QUIMELTUN 38
Falintuafiyiñ tati mongen
Taiñ mongen mu rupayafuiñ huesaque dungu meu, huelu femngechi rupaliyiñ rume, ayüucüleafuiñ. Jehová elueiñmu ta mongen quiñe regalo reque, feimu ¿chumngechi mañumafuiñ ta Jehová? ¿Chumngelua fente falin-ngei femal tüfa?
1. ¿Chumngelu falintuafiyiñ tati mongen?
Biblia feipi: “Chau Ngünechen mai ta eluquefi ta com pu che mongen, neyen ca com dungu”. Felei llemai, Jehová fente taiñ piuqueyenieteu quiñe regalo reque elueiñmu ta mongen, feimu falintuafiyiñ (Hechos 17:25, 28; Salmo 36:9). Jehová re eluquelaeiñmu taiñ duamnieel ñi mongeleal, doi mai taiñ ayüucüleal (papeltuaimi Hechos 14:17).
2. ¿Chumngechi pengelafuiñ ta Jehová taiñ falintuniefiel tati mongen?
Feichi antü tami nieeteu tami ñuque pütra meu, Jehová deu quimniefeimu. David, quiñe huentru poyequefilu ta Jehová feipi: “Tami nge peeneu petu tañi choyüngenon rume” (Salmo 139:16). Felei llemai, Jehová rume falintunieimu tami mongen (papeltuaimi Mateo 10:29-31). Quiñe che eluule ñi langümafiel ta cangelu che cam quisutu langümuule, Jehová müna hueñancüleafui (Éxodo 20:13).b Cafei taiñ Huenu Chau müna hueñancüleafui cuñiutucunofiliyiñ taiñ mongen cam caquelu che ñi mongen. Feimu cuñiutucuuliyiñ ta iñchiñ ca tati caquelu pu che ñi mongen, pengelqueiñ taiñ falintuniefiel ti mongen.
DOI QUIMAIMI
Inaduamaiñ chumngechi pengelafuiñ taiñ falintuquefiel ti mongen.
3. Eluucüleaiñ taiñ tremoleal
Iñchiñ hultuculu cai taiñ mongen Jehová meu, cuñiutucuquefiyiñ. Feipicünufilu ta Jehová taiñ femal com tañi ayüqueel, hulcünuiñ taiñ cuerpo quiñe lif chalintucun reque, feimu cuñiutucuquefiyiñ taiñ mongen. Papeltuaiñ Romanos 12:1, 2, ca ngüneduamaiñ tüfachi epu ramtun:
¿Chumngelu yafüluhuaimi tami tremoleal?
¿Chumafuimi tami tremoleal?
4. Cuñiutucuhuaiñ ca caquelu pu che
Biblia ngülamtuqueiñmeu taiñ cuñiutucuhual chem dungu meu rume taiñ huesalcayafeteu. Peaiñ ti VIDEO taiñ quimal chumngechi cuñiutucuhuafuiñ.
Papeltuaiñ Proverbios 22:3, ca ngüneduamaiñ tüfachi meli ramtun:
Tami ruca meu, ¿chem chumafuimi tami cuñiutucuhual ca caquelu pu che?
Tami cüdau meu, ¿chem chumafuimi tami cuñiutucuhual ca caquelu pu che?
Petu deportetulmi, ¿chem chumafuimi tami cuñiutucuhual ca caquelu pu che?
Petu miyahulmi chem transporte mu rume, ¿chem chumafuimi tami cuñiutucuhual ca caquelu pu che?
5. Cuñiutucufinge pu pichiqueche petu choyüngenolu
David feipi Chau Jehová rume falintuquefi pu pichiqueche petu ñi choyünoeteu tañi ñuque. Papeltuaiñ Salmo 139:13-17, ca ngüneduamaiñ tüfachi ramtun:
Jehová tañi adquiñ meu, ¿chumül rüf mongelerpui tati pichiche: niepüñeñlu ti domo cam deu choyüngelu?
Tati ley Jehová tañi elufiel tati pu israelche cuñiutucuquefui tati domo niepüñeñcülelu ca tati pichiche petu choyüngenolu. Papeltuaiñ Éxodo 21:22, 23, ca ngüneduamaiñ tüfachi cüla ramtun:
Quiñe che tuntucun meu langümfile quiñe pichiche petu choyün-ngenolu, ¿chem raquiduamquepei mai Jehová?
Quiñe che eluule ñi langümafiel quiñe pichiche petu choyüngenolu, ¿chem raquiduamcülepei mai Jehová?c
Jehová ñi raquiduamqueel tüfachi dungu meu, eimi cai ¿chem raquiduamqueimi?
Quiñe domo falintuniefilu rume ta mongen, ca raquiduamürpuafui doi cümeafui ancanentupüñeñal. Papeltuaiñ Isaías 41:10, ca ngüneduamaiñ tüfachi ramtun:
Quiñe domo ngüchaltucungele tañi ancanentupüñeñal, ¿inei quelluafeyu ñi cüme dullial? ¿Chumngelu?
QUIÑEQUE CHE FEIPIAFEIMU: “Quisuque pu domo ngen-ngei tañi cuerpo meu, feimu dulliafuingün ancanentupüñeñal cam femnoal”.
¿Chumngelu feipiafuimi Jehová ñi trür falintuniequefiel ti domo niepüñeñcülelu ca tati pichiche petu choyüngenolu?
TAMI QUIMEL
Tati mongen cüpai Jehová meu. Feimu Biblia quimeltuqueiñmu taiñ falintuafiel, piuqueyeafiel ca cuñiutucuafiel taiñ mongen ca caquelu pu che ñi mongen.
¿Chem piafuimi?
¿Chumngelu feipiafuiñ Jehová ñi falintuniefiel tati mongen?
Quiñe che langümfile ta cangelu che cam quisutu langümuule, ¿chum duamnagai Jehová?
¿Chumngelu am mañumcüleafuimi tati mongen meu?
CA PEAFUIMI
Jehová elueiñmu ta mongen, feimu ¿chumngechi mañumafuiñ?
Quiñe domo ancanentupüñeñlu cuifi meu, Jehová ¿perdonayafeyu?
“¿Chem feipilei Biblia ancanentungen mu quiñe püñeñ?” (Troquiñ internet mu)
Jehová ñi raquiduamqueel tati mongen meu, ¿chumngechi quelluafeiñmu taiñ quimal chem deporte mu conafuiñ?
“¿Cümepeafui mai taiñ conal cuñihun-ngechi deporte meu?” (¡Tami quimafel! 8 octubre, 2000)
Quiñe che raquiduamcülele tañi langümuhual, ¿chem troquiñ Biblia mu quelluafeyu?
“Raquiduamcüleli tañi langümuhual, ¿chumngechi quelluafeneu ta Biblia?” (Troquiñ internet mu)
a Chemu.
b Jehová rume duamtuniefi tati pu che rume hueñancülelu (Salmo 34:18). Hueñancülen mu quiñe che ayüafui cütu ñi langümuhual, huelu Jehová quimniei chum duamcülei engün, fei eluucülequei tañi quelluafiel. Ti troquiñ “Ca peafuimi” pingelu tüfachi quimeltun meu mülei quiñe chillca feipilelu “Raquiduamcüleli tañi langümuhual, ¿chumngechi quelluafeneu ta Biblia?”. Feiti troquiñ meu peaimi falinque ngülam cüpalu Ngünechen meu.
c Quiñe domo ancanentupüñeñlu müna huesa duamcüleafui, huelu Jehová eluucülei tañi perdonayaeteu. Tami doi quimal inaduamnge ti troquiñ “¿Chem feipilei Biblia ancanentungen mu quiñe püñeñ?” mülelu ti troquiñ “Ca peafuimi” pingelu tüfachi quimeltun meu.