Fentren che amuwelayngün tañi iglesia mu kellungenolu am ñi peal llowdungun tati doy falinke ramtun mew, ka yafüluwngelayngün rume. Feymew ¿chumngelu am (chemu) müley tami amual tati pu Dungukelu Iney Ngen Jewba tañi trawün mew? ¿Chem am ta peaymi tüfa mu?

Ayüwaymi tami rangiñkonküleal poyen-ngechi che ka küme piwkengechi che mew. Wünen siglo mu pu inayerpufilu Jesu trawüluwkefuyngün fillke trawünche mu ta poyeafiel Ngünechen, chillkatual ti Wirin Chillka, ka tañi welukonke yafüluwal (Ebrew 10:24, 25). Trawüluwlu engün feyentulechi peñiwen mu, rüf weniwen reke feleyngün poyewün mew (2 Tesalonisense 1:3; 3 Juan 14). Iñchiñ yenieiñ feychi inafalchi dungu, ka femngechi ayüwküleiñ.

Kimaymi chumngechi inayeafiel Biblia ñi ngülam, fey rüf kümelkayaeymu. Chumngechi pengeli ta Biblia, wentru, domo ka pichikeche trawüluwkeiñ ta allkütual tati pepikawkülechi kimeltukelu, fey kelluaetew taiñ kimal chumngechi Biblia tañi ngülam inanieal kom taiñ mongen mew (Deuteronomio 31:12; Nehemías 8:8). Kom chi trawüluwlu llowdunguafuy ti ramtun dungu ka ülkantuafuy, femngechi mu tati che pengelay tañi nieelchi maneluwün Biblia mu küpalu (Ebrew 13:15).

Llowafuymi tüfachi kümelkan: doy newen-ngeay tami mupiltun Chaw Ngünechen mew. Tati apostol Pablo ñi antü mu wirilelfi kiñe chillka ta kiñe trawünche mu, feypilelfi: “Rume [mütre] küpa amulelu am iñche tamün pewmeafiel [...] ka taiñ welukonkechi yafüluwael iñchiñ taiñ nieelchi mupiltun dungu mew” (Romanu 1:11, 12). Trawüluwkelu taiñ pu peñi ka lamngen iñchiñ, doy yafüluwaiñ ta yenieal Biblia ñi ngülam taiñ mongen mew, kafey doy tremay taiñ mupiltun.

Kümeafuy tami amual küpalechi trawün mu, femngechi kimaymi kidu tami peel mew. Küme llowngeaymi tati. Kullilayaymi taiñ trawün mew, ka ngelay tami wülal chem plata no rume.

• ¿Chem inafalchi dungu yeniekeiñ taiñ trawün mu?

• ¿Chem kümelkan elukeeiñmew taiñ trawün?

Fentren trekaliyiñ rume kam fütra mawünmaliyiñ, tati pu Dungukelu Iney Ngen Jewba fentekünuwlaiñ taiñ amual trawün mew. Feymu weda rupamekeliyiñ kam ürküleliyiñ rume taiñ fente küdawün mu, ¿chumngelu (chemu) fente newentumekeiñ trawüluwal taiñ pu peñi ka lamngen engün?

Kellukeeiñmew taiñ küme feleal. Duamfali taiñ amual tati trawün mu, tüfa ta feypi ti apostol Pablo, fey feypi: “Kintuaiñ [ngüneduamaiñ, TNM] chumngechi taiñ welukonke kelluwael” (Ebrew 10:24). ¿Chem pifel ngüneduamal? “Kuñiwtukun mew inaduamal kiñe dungu”. Fey llemay, tati apostol yafültukeeiñmew taiñ kimuwal, ka duamafiel kakelu pu peñi ka lamngen. Feymew kimürpuafiyiñ tati pu peñi ka lamngen mülelu trawünche mew, kiñeke wewfingün fentren wedake dungu inchiñ taiñ rupameken reke, fey tüfa kellukeeiñmew küme tripayal wedake dungu mu rupaliyiñ.

Yafüluwngechi kümeke weniwen mew konkeiñ. Tati trawün mu kiñentrür müleiñ fentren fülkonkülechi (trayay) weniwen iñchiñ. Kafey kiñeke rupa trawükeiñ taiñ ayüwünkechi rupan küme adngelluwün mew. ¿Chumngechi kümelkakeeiñmew tüfachi küme rupan? Kimeltueiñmew welukonkechi falintuwal, femngechi mu doy newen-ngetuy taiñ poyewün. Kafey weda rupamekele kiñe peñi ka lamngen, amufemkeiñ ta kelluafiel, ¡kiñe yafüluwün weniwen nielu am iñchiñ! (Proverbios 17:17). Fülmawkülen mu kom iñchiñ taiñ trawünche mu pengelkeiñ taiñ “welukonkechi duamtuniewael” (1 Korintio 12:25, 26).

Weniyeafimi tati che femkelu Chaw Ngünechen ñi ayükeelchi dungu. Pu Dungukelu Iney Ngen Jewba mu peaymi tüfachi che. Eluwkilnge ta chem dungu no rume tami katrütuaetew trawüpayal ta iñchiñ mew.

• ¿Chumngelu am (chemu) kümelkakeeiñmew trawüluwal taiñ pu peñi ka lamngen iñchiñ mülelu trawünche mu?

• ¿Chumül am pemupayaiñ taiñ trawün mew?

Ellaka mu pu wünelechi inayerpufilu Jesu ñi trawün mew mülekefuy ülkantun, llellipun, papeltun, ka ngüneduamngekefuy ti Wirin Chillka (1 Korintio 14:26). Küpalmi taiñ trawün mew, ka femngechi reke peaymi.

Wülngekey kümeke kimeltun tripalu Biblia mu. Afchi semana mew, kom chi trawüluwkelu allkütukeyngün kiñe wewpin tuwlu Biblia mew, küla mari minuto mu. Tüfa pengeli chumngechi ta Biblia nüwküley taiñ mongen mew ka taiñ mülen famülke mew. Kom iñchiñ mangelngekeiñ ta inanieal tüfachi dungu taiñ Biblia mu. Afle chi wewpin, mülekey ti chillkatun La Atalaya, kiñe ora mu puwkey. Fey mu inaduamngekey kiñe trokiñ tripalu ti chillkatungekeelchi La Atalaya mew, faw kom che puwlu pepi wiñoldunguafuy. Tüfa ta feypi chumngechi inayafuiñ Biblia ñi ngülam taiñ mongen mu. Tati doy pataka mari warangka trawünche mülelu wall Mapu püle chillkatukey kom tüfachi dungu.

Kellukeeiñmew ta doy küme kimelfe ngeal. Rupalen mu chi semana ka trawükeiñ, tüfachi trawün Taiñ Mongen ka Taiñ Amuldungukeel pingey, niey küla trokiñ ka Ti Papel taiñ Pepikawam feypiley chem ñi inaduamngeal tüfachi trawün mu. Tati wünen trokiñ “Biblia ñi Falin Dungu”, tüfa kellukeeiñmew taiñ doy kimafiel kiñe trokiñ Biblia mu tati pu trawüluwkelu ñi papeltukünuel. Kangelu trokiñ “Küme Kimeltuchefengeaiñ”, tüfa niey fillke pengelün dungu taiñ küme kimeltulelafiel ti Biblia kakelu pu che. Kiñe elfalkünungeelchi peñi elukey kiñeke ngülam taiñ kelluaetew doy küme papeltual ka entual ñi feypin (1 Timotew 4:13). Tati inan trokiñ “Taiñ Kristiano Mongen” pingey, inaduamkey chumngechi inayal tati Biblia ñi ngülam taiñ mongen mu. Tüfa ka müley kiñe chillkatun ramtun ka wiñoldungun mu taiñ kelluaetew ñi doy küme adümafiel ti Biblia.

Amulmi taiñ trawün mew, afmatuaymi tami peel müna tutengechi kimeltun Biblia mu wülngekelu (Isaías 54:13)

• Amulmi pu Dungukelu Iney Ngen Jewba tañi trawün mew, ¿chem dungu peaymi?

• ¿Chuchi trawün mew ayüfuymi tami amual?

¿Peniefimi tati adentun mülelu tüfachi papil mu? Pengeli küme adngechi takun yekeiñ pu Dungukelu Iney Ngen Jewba amulu taiñ trawün mew. ¿Chumngelu am rume (chemu mütre) inaduamkeiñ chem takun yenieal ka chumley taiñ ad?

Femngechi yamkeiñ taiñ Chaw Ngünechen. Kidu ta re ad müten falintukelay (1 Samuel 16:7). Welu trawüwkülelu iñchiñ tañi poyeafiel, rüf piwke mu küpa yamkefiyiñ taiñ Chaw Jewba ka taiñ pu peñi ka lamngen. Pemefiliyiñ kiñe kues, wüne adkintuwkeiñ chumley taiñ ad, kidu am yamfalchengelu. Ka famngechi amual iñchiñ taiñ trawün, pengelaiñ taiñ doy yamniefiel “tati doy fütra Kues mülelu kom mapu mew”, taiñ Chaw Ngünechen Jewba, ka tati trawünwe ruka mew chew poyekefiel (Génesis 18:25).

Pengelal chem ngülam mu yeniekeiñ taiñ mongen. Biblia ngülamtufi tati pu inayerpufilu Jesu chem tañi tukuwal “mallmangenon [rakiwülngenon] mew ka nor rakiduam mew” (1 Timotew 2:9, 10, TNM). ¿Chem pifel takuwal “mallmangenon (rakiwülngenon) mew”? Tüfa ta feypi taiñ takun rume (mütre) pengeluwkelayay ta fütra falingelu mu kam yewentukufal-lu. Kafey ti “nor rakiduam” kellukeeiñmu taiñ ayüfalchi takun tukuwal (tukulal), welu weda adngenolu ka kangechi adngelayay. Müley taiñ inanieal tüfachi ngülam, welu may fillke takun pepi dulliafuiñ taiñ tukutual (ngümintuabuiñ taiñ tukulal). Kiñe ayüfalchi ad mew, “itrokom che [...] ngüneduamay Ngünechen taiñ Montulchefe tañi kimeltun ñi rume küme dungungen”, ka sakiafiyiñ, feymu duamfal-lay chem pial no rume (Tito 2:10; 1 Pedro 2:12). Küme adngen amuliyiñ taiñ trawün mu, küme dunguay kakelu che Jewba tañi pu che mew.

Duamün-ngelay we kam tutelechi takun, welu müley ñi lifküleal ka küme adnieal. Feymu llemay, ta chem takuwün rume nielmi, yafüluwnge tami amual Trawünwe Ruka mew.

• Poyemefiliyiñ taiñ Chaw Ngünechen, ¿chumngelu am (chemu) falin-ngey chem takun taiñ tukunieel?

• Dullial (ngümintual) chumngechi tukutuwal, ¿chem ngülam müley taiñ inanieal?

Chillkatulmi chi Biblia kiñe Dungukelu Iney Ngen Jewba eymu, wüne pepikawkepelaymi tati kimeltun. Ka femngechi femkeaymi tami amual ti trawün mew tami doy kümelkayaetew, welu müley tami inayal kiñe adkünudungu tami chillkatual, fey llemay kümelkayaeymu.

Chumül ka chew chillkatuaymi. ¿Chumül am doy küme chillkatuafuymi? ¿Puliwen mu, petu tami küdawmenon? ¿Kam konle chi antü, dew umawtule tami pichikeche? Niewenolmi antü rume, eluwaymi tunten tami chillkatual, welu chem dungu no rume katrütulayaeymu tami femal. Kintunge chew tami tüngküleal, chongümfinge ti radio, telefision ka telefono. Wüne ngillatuaymi, fey kiñepülekünuafimi fill rakiduameletewchi dungu, ka longkontukuaymi Ngünechen ñi Dungu müten (Filipense 4:6, 7).

Wirikünuafimi tati doy falinke dungu, fey nentuaymi tami feypin. Wüne küme adkintufinge (kintulbinge) chem pifel tüfachi dungu wirintukungelu. Ngüneduamfinge tati wenulechi wirikonkülelu, ka chumngechi ti pichi longkolechi wirin nüwküley ti dungu mew, inaduamfinge ti adentun ka ti wiño ramtun ti chillkatun mu pengelkelu tati doy falin dungu. Kafey papeltufinge tati troy, ka kintunge ñi llowdungun tati ramtun mu. Kintunge Biblia mew kom tuchi versikulo wirikonkülenolu, ka peaymi chumngechi kelluntukuy ta tüfachi dungu (Hecho 17:11). Dew pefilmi ti wiñoldungun, tukulelfinge kiñe wirin miñche mew, feymew tukulpayafimi tati. Fey petu rupamekele ti trawün, witrapüramaymi tami kuwü ayülmi, ka wülaymi tami feypin.

Fillke dungu inaduammekelmi fill semana tati trawün mew, weke dungu püñamtukuaymi tami “falin” kimün Biblia mu (Matew 13:51, 52).

• ¿Chumngechi adkünuafuymi tami pepikawal tati trawün mew?

• ¿Chumngechi pepikawafuymi tami wülal kiñe feypin trawün mew?

Fütra kuyfi mu ka fantepuw mu, Jewba ayükey kom ti reñma ñi kiñewkülen rupaleal, feymu doy newentuleay tañi fülmawün Jewba engu, ka welukentu engün (Deuteronomio 6:6, 7). Feymew tati pu Dungukelu Iney Ngen Jewba elkünukeiñ kiñe antü fill semana mu ta poyeafiel taiñ Chaw Ngünechen reñmawen mu, fey chem ñi duamnieel itrokom che ti reñmawen mu, inaduamkefiyiñ Ngünechen ñi dungu mu, kiñe ayüfal mülen mu. Kidulelmi rume, doy fülkonpuafuymi Chaw Ngünechen mew inaduamülmi kiñe dungu küpalu Biblia mew kidu tami dulliel (ngümintuel).

Femngechi doy fülkonpayafuymi Jewba mu. “Fülkonmün ta Ngünechen mew, fey kidu fülkonay ta eymün mew.” (Santiaw 4:8.) Papeltuliyiñ ta Biblia, feymew doy kimaiñ Jewba tañi chumngen ka tañi femün. Llitualu tamün chillkatun reñmawen mu, kiñe che papeltuafuy ta Biblia, welu kom kakelu allkütuleayngün; inayafuymün ti trokiñ elkünungelu ñi papeltungeal ti trawün mew Taiñ Mongen ka Taiñ Amuldungukeel pingelu. Kiduke eymün papeltuay kiñe trokiñ, fey wüla kom nütramkayaymün chem kimeltun nentuymün Biblia ñi trokiñ mu.

Famngechi tami reñmawen doy fülkonpuay. Tati kurewen, ka chaw-wen tañi pu pichikeche engün, kiñentrür chillkatukelu Biblia engün doy tremkülekey tañi fülmawün. Kom ti pu reñma (pu che) ayüwünkechi ka tüngkülen mu llüwatuleay (ingelküleay) ti chillkatun. Tati pu chaw ngüneduamafuy kiñeke dungu tripalu La Atalaya ka ¡Despertad!, kam taiñ pagina internet mew jw.org, tañi kelluetew tunten tripantu niele rume tami pu pichikeche, traftumekele kiñeke wedake dungu ti chillkatuwe ruka mew ka chumngechi küme tripayafuy feychi dungu. Ka kümeafuy tamün peal kiñe dungu tripalu JW  Broadcasting (tv.jw.org), fey trür inaduamafuymün. Kafey pepikantuafuymün tati ülkantungeal trawün mew, fey afle ti chillkatun ka pichin yafütuafuymün.

Feychi falin antü elkünungelu fill semana mu taiñ kiñewkülen poyeafiel ta Jewba, feymew taiñ reñma ayüwküleay ti chillkatun Biblia mu. Fey alün kümelkan llowaiñ taiñ yafüluwün mu (Salmo 1:1-3).

• ¿Chumngelu am (chemu) entukeiñ antü poyeafiel ta Ngünechen reñmawen mu?

• ¿Chem chumafuyngu tati chaw-wen tañi ayüwküleal kom ñi reñma tati chillkatun mew?

¿Chumngelu am (chemu) fente ayüwküley tüfachi pu che? Mülepayngün am taiñ fütra trawün mew. Alün che ayüwünkechi trawükeiñ iñchiñ, Ngünechen ñi kuyfike kona reke. Fey engün werküngeyngün ñi trawüluwal fill tripantu küla rupa mu (Deuteronomio 16:16). Feymu iñchiñ niekeiñ küla fütra trawün: epu kiñe antü ngekelu, ka kiñe küla antü ngekelu. ¿Chem kümelkan elukeeiñmew?

Newen-ngeay taiñ peñiwen ka lamngenwen. Tati pu israelche müna ayüwkülekefuy ñi sakiafiel ta Jewba “fütrake trawün mew”, ka iñchiñ müna ayüwkeiñ taiñ kiñentrür poyeafiel ta Jewba falinke trawün mu (Salmo 26:12, nota; 111:1). Tüfa mu trawüluwkeiñ pu peñi ka lamngen fillke trawünche tuwün-ngelu, ka kake mapu mülelu. Rangiantü entukeiñ iyael, fey kiñentrür yafütual chew taiñ trawüluwkülen, feymu doy trempuy taiñ weniwen, mülepulu kay iñchiñ tüfachi fütra trawün mew (Hecho 2:42). Tüfa mu rüf pekeiñ ti piwkeyewün ñi kiñewküleal taiñ “feyentulechi [mupitulechi] pu che” mülelu kom wall Mapu mu (1 Pedro 2:17).

Kellukeeiñmew küme amuleal tati rüf dungu mu. Pu israelche kümelkaeyew “kimtukulu engün chi dungun” mülelu Wirin Chillka mew tañi kimeltuetew (Nehemías 8:8, 12). Iñchiñ müna falintuniekefiyiñ kom tati kimeltun taiñ elungekeel fütrake trawün mew. Kom tüfachi trawün Biblia ñi dungu mu tuwi. Ngüneduamfalchi wewpitun ka pengelün dungu mu kimeltungeiñ chumngechi femal Ngünechen ñi ayükeelchi dungu. Kafey yafüluwkeeiñmew tati nütramkan pengelkelu chumngechi taiñ pu peñi ka lamngen wewingün wedake dungu nieyelu kristianongen tüfachi küdawngechi antü mu. Ka tati fütra trawün küla antü ngekelu müley pengelün nütram, femngechi takuwün yeniekefel pu kuyfike che, fey doy mupituafuiñ kom tüfachi nütram Biblia mu tuwlu, ka fentren kümeke kimeltun elukeeiñmu. Ka kom tüfachi fütrake trawün mu, tati pu che küpa pengelkelu ñi wülal ñi mongen ta Ngünechen mew, fawtisangekey.

• ¿Chumngelu am (chemu) fente ayüwküleiñ taiñ fütrake trawün mu?

• ¿Chumngechi kümelkayaeymu amulmi kiñe fütra trawün mew?

Epe puwlu Jesu ñi layal feypikünuy: “Tüfachi kümeke dungu [Chaw Ngünechen] ñi Ngünenien mu, kimelngeay ta kom Mapu mew, femngechi kom trokiñke mapu ñi kimael engün; fey wüla akuay ñi afael ta antü” (Matew 24:14, TNM). ¿Chumngechi yeniengeafuy tati amuldungun wall Mapu püle? Müley taiñ inayeafiel kom ñi femel Jesu mülepalu Mapu mew (Luka 8:1).

Pemekefiyiñ tati pu che kidu ñi ruka mew. Jesu kimeltufi tañi pu inanieetew ta amuldungual ti kümeke dungu fill ruka püle (Matew 10:11-13; Hecho 5:42; 20:20). Tati wünenke amuldungufe niekefuyngün kiduke tañi lof ñi amuldungual (Matew 10:5, 6; 2 Korintio 10:13). Ka femngechi fachantü küme pepikawkünungey taiñ amuldungun, tati trawünche kiduke nieyngün kiñe wirikonkülechi lof mapu chew ñi amuldungual. Feymew amuldunguaiñ tunten che taiñ peel, femngechi küme femürpuaiñ Jesu ñi werkün dungu ta ‘kimelafiel tati che’ (Hecho 10:42).

Chew püle ñi mülen pu che amukeiñ. Jesu ka elkünuy kiñe inafalchi dungu amuldungukefulu chew ñi mülen fentren che, inaltu lafken mu ka rünganko (posoko) mew pu che entukelu ko (Marku 4:1; Juan 4:5-15). Ka iñchiñ chew püle rume nütramkakefiyiñ ta che Biblia tañi dungu mew: rüpü püle, ka chew ngillapelu che, plasa mew, ka telefono mu. Ka nütramelkefiyiñ taiñ mupiltun mu taiñ pu karuka mu, pu kompañ küdaw mu kam chillkatuwe ruka mew, ka taiñ pu reñmawen pepi nütramkalelfiliyiñ. Fey llemay fentren che wall Mapu püle allkütuafuy “tüfachi werken montuluwün dungu” (Hecho 13:26).

Kümeafuy tami rakiduamal iney am nütramkalelafuymi tati kümeke dungu Chaw Ngünechen ñi Ngünenien mu, ka chum kümelkayafuy tüfachi che ñi mongen küpalechi antü mew. Ngelay tami ellkalkünual tüfa maneluwün-ngechi werken dungu, welu may amufemnge kimelelafiel.

• ¿Chem “kümeke dungu” müley taiñ amuldungual?

• Pu Dungukelu Iney Ngen Jewba, ¿chumngechi inayentukeiñ kom ñi femel Jesu taiñ amuldungual?

Kiñe che wünelekelu elkünukey kiñe we rüpü kakelu che ñi rupayal. Jesu wünelekefuy, fey am werküngelu Mapu mew ñi femal tañi küdaw wülkelu mongen, ka tañi elkünual kiñe rüpü reke tati pu che ñi montulngeal engün (Matew 20:28). Fachantü iñchiñ inayekeiñ tañi femün, ka elkünukeiñ antü, tunten taiñ pepilel (chumten taiñ topal), ñi kelluafiel ta che ñi inayerpual Jesu (Matew 28:19, 20). Feymu kiñeke wünelekeyngün amuldungun mew.

Feychi pu wünelekelu amuldungun mew fill antü amuldungukey. Itrokom pu Dungukelu Iney Ngen Jewba amuldungukeiñ tüfachi kümeke dungu. Welu kiñeke pepikayngün tañi mongen ñi amuldungual regle mari ora fill küyen mu. Feymew kiñeke küdawkeyngün rangiñ antü müten. Kakelu dullingeyngün (ngümintungeyngün) ñi amuldungual ka mapu chew duamniengey doy amuldungufe, tüfa engün amuldungukeyngün doy kiñe pataka küla mari ora fill küyen mu. Pu wünelekelu amuldungun mew nielayngün fentren chemkün, ka maneluwkeyngün Jewba ñi eluetew kom tañi duamnieel engün (Matew 6:31-33; 1 Timotew 6:6-8). Pu che pepinole (topanolu) amuldungual kom feychi ora, amuldunguafuyngün küla mari kam kechu mari ora kiñe küyen kidu ñi dulliel (ngümintuel).

Pu wünelekelu amuldungun mew piwkeyefingün ta Ngünechen ka tati pu che, tüfa nengümeyew tañi amuldungual. Jesu reke, ngüneduamkeiñ ñi müna duamniefiel tati che ñi kimafiel ta Ngünechen ka tañi duam (Marku 6:34). Welu iñchiñ nieiñ ta kimün ñi kelluafiel pu che ñi nieal rüf maneluwün küpalechi antü mew. Pu wünelekelu amuldungun mew piwkeyekefingün tati che, feymu entukey tañi antü ka tañi newen ñi kelluafiel ta kimal tüfachi kümeke dungu (Matew 22:39; 1 Tesalonisense 2:8). Femngechi doy newen-ngey kidu tañi mupiltun ka doy fülkonküley Ngünechen mew, feymu ta müna ayüwküleyngün (Hecho 20:35).

• Ti wünelekelu amuldungun mew, ¿chem am chi?

• ¿Chem dungu nengümeyew tati pu wünelekelu amuldungun mu?

Pu Dungukelu Iney Ngen Jewba müna falintukefingün Biblia ñi kimeltun. Feymew falin-ngechi chillkatuwe mu pepikangekey tati pu fill antü amuldungumekelu Ngünechen tañi Ngünenien, femngechi doy küme yenieay ñi amuldungun engün (2 Timotew 4:5).

Chillkatuwe ñi Pepikangeam pu Wünelekelu Amuldungun mew. Tüfachi chillkatuwe kayu antü mu puwkey, ka femngeafuy kiñe fülkülechi (püchü tripalechi) Trawünwe Ruka mu. Pu wünelekelu kiñe tripantu yenielu ñi amuldungun amuafuyngün. Tüfachi pepikawün kelluaeyew ñi doy fülkonal Jewba mew, doy adümal fill amuldungun mu, ka püntütripanoal tüfa mu.

Pu Amuldungukelu Ngünechen ñi Ngünenien tañi Chillkatuwe. Tüfachi chillkatuwe mu, epu küyen pepikangekey tati adümkechi wünelekelu. Tüfa engün kidu ñi ayün mu elkünuyngün tañi lof amualu chew duamniengele. Feypikeyngün reke: “¡Faw mülen iñche! ¡Werküen müten!”, femngechi inayentufingün tati doy fütra Amuldungukelu mülefulu Mapu mew: Jesukristo llemay (Isaías 6:8; Juan 7:29). Müley ñi küme wimal kiñe we mongen, kake che, ka iyael ka kake antü, wimkülenofulu ta kuyfi. Kafey duamafuy ñi kimal kiñe we kewün dungu. Tüfachi chillkatuwe mu amuafuy pu peñi kurengenolu, ka pu lamngen fütangenolu, ka pu kurewen niele engün epu mari küla ka kayu mari kechu puwchi tripantu; ka kellueyew ta küme kristianongeal duamniealu may tañi küdaw mu, ka pepikawküleay doy kelluntukual taiñ adkünun ka Jewba mew.

Kalad pingechi Biblia Chillkatuwe. Ella konlu Kalad Chillkatuwe 1943 tripantu mu fantepuw mu, doy pura warangka che chillkatuyngün tüfa mu, ka werküngeyngün ñi amuldungual “tuntepu [chumtepow] ñi mülen ta mapu”, ka müna küme tripay tañi küdaw (Hecho 13:47). Pu wünenke werküngelu Peru pingechi mapu mu puwlu, kiñe trawünche no rume mülekelafuy, welu fewla doy warangka trawünche müley. Ka femngechi pu werküel Japon pingechi mapu mu puwlu engün, epe mari Dungukelu Iney Ngen Jewba mülekefuy müten, welu fewla müley doy epu pataka warangka Dungukelu. Tüfachi Kalad pingechi Chillkatuwe kechu küyen mu puwkey, ka fey mu pu chillkatukelu eluwingün ñi doy küme chillkatual ta Biblia. Tüfa mu mangelngekeyngün kom feychi pu wünelekelu doy pataka küla mari ora amuldungulu fill küyen mu, tati pu werküngelu ka mapu ñi amuldungual, pu küdawkelu ngünenieelchi ruka mu, ka pu witran-ngepakechi longkolelu ñi ngüneytual, femngechi mu pepikangeyngün ñi müküfnieafiel ka newentuafiel taiñ küdaw kom wall Mapu püle.

• Tati Chillkatuwe ñi Pepikangeam pu Wünelekelu Amuldungun mew, ¿chumngechi kellukefi tati amulu?

• ¿Iney engün am ta amuafuy tati pu Amuldungukelu Ngünechen ñi Ngünenien tañi Chillkatuwe mu?