Noviembre

Eimi chau, ñuque, nielmi pichiqueche pepicayafimi engün ñi huiñoldungual trahun mu. Quiñeque chillcatun mu nütramcangequei curehuen dungu cam taiñ connoal pod cudumuhun mu, fei pu pichiqueche quimlayafuingün chi tañi chem pial. Huelu müleafui chi quiñe cam epu parrafo tañi huiñoldungual engün. Ca nütramcayafimi tami pichiqueche chemu tañi pürüm elufemngenoal ta comentario, femngechi tami pichiqueche huesa duamlayai elungenole tañi huiñoldungual (1 Tim. 6:18). Com iñchiñ taiñ huiñoldungun mu püramyeafuiñ ta Jehová ca yafültucuafuiñ taiñ pu peñi ca pu lamngen (Prov. 25:11). Quiñeque mu pichi nütramcayafuiñ quisu iñchiñ taiñ rupan mu, huelu cuñiutucuhuaiñ iñchiñ mu müten taiñ nütramcanoal (Prov. 27:2; 2 Cor. 10:18). Huelu mai taiñ comentario mu doi nütramcayaiñ Jehová mu, Biblia mu ca Jehová tañi troquiñche mu (Apoc. 4:11). w23.04 pag. 24, 25 parr. 17, 18

Ti piuqueyehun quelluqueiñmu taiñ llihuatuleal ca taiñ nieal cüme raquiduam (Mat. 22:37-39). Piuqueyefiliyiñ Chau Ngünechen, eluhuaiñ taiñ amuldungual cüdaungefule rume (2 Tim. 1:7, 8). Cafei fente taiñ piuqueyefiel mu pu che, chumqueiñ rume taiñ quimelelafiel engün Jehová ñi dungu, telefono, carta mu rume. Maneluucüleiñ ñi norcünutual ñi mongen engün ca ñi inayal Jehová ñi rüpü (Ezeq. 18:27, 28). Ca piuqueyequefiyiñ taiñ pu peñi ca pu lamngen, feimu huelucontu nehuentucuuqueiñ ca yafültucuuqueiñ (1 Tes. 5:11). Pu soltau quiñe mu mülelu huelucontu quelluuqueingün. Iñchiñ turpu huesalcalayafuiñ taiñ pu peñi ca pu lamngen quisu taiñ pin mu, ca huiñoleltulayafiyiñ huesalcangeliyiñ rume (1 Tes. 5:13, 15). ¿Ca chumngechi pengelafuiñ taiñ piuqueyeniefiel pu peñi ca pu lamngen? Respetanieafiyiñ tati pu loncolelu (1 Tes. 5:12). w23.06 pag. 10 parr. 6; pag. 11 parr. 10, 11

Raquiduamliyiñ Jesús ñi hulün ñi mongen, fei doi maneluhuaiñ Jehová ñi feipicünuel mu. Jesús tañi lan mu, cüme pengeli Jehová ñi femtripayal tañi feipicünuel. Raquiduamliyiñ chumngelu ñi lan ta Jesús ca com ñi femün Jehová ñi hulal tañi Fotüm, doi maneluhuaiñ Jehová ñi cüme elcünutuafiel ti mapu ca taiñ rumel mongeleal. Raquiduamaiñ tañi femün ta Jehová. Huli tañi poyen Fotüm. Huenu mu, rume quiñeucülefuingu, fei huercüfi tañi nagpayal mapu mu. Tüfa mu fentren huesaque dungu mu rupai, rume cutrancahui ca langümngei. Raquiduamnge tüfa mu: Jehová ¿hulpeafui mai tañi Fotüm taiñ cümelcaleal pichin antü mu müten? Femlayafui (Juan 3:16; 1 Ped. 1:18, 19). Feimu Jehová hulün mu tañi Fotüm taiñ montulaeteu, eluhuai tañi huechurpual ñi feipin taiñ rumel mongeleal. w23.04 pag. 27 parr. 8, 9

Jehová, ¿rüf ayüniepei mai ñi huiñomongeltuafiel pu layelu? Felei llemai. ¿Chumngechi quimiyiñ tüfa? Jehová adcünufi fentren huentru ñi huirintucual Biblia mu ñi huiñomongetual pu layelu (Is. 26:19; Apoc. 20:11-13). Ca com ñi feipicünuel ta Jehová huechutripaquei (Jos. 23:14). Raquiduamnge Job ñi feipin mu. Job quimniefui ñi layal quiñe antü, huelu ca quimniefui Jehová rume ayüniei tañi huiñomongeltuaeteu (Job 14:14, 15). Jehová ca rume ayüniei tañi huiñomongeltuafiel com tañi pu serfiqueteu, femngechi ñi cüme mongen nieal ca ñi ayüucüleal engün. Huelu quiñe che quimnofilu Jehová lale, ¿ca ayüniepei mai Jehová ñi huiñomongeltuaeteu? Femi llemai (Hech. 24:15). Quisu ayüniei tañi hueniyeaeteu engün ca tañi rumel müleal mapu mu (Juan 3:16). w23.04 pag. 9 parr. 5, 6

¿Chumafuimi tami doi maneluhual? Maneluhulmi ñi rumel mongeleal mapu meu, papeltunge Biblia ñi feipin chi hue mapu mu ca raquiduamnge tami mülen üye mu (Is. 25:8; 32:16-18). ¿Peyeniehuimi hue mapu mu? Huimtuleliyiñ ñi raquiduamal chumleai taiñ mongen ti hue mapu mu, taiñ cutrancahun “pichiñmayai müten” troquihuaiñ (2 Cor. 4:17). Chau Jehová ñi elueteuchi maneluhun nehuentucuaiñmu. Taiñ nehuentuleal, Jehová elueiñmeu com taiñ duamnieel. Feimu cüdaungele ñi femürpual quiñe elfal cüdau cam chaftuliyiñ quiñe huesa dungu, ¿chumaiñ ñi serfinieafiel Jehová ayühun mu? Ngillatuqueaiñ ca papeltuqueaiñ ta Biblia, femngechi llohuaiñ Jehová ñi quellu. Eluucüleaiñ taiñ quelluaeteu pu peñi, pu lamngen ca raquiduamtucunieaiñ taiñ maneluhun. Femngechi Chau Ngünechen ñi nehuen mu, llohuaiñ taiñ ‘duamnieelchi nehuen. Femngechi chem rupale rume, ayühunquechi amuleaiñ ñochi duam mu’ (Col. 1:11). w23.10 pag. 16, 17 parr. 19, 20

Llellipun mu mañumafuiñ Jehová com cümeque dungu taiñ eluqueteu, Jehová mu am cüpalu com cümeque dungu (Sant. 1:17). Mañumafuiñ ta Jehová com tañi deumael mu. Cafei taiñ elueteu mu mongen, taiñ familia, cümeque hueni ca ti maneluhun. Ca mañumafuiñ Jehová taiñ hueniyeteu. Quiñeque mu cüdautuafuiñ taiñ mañumafiel Jehová llellipun mu. ¿Chumngelu am? Famülque mu pu che mañumquelai. Raquiduamqueingün quisu engün tañi ayüqueel müten, huelu mañumquelaingün. Feimu mülei taiñ cuñiutucuhual. Taiñ llellipun mu re pedilayafiyiñ müten ta Jehová taiñ eluaeteu cümeque dungu, huelu ca mülei taiñ mañumafiel com taiñ eluqueteu (Luc. 6:45). w23.05 pag. 4 parr. 8, 9

Taiñ poyen Chau Jehová pilai taiñ cutrancahual (Is. 63:9). Huelu Jehová müntuñmalayaiñmu com taiñ huesaque rupan. Huesaque dungu taiñ rupan trürümafuiñ leüfu mu cam cütral mu (Is. 43:2). Jehová feipicünui taiñ quelluaeteu, femngechi taiñ chaftuafiel feitachi huesaque dungu. Ca quelluaiñmu taiñ fülconcüleal quisu meu chem rupaliyiñ rume. Ca eluaiñmu tañi nehuen, femngechi taiñ amuleal (Luc. 11:13; Filip. 4:13). Feimu llemai, rupaliyiñ huesaque dungu mu, maneluhuaiñ Jehová taiñ quelluaeteu nehuentuleal ca taiñ püntütripanoal quisu meu. Jehová ayüniei taiñ maneluucüleal quisu meu (Heb. 11:6). Quiñeque mu, yafüngehuelayafuiñ taiñ rupan huesaque dungu mu, fei ¿quellupeafeneu mai ta Chau Jehová? piafuiñ. Huelu “fütra cura malal” mu pürayafuiñ Chau Ngünechen ñi nehuen mu pi ta Biblia (Sal. 18:29). Feimu epu rume raquiduamcülelayaiñ, huelu mai llellipuafiyiñ Jehová ca com piuque mu maneluhuaiñ taiñ allcütuaeteu (Sant. 1:6, 7). w23.11 pag. 22 parr. 8, 9

Müna cüme feipilei tati piuqueyehun mu. ¿Chem quimeltui tüfachi texto? Com pu curehuen rumel rüf piuqueyehuafui. Ti huentru ca ti domo mülei ñi cüdaucüleal engu, fei ñi chongnoal ñi piuqueyehun. Ti cütral ñi chongnoal, mülei ñi tucunielngeal mamüll, femngechi üicüleai. Ca femngechi ti curehuen fentecünunole ñi cüdahun, tremcüleai ñi piuqueyehun engu. Quiñeque mu rupayafuingu huesaque dungu mu, nielayafui plata, cutrancüleafuingu ca cüdautuafuingu ñi tremümafiel tañi pu yall. Feimu chongnagafui reque tañi piuqueyehun. Fei ñi chongnoal “Jehová tañi üi cütral”, ti huentru ca ti domo mülei ñi cüme hueniyeafiel ta Jehová. w23.05 pag. 20, 21 parr. 1-3

Taiñ pu chau nehuen piuquengeingün chi ca nehuen piuquecünuhuaimün piafeiñmu, huelu caque quisuque iñchiñ mülei taiñ cüdahual taiñ femngechi chengeal. Raquiduamnge tüfa: hue adümuuliyiñ quiñe dungu mu, duamfali taiñ cüme ngüneduamafiel inei taiñ quimeltueteu, femngechi inayentuafuiñ tañi femün. Ca femngechi taiñ nehuen piuquengeal, mülei taiñ ngüneduamafiel ñi femün quiñeque che nehuen piuquengelu. Daniel reque, mülei taiñ cüme chillcatuafiel ti Biblia, mülei taiñ cüme hueniyeafiel ta Chau Jehová ca piuque mu tripape taiñ ngillatuquefiel. Cafei mülei taiñ maneluhual taiñ rumel quelluaeteu. Com tüfachi dungu femliyiñ, nehuen piuquengeaiñ rupaliyiñ rume huesaque dungu. Pu nehuen piuquengelu yamngequei ca raquiduamelafui caquelu che fei ñi quimafiel Chau Jehová. Feimu rume falin-ngei nehuen piuquengeal. w23.08 pag. 2 parr. 2; pag. 4 parr. 8, 9

Griego quehun mu, ñi feipin Pablo pengeli quiñe che cüme ngüneduamquefilu ñi rüfngepen mai ti plata cam ti oro. Ca femngechi femaiñ iñchiñ, taiñ allcüel ca taiñ papeltuqueel cüme ngüneduamafiyiñ ñi rüfngepen mai. Doi fülcülepale ti fütra cutrancahun, doi mülei taiñ femal tüfa. Feyentufemlayafiyiñ com taiñ feipingeel, huelu mai trürümafiyiñ tañi feipin mu ta Biblia ca Jehová tañi troquiñche. Femngechi chem coilaque dungu rume Huecüfü mu cüpalu, ngünencalayaiñmu (Prov. 14:15; 1 Tim. 4:1). Jehová ñi pu che mongetripayai ti fütra cutrancahun mu, huelu caque quiñeque iñchiñ quimlaiñ ñi chumleal taiñ mongen ta hule (Sant. 4:14). Iñchiñ mongetripayaiñ chi ti fütra cutrancahun mu cam layafuiñ petu ñi acunon. Huelu püntütripanoliyiñ Chau Jehová mu, eluaiñmu rumel mongen. Feimu, ¿chem mülei taiñ femal feula? Raquiduamtucunieafiyiñ ti maneluhun ca pepicaucüleaiñ petu acunole Jehová ñi antü. w23.06 pag. 13 parr. 15, 16

Quimlaiñ chumngechi huechutripayal quiñeque dungu ñi feipicünuel Biblia (Dan. 12:8, 9). Müte adümnoliyiñ quiñe dungu ñi feipicünuel Biblia, feipilayafuiñ tañi huechutriparpunoal. Rüf maneluucüleiñ puuchi antü mu Chau Jehová quimelaiñmu chem taiñ duamnieel ñi quimal, chumngechi femi cuifi. Tati troquiñque mapu feipiaingün: “¡Com cümelcalei, ngelai chem dungu rume!” (1 Tes. 5:3). Fei hula tati pu gobierno caiñetuafingün tati coilaque religion ca apümcayafingün (Apoc. 17:16, 17). Cafei caiñetuafingün Chau Dios ñi pu che (Ezeq. 38:18, 19). Fei hula conai ti afchi hueichan Armagedón pingelu (Apoc. 16:14, 16). Rüf maneluucüleiñ tañi rupayal tüfachi dungu pichiñma mu. Petu ñi acunon feichi antü, amulepe taiñ mañumtuniefiel taiñ Huenu Chau Jehová, amulepe taiñ ngüneduamniefiel Biblia ñi feipicünuel ca quellunieafiyiñ ta caquelu pu che ñi ca femngechi femal. w23.08 pag. 13 parr. 19, 20

Tati apostol Pablo nütramcai tati feyentun, maneluhun ca ti piuqueyehun. Fei hula, feipi: “Doi falin-ngei ti piuqueyehun” (1 Cor. 13:13). ¿Chumngelu femngechi feipi? Ti hue mapu mu maneluuhuelayaiñ ñi femtripayal Jehová ñi feipicünuel, com femtripayalu am. Huelu amuleai taiñ piuqueyefiel ta Chau Jehová ca tati pu che. Rumel mu doi nehuentuleai taiñ piuqueyen. Cafei hueluquentu piuqueyeuliyiñ, pengelaiñ taiñ rüf cristianongen. Jesús feipifi tañi pu apostol: “Femngechi hueluquentu piuqueyehulmün, com pu che quimai tamün inaniemufiel ta iñche” (Juan 13:35). Cafei ti piuqueyen quelluqueiñmu taiñ quiñeucüleal. Feimu Pablo feipi: “Piuqueyehun mu rüf quiñeucülequei pu che” (Col. 3:14). Tati apostol Juan feipi: “Tati piuqueyefilu ta Chau Dios ca mülei ñi piuqueyeafiel tañi peñi” (1 Juan 4:21). Feimu piuqueyefiliyiñ taiñ pu peñi, taiñ pu lamngen, ca pengelqueiñ taiñ piuqueyefiel ta Chau Jehová. w23.11 pag. 8 parr. 1, 3

Biblia feipi taiñ cristianongen lefcüleiñ quiñe cuden mu reque. Huechunentufiliyiñ ti cuden, nieaiñ afnoachi mongen (2 Tim. 4:7, 8). Feitachi cuden epe afcülei, feimu mülei taiñ lefcüleal müten. Ti apostol Pablo ngülamtueiñmu: ‘Quiñe püle nentuaiñ com fanechi dungu ca yafüluhun mu lefcüleaiñ ti cuden cheu taiñ coneltulen’. Tüfa quelluaiñmu taiñ huehual. Pablo, ¿feipipei mai taiñ yenienoal chem no rume taiñ fanetuniefiel? Femlai. Pablo feipi taiñ yenienoal falinochi dungu taiñ fanetuafeteu. ¿Chumngelu am? Yeniefiliyiñ tüfachi fanechi dungu, matu amulelayafuiñ ca cansayafuiñ. Feimu inaduamuhuaiñ taiñ yenienoal falinochi dungu taiñ fanetuafeteu, fei famentufemafiyiñ. Huelu, ¿re femngechi lefaiñ müten? Femlayaiñ. Petu taiñ lefcülen tüfachi cuden meu, mülei taiñ femal cüdaungechi dungu. Rume falin-ngei taiñ femal. Femnoliyiñ, hueulayafuiñ ti cuden (2 Tim. 2:5). w23.08 pag. 26 parr. 1, 2

Eluhuaiñ taiñ respetayafiel caquelu che ñi raquiduam. Por ejemplo, quiñeque domo lamngen tucuquei maquillaje. Huelu quiñequentu domo lamngen femquelaingün. Quiñeque cristiano pichique putuqueingün pulcu, huelu quiñequentu femquelaingün. Cafei com pu cristiano ayüquei tañi tremoleal, huelu quisuque dulliquei chumngechi ñi cuñiutucuhual. Iñchiñ doyümliyiñ quisu iñchiñ taiñ raquiduam müten ca dicümtucufiliyiñ caquelu che ñi ca femngechi raquiduamal, huesalcayafuiñ ca quiñeucülelayafui ti trahunche (1 Cor. 8:9; 10:23, 24). Por ejemplo, Jehová feipiquelaeiñmu chumngechi taiñ tucutuhual, huelu ngülamtuqueiñmu taiñ cüme dullial. Chumngechi taiñ tucutuuquen quimfalcünuqueiñ taiñ yamniefiel ta Chau Dios ca quimfalngepe taiñ mallmangenon ca taiñ nien cüme raquiduam (1 Tim. 2:9, 10). Feimu ayüquelaiñ taiñ afmatulelafiel pu che chumngechi taiñ tucutuuquen. Pu loncolelu inafile Biblia ñi ngülam, feimu feipilayafingün pu peñi ca pu lamngen: “Famngechi tucutuhuaimi, famngechi cupiluucüleaimi” pilayafingün. w23.07 pag. 23, 24 parr. 13, 14

Jehová quimeltueiñmu chumngechi ayühun-ngechi mongen taiñ nieal. Quiñeque che allcütuquefi tati quim raquiduamnienochi domo, femngechi tañi conal pod cudumuhun mu. Fei engün pichin mu müten cüme rupaqueingün, huelu tañi femün mu engün, larpuaingün (Prov. 9:13, 17, 18). Pu allcütuquefilu ti domo adentulelu “ti rüfngechi quimün” cüme tripaquei ñi mongen (Prov. 9:1). Petu quimürpuiñ taiñ falintuafiel Jehová ñi ayüqueel ca taiñ üdeafiel Jehová ñi üdequeel (Sal. 97:10). Ca ayühunquechi mangelquefiyiñ caquelu pu che ñi allcütuafiel “ti rüfngechi quimün”. Chumngechi ñi feipiel Biblia, “alüpüralechi lof huaria mu mülelu” huirarcüleiñ reque: “¡Com pu quimnolu cüpape fau!”. Com iñchiñ ca com pu lloufilu feitachi mangelün rume cümelcangeiñ famülque mu. Ca inaniefiliyiñ feitachi “quimün ñi rüpü”, rumel mongeleaiñ cüpalechi antü mu (Prov. 9:3, 4, 6). w23.06 pag. 24, 25 parr. 17, 18

¿Chum duamqueimi quiñe tami pu compañ cüdau, colegio mu ramtuelmu tami feyentun mu? ¿Llicalequeimi? Fentrenque iñchiñ llicaqueiñ. Femngechi ramtungeliyiñ, quimafuiñ chem ñi raquiduamquen ti che ca chem ñi feyentuquen, femngechi quelluafeiñmu taiñ amuldungulelafiel. Huelu quiñeque mu, quiñeque che ramtuafeiñmu taiñ notucadunguaeteu müten. Femqueingün allcütun mu coilaque dungu iñchiñ mu (Hech. 28:22). Cafei ‘epe puucülei ñi afal mapu müleyechi dungu’, feimu pu che ‘pilai ñi cümelcautual caquelu che engün’ ca ‘illcufengeingün’ (2 Tim. 3:1, 3). Quiñe che ramtueliyiñmu taiñ feyentun mu re notucadungual müten, ¿chem quelluaiñmu taiñ tüngcüleal? Taiñ ñom piuquengeal. Quiñe che ñom piuquengelu illcufemquelai. Cafei quintucadungungen mu cam quimnole chem tañi huiñoldungual, quim ngüneuquei. w23.09 pag. 14 parr. 1, 2

Quiñeque mu Chau Jehová tañi troquiñche eluqueiñmu ngülamtun taiñ cuñiutucuaeteu. Inaniefiliyiñ Jehová ñi quimeltun, cümelcaqueiñmu (Is. 48:17, 18; 1 Tim. 6:9, 10). Jehová amulerpuai ñi püneafiel pu huentru ñi adnieafiel tañi troquiñche. Femai fütra cutrancahun mu ca feichi huaranca tripantu ñi ngünenietual ta Jesús. Feichi antü mu ayülayafuiñ chi taiñ chem pingeal, huelu ¿inaniepeafuiñ mai? Fachantü doi feyentufiliyiñ ta Jehová, müte cüdautulayaiñ ñi femal cüpalechi antü mu. Feimu mülei taiñ rumel inanieafiel Chau Jehová taiñ adnieteu. Cafei mülei taiñ inanieafiel pu huentru Jehová ñi elcünuel (Is. 32:1, 2; Heb. 13:17). Rüf maneluucüleiñ Jehová mu taiñ cüme adnieteu, fei quelluqueiñmu taiñ hueniyenieafiel, femngechi diturpuafuiñ ti rumel mongen. w24.02 pag. 25 parr. 17, 18

Ti apostol Pablo ayühunquechi serfiquefui Jehová, huelu quiñeque mu cüdaungechi dungu mu rupai. Fentrenque rupa, mülefui ñi amual fütra camapu, ca quiñeque mu cümelcalequelafui ti rüpü. Cafei Pablo cuñihun dungu mu rupai lafquen mu ca pu hueñefe ñi duam mu. Cafei tañi pu caiñe rume huesalcaeyu (2 Cor. 11:23-27). Ca quiñeque mu tañi pu peñi cütu mañumquelafuingün com ñi femquefel Pablo (2 Cor. 10:10; Filip. 4:15). ¿Chem quellueyu Pablo ñi cüdahuelnierpuafiel ta Jehová? Pablo papeltuquefui Chau Ngünechen ñi huirintucuel, femngechi cüme quimnierpufi. Ca com ñi rupan ñi mongen mu, doi cüme quimürpufi Jehová. Feimu cüme quimniefui ñi piuqueyenieteu Jehová (Rom. 8:38, 39; Efes. 2:4, 5). Ca Pablo rume piuqueyerpufi ta Jehová, feimu serfiniefi tañi pu chaf feyentulelu (Heb. 6:10). w23.07 pag. 9 parr. 5, 6

Biblia nütramcai “pu autoridad taiñ ngünenieteu”, tüfa ti pu gobierno. Quiñeque che inaquefi quiñeque ley ñi feipin ti gobierno, huelu caquelu ley dungu ayüquelafi, feimu inaquelafi. Biblia feipi ti Huecüfü adniefi pu gobierno, feimu cutrancachequeingün. Huelu pichiñma mu, apümngeaingün (Sal. 110:5, 6; Ecl. 8:9; Luc. 4:5, 6). Femlu rume, iñchiñ mülei taiñ feyentuafiel, ¿chumngelu? Biblia feipi tati “caiñetufilu ti autoridad, caiñetuquefi Chau Ngünechen ñi elcünuel”. Chau Dios pichiñma mu elcünufi pu gobierno ñi ngünenieafiel pu che, femngechi ñi pofolcaunoal engün. Feimu mülei taiñ ‘eluafiel chem ñi llohual’ engün, tüfa tati impuesto, yamühun ca inayal tañi feipin engün (Rom. 13:1-7). Fei quiñeque ley ñi elcünuel ti gobierno cümelai, norngelai, rume fali ñi inangeal piafuiñ. Huelu Jehová feipieiñmu taiñ feyentuafiel pu gobierno, feimu feyentuafiyiñ müten. Huelu huercüngeliyiñ taiñ femal chem ñi ayüquenoel ta Jehová, femlayaiñ (Hech. 5:29). w23.10 pag. 8 parr. 9, 10

Choyüngelu Sansón, pu Filistea che ngüneniefingün pu Israel che ca rume huesalcaquefingün (Juec. 13:1). Pu Israel che rume cutrancauquefuingün pu Filistea che ñi duam mu. Feimu Jehová dullifi Sansón ñi montulafiel pu Israel che (Juec. 13:5). Ñi femürpual tüfachi cüdau, Sansón mülefui ñi maneluhual Jehová mu. Peafiyiñ Sansón chumngechi ñi maneluhun Jehová mu tañi quelluaeteu. Quiñe rupa pu Filistea che amuingün Lehí mapu mu ñi nüafiel ta Sansón. Lehí, ¿mülepelai Judá mapu mu? Feimu pu judio fente tañi llican mu trarifingün Sansón epu hue llasu ca hultucufingün pu Filistea che mu (Juec. 15:9-13). Fei “Jehová ñi nehuen nehuentucufi ta Sansón”, fei quisutu reque catrücahui ti llasu. Fei Sansón ‘pei quiñe burro ñi trangatranga (traltri), nüfi ca fei mu langümfi huaranca huentru’ (Juec. 15:14-16). w23.09 pag. 2 parr. 3, 4

Chau Jehová Biblia mu ñochiquechi pengeleleiñmu chem tañi ayüqueel ca tañi piel, tüfa rumel felequei. Quisu chumngechi rume huechunentuquefi tañi ayüqueel ca cüme adcünufi com dungu tañi huechurpual tañi ayüqueel (Prov. 16:4). Ca com tañi femqueel ta Jehová rumel mülequei. Feimu, ¿chem dungu ayüquei ta Jehová? Ca ¿chem dungu femquei ñi huechurpual tañi ayüqueel? Jehová feipifi ta Adán engu Eva chem ayüniefui ñi femal ta quisu engu. Feipifi: “Nieaimün yall, fentren-ngeaimün, apolfimün ti mapu ca ngünenieafimün. Cafei ngünenieafimün itrofill mongen” (Gén. 1:28). Huelu Adán engu Eva culpalu, com rulpalelfi ñi culpan caquelu cüpachi che. Tüfa ¿catrütupefi mai Jehová tañi ayüqueel? Femlai, Jehová fentecünulai. Pichiñma rupalu, raquiduami ñi elcünual quiñe Gobierno huenu mu, femngechi ñi huechurpual tañi ayüqueel mapu mu ca pu che mu (Mat. 25:34). w23.10 pag. 20 parr. 6, 7

Cüdautuliyiñ taiñ femhuenoal huesaque dungu, huesa duamcüleafuiñ. Huelu Jehová quelluaiñmu taiñ amuleal (Sal. 94:18, 19). Peafiyiñ ñi rupan quiñe peñi. Petu ñi quimnofiel ta Jehová, fentren tripantu mu cudumuuquefui chaf huentru engu. Quimfilu ti rüf dungu, cümelcünutui tañi mongen. Femfulu rume, quiñeque mu petu niequefui huesaque raquiduam, ¿chem quellueyu tañi amuleal? Quisu feipi: “Jehová yafültucuchequei. Quimürpun Jehová tañi nehuen mu iñche cüme yenieafun tañi mongen chumngechi ñi ayüqueel ta Jehová. Chau Jehová ñi duam mu, iñche serfiniequefiñ. Quisu nehuentucuqueneu culpafe chengelu rume iñche”. w23.09 pag. 23 parr. 12

Eimi hueche peñi, müchai müten cüme cristianongerpulayaimi. Mülei tami inayentuafiel pu quimche, cüme raquiduamaimi, manelfal chengeaimi, adümuhuaimi fillque dungu mu ca pepicahuaimi tami femal fillque dungu cüpalechi antü. Pütrünque dungu inaduamimi tami femal, fei ¿com feman chi am tañi quimürpuel? piafuimi. Huelu femafuimi llemai, Jehová quelluaimu (Is. 41:10, 13). Pu peñi ca pu lamngen trahunche mu ca quelluafeimu. Cüme cristianongerpulmi chumngechi ñi ayüqueel ta Jehová, rume ayüucüleaimi. Hueche, rume piuqueyehuiyiñ. Eluucülenge tami cüme cristianongeal, fei Chau Jehová cümelcanieaimu. w23.12 pag. 29 parr. 19, 20

Raquiduamnge tüfa, eimi müleimi caquelu peñi ca lamngen eimün, fei entuimi quiñe foto. Quiñe müten entulaimi, epu, cüla. Quiñe peñi cüme tripanole quiñe foto mu, borracünuafimi, fei tati cüme tripalu elafimi. Iñchiñ acordanieiñ ñi cüme rupan taiñ pu peñi, pu lamngen iñchiñ. Huelu acordarumeafuiñ quiñe peñi cam quiñe lamngen huesa entui tañi feipin cam huelulcahui, fei ¿chumafuiñ? Ngoimanentuafiyiñ, borracünuafiyiñ feiti huesa tripachi foto reque (Efes. 4:32). Fentren rupa am cüme rupaquefulu feichi lamngen cam peñi iñchiñ, feimu loncontucuafiyiñ taiñ cüme rupan, guardacünuafiyiñ tati cüme tripachi foto reque. w23.11 pag. 12, 13 parr. 16, 17

Tañi feipin Pablo griego quehun mu pengeli pu domo mülei ñi rumel cüme tucutuucüleal ca mülei ñi raquiduamal chem piquei caquelu pu che tañi tucutuucülen mu. Saquihuiyiñ eimün pu lamngen tamün cüme tucutuuquen. Ñi cüme cristianangerpual pu domo ca mülei ñi quim raquiduamal. Cüme raquiduamle engün, fei quimaingün chem ñi cümen ca chem ñi cümenon, ca inayafingün tati cümelu. Ngüneduamaiñ ñi femün ta Abigaíl. Tañi füta huesa raquiduamniefui, ayüfui ñi huesa femal. Femfule, com tañi pu che contuafeyu huesaque dungu. Fei, ¿chumi Abigaíl? Abigaíl cüme quimniefui chem ñi cümen. Fei tüfa ta femi, femngechi montulfi fentren che (1 Sam. 25:14-23, 32-35). Cafei cüme raquiduamliyiñ, quimaiñ chumül taiñ dungual ca chumül taiñ ñücüfnagal. Cafei duamtuafiyiñ caquelu pu che, huelu rume conlayaiñ fei engün ñi dungu mu, femngechi taiñ huesa duamelnoafiel (1 Tes. 4:11). w23.12 pag. 20 parr. 8, 9

Ti apostol Pablo huirintuculelfi tüfachi dungu pu peñi, pu lamngen Roma mu mülelu. Fei engün quimürpufi ta Jehová ca tañi Fotüm Jesús. Tüfa engün feyenturpui ca cristianongerpuingün, feimu tañi feyentun mu “nor che” pieyu Jehová. Ca dullieyu engün quisu tañi nehuen mu (Rom. 5:1). Fei maneluhuingün ñi llohual tañi cullitu cüpalechi antü meu. Pablo ca nütramcalelfi pu dullinque cristiano Éfeso mu ñi llohual cümelcan. Feipi Chau Dios ñi eluafiel “quiñe cullitu reque tati pu che dullicünungelu” (Efes. 1:18). Pablo ca feipifi pu Colosa che cheu ñi llohual feitachi cullitu. Feipi: “Maneluucüleimün tamün llohual ti cümelcan tamün elungeal huenu meu” (Col. 1:4, 5). Fei, ¿chem maneluuqueingün pu dullinque cristiano? Maneluucüleingün ñi huiñomongetual ca llohual afnoachi mongen huenu meu, tüfa mu ngünenietuai Jesús engün (1 Tes. 4:13-17; Apoc. 20:6). w23.12 pag. 9 parr. 4, 5

Ñi feipin ‘cuñiutucuai’ raquiduamelqueiñmu ñi chumquefel cuifi pu soltau llihuatuquefulu ti huaria. Pu huaria che duamcülequelafui quimnielu cai engün ñi cuñiutucuaeteu pu soltau. Ca femngechi iñchiñ, cüme duamcülequei taiñ raquiduam ca taiñ piuque, quimnielu cai Chau Ngünechen ñi hulqueelchi cüme tüngün cuñiutucuqueiñmu (Sal. 4:8). Amulele rume taiñ huesa rupan, tüngcüleafuiñ chumngechi ñi rupan ta Ana (1 Sam. 1:16-18). Cüme duamcülelu iñchiñ, cüme raquiduamaiñ taiñ chumal. ¿Chumafuiñ? Cuifi mu, pu huaria che pediquefuingün pu soltau tañi incayaeteu. Ca femngechi iñchiñ llellipunieafiyiñ ta Chau Jehová elungeliyiñ hula tañi “cüme tüngün” (Luc. 11:9; 1 Tes. 5:17). Cüdaungechi dungu rupamequelmi, fentecünuquilnge tami llellipun, femngechi ngüneduamaimi Chau Jehová ñi cüme tüngün cuñiutucuquei tami piuque ca tami raquiduam (Rom. 12:12). w24.01 pag. 21 parr. 5, 6

Jesús eluucülefui tañi hulelcangeal, huesa pingeal ca coila dalluntucungeal, femngechi ñi liftuñmayafiel tañi Chau ñi üi. Jesús femi com ñi feipin tañi Chau, feimu yehuelcaulai (Heb. 12:2). Quimniefui Huecüfü tañi huesalcamequeteu (Luc. 22:2-4; 23:33, 34). Huecüfü ayüfui Jesús ñi poyehuenoafiel ta Jehová, huelu Jesús femlai, femngechi pengelfi Huecüfü ñi coilatufengen. Ca quimfalcünui Jehová tañi pu serfiqueteu püntütripalayafui fei mu rupafule rume huesaque dungu mu. Cüpa ayühuelfiliyiñ Jesús, püramyenieafiyiñ Jehová tañi üi ca quelluafiyiñ caquelu che tañi quimaeteu, femngechi inayentuafiyiñ ta Jesús (1 Ped. 2:21). Femngechi pengelaiñ Huecüfü ñi fütra coilangen ca ayühuelafiyiñ ta Jehová. w24.02 pag. 11 parr. 11-13

Rupachi quechu tripantu, doi millon che fautizahui. Feipin mu taiñ hulcünual taiñ mongen Jehová mu, eluucüleiñ taiñ inayafiel ta Jesús ca hunelu mu femal Jehová tañi ayüqueel. ¿Chumngechi femafuiñ? Jesús feipi: “Inei rume ayüle tañi inayaeteu, quisu illamuupe” (Mat. 16:24). Ñi feipin griego quehun mu ca feipiafui “ñi mongelenoal quisu tañi duam mu”, feimu famentuafiyiñ Jehová tañi ayüquenoel (2 Cor. 5:14, 15). Feimu famentuafiyiñ ñi femquen pu inaquefilu tañi huesaque illutun. Por ejemplo, tati pod cudumuhun (Gál. 5:19-21; 1 Cor. 6:18). Piuqueyefiliyiñ ta Jehová ca quimtuculiyiñ taiñ cümelcayaeteu tañi feipin, cüdautulayaiñ taiñ inanieafiel taiñ feipieteu Jehová (Sal. 119:97; Is. 48:17, 18). w24.03 pag. 2 parr. 1; pag. 3 parr. 4

Jehová eluquefi tañi nehuen com ti pu che tañi ayühuelqueteu (Mat. 12:18). Ramtuhuaiñ: “Tañi chumngechi chengen, ¿pengelquepen mai tañi nien Jehová tañi nehuen? Tañi quimfiel mu ta Jehová, ¿doi ñochi duam chengetun ca doi niequetun ta paciencia?”. Doi cüme chengerpuliyiñ taiñ nien mu Jehová tañi nehuen, doi quimfalcüleai Jehová tañi ayüucülen iñchiñ mu. Jesús tañi lan mu, Jehová perdonaquefi feichi che tañi ayühuelqueteu (1 Tim. 2:5, 6). Huelu quiñeque peñi, lamngen feyentulefui rume Jesús tañi lan mu ca fautizaucülefui rume, ayühuelquenofilu ta Jehová troquiuqueingün. Femngechi dungu mu rupaliyiñ, ¿chem quelluafeiñmu? Iñchiñ taiñ pu chengen maneluulayafuiñ taiñ chem pieteu taiñ piuque, huelu maneluhuafuiñ llemai Jehová mu müten. Jehová nor che troquiquefi pu feyentulu Jesús tañi lan mu, ca cümelcaquefi (Sal. 5:12; Rom. 3:26). w24.03 pag. 30 parr. 15; pag. 31 parr. 17