HUESAQUE DUNGU ÑI RUPAN MU

4 | Elcünuquilnge tami maneluhun

¿CHUMNGELU FALIN-NGEI TAMI FEMAL?

Rupamequen mu fentren huesaque dungu, nehuen-ngehuequelaiñ ca cutranduamqueiñ. Fentrenque che niehuequelai maneluhun. Fei, ¿chem chumqueingün?

Quiñeque che raquiduamhuequelai cüpalechi antü mu.
Caquelu conqueingün putun mu ca drogatun mu ñi ngoimanentual tañi huesa raquiduam.
Ca quiñeque quisutu raquiduamquei tañi langümuhual.

Chem tami quimafel

Quiñeque tüfachi dungu pichiñma mu rupayafui, fei doi cümelcaletuafui.
Huelu cümelcaletunole ti huesa dungu, mülei chumngechi tami aguantayal.
Biblia pengelquei tañi afal com huesaque dungu, fei taiñ rüf cümelcaletual.

Feula chem tami cüme femal

Biblia feipi: “Feimeu fill raquiduamcülequilmün tamün chumal ta hule, fei hule hula quimaimün tamün chem chumal. Caque antü ta quisuque nieyei fentren huelulcahun-ngechi dungu” (Mateo 6:34).

Müte raquiduamquilnge chem dungu ñi rupayal, doi mai raquiduamnge chem tami femafel feula.

Raquiduamcülequilnge huesaque dungu ñi rupayafel. Tüfa re ürcülafeimu, fei ngoimanentuafuimi doi cümeque dungu ñi cüpayal ca antü.

¿CHUMNGECHI CHAFTUAFUIMI? Cümeque ngülam

RAQUIDUAMNGE RE CÜMEQUE DUNGU MU

Biblia ñi feipin: “Tati cutrancaucülelu com ñi antü huesalcalerpuquei, huelu tati nielu ayüucülechi piuque, rumel niequei quiñe fütra ilelcahun” (Proverbios 15:15). Rume raquiduamülmi tami huesa rupamequen mu, pelayaimi chumngechi tami cümelcaletual. Huelu raquiduamülmi cümeque dungu mu, fei quimaimi chumngechi tami doi cümelcaletual.

Müte pequilnge noticia cheu ñi mülen re huesaque dungu.
Aflu chi antü, raquiduamnge epu cam cüla dungu tami mañumtuleal.
Huirintucuaimi quiñe lista mu chem tami chumal. Quiñe fütra cüdau doi pichique cünuyeafimi, femngechi doi cüme amulnieafimi tami cüdau. Fei ayühunquechi quimaimi com tami femün tachi antü mu.

QUINTUNGE TAMI QUELLUNGEAL

Biblia ñi feipin: “Tati quisutu püntütripalu […] famentuquefi com cümeque quimün” (Proverbios 18:1). Quisu pepi tripalayafuimi quiñe fütra lolo mu. Huelu quellungelmi, fei tripayafuimi.

Quintuaimi tami quellungeal tami familia mu ca tami hueni mu.
Eimi cafei quintunge chumngechi tami quelluafiel. Quellufilmi caquelu, cafei quelluaimu tami raquiduamcülenoal tami huesa rupamequen mu müten.
“Falilai ñi mongelen, lali doi cümeafui” pilmi, fei amuaimi medico mu. Quiñeque mu doi hueñancülen ñi mongelen, feita quiñe depresion cutran pingelu contunieyu cam caquelu cutran chi. Huelu amun mu medico mu, fentren che doi cümelcaletuquei.a

a Tüfachi revista feipiquelai chem tratamiento ñi lloungeal. Quisuque che mülei ñi dullial.

Biblia mu tripai quiñe cüme maneluhun

Quiñe huirintuculu salmo feipifi ta Chau Dios: “Tami dungun quiñe cüdetuhue reque felei iñche tañi namun meu, ca quiñe pelon reque felei iñche tañi rüpü meu” (Salmo 119:105). Peafiyiñ chumngechi ñi quimeltun Biblia quiñe pelontuhue reque.

Pun meu quiñe cüdetuhue pengeleleiñmu rüpü cheu taiñ pünoal. Ca femngechi Biblia quiñe cüdetuhue reque, quelluqueiñmu fente ñi nien cümeque quimün. Femngechi eluqueiñmu cümeque ngülam taiñ cüme amuleal mülen mu huesaque dungu.

Dumiñ mu quiñe pelontuhue elunieiñmu ñi peal chem ñi mülen cheu taiñ amulen. Ca femngechi Biblia pengeleiñmu chem cümeque dungu ñi cüpalen.

Biblia pengeli chem ñi rupan fütra cuifi mu. Huelu ca pengeli fentren cümeque dungu ñi rupayal cüpalechi antü mu. Biblia huiñoldungui tachi ramtun:

1. ¿Chumngechi huefi ti cutrancahun? Biblia feipi: ‘Quiñe huentru meu müten mülei ta culpan mapu meu ca femngechi mülei ta lan dungu. Fei tati lan dungu mülei itrocom che meu, itrocom che culpafengelu am’ (Romanos 5:12).

2. ¿Chumngelu pu gobierno cümelcacünutulai? Biblia feipi: “Tati pu che trecalelu, ngen-ngelai ñi adcünual quisu tañi trecan no rume engün” (Jeremías 10:23). Biblia ñi feipin mu, com felerpui huall Mapu.

3. ¿Chem chumai Dios tañi cümelcacünutuafiel? Biblia feipi pu che “ancümüñmangetuai engün tañi cülleñu, fei ngehuelayai ta lan, ngüman no rume, eyütun no rume, cutrantun no rume” (Apocalipsis 21:4).