HUESAQUE DUNGU ÑI RUPAN MU

3 | Fülmanieafimi tami pu che ca tami pu hueni

¿CHUMNGELU FALIN-NGEI TAMI FEMAL?

Rupan mu huesaque dungu, pu che huesa duamquei, feimu famentuuquei tañi familia mu ca tañi pu hueni mu. ¿Chumngelu feipiafuiñ?

Quiñeque mu, tati pu che huichutripaquei tañi pu hueni mu.
Rupan mu huesaque dungu, quiñeque curehuen doi lladcütudunguuquei.
Ca femngechi, quiñeque chau ca ñuque müte duamhuelafi ñi huesa duamcülen tañi pu yall, pu püñeñ.

Chem tami quimafel

Rupan mu huesaque dungu, rume falin-ngei taiñ nieal cümeque hueni, ¿chumngelu? Fei engün quelluaiñmu taiñ cümelcaleal ca taiñ cüme duamcüleal.
Fente ñi rupamequen huesaque dungu, ürcüafuimi eimi ca tami familia, fei doi cüdaungeafui tamün tüngcüleal.
Tami pu pichiqueche pefile noticia fentren huesaque dungu ñi rupamequen, pellqueduamafuingün.

Feula chem tami cüme femal

Biblia feipi: “Quiñe rüfngechi hueni rumel piuqueyechequei, ca quiñe peñi reque felei ñi mülen mu hueñancün” (Proverbios 17:17).

Taiñ pu hueni yafültucuqueiñmu ca eluqueiñmu cümeque ngülam. Fei engün piuqueyenquechi quelluqueiñmu taiñ nehuencüleal, femngechi taiñ chaftuafiel huesaque dungu.

¿CHUMNGECHI CHAFTUAFUIMI? Cümeque ngülam

Rupan mu huesaque dungu, ¿chem quelluafeimu tami quisulenoal?

DOI QUIÑEUCÜLENGE TAMI AFCADI MU

Doi quiñeucülenge tami afcadi mu

Biblia feipi: “Epu che doi cümelcalei tati quisulelu mu […]. Fei quiñe tranle, quelluaeyu ñi compañ tañi huitrapüramaeteu” (Eclesiastés 4:9, 10). Tati curehuen trürümngeafui quiñe trarin mansun mu. Tati epu mansun mülei ñi quiñehun cüdahual ñi yenieafiel ti carreta. Huelu femnole, huelu huitraumequeafui engu. Ca femngechi curehuen mülei ñi quiñehun cüdahual tañi cüme yeniehual engu.

Mülele huesaque dungu, huesa piulayaimu. Lladcütuumequequilmu, tüngcülemu.
Fill semana nütramcaumu quiñe rupa rehuall chumngechi cüme elcünutual huesaque dungu. Yafcaumequenoal, doi mai tamu cümelcaucüleal.
Elantücünumu tamu ayühunquechi cüme rupaleal.
Acordaleluumu cümeque antü tamu rupaquen. Trür peafimu foto tamu mafühun mu ca caquelu falin antü mu.

David feipi: “Pu curehuen quiñeque mu quiñeuquelai tañi raquiduam. Huelu femfule rume, quiñehun cüdahuafuingu. Tati curehuen mülei ñi quiñe rumecünual ñi raquiduam ca ñi quiñehun cüdahual, femngechi tañi cüme tripayal”.

FAMENTUUQUILNGE TAMI PU HUENI MU

Famentuuquilnge tami pu hueni mu

Eluunge tami yafültucungeal, ca femngechi eimi yafültucuafimi tami pu hueni. Yafültucufilmi ta caquelu che, eimi ca femngechi yafültucuuqueimi.
Fill antü quiñeque mütrümfinge tami pu hueni tami quimafiel chumlen engün.
Ramtufinge tami pu hueni chumngechi chaftufi ti huesaque dungu eimi reque tami rupamequen.

Nicole feipi: “Tati huesaque dungu traumalqueiñmu reque, quimquelaiñ taiñ chumal. Huelu pu hueni feipiafeiñmu chumngechi taiñ montuluhual. Quiñeque mu quimfuliyiñ rume taiñ chumal, huitralehuequeiñ, fei taiñ pu hueni quellufemqueiñmu. Taiñ pu hueni duamnieiñmu, iñchiñ ta ca femngechi duamniefiyiñ”.

QUELLUAFIMI TAMI PU YALL, PU PÜÑEÑ

Quelluafimi tami pu yall, pu püñeñ

Biblia feipi: “Com eimün, mülei tamün hune allcütual, huelu mülei tamün pürümcaunoal tamün dungual” (Santiago 1:19). Ellaca mu, tati pu pichiqueche pilayafuingün chi tañi feipial chem tañi raquiduamcülen. Huelu ñochiquechi allcütufilmi engün, doi eluucüleaingün tañi nütramcayal.

Quellufinge tami pu yall ñi entual chem ñi mülen tañi piuque mu. Quiñeque pichiqueche anünge pieliyu ñi pu chau ñi nütramcayal, llicayafuingün chi. Huelu doi eluucüleafuingün ñi nütramcayal miyaule auto mu cam trecayahun mu.
Ngüneduamniefinge ñi müte penoal huesaque noticia.
Quimelfinge tami pu yall chem dungu tami femquen ñi cümelcaleal ti familia.
Adcünufinge chumngechi montuluhual petu ñi rupanon huesaque dungu ca adümcantufinge tami pu familiahuen-ngen.

Berta feipi: “Nütramcafinge tami pu püñeñ. Elufinge ñi entual chem raquiduamcülen. Ellcaniefi chi tañi lladcülen, tañi llicalen, tañi fill raquiduamcülen. Feipifinge tami pu püñeñ: ‘Iñche ca femngechi dungu mu rupaquen quiñeque mu’. Feipifinge chumngechi tami chaftuquefiel feichi huesaque dungu”.