QUIMELTUN 26
¿Chumngelu mülei fillque huesaque dungu Mapu meu?
Rupan mu huesaque dungu meu ramtuuqueiñ: “¿Chumngelu am (chemu) femngechi huesaque dungu rupamequeiñ?”. Ngüneduamfilmi ñi chem feipilen Biblia, rume ayühulafeimu llemai.
1. ¿Chem femi Huecüfü ñi rupayal huesaque dungu Mapu meu?
Satanás chi Huecüfü caiñetufi ta Jehová, ¿chumngelu? Satanás ayüi ñi ngünenieal, feimu ngüchaltucufi tati hunen curehuen ñi ca caiñetuafiel ta Jehová. Fei Satanás, ¿chumi tañi ngünencayafiel engu? Coilatulfi ta Eva (Génesis 3:1-5). Huecüfü raquiduamelelfi ta Eva Jehová ñi catrütumequefiel tañi doi cüme feleal engu. Huecüfü feipifi reque ta Eva quisu ngünenieule engu, doi ayüucüleafuingu. Satanás feipifilu ta Eva ñi lanoal, feipi ti hunen coila dungu. Feimu Biblia feipi Satanás “fei quiñe coilatufe. Quisu meu tripaquei com coilaque dungu” (Juan 8:44).
2. ¿Chem dungu eluhuingu ñi femal Adán ca Eva?
Jehová rume cümelcafi ta Adán ca Eva. Elufi ñi iyal com anümca ñi mülerquefel Edén pingechi lof meu, huelu quiñe anümca müten eluñmalaeyu ñi iyal engu (Génesis 2:15-17). Cüme felefulu engu rume, Eva “nentumei quiñe fün” feichi anümca meu, “fei ca ifi. Fei ca femngechi elufi ñi füta, fei ti huentru cafei irquei ti fün”, feimu mür engu culpaingu Ngünechen meu (Génesis 3:6). Culpafengenolu rume, eluhuingu ñi inanoal Jehová ñi feipin, femngechi culpaingu ca eluhuingu ñi quisutu ngüneniehual. Adán ca Eva quiñepülecünufingu ta Jehová. Tañi dulliel mu engu, rume cutrancahuingu (Génesis 3:16-19).
3. Adán ca Eva tañi femün, ¿chem femeiñmu?
Adán ca Eva inanienofilu ta Jehová, culpafe chengetuingu ca rulpalelfi tüfachi culpan tañi pu cüpanche. Feimu Biblia feipi Adán meu: “Quiñe huentru ñi femün mu coni tati culpan mapu meu. Fei ti culpan cüpali lan dungu. Com pu che culpafengetui, feimu ti lan dungu com che meu puhui” (Romanos 5:12).
Quiñeque meu taiñ huesa dullin meu huesa rupaqueiñ. Huelu cafei caquelu che tañi huesa dulliel meu iñchiñ huesa rupayafuiñ. Ca quiñeque mu huesa ruparumeafuiñ müten (papeltuaimi Eclesiastés 9:11).
DOI QUIMAIMI
Inaduamafiyiñ chumngelu culpatulayafuiñ ta Ngünechen tati huesaque dungu mu ñi mülen Mapu meu. Ca quimaiñ chum duamcülei Ngünechen pefiel mu tati pu che ñi cutrancaumequen.
4. ¿Inei ñi duam mu cutrancauqueiñ?
Rume fentren che feipiquei Chau Ngünechen ñi ngüneniefiel tüfachi Mapu, huelu ¿feingepei mai tüfa? Peaiñ ti VIDEO.
Papeltuaiñ Santiago 1:13 ca 1 Juan 5:19, fei ngüneduamaiñ tüfachi ramtun:
¿Culpatungepeafui mai ta Ngünechen taiñ cutrancahun meu?
5. Satanás tañi ngünenierpufiel ta Mapu, ¿chem dungu ta rupamequei?
Papeltuaiñ Génesis 3:1-6, ca ngüneduamaiñ tüfachi cüla ramtun:
¿Chem coila dungu feipi Satanás? (Pefinge Génesis 3:4, 5).
Satanás, ¿chumngechi raquiduamelelfi ta Eva Jehová ñi catrütueteu ñi doi cüme feleal?
Satanás feipiquei tati pu che duamniequelai Ngünechen tañi ngünenieaeteu ñi ayüucüleal, fei ¿chumquei Huecüfü ñi femngechi raquiduamelafiel pu che?
Papeltuaiñ Eclesiastés 8:9, ca ngüneduamaiñ tüfachi ramtun:
Famülque meu Ngünechen tañi ngünenietunofiel ta Mapu, ¿chum feletui tati pu che?
Adán engu Eva culpanchengelafuingu ca quiñe ayüfalngechi Mapu mu mülefuingu. Huelu allcütufingu ta Huecüfü ca caiñetufingu ta Jehová.
Adán engu Eva tañi culpan meu, com pu che Mapu meu culpanchengetuingün, cutrancauqueingün ca larpuingün.
Jehová tañi duam meu, tati pu che culpanchengehuelayai, cutrancahuelayai ca lahuelayai. Tati pu che müleaingün quiñe ayüfalchi Mapu meu.
6. Iñchiñ taiñ huesa rupaquen hueñancülquefi ta Jehová
¿Cutrantupiuquepei mai Jehová iñchiñ taiñ cutrancaumequen meu? Ngüneduamaiñ chem ñi huirintucuel tati rey David ca tati apostol Pedro. Papeltuaiñ Salmo 31:7 ca 1 Pedro 5:7, fei ngüneduamaiñ tüfachi ramtun:
Taiñ huesa rupamequen hueñancülquefi ta Jehová, ¿chum duamelqueimu quimal tüfa?
7. Ngünechen apümcayafi com taiñ cutrancaqueteu
Papeltuaiñ Isaías 65:17 ca Apocalipsis 21:3, 4, fei ngüneduamaiñ tüfachi ramtun:
Chau Ngünechen feipicünui ñi apümcayafiel com taiñ huesalcaqueteu ca ñi cüme elcünutuafiel com ñi huesalcangeel. Jehová tañi feipicünuel, ¿chum duamelqueimu? ¿Chumngelu femngechi feipiafuimi?
¡Tüfei!
Satanás tañi hune coilatun meu huitrameldungufi ta Jehová. Tañi huitrameldungun meu, Huecüfü feipicai reque Jehová ñi norngenon ca ñi cüme ngünenienoafiel tati pu che. Pichiñma meu, Jehová apümcayafi com tati huesaque dungu ca cüme quimfalcünuai ñi rüfngenon tati fillque coilaque dungu ñi feipingeel quisu meu. Femngechi Jehová pengelai quisu müten adümuucülei ñi ngünenieafiel tati pu che. Rume falin-ngei ñi rupayal tüfa cüpalechi antü meu (Mateo 6:9, 10).
QUIÑEQUE CHE FEIPIAFEIMU: “Ngünechen tañi duam meu cutrancauqueiñ”.
¿Chem piafuimi eimi?
TAMI QUIMEL
Satanás ca tati hunen curehuen tañi duam meu mülei huesaque dungu Mapu mu. Taiñ huesa rupaquen hueñancülquefi ta Jehová, feimu pichiñma meu Jehová apümcayafi com taiñ huesalcaqueteu.
¿Chem piafuimi?
Satanás, ¿chem ngünencan dungu feipifi ta Eva?
Adán ca Eva tañi allcütunofiel mu ta Jehová, ¿chumngechi huesalcaqueiñmu?
¿Chumngelu feipiafuiñ taiñ huesa rupaquen mu hueñancülquefi ta Jehová?
CA PEAFUIMI
Quimürpunge chem pilei Biblia tati culpan meu.
Doi quimürpunge Satanás tañi huitrameldungufiel ta Ngünechen Edén pingechi lof meu.
“¿Chumngelu Ngünechen petu catrütulafi ñi mülehuenoal cutrancahun?” (Ti Huerquen 1 enero, 2014)
¿Chumngelu Chau Ngünechen catrütulafi huesaque dungu? Quimürpunge tüfa.
Quiñe huentru fillque huesaque dungu meu rupalu quiñe falin dungu quimürpui. Ngüneduamnge tañi quimürpuel.