Faraon ñi pu pewma

EPU TRIPANTU rupay, ka Jose petu mülerkey karsel mew. Ti nüfül kopakelu tukulpalafi. Feymu kiñe pun, Faraon nierkey epu pekan pewma no, ka ramtuwi: ‘¿Chem pewmachi tüfa?’ ¿Pefimi umawtuley tüfa? Puliwen mew Faraon mütrümfi tañi pu wentru doy kimlu, ka feypifi engün ñi pewma. Welu fey engün pepi feypilaeyew ñi chem pifel ñi pewma.

Fey wüla ti nüfül kopakelu tukulpafi Jose. Feypifi ta Faraon: ‘Iñche mülelu karsel mew, feymu mülekey kiñe wentru fey feypiafuy chem pewma ngen.’ Faraon pürüm (pür) entufalmefi Jose karsel mew.

Faraon nütramelfi Jose ñi epu pewma: ‘Pefiñ regle küme motrinke waka. Ka pen, regle waka rume trongli ka re foroley. Ti pu tronglike waka ifingün tati motrinke waka.

‘Kangelu tañi epu pewma pen regle longko ketran apoley fün mew ka afülefuy, kiñen chang choyün (llegün) mew tremlu engün. Kafey pefiñ regle apofün-nochi angkün longko ketran. Ka ti apofün-nolu longko ketran lümüfi ti regle kümeke longko ketran.’

Jose feypifi Faraon: ‘Feychi epu pewma mür femngey. Feytichi regle motrinke waka ka ti regle apolechi longko ketran regle tripantu tati, ka ti regle tronglike waka ka ti regle apofün-nolechi longko ketran ka regle tripantu tati. Müleay regle tripantu fentren iyael trempürayay Egipto mu. Inalechi regle tripantu pichin iyael tremay.’

Feymu lle, Jose feypifi Faraon: ‘Dullifinge (ngümintufinge) kiñe kim wentru, ka elfalfinge tañi ñimitual iyael regle kümeke tripantu mew. Feymu tachi pu che lalayay ngüñün mew, feytichi ka regle wedake tripantu mew pichin iyael mülele.’

Faraon ayüy chi ngülam. Ka dullifi (ngümintufi) Jose ñi ñimitual ka wirkolal iyael. Jose doy falin-ngechi wentru ngetuy Egipto mew, inan Faraon mew.

Rupalu pura tripantu mew, petu müley ngüñüwtun, Jose pefi kiñeke wentru ñi küpan. ¿Kimfimi iney engün? ¡Ñi mari wünen peñi ürke! Jakob, ñi chaw engün, werküeyew Egipto mu aflu am ñi iyael (yagel) engün Kanaan mapu mew. Jose kimi tañi peñingen engün, welu kidu engün kimlayngün. ¿Kimimi chumngelu (chemu)? Jose nierkey doy tripantu, ka küme takuley kakewme takun.

Jose tukulpay pichi wentru ngelu, tañi pewman tañi pu peñi tañi küpan ñi lloyünagal kidu mew. ¿Tukulpaymi tami chillkatufiel? Feymu, Jose kimtükuy Ngünechen werküeyew kiñe küme dungu Egipto mu. ¿Chumi am chi Jose? Peafiyiñ.