QUIMELTUN 37
Tati Biblia, ¿chem quimeltuquei tati plata ca cüdau meu?
Com iñchiñ ayüqueiñ nierpual com taiñ duamnieel, huelu quiñeque mu fill raquiduamcülerpuafuiñ tati plata cam taiñ cüdau ñi duam meu. Fei cüdautuafuiñ chi taiñ poyeafiel ta Jehová com taiñ piuque meu. Huelu Biblia tañi ngülam quelluafeiñmu taiñ cüme poyeafiel ta Jehová ca nierpual com taiñ duamnieel.
1. ¿Chem quimeltuquei Biblia tati cüdau meu?
Jehová ayüniei taiñ ayühulaeteu taiñ cüdau, feimu Biblia feipi: “Tüfa tati doi cüme dungu quiñe huentru mu: […] ñi ayüucüleal fente tañi cüdahun mu” (Eclesiastés 2:24). Jehová rume cüdauquei. Feimu inayentuafiyiñ ta Jehová ca cüme cüdaufengeaiñ, femngechi ayühulafiyiñ ca ayüucüleaiñ.
Rume falin-ngei taiñ cüdahual, huelu hunentuculayafiyiñ taiñ mongen meu. Doi mai doyümnieafiyiñ poyeafiel ta Jehová (Juan 6:27). Femngechi femliyiñ, Jehová eluaiñmu com taiñ duamnieel.
2. Biblia, ¿chem quimeltuquei tati plata meu?
Biblia feipi tati plata cuñiutucuafeiñmeu, huelu plata müten duamnielaiñ taiñ rüf ayüucüleal (Eclesiastés 7:12). Biblia ngülamtuqueiñmu taiñ diñmatunoafiel plata, doi mai ‘ayüucüleal chem taiñ nieel mu’ (papeltuaimi Hebreos 13:5). Femngechi raquiduamliyiñ, tuduamcüleaiñ taiñ nieel mu ca conlayaiñ defen dungu meu (Proverbios 22:7). Cafei aucantulayaiñ ñi huehual plata ca cuñiutucuucüleaiñ taiñ connoal feichi fillque negocio meu feipingequelu tati pu che ñi pürüm huehual plata.
3. ¿Chumngechi püneafuiñ taiñ nieelchi plata?
Jehová rücüngelai. Feimu taiñ inayentuafiel, eluucüleaiñ taiñ misahual cam hulal taiñ nieel (1 Timoteo 6:18). Taiñ plata meu quelluntucuafuiñ ñi femngeal fillque cüdau trahunche meu cam hulafuiñ plata taiñ quelluafiel pu duamnielu, doyelchi mai taiñ pu peñi ca pu lamngen. Fentren cam pichin plata hul-liyiñ rume, Jehová ayüquei taiñ hulal cüme duam meu. Com taiñ piuque meu hul-liyiñ, ayühulafiyiñ ta Jehová ca iñchiñ ayüucüleaiñ (papeltuaimi Hechos 20:35).
DOI QUIMAIMI
Inaduamafiyiñ chumngelu (chemu) doyümnielayafiyiñ taiñ cüdau taiñ mongen meu ca chumngechi tuduamcüleafuiñ taiñ nieel meu.
4. Cüme cüdaufengelmi, püramyeafimi ta Jehová
Cüme hueniyefiliyiñ ta Jehová, cüme cüdaufengeaiñ. Peaiñ ti VIDEO, ca ngüneduamaiñ tüfachi epu ramtun.
Jaime ñi femqueel tañi cüdau meu, ¿chem dungu doi ayüfimi?
Jaime, ¿chem dungu femi ñi doyümnienoafiel tañi cüdau?
Papeltuaiñ Colosenses 3:23, 24, ca ngüneduamaiñ tüfachi ramtun:
¿Chumngelu falin-ngei taiñ cüdahual com taiñ nehuen meu?
Rume falin-ngei taiñ nieal cüdau, huelu rumel hunentucunieafiyiñ taiñ poyefiel ta Jehová.
5. Ayüucüleaiñ taiñ nieel meu
Fentren che eluucülei ñi ngülümal fentren plata, huelu Biblia ca dungu ngülamtuqueiñmu taiñ femal. Papeltuaiñ 1 Timoteo 6:6-8, ca ngüneduamaiñ tüfachi ramtun:
¿Chem ngülam eluqueiñmu tati Biblia?
Pichin rume niefuliyiñ, ayühun mongen nieafuiñ. Peaiñ ti VIDEO, ca ngüneduamaiñ tüfachi ramtun.
Pichin plata nielu rume, ¿chumngelu fente ayüucüleingün pu familia tripalu tati video meu?
Fentren plata niefuliyiñ rume, ca ayünierpuafuiñ taiñ doi nieal. Jesús quimeltui chumngelu fente cuñihun-ngei femngechi raquiduamal. Papeltuaiñ Lucas 12:15-21, ca ngüneduamaiñ tüfachi ramtun:
¿Chem quimeltueiñmu ñi feipin Jesús? (Pefinge Lucas 12:15).
Papeltuaiñ Proverbios 10:22 ca 1 Timoteo 6:10, ca raquiduamaiñ chumngechi nüucülei tañi feipin. Fei ngüneduamaiñ tüfachi epu ramtun:
¿Chem dungu doi falin-ngei: hueniyeafiel ta Jehová cam nieal fentren plata? ¿Chumngelu femngechi feipiafuimi?
Diñmatufiliyiñ plata, ¿chumleafuiñ?
6. Jehová eluaiñmu com taiñ duamnieel
Duamün mu plata cam rupan mu huesaque dungu mu taiñ cüdau meu, quelluafeiñmu taiñ quimal tunte taiñ maneluucülen Jehová meu. Fei, ¿chem quelluafeiñmu taiñ chaftual femngechi huesaque dungu? Peaiñ ti VIDEO ca ngüneduamaiñ tüfachi epu ramtun.
Taiñ peñi tripalu ti video meu, ¿chem cüdaungechi dungu meu rupai?
¿Chumi taiñ peñi ñi chaftual ñi huesa rupan?
Papeltuaiñ Mateo 6:25-34, ca ngüneduamaiñ tüfachi ramtun:
Doyümfiliyiñ ta Jehová taiñ mongen meu, ¿chem chumai quisu?
QUIÑEQUE CHE FEIPIAFEIMU: “Rume cüdauquen ñi eluafiel tañi familia com ñi duamnieel engün, feimu pepi trahuluuquelan fill semana”.
Doyümniefiliyiñ ta Jehová taiñ mongen meu quisu eluaiñmu com taiñ duamnieel, ¿chem troquiñ Biblia meu quelluqueimu tami maneluucüleal tüfachi dungu meu?
TAMI QUIMEL
Duamfali taiñ nieal plata ca quiñe cüdau, huelu eluucüleaiñ taiñ doyümnieafiel ta Jehová taiñ mongen meu.
¿Chem piafuimi?
¿Chem falinque ngülam inanieaimi tami cüdau meu?
¿Chumngelu fente cümei tami ayüucüleal tami nieel meu?
Doyümniefiliyiñ ta Jehová taiñ mongen meu quisu eluaiñmu com taiñ duamnieel, ¿chumngechi pengelafuimi tami maneluucülen tüfachi dungu meu?
CA PEAFUIMI
Biblia, ¿feipipei mai ñi cümenon ta plata?
“¿Plata mai niepei culpa com huesaque dungu ñi rupaquen?” (Troquiñ internet mu)
Quimürpunge chumngechi ayühulafuiñ ta Chau Dios hulun mu plata.
¿Cümepei mai aucantual plata mu?
“¿Chem quimeltuquei Biblia? Fillque aucantun ñi huehual plata” (¡Tami quimafel! marzo, 2015)
Quimürpunge chumi quiñe huentru ñi aucantuhuenoal plata meu ca hueñenoal.
“Iñche rume ayüquefun ñi cudeal cahuellu” (Ti Huerquen 1 noviembre, 2011)