2 KIMELTUN

Chumngechi tami nütramkaken entunge tami feypin

Luka 6:⁠45a

DUAMFALI TAMI KIMAL: Chumngechi tami dunguken, ka femngechi entuaymi tami wewpin, nütramkan kam amuldungun. Tami pu allkütukeetew müley ñi ngüneduamal tami duamtukefiel engün ka tami feyentukefiel ka falintukefiel tami feypimeken.

CHUMAFUYMI

Ngillatufinge ta Chaw Dios ka küme pepikawnge. Pepilnolu trokiwülmi, re rakiduamlayaymi tüfa. Doy may longkontukuaymi chem tami feypial ka chumngechi ñi kümelkayafiel tami pu allkütukeetew. Llellipuafimi ta Jewba tami femngechi femal. Kafey longkontukunienge tati doy falin-ngechi dungu tami feypial. Re papeltulayaymi chem ñi wirintukuel papel mu. Doy may eymi tami dungun mew entuaymi tati nütram.

Papeltulmi Biblia kam lifru, küme kimnienge chem tami papeltual. Femngechi katrükatrünentulayaymi tami papeltun. Papel mu wirikonkülele kiñe che ñi feypin, piwke mu tripape tami papeltun, welu doy amulkünulayaymi.
Piwke mu entunge tami dungun. Longkontukuniefinge pu che. Rakiduamnge: “¿Chumngelu (chemu) duamnieyngün ñi allkütual tüfa?”. Femngechi pengelaymi tami duamtucheken ka weniyefalngen tami ange mu, tami chumkünuwün ka chumngechi tami nengümkefiel tami kuwü.

Chumngechi tami nütramkaken entuaymi tami feypin, welu ka yamfal dunguaymi. Ti werkün dungu tami feypimeken müna falin-ngey ka yamfalngey. Feymu ñi femngechi rakiduamal pu che, küme entudungunge ka yafüluwnge tami welulkawnoal tami dungun mew.
Leliwülfinge tati pu che. Adkintuafimi tañi nge, welu kuñiwtukuwnge tami weda duamelnoafiel. Wewpilmi, re adkintulayafimi kom ti trokiñche, doy may weluken adkintuafimi pu che.