Quiñeque che cüdautuquefi ñi poyeafiel ta Chau Dios. Raquiduamqueingün: “Chau Dios duamtuquelafi ta pu che, doi mai castigaquefi”. Peafiyiñ chem pingün quiñeque che.

• Marco mülelu Italia mapu, feipi: “Llellipufiñ ta Chau Dios, huelu raquiduamün ñi allcütunoaeteu. ‘Chau Dios poyequelafi ta pu che’ piquefun”.

• Rosa, Guatemala mu mülelu feipi: “Iñche cüpa serfiquefun ta Chau Dios, huelu puunoalu quisu mu troquiuquen. Castigaquefi tati pu che troquiuquen. Raquiduamquen ñi poyenofiel ta pu che”.

• Raimunda, Canadá mülelu feipi: “Pichi domo ngelu iñche, raquiduamquen Chau Dios leliniequefi taiñ huelulcan müten taiñ castigayaeteu. Rupalu pütrün tripantu, raquiduamfun Chau Dios ñi poyenofiel tati pu che. Quiñe presidente reque troquiquefiñ ta Chau Dios. Ngüneniefi ta pu che, huelu rüf poyequelafi”.

Eimi, ¿chem pimi? ¿Poyeafuiñ ta Chau Dios? Pütrünque mu ramtuuqueingün pu che tüfachi ramtun. Cuifi mu cristiano ngefulu rume, quiñeque che ngillatuquelafingün ta Chau Dios. ¿Chumngelu? Llicaquefuingün. Quiñe historiador Will Durant pingelu, feipi: “Puque che raquiduamquefuingün ñi llican-ngen ta Chau Dios, feimu llicaquefingün tañi ngillatuafiel”.

¿Chumngelu femngechi raquiduamqueingün puque che? ¿Chem quimeltuquei ti Biblia? Cüme quimfiliyiñ ta Chau Dios, ¿cüdautungelayafui ñi poyeafiel? Peafiyiñ.

CHEM ÑI RAQUIDUAMQUEEL TATI PUQUE CHE

“Cüme quimlaiñ ñi nien üi ta Chau Dios. Niefule üi, quimlaiñ chumngechi pingei (ñi feipin tati profesor David Cunningham, Theological Studies).

CHEM QUIMELTUQUEI BIBLIA

Chau Dios feipicünui: “Iñche ta Jehová. Tüfa tañi üi” (Isaías 42:⁠8). Jehová fei ta quiñe hebreo üi. ¿Chem quimeltuqueiñmu? “Huechunentuniequei com tañi ayünieel”.

Jehová ayüniei tañi üitungeal. Biblia feipi: “¡Mañumfimün ta Jehová, üitufimün tañi üi. Quimeltufimün pu che Chau Dios tañi femquen! Feipiaimün ñi alüpüralen tañi üi” (Isaías 12:⁠4).

Jesús üituquefi ta Chau Dios ca quimeltufi tañi pu discipulo ñi femal. Feimu quiñe ngillatun mu feipifi tañi Chau: “Quimeltulelfiñ engün tami üy”. ¿Chumngelu quimeltufi? Quisu feipi: “Femngechi piuqueyecheaingün chumngechi piuqueyeen iñche. Fei quiñeucülean fei engün mu” (Juan 17:⁠26, TNM).

¿CHUMNGELU FENTE FALIN-NGEI?

Quiñe profesor Walter Lowrie pingelu, huirintucui: “Feichi che quimnofilu Chau Dios tañi üi quimlafi reque, feimu rüf poyelayafui”.

Quiñe huentru Victor pingelu, com semana amuquefui tañi iglesia mu, huelu quimquelafi ta Chau Dios. Quisu feipi: “Quimlu iñche Jehová pingei ta Chau Dios, afmatulehuen. Pütrün rupa allcüquefun ta Chau Dios. Huelu quimfilu tañi üi, fei hula quimürpun tañi inei ngen, feimu cüme hueniyerpufiñ”.

Jehová fülconquei tati pu che mu üituquefilu. Quisu feipicünui: “Cutranduamyehuayiñ, chumngechi quiñe chau cutranduamyequefi tañi fotüm ñi poyequeteu” (Malaquías 3:16, 17). Chau Dios ca fürenequefi feiti che üituquefilu. Biblia feipi: “Com tati maneluulu Chau Jehová ñi üi mu, montulngeai” (Romanos 10:13, TNM).

CHEM ÑI RAQUIDUAMQUEEL TATI PUQUE CHE

“Cüla fütraque religion feyentuquei Chau Dios, tati Fotüm ca tati cüme püllü quiñengei müten. Feimu raquiduamqueingün cüla dios no tati, doi mai raquiduamqueingün quiñe dios müten ngeingün” (The New Encyclopædia Britannica).

CHEM QUIMELTUQUEI BIBLIA

Jesús turpu trürümuulai tañi Chau mu. Jesús feipilai: “Iñche ta Dios”. Doi mai Jesús feipicünui: ‘Amutuan ta Chau meu, quisu am doi hunen-ngelu iñche meu’ (Juan 14:28). Ca feipifi quiñe tañi discipulo: ‘Amutuan ñi Chau meu, ca femngechi eimün tamün Chau, iñche ñi Ngünechen ca eimün tamün Ngünechen’ (Juan 20:17).

Tati espiritu santo pingelu, quiñe dios no tati. ¿Chumngelu feipiafuiñ? Biblia feipi pu hunenque cristiano llohuingün Chau Dios tañi nehuen. Ca femngechi Chau Dios feipi: ‘Hulan tañi nehuen com pu che meu’ (Hechos 2:1-4, 17). Tati espiritu santo, cüme püllü ca pingequei, huelu tüfa quiñe dios no tati, Chau Dios tañi nehuen müten.

¿CHUMNGELU FENTE FALIN-NGEI?

Epu profesor Karl Rahner ca Herbert Vorgrimler pingelu, feipi: “Chau Dios ñi quellun mu müten quimafuiñ tati Trinidad. Huelu Chau Dios quellueliyiñmu rume, com quimlayafuiñ ñi feipin tati Trinidad”. Rüf quimfalngenofule Chau Dios, poyerpulayafuiñ. Feimu tati Trinidad catrütuquefi ta pu che ñi quimafiel ta Chau Dios ca ñi poyeafiel.

Marco taiñ nütramcapeel hunen articulo mu, feyentuquefui tati Trinidad mu, huelu raquiduameleyu. Quisu feipi: “Chau Dios ellcalquei tañi inei ngen troquiquefun. Feimu ‘inei no rume quimürpulayafui ta Chau Dios ca hueniyerpulayafui’ piquefun. Huelu feingelai. Biblia feipilei “Ngünechen ñi alü camapulenon caque quiñeque iñchiñ meu” (Hechos 17:27). Chau Dios ellcalquelai tañi inei ngen, doi mai quimfaluuquei. Jesús feipi: “Iñchiñ quimnieiñ inei taiñ püramyequefiel” (Juan 4:⁠22).

Marco ca feipi: “Quimürpulu iñche ñi rüfngenon chi Trinidad, hueniyerpufiñ ta Chau Dios”. Iñchiñ ca femngechi ngüneduamliyiñ Chau Dios ñi eluucülen tañi quimngeal, doi piuqueyerpuafiyiñ. Biblia feipi: “Tati piuqueyechenolu quimlafi ta Ngünechen, Ngünechen am ta piuqueyen ürque” (1 Juan 4:⁠8).

CHEM ÑI RAQUIDUAMQUEEL TATI PUQUE CHE

“Tati pu che rume huesa culpalu lai, amuquei cütral mapu mu, fei mu rumel cutrancahuaingün” (ñi feipin chi lifru Catecismo de la Iglesia Católica). Quiñeque lideres religiosos feipiquei tati pu che ñi mülen cütral mapu mu huichulei Chau Dios mu.

CHEM QUIMELTUQUEI BIBLIA

Tati am culpale, layai (Ezequiel 18:⁠4). “Tati pu layelu chem dungu no rume quimhuetuquelaingün” (Eclesiastés 9:⁠5). Raquiduamnge tüfa mu, tati pu layelu quimhuetulai, ¿chumngechi cai cutrancahuafui cütral mapu mu?

Biblia mu mülei quiñe palabra hebreo ca griego quehun mu, fentren rupa traducengequei, cütral mapu pingequei. Huelu feichi dungu feipingequei cheu tañi rüngalngequen tati pu la. Job tañi rupan cuifi mu, quiñe huesa cutran niequefui, feimu müna cutrancahui. Feipifi ta Chau Dios: “Peumangen ellcacünuen ti Rüngan mu” (Job 14:13). Cangelu Biblia mu, tüfachi texto feipi: “Ellcacünuen cütral mapu mu” (Nueva Versión Internacional). Huelu Job ayülafui ñi cutrancahual cütral mapu meu, doi mai cüpa ürcütufui.

¿CHUMNGELU FENTE FALIN-NGEI?

Raquiduamliyiñ Chau Dios ñi cutrancalquefiel tati pu che, fei püntütripayafuiñ quisu mu. Quiñe domo Rocío pingelu, feipi: “Pichi domo ngelu iñche, quimeltungen ñi mülen cütral mapu. Llicaquefuiñ Chau Dios. Feimu raquiduamquefun, ‘Chau Dios ¿cüme piuquengepei mai?’. Raquiduamquefun Chau Dios fill antü illculequei taiñ castigayaeteu müten.

Rupachi tripantu, Rocío eluhui ñi papeltual Biblia, feimu doi cüme quimürpufi Chau Dios ca quimürpui chumlen tati pu la. Quisu feipi: “Quimeltungelu Biblia iñche, lifretripalu troquihun, entuñmangelu tati fanetulelu ñi piuque mu troquihun. Quimürpun Chau Dios ayüniefui ñi cümelcaleal com iñchiñ. Rume piuqueyeiñmu, ca iñche ca piuqueyerpuafiñ. Quiñe chau reque, rume cuñiutucuniequei tañi pu pichiqueche. Ayüucülei tañi cümelcaleal engün müten” (Isaías 41:13).

Fentren che llicaniefi cütral mapu, feimu ayüquei ñi poyeafiel Chau Dios engün. Huelu Chau Dios ayülai ñi poyengeal llican meu. Doi mai Jesús feipi: “Piuqueyefinge ta Ñidol Ngünechen com tami piuque meu” (Marcos 12:29, 30). Ca quimtucuiñ Chau Dios femquelai huesaque dungu, feimu maneluucüleiñ Chau Dios meu tañi cüme jusgayafiel chi pu che cüpalechi antü meu. Feimu feipiafuiñ quiñe huentru ñi feipin cuifi: “¡Raquiduamfalngelai Chau Ngünechen ñi femal huesaque dungu, ca ñi huesalcayal tati Com Pepiluhun-nielu!” (Job 34:10).

Quiñe antü, Jesús mülei Jerusalén huaria meu. Petu dungufi chi pu che Jehová ñi cümeque dungu meu. Ca feipi tati pu religioso ñi fütraque coilangen engün (Juan 8:12-30). Tañi feipin Jesús feichi antü, ca quelluaiñmu taiñ quimafiel Chau Dios. Jesús feipi: ‘Eimün ta inafilmün iñche ñi dungu, rüf dungu meu eimün iñche ñi pu discipulongeimün. Quimafimün tati rüf dungu, fei ti rüfngechi dungu lifrecünutuaimünmeu’ (Juan 8:31, 32).

Tüfachi versiculo mu, Jesús pengeli chumngechi quimafuiñ tüfachi quimeltun rüfngen cam coilangen. Allcütuliyiñ quiñeque quimeltun Jehová ñi dungu, ramtuhuafuiñ: “¿Tüfachi quimeltun quiñeucülepei mai tañi feipin ta Jesús ca tati Biblia?”. Inayentuafiyiñ feichi pu che ñi allcütufiel apostol Pablo. Cuñihunquechi papeltuaiñ Biblia ñi feipin ñi femngen cam ñi femngenon (Hechos 17:⁠11).

Hunen articulo mu, dunguiñ ñi rupan Marco, Rosa ca Raimunda. Rupachi antü, papeltui Biblia Dunguquelu Inei Ngen Jehová engün. Feimu, ¿chemu am ngüneduamingün?

Marco feipi: “Trür papeltuyu Biblia tañi domo iñchiu Dunguquelu Inei Ngen Jehová engün. Huiñoldunguqueingün Biblia mu chem ramtun rume. Ñochiquechi piuqueyerpufiyu Jehová. Tañi curehuen-ngen doi cüme amulei”.

Rosa feipi: “Raquiduamquefun ñi huiriconlen Biblia mu huentru tañi dungu. Rupachi tripantu, papeltun Biblia. Fei Biblia huiñoldunguquei com tañi ramtuuqueel. Fei hula feyentuquen Chau Dios ñi mülen, hueniyefiñ. Maneluucülen Chau Dios mu”.

Raimunda feipi: “Llellipuquefiñ Chau Dios ñi quelluaeteu tañi quimafiel. Rupalu pichin antü, tañi füta iñchiu papeltufiyu Biblia. Feimu pichiñma mu müten quimfiyu inei am ta Jehová. Rume ayüucüleyu tayu quimfiel Chau Dios ñi cüme Dios ngen”.

Biblia feipi quiñeque dungu ñi feipingequeel Chau Dios mu coilangei. Biblia ca pengelqueiñmu tañi cüme piuquengen Chau Dios. Biblia cüpai Dios meu. Tüfa quimeltuqueiñmu Chau Dios piuqueyenquechi eluqueiñmu cümeque dungu (1 Corintios 2:12). ¿Ayüafuimi tami papeltufiel Biblia? Femngechi quimafuiñ chumngen ta Chau Dios, chem ñi ayüqueel ca chumlerpuaiñ cüpalechi antü mu. Papeltuafuimi www.pr418.com, fei amuaimi ti troquiñ “Biblia ñi quimeltuqueel > Fillque ramtun Biblia mu”. Ca feipiafuimi tañi quimeltulngeal Biblia. Femülmi, quimtucurpuaimi tami poyeafiel Chau Dios.