Kiñe pichi weche wentru umawnagi

¡AWEMTUKAY! ¿Chem rupamekey tüfa? ¿Rume (mütre) allfüpey may ti pichi (püchü) weche wentru tranalelu? ¡Adkintunge, kiñe tati pu wentru tripalu ti ruka mew fey ta Pablo! ¿Ka pefimi Timotew üye mew? ¿Ütrüfnagpey may ti fentana mew ti pichi weche wentru?

May, femngechi rupay. Pablo wewpilmekefi tati pu disipulu mülepalu Troa waria mu. Kidu am kimniekey ñi alüñma mu pewenoafiel engün, ka antü mu am müley ñi amutual kiñe farku mew. Feymu lle rangiñ pun (trafia) may amulen ñi nütramkameken.

Tüfachi pichi weche wentru, Ewtiko pingelu, anüley fentana mew, ka rume umawnagi. ¡Küla piso wenu ruka ñi fentana mew ütrüfnagpay! Fey mew peafuymi chumngelu (chemu) tati pu che rume weda duamküleyngün. Tati pu wentru witrapüramfilu ti pichi weche wentru, pey engün ñi rupanoel chi dungu. ¡Larkey!

Pablo pefilu ñi lan pichi weche wentru, wente winafkünuwpay lan chi pichi weche wentru mew ka pangkontükufi. Fey mew feypi: ‘Llükakilmün. ¡Kidu kümelekay!’ pi. ¡Ka rüfngey! ¡Kiñe afmatun dungu tüfa! ¡Pablo wiñomongeltufi! Feymu lle tati pu che rume ayüwküley.

Kom che ka püratuy, ka nieyngün kiñe iyael (yagel). Pablo wünmanagi ñi wewpitulen. ¡Welu maneluwafuyiñ ta Ewtiko wiño umawnagwelay! Fey mew Pablo, Timotew ka tati pu konpañnieetew pürayngün ti farku mew. ¿Kimimi chew amuyngün?

Pablo amuley ñi afkülen küla rupachi amul dungun. Pablo mülepuy küla tripantu Efeso waria mu müten feychi ñi amun mu. Feymu lle, tüfachi amun doy alüy tati epungelu mu.

Tripalu wüla Troa waria mu, tati farku pichiñma tüngpuy Mileto waria mew. Pablo pülle (püchü) tripalelu am Efeso, mütrümfalfi tati longkolechi pu wentru mülelu tati trawüluwkelu mu, ñi amual ta Mileto ñi af nütramkawal engün. Fey wüla amutulu ti farku, ¡müna weñangküyngün pefilu ta Pablo ñi amuletun!

Fey wüla ti farku wiñotuy ta Sesarea. Mülepalu Pablo ti disipulu Felipe ñi ruka mew, ti pelon wentru Agabo pingelu feypi: ‘Wiñotule Pablo ta Jerusalen waria karseltükungeay.’ Femngechi rupay, chumngechi feypilu Agabo. Fey mew rupalu wüla epu tripantu Pablo ñi mülen karsel Sesarea mew, yengey Pablo ta Roma waria mu ñi ramtukadunguaetew Sesar mu, ti Roma che ngünenielu. Peafiyiñ chem dungu rupay amulelu ta Roma.