Jehová tañi adquiñ meu, ¿cümepei mai com tati fiesta ñi femngequeel?

Jehová ayüquei taiñ ayüucüleal taiñ mongen meu. Feimu cümelu troquiquefi taiñ trahuluhual quiñeque mu taiñ fiestayal. Huelu Chau Dios, ¿cümelu troquipefi mai com tati fiesta? Ca tüfachi dungu meu, ¿chumngechi pengelafuiñ taiñ piuqueyefiel ca taiñ duamtuniefiel ta Jehová?

1. Jehová, ¿chumngelu (chemu) ayüquelafi fentren fiesta?

Quimürpulmi cheu ñi tuhun fillque fiesta, afmatulehueafuimi. Fentren fiesta tuhui coilaque religion meu cam huelulequei Biblia tañi feipin meu. Cafei quiñeque fiesta nüucülei huesaque püllü meu cam quimeltuquei ñi amulen tati mongen lan mu tati pu che. Ca femngechi caquelu fiesta nüucülei huesaque huimtun meu cam tati suerte mu (Isaías 65:11). Feimu Jehová ngüfetuquefi tañi pu poyequeteu: “Tripatumün fei engün meu [...]. Quiñepülecünuafimün ti ünufalngelu” (2 Corintios 6:17).a

2. ¿Chem raquiduamquei Jehová fiestañmangeel ñi püramyengeal ta che?

Jehová feipieiñmu taiñ maneluunoal pu huentru mu (papeltuaimi Jeremías 17:5). Quiñeque fiesta femngequei ñi püramyengeal cam acordangeal pu soltau, pu ngüneniequelu, tati independencia cam caquelu dungu nüucülelu tati pais meu (1 Juan 5:21). Cafei quiñeque antü ñi fiestañmaqueel ta che nüucülei politico troquiñche mu cam organizaciones sociales mu. Fei conliyiñ quiñe fiesta mu ñi fütra püramyengeal quiñe che cam femlu quiñe organizacion chaftuquelu Chau Dios ñi ayüqueel, ¿chum duamcülepeai mai Jehová?

3. ¿Chem femngequei huesaque fiesta meu?

Biblia feipi ñi cümenon ngollicahual, conal fütraque fiesta meu cam trahuluhual taiñ putual müten (1 Pedro 4:3). Quiñeque fiesta meu tati pu che quim ngünenieuquelaingün ca conqueingün fillque pecan cudumuhun dungu meu. Feimu taiñ hueniyenieafiel ta Jehová, amulepe taiñ quiñepülecünuafiel com feichi huesaque dungu.

DOI QUIMAIMI

4. Conlayaimi feichi fiesta illamcaquefilu ta Jehová

Papeltuaiñ Efesios 5:10, ca ngüneduamaiñ tüfachi cüla ramtun:

• ¿Chem ngüneduamaiñ petu taiñ connon quiñe fiesta meu?

• ¿Chem fiesta femngequei cheu tami mülen meu?

• Jehová, ¿ayüquepei mai feichi fiesta? ¿Chem raquiduamqueimi?

Cümeafui tami ramtuhual: “Chau Ngünechen, ¿ayüquepei mai ñi fiestañmangeal taiñ puhultripantu?”. Biblia turpu feipilai pu poyequefilu ta Jehová ñi conquen cumpleaños mu, huelu mai Biblia pengeli epu che poyequenofilu ta Jehová ñi fiestañmael tañi puhultripantu. Papeltuaiñ Génesis 40:20-22 ca Mateo 14:6-10, fei ngüneduamaiñ tüfachi epu ramtun:

• ¿Chem dungu rupai tüfachi epu cumpleaños meu?

• Ñi feipin mu tüfachi troquiñ Biblia, Jehová ¿chem raquiduamquei tati cumpleaños meu? ¿Chem piafuimi?

Huelu eimi ca ramtuhuafuimi chi: “Conli quiñe cumpleaños meu cam quiñe fiesta mu chaftuquelu Biblia tañi feipin, ¿rüf huesa duamelpeafun mai ta Jehová?”. Papeltuaiñ Éxodo 32:1-8 ca peaiñ ti VIDEO, fei ngüneduamaiñ tüfachi epu ramtun.

VIDEO: Fillque fiesta ñi ayüquenoel ta Chau Dios (5:07)

• ¿Chumngelu mülei taiñ quimal Jehová tañi ayüqueel?

• ¿Chumafuiñ taiñ cüme quimal Jehová tañi ayüqueel?

¿Chumngechi quimafuiñ Jehová ñi ayüquenofiel quiñe fiesta?

• Feichi fiesta, ¿chaftuquepei mai Biblia tañi quimeltuqueel? Tami quimal tüfa, quintunge cheu ñi tuhun ti fiesta.

• Feichi fiesta, ¿püramyequefi mai tati pu che, quiñe organizacion cam caquelu dungu ti pais meu? Iñchiñ püramyequefiyiñ ta Jehová müten ca cüme quimnieiñ Jehová müten cüme elcünutuafi com dungu Mapu meu.

• Ñi femngequeel tüfachi fiesta meu, ¿huelulequepei mai Biblia tañi quimeltuqueel meu? Eluucüleaiñ taiñ lif chengeal, feimu conlayaiñ fillque pecan cudumuhun dungu meu.

5. ¿Chumafuimi tami yamüñmangeal tami feyentun?

VIDEO: Piuqueyen mu quimeltuaimi tami feyentun (2:01)

Papeltuaiñ Mateo 7:12, ca ngüneduamaiñ tüfachi epu ramtun:

• Ñi feipin mu tüfachi troquiñ Biblia, ¿mülepei mai tami feipiafiel tami pu pariente poyequenofilu ta Jehová ñi connoal engün quiñe fiesta meu?

• Amuhuenolmi quiñeque fiesta tami pu pariente engu, ¿chumngechi pengelelafuimi tami falintuniefiel ca piuqueyeniefiel engün?

6. Jehová ayüquei taiñ ayüucüleal

Jehová ayüquei taiñ cüme rupayal taiñ familia ca pu hueni iñchiñ. Papeltuaiñ Eclesiastés 8:15, ca ngüneduamaiñ tüfachi ramtun:

• Tüfachi troquiñ Biblia, ¿chumngechi pengeli Jehová ayüquei taiñ ayüucüleal?

Jehová ayüquei taiñ cüme rupayal taiñ pu peñi ca pu lamngen iñchiñ. Peaiñ ti VIDEO taiñ quimal chumngechi quimfalngequei ta tüfa taiñ fütraque trahun meu.

VIDEO: Fütraque trahun meu pengelngequei fütra piuqueyechen (5:40)

Papeltuaiñ Gálatas 6:10, ca ngüneduamaiñ tüfachi cüla ramtun:

• Taiñ cümelcayafiel ta caquelu pu che, ¿re duamfalngepei mai taiñ conal quiñe fiesta meu?

• ¿Chem doi ayühulafeimeu: hulal quiñe regalo tami conquen mu müten quiñe fiesta meu, cam hulal quiñe regalo fente tami piuqueyeniefiel mu ta quiñe che?

• Quiñeque mu pu testigo ca adcünuquefingün fillque dungu ñi cüme rupayal tañi pu pichiqueche ca eluquefi engün regalo. Fei eimi nielmi pichiqueche, ¿chem chumafuimi ñi cüme rupayal engün?

TAMI QUIMEL

Chau Jehová ayüquei taiñ cüme rupayal taiñ pu che ca hueni iñchiñ. Huelu ayüquelai taiñ conal feichi fiesta ñi ayüquenoel ta quisu.

¿Chem piafuimi?

• Taiñ quimal ñi cümepen mai quiñe fiesta Jehová tañi adquiñ meu, ¿chem ramtuhuafuiñ?

• ¿Chumngechi quimelelafuimi tami pu che cam tami pu hueni chumngelu conquelaimi quiñeque fiesta meu?

• Jehová ayüquei taiñ ayüucüleal ca taiñ cüme rupayal, ¿chumngelu quimnieiñ tüfa?

CA PEAFUIMI

Quimürpunge quiñeque fiesta ñi coneltuquenon pu cristiano.

“Pu Dunguquelu Ineingen Jehová, ¿chumngelu conquelaingün quiñeque fiesta meu?” (Troquiñ internet mu)

Ngüneduamnge chumngelu quimnieiñ Chau Dios ayüquelai taiñ celebrayal pu cumpleaños.

“¿Chumngelu am Dunguquelu Ineingen Jehová celebraquelaingün cumpleaños?” (Troquiñ internet mu)

Femngelu fiesta ñi ayüquenoel Jehová, ngüneduamnge chumngechi pu pichiqueche ayühuelquefi ta Chau Dios.

Eimi saquifalimi Jehová mu (11:35)

Fentren cristiano celebraquelaingün tati Navidad, fei ¿ayüucülepei mai engün tañi femquenon meu?

“Doi cümeque dungu llohuingün” (Ti Huerquen 1 diciembre, 2012)