuquefingün ta Chau Dios (1 Tim. 3:11). Trahunche mu ca mülei fentren lamngen cüme hueniyequefilu Jehová ca inayentufalngelu. Eimi hueche lamngen, ¿quimfimi cai quiñeque domo cüme hueniyequefilu Jehová? Ngüneduamafimi ñi chumngen engün, fei eluunge tami ca femngechi chengerpual. Rume falin-ngei tami ñom piuquengeal. Ñom piuquengechi domo cüme hueniyequefi ta Jehová, ca cüme yeuquei caquelu che engün. Ti domo piuqueyefile Jehová, ñom piuque mu cüme inayafi ñi feipin 1 Corintios 11:3. Tüfa mu feipi Jehová inei engün am elufi autoridad trahunche ca ti familia mu. w23.12 pag. 18, 19 parr. 3-5

Jehová ayüquei tati pu huentru ñi piuqueyenieafiel tañi domo, tañi cuidayafiel ca tañi eluafiel com tañi duamnieel, ñi cüme hueniyeafiel, ca quelluafi ñi fülmanieafiel ta Jehová. Cüme raquiduam nielmi, respetaniefilmi pu domo ca manelfal chengelmi,quelluaimu tami cüme fütangeal. Curengelmi, nierpuafuimi yall. Tami cüme chaungeal, inayentuafuimi Jehová ñi cüme chaungen (Efes. 6:4). Jehová feipiquefi tañi Fotüm Jesús tunte tañi piuqueyefiel ca ñi ayüucülen quisu mu (Mat. 3:17). Chaungerpulmi, feipiafimi tami yall tami piuqueyefiel. Ca cüme femle engün, saquifinge. Pu chau inayentuquefilu Jehová, quelluquefingün tañi pu yall ñi cüme cristianongerpual. ¿Chumngechi pepicahuafuimi fachantü tami cüme chaungeal? Pengelelafimi tami pu familia ca ti trahunche tami piuqueyeniefiel engün. Feipiafimi engün tami piuqueyefiel ca tami falintuniefiel (Juan 15:9). w23.12 pag. 28, 29 parr. 17, 18

Com pu che rupaquei huesaque dungu ca cutranquei, iñchiñ Jehová tañi pu che ca femngechi rupaqueiñ. Huelu iñchiñ inantucungequeiñ ca caiñetungequeiñ. Chau Jehová catrütuquelai com taiñ huesa rupan, huelu feipicünueiñmu taiñ quelluaeteu (Is. 41:10). Jehová ñi quellun mu ayüucüleaiñ, cüme dulliaiñ taiñ chem chumal ca püntütripalayaiñ Chau Jehová mu huesa rupaliyiñ rume. Biblia feipi: “Chau Ngünechen hulai tañi cüme tüngün” (Filip. 4:6, 7). Chau Dios ñi hueningen ta iñchiñ, tüngcülequei taiñ piuque, “pu che pepi adümquelafi” tüfa. ¿Llellipufimi mai ta Chau Dios, fei cüme duamnagtui tami piuque? Chau Ngünechen ñi tüngün femquei ta tüfa. w24.01 pag. 20 parr. 2; pag. 21 parr. 4

Tati piuqueyefilu Chau Dios eluhuingün ñi püramyeafiel tañi üi com piuque mu. Ti lonco ülmen David quimniefui püramyefile Jehová ñi üi, Jehová mai ta püramyequefi. ¿Chem raquiduameleiñmu Jehová ñi üi? Raquiduamelqueiñmu ñi cüme Chau ngen, ñi cüme piuquengen ca cümeque dungu ñi femquen. David ayüquefui com piuque mu ñi püramyeafiel Jehová tañi lif cüme üi. Pu Leví che ca eluhuingün ñi püramyeafiel Jehová tañi üi. Ñom piuque mu quimtucuingün chem pile rume engün ñi püramyeafiel, puulayafui Jehová fente tañi alüpüralen, quisu doi mülefui ñi püramyengeal (Neh. 9:5). Pu Leví che entulu tañi feipin com piuque mu, ¿rume ayüupelai Chau Dios? w24.02 pag. 9 parr. 6

Tunte cüdahulmi rume huelu pepi dirpunofilmi tami ayünieel, Jehová huesa raquiduamlayai eimi mu (2 Cor. 8:12). Huesaque dungu tami catrütuqueteu quimeltuqueimu reque. Raquiduamnge chem dungu tami femürpuel. Biblia feipi: “Chau Ngünechen norngei, fei ngoimaquelai tamün femquen” (Heb. 6:10). Feimu eimi ca loncontucuaimi cümeque dungu tami femürpun: hueniyerpufimi ta Jehová, amuldungurpuimi ca fautizahurpuimi. Com cümeque dungu tami femürpun ca dirpuafuimi caquelu dungu tami ayünieel. Fei eimi, Jehová ñi quellun mu, ca dirpuafuimi tami ayünieel. Cüdaucülelmi tami dirpuafiel tami ayünieel, raquiduamcüleaimi chumngechi tami quelluqueteu ta Jehová, fei ca ayühuafuimi (2 Cor. 4:7). Afeluunolmi, fütra cümelcan nieaimi cüpalechi antü mu (Gál. 6:9). w23.05 pag. 31 parr. 16-18

Chau Jehová pengelelquefi tañi pu che ñi piuqueyefiel ca ñi ayüucülen quisu engün mu. Biblia mu Jehová epu rupa feipifi ta Jesús: “Tüfa ta iñche tañi poyen Fotüm, iñche tañi ayühuelqueteu” (Mat. 3:17; 17:5). ¿Ayüafuimi tami ca femngechi feipiaeteu Jehová? Com iñchiñ ayüqueiñ taiñ feipingeal. Huenu mu feipinacümpalayaiñmu ta Jehová, huelu mai Biblia mu feipiqueiñmu. Jesús com tañi feipin ca tañi femün mu, inayentufi tañi Chau. Feimu papeltufiel mu iñchiñ Biblia mu Jesús ñi piuqueyenquechi dungufiel tañi pu discipulo, Jehová taiñ dungumequeteu troquihuaiñ. Huelulcauquefulu rume tañi pu discipulo, Jesús feipifi tañi piuqueyefiel, feimu raquiduamafuiñ Jehová taiñ ca femngechi feipimequeteu (Juan 15:9, 15). Rupan mu huesaque dungu mu, feipilayaiñ Jehová taiñ lladcütunieteu. Doi mai raquiduamaiñ taiñ pengelelafiel ta Jehová taiñ piuqueyefiel ca taiñ maneluucülen quisu mu (Sant. 1:12). w24.03 pag. 28 parr. 10, 11