Maneluucüleliyiñ, ¿rüf quellupeafeiñmu mai?

QUIÑE pichi huentru Daniel pingelu mari tripantu niefui, huelu quiñe tripantu deuma tañi contueteu cancer cutran. Fei fente tañi cutrancülen meu, pu doctor ca tañi familia layalu troquieyu. Huelu ti pichiche maneluucülefui ñi tremotual. Quisu feipiquefui: “Fütachengeli quintuan chumngechi tremoltuafiel tati pu che cancer cutran nielu”. Quiñe antü feipingei tañi pemeaeteu quiñe doctor, fei tañi ngüneduamaeteu ñi cutran meu. Fei müna ayüucülefui tati doctor ñi cüpan meu. Huelu ti doctor pepi amulai ñi huesa antü ngen meu. Fei Daniel hueñancünagi ca maneluuhuelai tañi tremotual. Fei quiñeque antü rupalu, lai.

Tüfachi dungu ñi rupan Daniel, nütramcai quiñe doctor. Femngechi nütram, ¿allcüquepelaimi? Raquiduamnge tüfachi nütram, quiñe cushe papai epe amuconcülei ñi layal yafüluucülei, ¿chumngelu? Pemeayu quiñe tañi familia, feimu nehuentulei. Fei pemengelu hula, lai ti cushe papai. ¿Chem nehuentuniefeyu tüfachi cushe papai? ¿Chem pimi cai? Fentren che raquiduamquei, maneluucüleliyiñ nehuencontuafuiñ. Huelu ¿rüfngepei mai tüfa?

Fentren doctor feipiquei nieliyiñ cümeque raquiduam ca maneluucüleliyiñ, doi cüme duamcüleaiñ. Huelu com pu doctor femngechi raquiduamquelai, quiñeque feipiqueingün: “¿Cheu am entungei femngechi raquiduam? Müte manelfalngelai” piqueingün. Fei feipiqueingün: “Quiñe che doi cüme duamcüleafui entuñmangele müten tañi huesa cutran”.

Huelu tüfachi dungu fantepu meu müten feipingequelai, fütra cuifi mu ñi feipingequen tati. Raquiduamnge chem pin tati quim huentru Aristóteles pingelu, feipi: “Pu nielu maneluhun re peumacamequei müten”. Quiñe huentru tuulu Estados Unidos mapu meu feipi: “Pu maneluucülelu chem cüme dungu no rume entulayaingün”.

¿Ngünam maneluucülepeiñ mai? Maneluucüleliyiñ, ¿rüf quellupeafeiñmu mai?

¿Chumngelu fente falin-ngei taiñ maneluucüleal?

¿ACORDAPEIMI feichi pichi huentru cancer cutran nielu Daniel pingelu? Quisu amulecafule tañi maneluhun meu, ¿tremoltuafui chi tañi cancer cutran meu? Inei no rume, “mai” pilayafui. ¿Chumngelu? Maneluucüleliyiñ rume, amulecayafui taiñ cutran. Feimu feipilayafuiñ quiñe che niele maneluhun, tremofemtuafui.

Quiñe doctor Nathan Cherney pingelu, television meu, feipi ñi rume cuñihun-ngen raquiduamal pu rume cutrancülelu ñi duamnieel maneluhun müten tañi tremotual. Tüfachi doctor feipi: “Quiñeque huentru illcutudunguquefingün tañi pu domo, tañi müte maneluucülenon ñi tremotual. Tañi femngechi feipin meu, culpantucufingün reque tati cutrancülelu tañi rupan. Fei tüfa cümelai tati”.

Tati pu che nienolu lahuen tañi tremotual, müna huesa duamcülequeingün. Feimu tañi familia cam tañi pu pariente cümelayafui tañi huesa duamelafiel cam culpantucuafiel tañi rupamequen mu. Huelu pu femngechi cutrancülelu, ¿quellulayafeyu tañi maneluucüleal?

¡Femlai llemai! Müna quelluafeyu. Quiñeque doctor quelluquefi tati pu che ñi tremotual. Huelu caquelu quelluquefi feiti pu cutranche nienolu lahuen, fei quelluquefingün ñi doi cüme yenieal tañi cutran ca fillque dungu femqueingün ñi doi cüme duamelafiel engün. Huelu maneluucüleal, ¿quelluafeyu? Femi llemai, mülei fillque dungu pengelquelu tati maneluhun ñi quelluchequen.

Maneluucüleliyiñ, ¿cümelcapeafeiñmu mai?

Tati doctor Ken Walker, fei ngüneduami ñi fente falin-ngen yafültucuafiel pu rume cutrancülelu, tüfa quellueyu engün ñi maneluucüleal ca cüme duamcüleal. Feimu feipi maneluucüleal müna quelluchequei. 1989 tripantu mu, feipingei com pu cutranche femngechi quellungequelu doi tripantu mongelerpuingün. Felei llemai, cüme pengelngequei pu cutranche yafültucungele, doi cüme duamcüleai ca cüme raquiduam nietuai.

Feiti nielu piuque cutran cai, ¿ca quelluafeyu cüme raquiduamal? Peaiñ. Doi 1.300 huentru ramtungei tañi chum raquiduamquen engün tañi mongen mu. Quiñeque cüme raquiduamqueingün ca caquelu huesa raquiduamqueingün tañi mongen mu. Fei tati pu huesa raquiduamquelu doi contueyu piuque cutran. Tati doctora Laura Kubzansky feipi: “Tati pu che feipiquei, cüme raquiduamliyiñ, cüme duamcüleaiñ, huelu müte quimfalngequelafui tüfa. Huelu ñi femngeel tüfachi huentru meu, pengeli tati pu che cüme raquiduamle, müte nielayafui piuque cutran”.

Ca quimngequei tati pu che hue operangelu, cüme raquiduamle doi matu tremotuafui. Ca femngechi quiñe che cüme raquiduamle, doi tripantu mongeleafui. Quiñe rupa trapümngei fentren fütaqueche ca feipingei fillque cümeque dungu tañi füchangen meu, “doi quimchengeimi” feipingei, “doi quimün nieimi” feipingei. Fei tüfa quellueyu tañi cüme raquiduamal engün, huelu ca femngechi doi nehuencontuingün. Raquiduamnge tüfa, cüla cüyen meu pu fütaqueche notrümcaule tañi cuerpo, doi nehuencüleaingün. Ca femngechi nehuencüleafuingün cüme raquiduamle engün.

Pu quimche petu quimquelaingün chumngelu fente cümelcaqueiñmu cüme raquiduamal ca nieal quiñe maneluhun. Huelu quiñeque quimche eluucüleingün ñi doi quimal tüfa. Ngüneduamnge ñi feipin quiñe doctor: “Müna cüme dungu quiñe che ñi ayüucüleal ca maneluucüleal. Femngechi duamle ta che, catrüduamcülehuelayai ca quelluayu ñi cülfüncüleal” pi tüfachi doctor.

Com taiñ inaduampeel, “hue dungu” piafui pu doctor ca pu quimche. Huelu pu chillcatuquelu Biblia deu quimniequeingün tüfachi dungu. Fentren tripantu cuifi meu, quiñe huentru Salomón pingelu, Chau Dios tañi duam meu huirintucui tüfa: “Quiñe ayüucülechi piuque cüme lahuen reque trüri, huelu ti huesa duamcülechi piuque ngañhuadelmaqueyu ñi nehuen” (Proverbios 17:22). ¡Müna cüme dungu tati! Ayüucüleliyiñ, cüme duamcüleafuiñ amulecale rume taiñ cutran.

Felei llemai, tati maneluhun quiñe cüme lahuen reque felei, müna quelluafeiñmu. Huelu maneluucüleliyiñ, re quellulayaiñmu taiñ cüme duamcüleal müten, ¿ca chumngechi quelluafeiñmu?

¿Falin-ngepei mai chem raquiduam nieal?

Pu quimche feipiquei tati pu che cümeque raquiduam nielu doi cüme tripaquei tañi dungu, doi cüme chillcatuqueingün, doi cüme cüdauqueingün ca doi cüme deportetuqueingün. Raquiduamnge ñi rupan quiñeque domo deportetuquelu. Tüfa engün ramtungei ñi niepen mai cümeque raquiduam tañi mongen mu. Tüfachi dungu ñi ramtungeel pu domo, quimfalngei chumngelu ñi cüme cam huesa tripaquen tañi deporte mu. Felei llemai, cümeque raquiduam nieliyiñ müna cümelcayaiñmu.

Cuifi mu, tati pu quimche fillque dungu quimürpuingün feichi pu che huesa raquiduamquelu. Raquiduamnge quiñe dungu ñi rupan. Trapümngei ta fentren che ca tuculelngei quiñe fütra huhucün. Huelu ca quimelelngei chumngechi pütafafiel quiñeque boton, femngechi ñi allcütuhuenoal ti huhucün. Com femngechi femingün.

Ca femngechi femi cangelu troquiñche, pütaffingün ti boton, huelu aflai tati huhucün. Fei ñi pepi chongümnofiel engün, fentren afeluhuingün. Fei hula feipingei engün ñi femal caquelu dungu. Huelu epe com afeluucaingün. Feipingün: “Pepi femlayafuiñ”. Huelu quiñeque tüfachi troquiñche meu afeluulaingün, ¿chumngelu? Nieingün cümeque raquiduam.

Tati doctor Martin Seligman adcünui tüfachi troquiñche, ¿chumal? Quisu ayüquei ñi quimal chem dungu rupaquei tati pu che cüme raquiduam nielu ca tati pu che huesaque raquiduam nielu. Quisu quimürpui tati pu che pürüm afeluuquelu, rume cüdautuqueingün ñi femal fillque dungu ca fentren rupa pepi femquelaingün. Tüfachi huentru feipi: “Pütrüñma yenien tañi ngüneduamfiel tüfachi dungu, fei quimürpun quiñe che culpantucuule ca re huesaque dungu raquiduamle, doi huesaque dungu contuayu”.

Com ñi feipiel pu doctor “¡hue dungu quimngerquei!”, piafui ta quiñeque che. Huelu pu estudiaquelu Biblia deu quimniequei tunte taiñ cümelcaqueteu cüme raquiduamal. Biblia feipi: “Hueñancülerpulmi tami rupan huesaque dungu mu, yafüngehuelayaimi” (Proverbios 24:10). ¡Felei llemai! Chumngechi feipi Biblia huesaque raquiduam nieliyiñ, yafüngehuelayaiñ ca fillque dungu femlayafuiñ. Feimu, ¿chem chumafuiñ taiñ cüme raquiduamal ca maneluucüleal? Peafiyiñ.

[Adentun]

Tati maneluhun rume cümelcayafeiñmu

Chem rupalmi rume, cüme raquiduamnieaimi

COM iñchiñ fillque huesaque dungu meu rupaqueiñ taiñ mongen mu. Fei pu quimche feipiquei chem taiñ chumqueel rupan mu femngechi dungu mu, pengelafui taiñ cüme raquiduamquepen mai taiñ mongen meu. Quiñeque che rupan mu huesaque dungu meu, afeluuquelai, doi mai eluuqueingün ñi nehuentual, huelu caquelu pürüm müten afeluuquei. ¿Chumngelu am femngechi femquei quiñeque che?

Raquiduamnge quiñe dungu meu: eimi, quintucüdaumeimi huelu elungelaimi chi cüdau. ¿Chum duamnagafuimi? Huesa duamnagafuimi llemai. Feipiafuimi: “Che troquingequelan, turpu elungelayan quiñe cüdau” cam “puucülerquelan chem cüdau meu rume” piafuimi. Femngechi raquiduamülmi, pengelaimi tami cüme raquiduamquenon.

¿Chumafuimi tami huesa raquiduamnoal?

¿Chumafuimi tami pürüm afeluunoal? Hunelu mu, eluhuafuimi tami quimal chem raquiduam cümelcayafeimu cam huesalcayafeimu. Femngechi quiñepülecünuafuimi huesaque raquiduam ca eluhuaimi tami cüme raquiduamal. Raquiduamnge tüfachi dungu meu: elungenolmi quiñe cüdau, feipiafuimi chi: “Che troquingequelan, ¿feimu peno elungelan chi cüdau? Ca feipiafuimi: “Tati empresa elulaeneu chi cüdau duamnielu cai engün caquelu che ca adümuhun nielu”.

Quiñeque mu, fütra huesa dungu troquiafuimi tami rupamequen, huelu eluunge tami ngüneduamafiel tami rüf rupamequen. Fei tami elungenon mu quiñe cüdau, ¿feipiafuimi chi tami serfiquenon chem dungu meu no rume? Femngechi pilmi, raquiduamafuimi fillque dungu tami cüme femqueel eimi tami mongen meu. Cüme yeniepelaimi chi tami familia engün, cümeque hueni nieimi ca fillque cümeque dungu femqueimi tami poyeafiel ta Chau Dios. Feipiquilnge: “Chem dungu femli, huesa tripayai tati”. ¿Rüf quimafuimi ñi huesa tripayal? Cam ¿rüf feipiafuimi tami turpu elungenoal quiñe cüdau? Caquelu dungu quelluafeimu tami famentuafiel huesaque raquiduam. Peafiyiñ.

Cüpa femülmi quiñe dungu, afeluuquilnge.

Ngüneduamfali ñi feipin quiñeque quimche, tüfa engün feipiquei: “Tati pu che raquiduamquelu ñi diturpual tañi ayüqueel, maneluucülequeingün tati”. Cüpalechi troquiñ meu, inaduamaiñ caquelu dungu ñi femqueel tati pu che maneluucülelu. Huelu feula, peaiñ chumngechi tati maneluhun quelluaiñmu taiñ femal taiñ ayüqueel.

Hunelu mu, mülei taiñ quimal chem dungu ayüqueiñ taiñ femal iñchiñ taiñ mongen meu. Feimu ramtuunge: “¿Chem ayüquen ñi femal tañi mongen meu?”. Quimnolmi, raquiduamnge chem doi falintuqueimi tami mongen mu ca chem ayüafuimi tami femal. Biblia fentren tripantu cuifi mu, ngülamtueiñmu taiñ cüme ngüneduamnieafiel chem am tati doi falin-ngelu (Filipenses 1:10).

Cüme quimliyiñ chem cüpa femqueiñ taiñ mongen mu, ramtuhuafuiñ: “¿Chumafun ñi diturpual tañi ayüqueel?”. Fei fillque dungu mu raquiduamafuimi tami femürpual. Hunelu meu, duamfalngelai tami femal fütraque dungu, dulliafuimi quiñeque dungu müten tami femal. Pürüm müten eluhulmi tami femal cüdaungechi dungu, afeluutripayafuimi. Fütraque dungu cüpa femülmi, ramtuunge: “¿Chumafun hunelu meu?”. Raquiduamnge pichique dungu tami femafel, femngechi ñochiquechi doi fütraque dungu nentuafuimi.

Fentren che feipiquei: “Quiñe che ayünielu quiñe dungu ta femal, huechunentuafui”. Quimliyiñ chem ayüqueiñ taiñ femal, mülei taiñ nehuentuhual, femngechi müten huechunentuaiñ taiñ cüpa femel. ¿Chumafuiñ taiñ nehuentuhual? Raquiduamafuiñ fente taiñ cümelcayaeteu taiñ ayüqueel. Huelu ngoimaquilnge, ruparumeafui quiñeque dungu tami catrütuafeteu, huelu pürüm afeluulayaimi.

¿Ca chem chumafuimi? Raquiduamnge fillque dungu tami femafel, femngechi huechunentuafuimi tami cüpa femel. Quiñe quim huentru C. Rick Schneider fei tüfa ngülamtui: “Fillque dungu femafuimi tami huechunenturpual tami ayüqueel, huelu ¿chumngelu fillque dungu femaimi? Quiñeque ta tüfa pepi femnolmi, dulliafuimi caquelu tami huechunenturpual tami ayüqueel”.

Huelu quiñeque mu fillque dungu femafuiñ, huelu entulayafuiñ taiñ ayüqueel. Fei ¿chem chumafuiñ? Tüfachi quim huentru Schneider feipi ñi cümeafel taiñ raquiduamal caquelu dungu taiñ cüpa huechunenturpual, femngechi afeluutripalayaiñ. Femngechi femliyiñ, fentecünulayaiñ taiñ maneluucüleal.

Quiñe nütram mu mülelu Biblia meu, doi adümafuiñ tüfa. Cuifi mu, ti rei David müna ayülefui ñi deumayal quiñe fütra ruca Jehová ngealu. Huelu ¿chem rupai? Chau Ngünechen feipifi: “Eimi deumalayaimi tati fütra ruca, tami fotüm deumayafi llemai”. Femngechi feipingelu rume, David illcutripalai, afeluutripalai rume, ¿chumngelu? Huechunentunofulu rume tañi ayüquefel, eluhui ñi caquelu dungu femal. ¿Chem chumi? Quellufi tañi fotüm ñi ngülümal fillque chemcün femngechi ñi deumangeal tüfachi fütra ruca (1 Reyes 8:17-19; 1 Crónicas 29:3-7).

Huelu femliyiñ rume com taiñ inaduampeel, ca huesa duamcüleafuiñ, maneluucülenolu troquihuafuiñ. ¿Chumngelu femngechi duamcüleafuiñ? Fillque huesaque dungu ruparupangelu cai, fei iñchiñ chumlayafuiñ rume taiñ cüme elcünutuafiel. Fill püle mülei filla, fütra quehuan, cutran ca lan dungu. Com tüfachi huesaque dungu rupamequelu cai, ¿petu maneluucülepeafuiñ mai?

[Adentun]

Elungenolmi quiñe cüdau, ¿turpu elungelayaimi?

[Adentun]

Ti rey David cüme raquiduami huesa dungu rupalu rume

¿Chem dungu mu rüf maneluhuafuiñ?

NGILLALMI quiñe silla, fei rupalu chi antü huesañmahui. Fei quintuafuimi inei tañi cüme elcünutuafiel. Huelu fillque che feipiafeimu: “Iñche cüme elcünutulelafeyu”. Huelu eimi maneluucülelaimi. Fei hula allcüimi tami carucatuche tañi deumafiel feichi silla, ca quisu eluucülei tami quelluaeteu ca cofralayaimu. ¿Cümenoafulu quisu tami quelluaeteu?

Ca femngechi fachantü fentren che hulquei fillque ngülam ca quiñeque feipiqueingün: “Iñche quelluafeyu tami doi cüme duamcüleal”. Huelu, ¿inei rüf quelluafeiñmu taiñ maneluucüleal ca cüme duamcüleal? ¡Ngünechen llemai! Quisu deumai ta mongen ca eluucülei taiñ quelluaeteu. Femngechi Biblia feipi: “Chau Dios camapulelai caque quiñeque iñchiñ meu” (Hechos 17:27, Traducción del Nuevo Mundo [TNM]; 1 Pedro 5:7).

Biblia ñi feipin mu, ¿chumquei pu maneluucülelu?

Famülque mu, pu doctor, pu quimche ca caquelu che fillque dungu feipiqueingün tati maneluhun meu. Huelu Biblia doi falinque dungu feipiquei tati maneluhun mu. Biblia feipi tati pu che nielu maneluhun raquiduamquei ñi rupayal cümeque dungu ca tañi quimnien mu raquiduamqueingün ñi femtripayal tañi ayüqueel. Mülei fillque dungu pengelquelu ñi rüfngen Biblia tañi feipin. Feimu ngünam maneluucülelaiñ tañi feipin meu.

Tati pu che maneluucülelu ca nielu feyentun, trauma reque miyauquelaingün. Doi mai cüme quimnieingün chem dungu mu tañi maneluucülen ca feyentuquen (Hebreos 11:1). Tati feyentun ca tati maneluhun, trürngelai ¿chumngelu am? (1 Corintios 13:13).

Raquiduamnge tüfa, quiñe huentru müna feyentuquei tañi hueni meu, ¿chumngelu am? Tañi hueni fürenechequei ca deu quellueyu cuifi mu, feimu fente maneluucülei tañi hueni mu. Felei llemai, tati maneluhun ca tati feyentun nüucülei, huelu trürngelai engu. Fei, ¿chumafuiñ taiñ fente cüme maneluucüleal Chau Dios meu?

¿Chumngelu maneluucüleiñ Jehová mu?

Chau Jehová mu rüf maneluucüleafuiñ. Cuifi meu tati pu israelche ca femngechi maneluucülefuingün quisu meu. Jehová fillque dungu feipileleyu engün tañi maneluucüleal (Jeremías 14:8). Huelu Jehová ‘re maneluucülemün’ feipilafi müten tati pu israelche, doi mai pengelelfi engün ñi manelfalngen, ¿chumngechi? Chem feipicünufiel femtripaquei. Feimu Josué loncolefulu Israel meu feipifi engün: “Fente cüme quimnieimün, com cümeque dungu tamün feipicünueteu Chau Jehová com femtripaquei” (Josué 23:14).

Pütrün tripantu rupalu rume, Jehová petu quimfalngequei tañi manelfalngen meu. Biblia mu, mülei fillque dungu ñi feipicünuel Jehová ca pengeli chumngechi ñi femtripan ta cuifi. Quiñeque dungu ñi feipicünuel Chau Dios huirintucungelu Biblia meu, deu femtripalu troquingequefui, fente tañi manelfalngen mu tañi feipin.

Felei llemai, Biblia ñi feipin manelfalngei. Fei papeltufiliyiñ doi maneluucüleaiñ Chau Dios mu. Feimu Biblia feipifi: “Com tati cuifique dungu huirintucungei taiñ quimeltungeal. Tati Huirin Chillca yafültucuqueeiñmeu ca quelluqueeiñmeu taiñ nehuentuleal. Feimu nieiñ ta maneluhun” (Romanos 15:4, TNM).

Layeucüleliyiñ, ¿niepeiñ mai maneluhun?

Layeluucüleliyiñ duamnieiñ taiñ maneluucüleal. Tati lan dungu müna hueñancün-ngei. Feimu fentren che huesa duamcülequei ca nielaingün maneluhun. Cafei com iñchiñ quimnieiñ taiñ layal, chumlayafuiñ rume. Feimu Biblia feipi tati lan dungu fei “ti quiñelehuechi caiñe” (1 Corintios 15:26).

Huelu, ¿maneluhuafuiñ ñi ngehuenoal ta lan dungu? ¡Mai! Maneluhuafuiñ. Biblia feipi ñi apümcangeal tati lan dungu. Jehová doi nehuen-ngei, feimu apümcayafui tati lan dungu, ¿chumngechi quimiyiñ tüfa? Biblia meu mülei ailla nütram pengeli Chau Dios ñi huiñomongeltufiel tati pu che.

Quiñe nütram Biblia meu Chau Jehová pengeli Jesús, Jehová tañi duam meu, huiñomongeltufi tañi hueni Lázaro. Jesús femi tüfa fentren che ñi adquiñ meu (Juan 11:38-48, 53; 12:9, 10).

Feichi pu che huiñomongeltungelu cuifi, ca huiño füchaingün fei laingün. Fei, ¿chumal am huiñomongeltungei? Lalu rume engün, tañi rupan pengeli ñi rüfngen taiñ feipicünueteu Chau Jehová. Feimu rüf maneluucüleafuiñ ñi huiñomongeltungeal pu layelu

Jesús feipi: “Iñche tati huiño mongeltuchequelu ca tati hulquelu mongen” (Juan 11:25, TNM). Jehová elfalcünufi ta Jesús ñi huiño mongeltuafiel pu layelu pichiñma mu. Feimu Jesús feipi: “Puhuai ti antü, fei com tati pu che mülelu eltun mu allcüñmayafi ñi dungun ta Chau Ngünechen ñi Fotüm. Fei huiñomongetuaingün” (Juan 5:28, 29, TNM). Felei llemai, com pu layelu huiñomongetuai ayüfalngele ta Mapu.

Cuifi quiñe huentru poyequefilu ta Jehová, Isaías pingelu, feipi pu layelu ñi huiñomongetual. Huiño huitratuaingün ca huirarcayaingün fente tañi ayühun mu (Isaías 26:19).

Raquiduamnge tüfa, quiñe pichiche mülei tañi ñuque ñi pütra meu, fei ti ñuque raquiduamtucunieyu. Ca femngechi reque, tati pu la müleingün Jehová tañi raquiduam meu. Quisu ngoimarumequelafi, doi mai loncontucuniequefi (Lucas 20:37, 38). Quiñe pichiche hue choyüngelu, ayühun mu llohueyu tañi ñuque. Ca femngechi ayühun mu lloungeai pu layelu huiñomongetule engün. Felei llemai, larumeliyiñ rume niequeiñ ta maneluhun.

Maneluucülelmi, ¿chumngechi quelluaeimu?

Pablo falinque dungu quimeltueiñmu ti maneluhun mu. Quisu trürümfi ti maneluhun ta quiñe casco mu (1 Tesalonicenses 5:8). Pablo, ¿chem cüpa feipi? Cuifi mu tati pu hueichaquefulu, hunelu meu tucuuquefuingün quiñe trülque gorra tañi lonco meu, fei hula tucuuquefuingün quiñe casco, fei ñi hueichayal. Fei tüfa quelluquefeyu ñi allfütripanoal ñi lonco. Ca femngechi reque nieliyiñ ta maneluhun quelluaiñmu taiñ cüme raquiduamnieal. Feimu, rupaliyiñ rume huesaque dungu mu, huelu tucuunieliyiñ tüfachi casco reque, fei tati maneluhun, müna cümelcayaiñmu.

Pablo ca dungu feipi tati maneluhun nüucülelu Ngünechen meu. Pablo feipi taiñ maneluhun quiñe ancla reque felei (Hebreos 6:19). Peufarumelu quiñe fütra cürüftucu mahun, pu che miyaulu farcu meu, ütrüftucuquefuingün tati ancla. Tüfachi ancla cüme nülcüle cura meu, ti farcu montutripayafui. Pablo cüme quimniefui tüfa, quenailu tañi montutripan meu.

Ca femngechi fachantü fillque huesaque dungu meu rupaqueiñ, fei tüfa taiñ rupaqueel quiñe fütra cürüftucu mahun reque trürümfalngeafui. Huelu maneluucüleliyiñ Ngünechen meu, nehuencüleaiñ. Jehová feipicünueiñmu ñi epe puucülen chi antü ñi mülehuenoal fütra quehuan, cutranhuelayai ta che ca ngehuelai lan dungu. Maneluuliyiñ chem taiñ feipicünueteu Jehová eluucüleaiñ taiñ inanieal quisu tañi feipin ca famentuafiyiñ tati huesaque dungu ñi mülen tüfachi Mapu meu.

Eimi ca maneluhuafuimi Jehová tañi feipicünuel meu. Taiñ Huenu Chau ayülei tami cüme feleal ca ayüquei “com che tañi montual”. ¿Chumafuimi tami mongetripayal? Mülei tami quimürpuafiel “tati rüfngechi dungu” mülelu Biblia meu (1 Timoteo 2:4). Feimu yafüluunge tami quimürpuafiel Ngünechen tañi Dungu. Fei quimürpuaimi Ngünechen tañi maneluhun doicülei chem dungu meu rume tüfachi Mapu meu.

Maneluucüleliyiñ fillque dungu femafuiñ. Fei taiñ ayüqueel nüucülele Jehová tañi feipin meu, huechunenturpuafuiñ (2 Corintios 4:7; Filipense 4:13). Feimu nehue maneluucülenolmi, yafüluunge tami maneluhual Jehová meu. ¡Femafuimi llemai!

[Huichulechi dungu/Adentun]

¿Chumngelu maneluhuafuiñ Chau Dios meu?

Tüfachi fillque troquiñque Biblia meu quelluafeiñmu taiñ nieal maneluhun:

◼ Ngünechen feipicünui taiñ cüme feletual

Biblia feipi tati Mapu ayüfalngeai ca com pu che quiñeucüleai (Salmo 37:11, 29; Isaías 25:8; Apocalipsis 21:3, 4).

◼ Chau Dios coilatuquelai

Jehová lifngei ca püntütripalei huesaque dungu meu. Feimu turpu coilatuquelai (Proverbios 6:16-19; Isaías 6:2, 3; Tito 1:2; Hebreos 6:18).

◼ Chau Dios fütra nehuen-ngei

Jehová com nehuen-ngei. Feimu chem no rume catrütulayafeyu ñi femal tañi ayüqueel (Éxodo 15:11; Isaías 40:25, 26).

◼ Ngünechen ayüniei taiñ rumel mongeleal

(Juan 3:16; 1 Timoteo 2:3, 4).

◼ Chau Dios manelnieiñmeu

Com iñchiñ huelulcauqueiñ, huelu Jehová eluucülei tañi ngüneduamafiel taiñ cüme femqueel (Salmo 103:12-14; 130:3; Hebreos 6:10). Jehová müna ayüquei tañi cümeque femün meu (Proverbios 27:11).

◼ Chau Dios tañi quellun meu huechunenturpuaiñ taiñ ayüqueel

Turpu quisulelu troquiulayaiñ. Ngünechen quelluqueiñmu tañi nehuen meu (Filipenses 4:13; TNM).

◼ Chau Dios meu maneluhuafuiñ

Chau Dios manelfalngei ca com ñi feipin mupitripaquei. Feimu maneluhuafuiñ quisu meu (Salmo 25:3).

[Adentun]

Chumngechi tati casco incañpequeiñmu taiñ lonco ñi allfünoal, ca femngechi tati maneluhun montulqueiñmu

[Adentun]

Quiñe ancla cüme nüniequefi quiñe farcu, ca femngechi taiñ maneluhun quelluqueiñmu taiñ nehuencüleal

[Cheu tuhui]

Courtesy René Seindal/Su concessione del Museo Archeologico Regionale A. Salinas di Palermo