Chau Dios deumai ti huenu ca ti Mapu

Chau Jehová deumaeiñmu. Fei deumai itrocom: com taiñ pequeel ca taiñ pequenoel. Hunelu mu, Chau Dios deumai fentren cümeque püllü. ¿Quimimi chem am pu cümeque püllü? Fei engün cüdahuelquefingün ta Chau Jehová, fei reque feleingün. Chau Jehová pepi pengequelai, ca femngechi pu cümeque püllü. Chau Jehová hune deumai quiñe cüme püllü tañi quelluaeteu. Fei quellueyu ñi deumayal pu huangülen, fillque planeta ca itrofill dungu. Quiñe feiti planeta fei taiñ Mapu.

Cafei Chau Jehová pepicafi ti mapu ñi müleal fillque culliñ ca tati pu che. Deumai ti Antü ñi huilüfal. Cafei deumai huincul, lafquen ca leufü.

¿Ca chem femi hula? Chau Jehová feipi: “Huefpe carü cachu, anümca ca fillque rayen”. Femngechi ti mapu huli fillque fün, cümeque tucucan ca itrofill adngechi flor. Chau Jehová cafei deumai fentren culliñ: pu müpüyaulu, pu miyaulu co mu ca pu huinolquiyaulu mapu mu. Deumai pichique culliñ, achahuall reque, ca fütraque culliñ, pu mansun reque. ¿Chuchi culliñ am doi ayüquefimi?

Chau Jehová feipifi tati hunen cüme püllü: “Deumayafiyu ti che”. Che trürlai ta culliñ mu. Pu che elungei ñi raquiduamal, fei tañi deumayal hueque dungu. Cafei, elungei ñi nütramcayal, ayeal ca llellipuafiel Chau Dios. Pu che elfalcünungei ñi cuidayafiel ti mapu ca pu culliñ. ¿Quimimi cai inei tati hunen huentru? Peafiyiñ.