Diciembre

Jehová, ¿niepei mai pepiluhun ñi huiñomongeltuafiel pu layelu? Felei llemai, Biblia feipi Jehová fei tati “Com Nehuen Nielu” (Apoc. 1:8). Jehová huehuafui chumngechi caiñe rume, ca femngechi huehuafi tati lan dungu (1 Cor. 15:26). Ca quimnieiñ Jehová pepiluuquei ñi huiñomongeltuafiel pu che, fei com loncontucuniefilu. Com huangülen mütrümquefi tañi üi meu (Is. 40:26). Ca quimtucuniefi com pu layelu (Job 14:13; Luc. 20:38). Jehová com quimniei ñi chumngechi chengen ñi huiñomongeltuafiel, chumngechi ñi adngen, tañi chumquefel petu ñi mongelen, ca chem raquiduam ñi mülen tañi piuque mu. Quimnieiñ Jehová ñi ayülen ñi huiñomongeltuafiel pu layechi che. Ca niei pepiluhun tañi femal. Feimu maneluuqueiñ ñi huiñomongetual pu layelu. Ca quimnieiñ Jehová ñi huiñomongeltufiel pu lachi che cuifi mu. Biblia ñi antü meu, Jehová elufi nehuen quiñeque huentru ñi huiñomongeltuafiel quiñeque che lalu. w23.04 pag. 9, 10 parr. 7-9

Ñochi duam mu nütramcafiliyiñ ti che, allcütuai ca amuleai ti nütram. Huelu ti che re ayüle taiñ notucadunguaeteu ca ayentuaeteu, fentecünuafuiñ taiñ nütramcan (Prov. 26:4). Huelu alün che femquelai tüfa, eluuquei taiñ allcütuaeteu. Ñom piuquengeliyiñ, feita rume quelluaiñmu. Llellipuafimi ta Jehová tami quelluaeteu, femngechi tami ñom piuquengeal quintucaduamngelmi cam rupalmi cüdaungechi dungu meu. Ñom piuquengelmi, ti che trürnole ñi raquiduam eimi meu, notucadungulayafimi. Respetahun meu huiñoldungulmi ti che ca ñom piuque mu, cacünutuafui chi ñi raquiduam pu testigo mu ca tati Biblia mu. Feimu rumel pepicaucülenge tami huiñoldungual “ñom piuque ca rume yamün meu” (1 Ped. 3:15). Rume cümei tami ñom piuquengeal. w23.09 pag. 19 parr. 18, 19

¿Chumqueingün ñochi duamngechi che? Peaiñ meli dungu. Hune, illcufemquelai. Chem pingefule rume tüngcülequei ca huiñolelquetulafi tañi huesa femeteu. Jehová ca illcufemquelai (Éx. 34:6). Epu, ñochi duamngechi che tüngcülen mu üngümcülequei. Alüñmale tañi üngümnieel, feitachi che lladcüyauquelai, tüngcülequei (Mat. 18:26, 27). Cüla, ñochi duamngechi che aporiauquechi femquelai. Ti ñochi duamngechi che petu ñi femnoel quiñe falin dungu, aporiauquechi femlayai, huelu mai cüme raquiduamai chumngechi ñi femal. Meli, ñochi duamngechi che rupale huesaque dungu mu fillpiyauquelai, doi mai eluuquei ñi cüme chaftuafiel, raquiduamquei cümeque dungu tañi rupamequen ca ayühunquechi serfiquefi Jehová (Col. 1:11). Iñchiñ taiñ cristianongen, rume falin-ngei taiñ ñochi duamngeal. w23.08 pag. 20, 21 parr. 3-6

Jehová ngüneduamüñmaqueiñmu taiñ piuque. Fei quimnieiñmu taiñ chumngechi chengen ca pequei pu che tañi pequenoel, feimu rume falin-ngen taiñ cuñiutucuafiel taiñ piuque. Inafiliyiñ Chau Dios tañi cümeque ngülam, fei ta piuqueyenieaiñmu (Juan 4:14). Ca femngechi eluulayaiñ taiñ huelulcanoaeteu coilaque dungu ñi feipiquen Huecüfü ca tañi pu che. Ca inayentulayafiyiñ huesaque che ñi femquen (1 Juan 5:18, 19). Doi fülmaniefiliyiñ Jehová, doi piuqueyeafiyiñ ca doi respetayafiyiñ. Turpu hueñancül-layafiyiñ ta Jehová, raquiduamlayaiñ rume taiñ culpayal quisu mu. Peafiyiñ ñi rupan quiñe lamngen Marta pingelu, mülelu Croacia mapu mu. Taiñ lamngen epe confui pod cudumuhun mu. Quisu feipi: “Cüdautun tañi cüme raquiduamal ca ñi chaftuafiel feitachi huesa dungu. Huelu fente tañi yamniefiel mu Jehová, conlan pod cudumuhun mu” pi. Marta raquiduami conle femngechi dungu mu, rume huesalcahuafui. Iñchiñ ca femngechi raquiduamaiñ. w23.06 pag. 20, 21 parr. 3, 4

Fentren coilaque dungu feipingequelu Jehová tañi üi, Jehová ayüquei ñi liftuñmangeal. Jesús cüme quimniefulu ñi ayüqueel ta Chau Jehová, quimeltufi tañi pu discipulo ñi ngillatuafiel: “Taiñ Chau huenu mülelu, rume yamniengepe tami üi” (Mat. 6:9). Jesús quimniefui ñi püramyengetual Chau Jehová tañi üi doi falin-ngei chem dungu mu rume. Jesús doi dungu femi ñi fampüramafiel Chau Dios tañi üi, huelu presuntucungelu, tañi pu caiñe feipieyu ñi caiñetudungufiel ta Ngünechen ca ñi yamnienofiel. Müna huesa duampelai Jesús femngechi dalluntucungelu. Jesús deu quimniefui tañi femngechi feipintucungeal ca ñi condenangeal, feimu petu ñi presuntucungenon “rume fütra hueñancüi” (Luc. 22:41-44). w24.02 pag. 11 parr. 11

Taiñ cristianongen mu, mülei taiñ doi piuqueyeafiel ta Jehová ca Jesús taiñ familia mu (Mat. 10:37). Huelu feita feipilaeiñmu taiñ femnoal ti cüdau taiñ elfalcünungeel familia mu. Feimu ayüliyiñ taiñ ayühuelafiel Jehová ca Jesús, mülei taiñ cüme yenieal ti cüdau taiñ elfalcünungeel familia mu (1 Tim. 5:4, 8). Femliyiñ, doi ayüucüleaiñ. Jehová quimniei chumngechi ñi ayüucüleal com ti familia. Ti huentru ca tañi domo mülei ñi piuqueyehual ca yamniehual. Pu chau mülei ñi ngülamtuafiel ca piuqueyeafiel tañi pu yall. Pu pichiqueche mülei ñi feyentuafiel tañi pu chau (Efes. 5:33; 6:1, 4). Com ti familia, ti huentru, domo, pichiqueche, mülei ñi inayal ñi feipin tati Biblia. Maneluulayaiñ quisu taiñ raquiduam mu, caquelu che ñi raquiduam ca ñi feipiqueel quiñeque quimche. Doi mai maneluhuaiñ Biblia ñi ngülam mu. Cüme inaduamafiyiñ fillque publicacion Biblia mu tuulu. Feita mu peaiñ chumngechi taiñ inayal Biblia ñi ngülam taiñ mongen mu. w23.08 pag. 28 parr. 6, 7

Cümei tati huecheque lamngen ñi adümuhual fillque dungu mu. Pichicalu eimi adümuhulmi fillque dungu mu, fei quelluafeimu com tami mongen mu. Por ejemplo, quim cüme papeltuaimi ca cüme huiriaimi. Quiñeque mapu mu, falintungequelafui ti domo ñi cüme papeltual ca ñi cüme huirial. Huelu müna cümefui tañi femal pu cristiana (1 Tim. 4:13). Feimu cüdaungefule rume, quimcantuaimi tami cüme papeltual ca tami cüme huirial. Femülmi, peafuimi quiñe cüdau tami mongeluhuam, cafei doi cüdautulayaimi tami papeltual Biblia ca tami enseñalelafiel caquelu. Fei tami cüme papeltufiel mu Biblia, doi fülconafuimi taiñ Huenu Chau Jehová (1 Tim. 4:15). w23.12 pag. 20 parr. 10, 11

Llellipuafiyiñ ta Jehová taiñ connoal huesaque dungu meu. Culpafe chengelu am iñchiñ, cüdautuqueiñ taiñ famentuucüleal huesaque dungu meu. Fei Huecüfü ca ngüchaltucuniequeiñmu taiñ femal huesaque dungu. ¿Chumngechi huesa raquiduameleiñmu Huecüfü? Por ejemplo, ayüniefui taiñ adngelluhual podngechi dungu meu. Cuñiutucuunoliyiñ, contuafeiñmu huesaque illun, femliyiñ culpayafuiñ Jehová mu (Mar. 7:21-23; Sant. 1:14, 15). Quisuque nielaiñ nehuen taiñ famentuucüleal huesaque dungu meu. Duamnieiñ Jehová taiñ quelluaeteu. Jesús quimeltueiñmu taiñ feipiafiel Jehová llellipun meu: “Quellumuiñ ñi connoal huesaque dungu mu, doi mai montulmuiñ Huecüfü meu” (Mat. 6:13). Jehová ayüquei taiñ quelluaeteu, huelu iñchiñ mülei taiñ ngillatuafiel. Fei ca müten no, mülei taiñ famentuucüleal huesaque dungu meu. w23.05 pag. 6, 7 parr. 15-17

Ti füta ca tañi domo falintufile engu ñi hueniyefiel Jehová, eluhuaingu ñi inayafiel tañi ngülam, fei quelluaeyu ñi hudaunoal engu. Cafei inayentuafingu ta Jehová, feimu ñom piuquengeaingu, piuqueyechefengeaingu ca perdonachefengeaingu (Efes. 4:32–5:1). Femngechi chengele engu, doi piuqueyehuaingu. Quiñe lamngen, Lena pingelu, yeniei doi 25 tripantu tañi fütangen. Quisu feipi: “Quiñe che cüme hueniyefile Jehová, caquelu che piuqueyeaeyu ca yamnieaeyu”. Peafiyiñ ñi femün José ca María. Jehová dullieyu engu ñi choyüafiel ti Mesías. Ca mülefui caquelu tuhun-ngelu David mu, feimu ¿chumngelu am dullifi José engu María? Fei engu cüme hueniyequefui ta Jehová, quiñehun tañi mongen mu hunentucuniefingu Jehová. w23.05 pag. 21 parr. 3, 4

Taiñ Ñidol Jesús turpu culpaquelai, huelu pu loncolelu ñi elcünuel huelulcaqueingün. Feimu cüdaungeafui ñi inayal tañi feipin engün, doyelchi mai ayünoliyiñ taiñ feipieteu. Femngechi rupai ti apostol Pedro. Quiñe cüme püllü feipieyu ñi iyal quiñe culliñ ünufalngelu chumngechi feipi Moisés ñi ley, huelu Pedro ayülafui. Feimu cüla rupa “femlayan” pi (Hech. 10:9-16). Tañi feipieteu ti cüme püllü turpu femngechi femquelafui, feimu cümelu troquilafi. Huelu ti apostol Pablo ca dungu femi. Pu loncolelu Jerusalén huaria mu feipieyu ñi quimfalcünual tañi inaquefiel Moisés ñi ley. Feimu Pablo mülefui ñi yeal meli huentru Jehová ñi ruca mu ca fei mu ñi liftuhual, chumngechi feipi Moisés ñi ley. Pablo quimniefui feichi mu inangehuelai Moisés ñi ley, ca chem huesa femlafui rume. Huelu “ca antü, Pablo yetufi tüfachi pu huentru, fei liftuhuingün chumngechi ñi feipiel Moisés ñi ley” (Hech. 21:23, 24, 26). Pablo ñi feyentuquen quelluntucui ñi quiñeucüleal ti trahunche (Rom. 14:19, 21). w23.10 pag. 10 parr. 15, 16

Biblia feipi ayüliyiñ taiñ hueniyeafiel Jehová, mülei taiñ yamnieafiel. Tunten tripantu rume yenieliyiñ taiñ serfiniefiel Jehová, mülei taiñ respetanieafiel. ¿Chumquei quiñe che yamquefilu Jehová? Piuqueyequefi ca chem huesa dungu rume femquelai, femngechi ñi hueniyenieafiel. Jesús yamquefi ta Jehová (Heb. 5:7). Jesús llicaniequelafui ta Jehová (Is. 11:2, 3). Huelu mai, rume piuqueyequefui ca inaniequefui tañi huercün dungu (Juan 14:21, 31). Jesús reque, iñchiñ ca rume yamnieafuiñ ta Jehová, ¿chumngelu am femqueiñ? Quisu am piuqueyechequelu, quimün-ngelu, norngelu ca nehuen-ngelu. Ca quimnieiñ quisu taiñ piuqueyenieteu. Ca inaduamüñmaqueiñmu chumngechi llouquefiel cümeque ngülam. Feyentufiliyiñ, ayühuelafiyiñ. Huelu feyentunofiliyiñ, hueñancülafiyiñ (Sal. 78:41; Prov. 27:11). w23.06 pag. 14 parr. 1, 2; pag. 15 parr. 5

Fentren poder nierpulu ti lonco ülmen Uzías, ngoimanentui chumngechi quellufeyu Jehová. ¿Chem quimeltuqueiñmu tüfa? Ngoimalayaiñ com cümeque dungu taiñ nieel Jehová ta elueiñmu. Feimu mallmaulayaiñ, Jehová müten püramyeafiyiñ (1 Cor. 4:7). Mülei taiñ ñom piuquengeal ca quimtucunieaiñ taiñ culpafe chengen mu duamnieiñ taiñ norümtungeal. Quiñe peñi doi 60 tripantu nielu feipi: “Quimürpun ñi illcufemnoal norümtungeli, doyelchi mai eluuquen ñi cümecünutuafiel tañi femquen ca tañi doi cüdahuelafiel ta Jehová” pi taiñ peñi. Ñom chengeliyiñ ca respetaniefiliyiñ ta Jehová, cüme amuleai taiñ mongen (Prov. 22:4). w23.09 pag. 10 parr. 10, 11

Pu hunenque cristiano duamniefuingün tañi nehuencüleal. Fei engün doi huesaque dungu mu rupaquefuingün tañi cristianongen mu. Fei engün caiñetuquefeyu pu loncolechi religioso judio, pu autoridadcülelu Roma mu ca quisu tañi familia cütu caiñetuquefeyu (Mat. 10:21). Ca ti trahunche mu mülequefui apostata coilaque dungu quimeltuquelu ca püntülquefilu ti trahunche, feimu pu peñi ca pu lamngen mülefui ñi eluucüleal engün ñi ngünencanoaeteu engün (Hech. 20:29, 30). Felen mu rume ti dungu, huelu nehuentuleingün (Apoc. 2:3). ¿Chem quellueyu? Raquiduamingün cuifique che poyequefilu Jehová, por ejemplo ñi rupan ta Job (Sant. 5:10, 11). Fei engün ca llellipuingün ñi elungeal nehuen (Hech. 4:29-31). Ca maneluucülequefuingün Jehová ñi eluaeteu cümeque dungu aguantale engün (Hech. 5:41). Biblia mu ca taiñ publicacion papeltuafuiñ quiñeque che ñi nehuentulen mu. Ngüneduamliyiñ ñi femün engün, ca quelluaiñmu taiñ ca femngechi femal. w23.07 pag. 3 parr. 5, 6

Jehová ca Jesús quisucünuquelaeiñmu. Rupan ñi feipiel ti apostol Pedro ñi quimnofiel ta Jesús, ¿chumafui? ¿Inanieafui ta Jesús cam fentecünuafui? Jesús ngillatufi ta Jehová Pedro ñi duam mu, femngechi ñi fentecünunoal tañi feyentun. Rupachi antü mu, Jesús iñche ngillatuñmaeyu pifi ta Pedro, ca feipifi ñi yafültucuafiel pu peñi ca pu lamngen. Femngechi pengelelfi tañi maneluucülen quisu mu (Luc. 22:31, 32). Raquiduamlu Pedro ñi feipieteu ta Jesús, ¿rume yafültucupelaeyu? Ca femngechi, Jehová ñi duam mu, pu loncolelu quelluafeiñmu taiñ cüme femal, femngechi taiñ serfinieafiel Jehová (Efes. 4:8, 11). Jehová elufi Pedro ca caquelu pu apostol com ñi duamnieel engün. Ca femngechi eluaiñmu com taiñ duamnieel doyümliyiñ taiñ amuldungual. w23.09 pag. 24, 25 parr. 14, 15

Jehová com peniequei chumngechi taiñ quelluquefiel pu peñi ca pu lamngen, pichin-ngefule rume. Jehová rume falintuquei com taiñ femquen ca ayüniei taiñ cullituaeteu reque. Loncolelungefuimi cam siervo ministerialngefuimi trahunche mu cuifi, Jehová ngoimaquelai chumngechi tami com piuque mu cüdauquefel cuifi (1 Cor. 15:58). Ca ngüneduammequei chumngechi tami cüdaumequen fachantü. Jehová ayüniei taiñ doi piuqueyenierpuafiel quisu ca caquelu pu che. ¿Chem chumafuiñ taiñ doi piuqueyenierpuafiel Jehová? Mülei taiñ papeltuafiel Biblia ca raquiduamal taiñ chillcatuel mu ca rumel ngillatuafiel. ¿Chumafuiñ taiñ doi piuqueyerpuafiel taiñ pu peñi, pu lamngen? Eluucüleaiñ taiñ quelluafiel. Com tüfa femliyiñ, doi fülconcüleaiñ Jehová mu ca taiñ pu peñi pu lamngen mu. Ca rumel huenihuen-ngeaiñ. w23.07 pag. 10 parr. 11; pag. 11 parr. 13; pag. 13 parr. 18

Caque quiñeque iñchiñ mülei taiñ dullial chumngechi taiñ cuñiutucuhual. Huelu inaquefiyiñ tañi huercüel Biblia taiñ lahuentuñmangeal, feimu famentuquefiyiñ ti mollfüñ ca conquelaiñ calcu dungu mu (Hech. 15:20; Gál. 5:19, 20). Huelu caquelu dungu mu caque quiñeque iñchiñ mülei taiñ dullial. Feimu tunte ayüfiliyiñ rume quiñe tratamiento, yamnieafiyiñ caquelu peñi, lamngen tañi dulliel. Fei loncontucuaiñ meli dungu. 1) Acule Chau Dios ñi ngünenien mapu, feimu queta afai ta cutran ca cülfüncüleaiñ (Is. 33:24). 2) Caque quiñeque cristiano mülei ñi cüme duamcüleal tañi dulliel mu (Rom. 14:5). 3) Juzgaquelafiyiñ taiñ pu peñi ca pu lamngen ñi dulliel ca ayüquelaiñ taiñ huelulcanoafiel engün (Rom. 14:13). Ca 4) pu cristiano piuqueyeuqueingün, feimu doyümquelaingün quisuque tañi raquiduam engün, huelu mai doi falintuquefingün ñi quiñeucüleal ti trahunche (Rom. 14:15, 19, 20). w23.07 pag. 24 parr. 15

¿Rume piuqueyefimi ta Jehová? Eimi müten femquelaimi. Rumel mülequei che ñi piuqueyefiel ta Jehová (Sal. 104:33, 34). Fentrenque che elcünuqueingün falinque dungu ñi serfiafiel ta Jehová. Cuifi Israel mu femngechi femqueingün tati pu nazareo cam huichucünungelu ñi femal quiñe falin cüdau. Tati pu nazareo elcünuquefui falinque dungu tañi doi cüdahuelafiel ta Jehová. Moisés tañi ley feipifui quiñe huentru ca quiñe domo feipicünuafui ta Jehová tañi nazareongerpual ca tunteñma ñi femal (Núm. 6:1, 2). Quiñe Israel che nazareongerpulu, mülefui ñi femnoal quiñeque dungu ñi femquefel pu caquelu Israel che. Tüfa cüdaungefui, feimu ¿chemu nazareongerpuqueingün? Tañi rume piuqueyefiel mu ta Jehová ca rume mañumniefuingün com cümeque dungu tañi elueteu (Deut. 6:5; 16:17). w24.02 pag. 14 parr. 1, 2

Biblia mu, ti palabra hebrea rulpadungungelu “nor piuqueyen” cam “piuqueyen” pengeli tañi fente piuqueyechen quiñe che. Fentren rupa tüfachi palabra pengeli Chau Dios ñi nor piuqueyefiel tañi pu che, ca chumngechi piuqueyeuquei pu serfiquefilu ta Chau Dios (2 Sam. 9:6, 7). Rupalu ta antü doi nor piuquengerpuafui ta che. Tüfachi dungu mu rupai ta Daniel. Com tañi mongen mu Daniel fentren rupa pengeli ñi nor piuqueyefiel ta Chau Jehová. Huelu nielu doi 90 tripantu rupai quiñe fütra cüdaungechi dungu mu. Quiñeque huentru adniequelu ti lonco ülmen ñi ruca üdequefuingün ta Daniel ca yamquelafingün ta Chau Jehová, feimu nütramcahuingün chumngechi ñi langümafiel ta Daniel. Tüfa engün feipi feipiyefingün ta Darío ñi entual quiñe ley. Daniel ñi inayal tüfachi ley mülefui ñi ngillatuhuenoafiel ta Chau Jehová 30 antü. Femle, Daniel pengelafui ñi nor piuqueyefiel ti lonco ülmen müten, huelu Jehová no. Fei, ¿chumi Daniel? Daniel feyentufi Jehová müten (Dan. 6:12-15, 20-22). w23.08 pag. 5 parr. 10-12

Jehová ayüniei taiñ piuqueyenieafiel taiñ pu peñi pu lamngen. Huesa duameleliyiñmu quiñe peñi cam lamngen, cüpa huesalcaeneu pilayaiñ. Doi mai raquiduamaiñ feichi che nehuentumequei ñi inayafiel Jehová ñi ngülam (Prov. 12:18). Culpan chengeiñ, huelu Jehová rume piuqueyenieiñmeu. Huelulcauquelu rume iñchiñ, Chau Jehová hueniyenieiñmu ca lladcütuniequelaeiñmu (Sal. 103:9). Mañumfali Jehová tañi perdonachequen mu, feimu iñchiñ ca femngechi perdonachequeaiñ (Efes. 4:32–5:1). Fülcülepale Jehová ñi antü, doi huesalcalerpuai ta mongen, feimu duamnieiñ taiñ fülmaucüleal taiñ pu peñi ca lamngen iñchiñ. Doi caiñetungeaiñ peno, cafei presungeafuiñ. Feichi mu doi duamnieaiñ taiñ pu peñi pu lamngen tañi quellu (Prov. 17:17). w24.03 pag. 15, 16 parr. 6, 7

Biblia mu peafuiñ quiñeque hueche fülconlu Jehová mu ca cüme mongen yenieingün. Quiñe tüfa, David. Petu ñi huechengen mu eluhui ñi poyeafiel ta Jehová, femngechi tañi lonco ülmen-ngen mu püntütripalai Jehová mu (1 Rey. 3:6; 9:4, 5; 14:8). Doi quimfilmi ñi femün ta David, quelluaimu tami doi poyenieafiel ta Jehová. Ca papeltuafuimi ñi femün Marcos ca Timoteo. Fei engu petu ñi huechengen mu, eluhuingu ñi poyeafiel Jehová ca com ñi mongen mu püntütripalaingu quisu mu, feimu ayühuelfingu ta Jehová. Tami mongen cüpalechi antü mu, ¿chumngechi ayüleimi ñi feleal? Famülque mu maneluhulmi Jehová mu, ayüucüleaimi. Quisutu maneluulayaimi, eluunge Jehová tami quelluaeteu cüme dullial tami mongen mu. Ngoimaquilnge, Jehová rume falintuquei tami cüdahuelniefiel. Jehová rume piuqueyenieimu, feimu eluunge com tami piuque mu tami poyeafiel. ¡Ngelai doi cüme mongen! w23.09 pag. 13 parr. 18, 19

Ti apostol Pablo quimniefui ñi culpan chengen tañi pu peñi. Hue cristianongerpulu Pablo, quiñeque cristiano Jerusalén trahunche mu llicaniequefeyu (Hech. 9:26). Caquelu huesa dunguyeyu (2 Cor. 10:10). Pablo ca ngüneduamfi ñi huesa femün quiñe loncolelu, fei huelulcahuafui caquelu peñi ca lamngen (Gál. 2:11, 12). Ca lladcülcaeyu ñi femün Marcos, fei tüfa quiñe cüme hueni fel (Hech. 15:37, 38). Duamhuelayafiñ tüfachi peñi piafui Pablo, huelu femlai. Falintuniefi tañi pu peñi ca fentecünulai tañi serfinieafiel ta Chau Jehová. ¿Chem quellueyu? Pablo fente ñi piuqueyeniefiel tañi pu peñi ca pu lamngen, ngüneduamquefui ñi cüme chengen engün. Quiñepülecünuquefui ñi huelulcahun engün. Tañi piuqueyehun quellueyu ñi huiñoduamtucheal, femngechi Pablo femürpui ñi feipin ti texto taiñ ngüneduamal fachantü. w24.03 pag. 15 parr. 4, 5

Biblia pengelquei ñi rume falin-ngen pu che ñi ñom piuquengeal. Peaiñ ñi rupan Isaac. Mülen mu Guerar mapu mu, tati pu Filistea che ütrireyu tañi doi cüme felen mu. Feimu pu Filistea che apolfingün trufür mu tañi pozo. ¿Chumi ta Isaac? Isaac quehualai, cañpüle amutui ca deumaputui ca rünganco (Gén. 26:12-18). Huelu pu Filistea che ca feipingün: “¡Iñchiñngei tüfachi co!”. Femngechi dungu rupafulu rume Isaac, tüngcülefui (Gén. 26:19-25). ¿Chem quellueyu tañi ñom piuquengeal? ¿Inayentupelai tañi chumngen tañi chau? Abrahán ayüquelafui tañi quehuatuyahual. Ca Sara ñochi duamngefui ca ñom piuquengefui (Gén. 21:22-34; 1 Ped. 3:4-6). w23.09 pag. 15 parr. 4

Jehová huercüi tañi Fotüm mapu mu. Fei, ¿chumpai Jesús mapu mu? Quimeltuchepai Chau Dios ñi ngünenietual mapu ca hulpai ñi mongen taiñ montulaeteu culpan ca lan dungu mu. Lalu ta Jesús, Jehová huiñomongeltueyu ñi lonco ülmencüleal Jehová ñi Gobierno mu huenu meu. Biblia doi nütramcai Jehová ngünenietufile mapu huechurpuai tañi ayüqueel mapu mu, femngechi yamniengetuai Jehová tañi üi. Jehová tañi ayüqueel femngechi felequei müten, com ñi feipicünuel femngechi tripayai (Is. 46:10; Heb. 6:17, 18). Tati mapu cüme adcületuai ca com pu che culpan chengehuelayai ca rumel mongeleaingün (Sal. 22:26). Huelu doi afmatufalchi dungu rupayai. Jehová ayüquei com mülelu huenu mu ca ti mapu mu quiñe familia reque quiñeucületuai ca eluhuaingün tañi ngünenieaeteu ta Jehová (Efes. 1:8-11). ¿Ayüucülenoafulu am ta iñchiñ Jehová chumngechi tañi huechurpual tañi ayüqueel? w23.10 pag. 20 parr. 7, 8

Pu judio ñi mülequefel Babilonia mu aculu engün Jerusalén mu, pichiñma mu fillaingün, caiñetueyu feichi troquiñche ñi hualloñmanieteu, ca rupaingün cüdaungechi dungu ti gobierno Persia ñi duam mu. Feimu cüdautufuingün ñi huiño deumatual Chau Jehová ñi ruca. Feimu Jehová huercüfi Ageo engu Zacarías ñi yafültucuafiel pu che, femngechi ñi amuleal ti cüdau. Ñi femün Jehová tañi pu huerquen rume cüme tripai (Ageo 1:1; Zac. 1:1). Huelu 50 tripantu rupalu pu judio ca duamniefuingün ñi yafültucungeal. Feimu Esdras, quiñe huentru adümuucülelu Moisés ñi ley dungu, Babilonia mu tripai ñi quelluafiel pu Israel che Jerusalén mu mülelu, femngechi ñi doyümafiel engün Jehová tañi cüdau (Esd. 7:1, 6). Chem ñi feipin Jehová ñi pu huerquen yafültucufi pu judio ñi maneluucüleal Jehová mu chem huesa dungu mu rupale rume. Ca quelluafeiñmeu ta iñchiñ ñi maneluucüleal Jehová mu chem rupaliyiñ rume (Prov. 22:19). w23.11 pag. 14, 15 parr. 2, 3

¿Chumngechi pengelquefiyiñ taiñ pu peñi, pu lamngen taiñ piuqueyefiel? Quiñe tüfa, yafültucufiliyiñ. Taiñ femal, duamnieiñ taiñ cutranpiuqueyeafiel engün (1 Tes. 4:18). ¿Chumngechi doi piuqueyehuafuiñ? Eluhuaiñ taiñ perdonacheal caquelu che ñi huelulcan. ¿Chumngelu fente falin-ngei pengelal taiñ piuqueyen famülque mu? Peaiñ ñi feipin Pedro: “Deu püllelepai ñi afal com ti müleyechi dungu. Feimu [...] hueluconque rume piuqueyehuaimün” (1 Ped. 4:7, 8). ¿Chem dungu rupayai fülpale ti afaelchi antü? Jesús feipifi tañi pu discipulo: “Feyentuqueimün iñche tañi üi mu, feimu com pu troquiñche üdeaimünmeu” (Mat. 24:9). Mülei taiñ quiñeucüleal, femngechi serfinieafiyiñ ta Chau Jehová üdengeliyiñ rume. Huecüfü ayüniei taiñ quiñeucülenoal, huelu hueulayaiñmeu hueluconque piuqueyeuliyiñ (Filip. 2:1, 2). w23.11 pag. 13 parr. 18, 19

Chau Jehová tañi cüme dungu rume nehuen-ngei. Quimeltufiliyiñ pu che ñi chumngen ta Jehová, quelluafiyiñ pu che ñi ngünencahuenoaeteu tati Huecüfü, femngechi cüme quimafingün Jehová tañi chumngen. Afmatulehueaingün fente ñi nehuen-ngen ta Jehová (Is. 40:26). Inaduamingün Jehová tañi norngen, feimu maneluhuaingün quisu mu (Deut. 32:4). Quimeltuaeyu engün Jehová tañi quimün (Is. 55:9; Rom. 11:33). Ca yafültucuaeyu Jehová ñi piuqueyechefengen (1 Juan 4:8). Doi fülconcülele ta Jehová mu, doi maneluhuaingün tañi afnoachi mongen tañi nierpual ca Chau Dios tañi fotümngerpuaingün. Müna falin cüdau taiñ enseñayafiel pu che ñi fülconal tañi Chau mu. Femün mu, “quiñentrür cüdaucüleiñ Chau Ngünechen iñchiñ” (1 Cor. 3:5). w24.02 pag. 12 parr. 15

Eimi, ¿enseñalmequengeimi Biblia? Cam, ¿tami pu chau enseñalmequeimu Biblia? Raquiduammequeimi chi tami fautizahual, feita rume cümei. Huelu hune feipiafimi ta Jehová tami hultucual ñi mongen quisu mu. ¿Chem mülei taiñ femal taiñ hultucual taiñ mongen Jehová mu? Llellipun mu feipiafiyiñ taiñ poyeafiel quisu müten ca taiñ doyümafiel quisu tañi ayüqueel taiñ mongen mu. Ca feipicünuafiyiñ taiñ piuqueyeafiel com taiñ piuque mu, com taiñ mongen mu, com taiñ raquiduam ca com taiñ nehuen meu (Mar. 12:30). Femngechi ngillatufiliyiñ ta Jehová, Jehová müten allcütuaiñmu. Huelu fautizauliyiñ, com pu che mülelu fei mu peaiñmu. Feipifiel mu ta Jehová taiñ serfiafiel, tüfa müna falin-ngei. Mülei taiñ femal tañi feipicünufiel, Jehová ca ayüniei taiñ femal (Ecl. 5:4). w24.03 pag. 2 parr. 2; pag. 3 parr. 5

Biblia feipi com pu curehuen rupaquei huesaque dungu (1 Cor. 7:28). ¿Chumngelu chi cai? Ti domo ca ti huentru culpan chengeingu. Caquerumequei tañi chumngechi chengen, tañi ayüqueel cam tañi ayüquenoel. Caquerumeafui tañi tuhun ca tañi tremün engu. Ca deu nieulu engu, doi cüme quimuhuingu, fei ngüneduamafuingu quiñeque dungu tañi ayüquenofiel tañi afcadi mu. Feichi dungu mu yafcahuafuingu. Ti curehuen mür huelulcauqueingu, feimu mülefui ñi trür yafüluhual ñi cüme yeucüleal. Huelu quiñeque mu pu curehuen epuñpüle culpatuuquei ñi huesa rupan mu, feimu doi cümei tayu hudahual piafuingu. ¿Cümepeafui mai ta tüfa? Femlai. Jehová ayüquei pu curehuen ñi quiñeucüleal tutefalnole rume ti huentru cam ti domo. w24.03 pag. 16 parr. 8; pag. 17 parr. 11

Rupan fautizaulu eimi, doi quimürpufimi ta Jehová ca doi piuqueyefimi. Feimu doi maneluhuimi tami rumel mongeleal mapu mu (Heb. 5:13–6:1). Rupaimi chi huesaque dungu mu, huelu quimnieimi Jehová ñi ayüucülen eimi mu, chumngechi ñi feipin Romanos 5:2-4. Jehová ayüucülelu eimi mu, fei doi maneluuqueimi tami cümelcayaeteu. Doi maneluucülelu am eimi, pengelqueimi tami chumquen mu, tami familia mu ca chumngechi pünequeimi tami tiempo. Ti apostol Pablo feipi ayühuelfiliyiñ ta Chau Dios, maneluucüleaiñ. Ca feipi Chau Dios ñi duam mu, rüf femtripayai taiñ maneluucülen (Rom. 15:13). w23.12 pag. 12, 13 parr. 16-19

Rupamequeliyiñ huesa dungu mu, cüme ngünelayafuiñ taiñ raquiduam ca taiñ piuque. Quiñe farcu cheu rume yeafeyu ti cürüf, ca femngechi quim ngünelayafuiñ taiñ piuque ca chem taiñ raquiduamquen. Iñchiñ femngechi rupaliyiñ, ¿quellupeafeiñmu mai Jehová? Jehová feipicünueiñmu taiñ nehuentucuaeteu, femngechi taiñ cüme foliluucüleal reque. Rangiñ cürüftucu mu ti farcu cheu rume amuafui, fente ñi nengümcaunoam fentren farcu epuñpüle miñche mu niei aleta reque, femngechi ñi mütroucaunoal. Feimu tati pu che amuleyelu farcu mu tüngcüleafuingün. Huelu ti farcu mülei ñi amulngeal, femngechi cheu rume yelayaeyu ti cürüf. Ca femngechi iñchiñ mülei ñi amuleal Jehová ñi cüdau mu, femngechi Jehová quelluaiñmu taiñ yenoaeteu huesaque dungu cürüftucu mu reque. w24.01 pag. 22 parr. 7, 8

Llicaleliyiñ, ¿chem quelluafeiñmu? Raquiduamafuiñ ñi chumün Jehová cuifi mu. Biblia feipi “cüme ngüneduamfimün” Jehová tañi deuman mu. Inaduamaiñ tüfa: tati pu pichique üñüm ca tati rayen poyequelafi ta Jehová, huelu ¿chumquei Jehová? Cuidaquefi llemai. Raquiduamliyiñ feita mu, doi maneluhuaiñ Jehová taiñ cuidayaeteu (Mat. 6:25-32). Cafei cümeafui taiñ raquiduamal Jehová ñi chumün tañi pu che mu. Papeltufiliyiñ Biblia, peafuiñ ñi femün quiñeque che feyentulu Jehová mu. Ca papeltuafuiñ taiñ pu peñi ca lamngen ñi rupan famülque mu. Cafei raquiduamaiñ chumngechi taiñ cuidaqueteu ta Jehová fachantü. Ramtuhuafuiñ: Jehová, ¿chumngechi quellueiñmu ñi quimal ti rüf dungu? (Juan 6:44). Jehová, ¿chumngechi huiñoldunguqueiñmu taiñ llellipufiel? (1 Juan 5:14). Jesús ñi hulün tañi mongen com iñchiñ mu, ¿chumngechi cümelcaqueiñmu? (Efes. 1:7; Heb. 4:14-16). w24.01 pag. 3 parr. 6; pag. 7 parr. 17