Pablo ñi choküm llükakelafuy

Nütramelayu kiñe weche wentru ñi rupan mu. Fey montulelfi tañi mongen ti apostol Pablo. Kimlaiñ (kimalabiiñ) tañi üy, welu tüfachi weche wentru Pablo ñi chokümngefuy. Ka llükanchengelafuy (llükanten-ngelabuy). ¿Ayüymi tami kimal chem ñi femün tüfa?...

Pablo Jerusalen waria mew presuley. Kidu nütramelkefi ta che Jesu ñi dungu mew, feymu karsel mu rakümkoni. Kafey kiñeke wedake wentru üdenieeyew, feymu nütramkawingün ñi femal kiñe weda dungu. Fey engün ayüy ñi pemeafiel tati longkolechi soltaw, ka feypiafiel: ‘Feypiafimi tami pu soltaw ñi yeafiel ta Pablo ti tribunal mu’. Fey ellkawafulu engün chi rüpü mew, feymu petu rupale Pablo ¡lefkontupayafuyngün ñi langümafiel!

Pablo ñi choküm kimürkey feychi weda dungu. Fey ¿chumi kidu? Feypimefi tañi weku. Feymu Pablo feypieyew: ‘Lef amunge chew ñi mülen ti longkolechi soltaw, ka feypimefinge tüfachi dungu’. Fey chi weche wentru feypimefi tati longkolechi soltaw, ¿küdawngefuy ñi pial tüfa? ¿Chem pimi kay?... Küdawngefuy llemay, tüfachi longkolechi soltaw am kiñe ülmen wentru-ngefuy. Welu Pablo ñi choküm llükanchengelay (llükanten-ngelay), ka feypifi tüfachi dungu.

Chi longkolechi soltaw küme allkütufi ti weche wentru. Feymu ñi langümngenoal Pablo kangelu waria mew yengetuy, Sesarea pingechi waria mu. Kafey eli 500 soltaw ñi kompañafiel (diweñabel) ta Pablo petu amulelu rüpü mu. Ka feypi: ‘Tüfachi pun müten yeafimün’. Fey ¿montuy tañi mongen Pablo? ¿Chem piafuymi eymi?... Femi tati, montuy tañi mongen. Tüfachi pu wedake wentru pepi langümlaeyew engün.

¿Chem kimelelafeymu tüfachi nütram?... Eymi ka llükanchengelayaymi (llükanten-ngelayaymi), Pablo ñi choküm reke. Taiñ dungulelafiel pu che Jewba ñi dungu, ngelay taiñ llükayal. Feymu ¿llükapeafuymi may? ¿Amulepeafuymi may tami dunguafiel ta che Jewba ñi dungu mew?... Rume (mütre) fali tami femal tüfa. Feymu montulelafuymi tañi mongen ti che.